Naajdik Sip ko Aō, jān Kamille Corry

Juun 26–Juļae 2.

Matu 28; Mark 16; Luk 24; Jon 20–21

“E Em̧ōj An Jerkak”

M̧okta jān etale ļōmņak in katakin ko ilo unin tōl in, riiti Matu 28; Mark 16; Luk 24; im Jon 20–21, im kejekļo̧kjeņ kōn ekōjkan an jepta kein maron̄ jerbal n̄an kōkajoorļo̧k tōmak eo an ro kwoj katakin.

Kajjitōk bwe ren Kwaļo̧k

N̄an jipan̄ ro uwaan kūlaaj eo kwaļo̧k ta eo raar ekkatak ilo ekkatak eo aer make im baam̧le, kajjitōk ippāer n̄an je juon m̧ool jān kein riit ko kappeik an wiik in me rej en̄jake rej aikuj in kwaļo̧k ippān “aolepen laļ” (lale Mark 16:15). Ilo jem̧ļo̧kin kūlaaj eo, kajjitōk ippāer eļan̄n̄e raar lo jabdewōt m̧ool ko rej kōņaan kwaļo̧k.

Katakin Katak eo

Matu 28; Mark 16; Luk 24; Jon 20

Kōnke Jisōs Kraist ekar jerkakpeje, kōj barāinwōt naaj jerkakpeje.

• Kwomaron̄ leļo̧k n̄an ro uwaan kūlaaj eo jejjo minit ko n̄an etale kein riit ko an wiik in im “Resurrection” ilo Bible Dictionary im je m̧ool ko raar ekkatak kaki kōn Jerkakpeje eo. Kōtļo̧k bwe jejjo ren kwaļo̧k ta eo raar je, im kōketak ro uwaan kūlaaj eo n̄an kajutak peier n̄e rej ron̄ an juon kwaļo̧k juon m̧ool me ej āinļo̧k wōt n̄an ta eo raar je. Etke m̧ool kein rej aorōk n̄an kōj? Ekōjkan aer kareel jemjera ko ad? Ekōjkan aer kareel kāālet ko ad?

Luk 24:13–35

Jemaron̄ karuwaineneitok Rilo̧mo̧o̧r eo n̄an “pād ippād.”

• N̄an jipan̄ ro uwaan kūlaaj eo lo ekkejel ko ikōtaan en̄jake ko aer im en̄jake eo an rikaļoor ro ilo iaļ eo n̄an Emmaus, jin̄aik juon iaļ ioon boot eo, im kajjitōk ippān ro uwaan kūlaaj eo n̄an je tipdik in meļeļe ko jān bwebwenato eo ilo Luk 24:13–35 ilo turejete in iaļ eo. Innām, ilo turejet eo juon in iaļ eo, remaron̄ je men ko reier wōt rej loi n̄an en̄jake ko aer make āinwōt rikaļoor ro an Jisōs Kraist. N̄an waanjon̄ak, remaron̄ je “dāpij mejeir” (Luk 24:16) ilo rejet eo juon in iaļ eo im Jet iien jejjab kile kareel eo an Irooj ilo mour ko ad ilo turejet eo juon. Ekōjkan ad maron̄ karuwaineneiktok Rilo̧mo̧o̧r eo n̄an pād ippād?

Jisōs ekar katakin Thomas, “Kwōn jab pere a tōmak” (Jon 20:27).

Jon 20:19–29

“E m̧ōņōņō ro raar jab lo, im rej tōmak.”

• Kūlaaj in Jabōt Jikuuļ eo am̧ emaron̄ in juon jikin n̄an ro uwaan kūlaaj eo kōkajoorļo̧k tōmak eo an doon ilo men ko me rejjab maron̄ loi. Bōlen kwomaron̄ jino kōn kajjitōk ippān juon n̄an ba ilo tukadu in en̄jake eo an Thomas ilo Jon 20:19–29. Kwomaron̄ barāinwōt kwaļo̧k pija in alooj eo “Blessed Are They That Have Not Seen, and Yet Have Believed” (ChurchofJesusChrist.org). Ro uwaan kūlaaj eo remaron̄ kōllaajrake ioon boot eo jet men ko Anij ej kajjitōk ippād n̄an tōmaki ilo jab loi. Innām kwomaron̄ kajjitōk ippāer n̄an kwaļo̧k en̄jake ko me raar kōkajoorļo̧k naan in kam̧ool ko aer kōn men kein im kōjeraam̧m̧an ko me raar itok n̄an er ilo aer kar kōjerbal tōmak.

Jon 21:1–17

Rilo̧mo̧o̧r eo ej kajjitōk ippād n̄an naajdik sip ko An.

• Ta eo emaron̄ in jipan̄ ro uwaan kūlaaj eo am̧ bōk kūr eo an Rilo̧mo̧o̧r eo n̄an “naajdik sip ko [An]”? Kwomaron̄ jino kōn kajjitōk ippāer n̄an riiti Jon 21:15–17 ilo ejjeļo̧k ainikien, jāniji etan Simon kōn etaer make im “lamb ko aō” im “sip ko aō” kōn āt ko etan armej ro rej en̄jake Irooj ekōņaan bwe ren jerbal n̄an er—n̄an waanjon̄ak, armej ro rej jerbal in karejar n̄an er, ro rūturier, ak armej ro rejeļā kajjier ilo jerbal ak jikuul. Ālkin jejjo minit ko, ro uwaan kūlaaj eo remaron̄ kwaļo̧k en̄jake ko ewōr ippāer. Ta eo jej ekkatak kōn Rilo̧mo̧o̧r eo jān jerbal ko An ilo Jon 21:4–13? Ta eo jemaron̄ kōm̧m̧ane n̄an naajdik lamb ko im sip ko an Rilo̧mo̧o̧r eo? Ennaan eo jān Elder Neil L. Andersen ilo “Kein Jipan̄ ko Jet, emaron̄ jipan̄ uwaake kajjitōk in.

Kein Jipan̄ ko jet

Ekōjkan ad “naajdik sip ko [An]”?

Elder Gary E. Stevenson ekar kōmeļeļeik ekōjkan ad maron̄ kakūrm̧ool kien eo an Irooj n̄an naajdik sip ko An:

“Wōn eo ej seperd? Aolep em̧m̧aan, kōrā, im ajri ilo aelōn̄ in kiin̄ in an Anij rej juon seperd. Ejjab aikuj wōr kūr. Jān tōre eo jaar waļo̧ktok jān dānnin peptaij, jej karbab n̄an jerbal in. Jej diwōjļo̧k ilo iakwe n̄an ro jet kōnke en̄in ej ta eo ad Rilo̧mo̧o̧r eaar kakien kōj n̄an kōm̧m̧ane. … N̄e ro rituruur rej pād ilo būrom̧ōj in kanniōk ak jetōb, jen m̧ōkaj n̄an aikuj ko aer. Jej ineek eddo ko an doon bwe ren maron̄ mera. Jej jan̄ ippān ro rej jan̄. Jej kaenōm̧m̧an ro rej pād ilo aikuj aenōm̧m̧an [lale Mosaia 18:8–9]. Irooj ej aikuji menin jān kōj. Im n̄e raan eo enaaj itok Enaaj ņa ruwōd kōn kea eo jej kōm̧m̧ane n̄an jerbal in karejar n̄an ro Doon [lale Matu 25:31–46]” (“Seperd n̄an Jetōb ko,” Liaona, Nob. 2018, 111).

Kōkōm̧anm̧anļo̧k Ad Katakin

Kōm̧m̧an iien n̄an an rikkatak ro kwaļo̧k. “N̄e rikkatak ro rej kwaļo̧k ta eo rej ekkatak, rejjab en̄jake wōt Jetōb eo im kōkajoorļo̧k naan in kam̧ool ko aer, ak rej barāinwōt rōjan̄ ro jet uwaan kūlaaj eo n̄an pukot m̧ool ko ippāer make. … Kakoņkoņ iien n̄an an rijikuuļ ro kwaļo̧k ilo aolep katak—ilo jet jekjek, kwomaron̄ lo bwe iien ekōnono kein rej katak eo” (Teaching in the Savior’s Way, 30).