17–23 Julae

Ol Wok 10–15

“Tok blong God I Stap Goraon Moa, Mo I Gat Plante Man Moa Oli Stap Bilif long Hem”

Stadi wetem prea Ol Wok 10–15 bifo yu rid long aotlaen ia, bae i helpem yu kasem insperesen we i kam long Lod. Ol aedia we i stap daon ia oli ol tingting nomo.

Invaetem Ol Memba blong Serem Wanem Oli Gat

Invaetem ol memba blong klas blong serem wetem wan we i sidaon kolosap long olgeta, samting we Spirit i tijim olgeta long hem taem oli rid long Ol Wok 10–15. Invaetem sam long olgeta blong serem wanem oli lanem wetem evriwan long klas.

Stap Tijim Doktrin

Ol Wok 10; 11:1–18; 15:1–25

Papa long Heven i tijim yumi, tijing folem tijing tru long revelesen.

• Sam long ol klas memba maet bae oli no andastanem gud proses blong kasem revelesen. Maet i help blong tokbaot olsem wanem revelesen i kam long Pita, mo olsem wanem oli save muv i go fored, “no gat tu tingting” (Ol Wok 10:20), taem i luk olsem revelesen i hafhaf nomo mo i no klia. Tingting blong dro wan laen long bod mo raetem long en blong laen ia Gospel ia i mas prij i go long ol Jentael. Olsem wan klas, luklukbak long Ol Wok 10 mo 11:1–18, mo afta raet long laen blong soemaot olsem wanem Lod i talemaot long Pita, step afta step, we taem i bin kam blong prijim gospel long ol Jentael. Eksampol yu save stat wetem wan poen long laen we yu raetem “Konelias i luk wan visen” (Ol Wok 10:1–6) o iven statem wetem Sevya i givim komanmen long ol disaepol blong Hem blong “tijim evri nesen” long Matiu 28:19. ?Wanem yumi save lanem abaot revelesen long eksperiens blong Pita? ?Wanem nao ol tijing blong Nifae abaot revelesen long 2 Nifae 28:30 mo ol tijing we i kam long Elda David A. Bednar long “Sam Moa Risos” we i ademap moa save long yumi?

  

  Revelesen blong yuwan, oltaem, bae i kam folem taem mo hamas yu wok had blong kasem.

• Yu save stadi ol eksampol long ol skripja taem Lod i tijim ol pipol, tijing folem tijing. Antap long eksperiens blong Pita long Ol Wok 10, ol memba blong klas oli save luklukbak long eksperiens blong Nifae long (1 Nifae 18:1–3); Alma (Alma 7:8; 16:20); mo Momon (3 Nifae 28:17, 36–40). ?Wanem sam nara eksampol we ol memba blong klas oli tingbaot, long wei we spirit i lidim ol pipol “smol long ples ia mo smol longwe”? (2 Nifae 28:30). ?From wanem Lod i jusum blong talemaot ol samting long wei ia be i no blong givim evri samting long wantaem nomo? (luk long Doktrin mo Ol Kavenan 50:40; 98:12).

• Samtaem ol memba oli gat ol kwestin abaot ol jenis long ol polisi mo program insaed long Jos. Hemia i save helpem olgeta blong toktok raon long olsem wanem revelesen blong stat prijim gospel long ol Jentael (luk long Ol Wok 10) i riplesem wanem Lod i bin givim long bifo finis long ol disaepol blong Hem (luk long Matiu 10:1, 5–6). Yu save soem vidio ia “The Jerusalem Conference” (ChurchofJesusChrist.org). ?Olsem wanem nao ol memba blong klas oli save ansa long sam man long taem blong Pita we oli no agri wetem daereksen blong Pita, from se i no folem wanem we oli stap praktisim bifo finis i kam? ?Olsem wanem nao revelesen long Ol Wok 10 i helpem yumi blong lisin mo folem revelesen we i stap gogohed tru long ol profet blong Hem?

Ol Wok 10:9–48

“God i stap mekem i semmak nomo long olgeta man.”

• ?Yu ting se ol memba blong klas blong yu oli save lanem sam gudfala samting long wan storian abaot, wanem i minim blong “God i lukluk long evri man i semmak nomo”? Yu save statem mo invaetem klas blong ridim ol skripja we oli tijim abaot God i lukluk evri man i semmak nomo, olsem long Rom 2:1–11; 1 Nifae 17:34–40; 2 Nifae 26:32–33; Alma 5:33; Moronae 8:12; mo Doktrin mo Kavenan 1:34–35. Askem ol memba blong klas blong raetem smol toktok blong talemaot mining blong toktok ia “God i lukluk long evri man i semmak nomo” aot long wanem oli ridim, mo afta serem wanem oli raetem. ?Olsem wanem ol samting we i stap tekem ples mo ol prinsipol long Ol Wok 10:34–48 i soem se God i lukluk evri man i semmak? ?Olsem wanem God i save “akseptem” mo “laekem” ol man we oli stret mo gud be i no lukluk evri man i semmak? (luk long Ol Wok 10:34–35; 1 Nifae 17:35).

  Yu save helpem ol memba blong klas blong oli andastanem se blong “no lukluk evri man i semmak” i no minim se God i blesem evri man i semmak nomata long wanem yumi mekem. Hem i wantem evri pikinini blong Hem oli akseptem gospel, be olgeta nomo we oli mekem mo obei ol kavenan wetem Hem, bae oli kasem ful blesing blong gospel.

Sam Moa Risos

Stap kasem revelesen tijing folem tijing.

Elda David A. Bednar i bin tijim: “Plante long yumi oli stap tingting se bae yumi kasem wan ansa o wan toktok blong Spirit long prea blong yumi we i kamaot stret long hat. Mo tu yumi stap tingting we wan ansa olsem o Spirit i save toktok long yumi kwiktaem mo evri samting long wan go nomo. Mekem se, yumi stap bilif se Lod bae i givim long yumi wan bigfala ansa kwiktaem mo evri samting long wan taem nomo. Be, paten (o folem fasin blong mekem samting) we i kamaot plante taem long ol skripja, i soem se yumi kasem ‘tijing folem tijing, rul folem rul,’ o long nara toktok, plante smol ansa i kam long plante nara taem. Hem i impoten blong luksave mo andastanem paten ia from hemia i ki blong kasem insperesen mo help we i kam long Tabu Spirit” (“Line upon Line, Precept upon Precept,” New Era, Sept. 2010, 3–4).

Stap Kam Antap long Fasin blong Yumi blong Stap Tij

Stat wetem ol skripja. Bifo yu ridim ol nara risos, wetem strong tingting stadi long ol olfala skripja mo skripja blong tedei. Taem yu stadi long toktok blong God wetem prea, i letem Spirit i helpem yu blong tijim wanem yu stadi long hem taem yu tij. (Luk long Teaching in the Savior’s Way, 12.)