Fidim Sipsip blong Mi, i kam long Kamille Corry

26 Jun–2 Julae

Matiu 28; Mak 16; Luk 24; Jon 20–21

“Hem I Laef Bakegen Finis”

Bifo yu go lukluk long aotlaen blong tijing aedia ia, ridim Matiu 28; Mak 16; Luk 24; mo Jon 20–21, mo tingting hevi long olsem wanem yu save yusum ol japta ia, blong mekem fet blong olgeta we yu stap tijim, i kam moa strong.

Invaetem Ol Memba blong Serem Wanem Oli Gat

Blong helpem ol memba blong klas oli serem wanem oli lanem long stadi blong olgetawan, o wetem famli, askem olgeta blong raetemdaon wan trutok long riding blong wik ia we oli filim se i gud blong oli serem wetem “ful wol” (luk long Mak 16:15). Long en blong klas askem sapos oli gat sam moa trutok we oli laekem blong serem.

Stap Tijim Doktrin

Matiu 28; Mak 16; Luk 24; Jon 20

From se Jisas i bin laef bakegen long ded, yumi tu bae yumi laef bakegen long ded.

• Maet yu wantem blong givim sam minit blong ol memba blong klas oli luklukbak long riding blong wik ia mo “Laef Bakegen long Ded” long Gaed long Ol Skripja mo raetemdaon trutok we oli lanem abaot Laef Bakegen long Ded. Letem sam long olgeta oli serem wanem oli bin raetem, mo leftemap tingting blong ol memba blong klas blong leftemap han blong olgeta taem oli harem wan i serem trutok we i maet semmak long wanem olgeta i raetem daon. ?From wanem ol trutok ia oli impoten tumas long yumi? ?Olsem wanem nao oli lidim yumi long ol rilesensip blong yumi? ?Olsem wanem nao oli lidim ol joes blong yumi?

Luk 24:13–35

Yumi save invaetem Sevya blong i “stap wetem yumi.”

• Blong helpem ol memba blong klas oli luk koneksen bitwin eksperiens blong olgeta mo eksperiens blong ol disaepol long rod blong Emeas, dro wan rod long bod mo invaetem ol memba blong klas blong raetem ol ditel blong stori we i stap long Luk 24:13–35 long wan saed blong rod. Long narasaed blong rod, oli save luk i semmak long eksperiens blong olgetawan olsem ol man blong folem Jisas Kraes. Eksampol, oli save raetem “Samting i blokem tingting blong tufala” (Luk 24:16) long wan saed blong rod mo Samtaem yumi no luksave se Lod i stap lidim laef blong yumi long nara saed blong rod. ?Olsem wanem yumi save invaetem Sevya blong i save stap wetem yumi?

Jisas i bin tijim Thomas, “Yu mas bilif long mi, yu nomo hafhaf long bilif blong yu” (Jon 20:27).

Jon 20:19–29

“Yu yu bilif long mi from we yu luk mi. Be olgeta we oli no luk mi, be oli bilif long mi, bambae oli harem gud.”

• Sandei skul klas blong yu i save stap olsem ples we ol memba blong klas oli save mekem fet blong wanwan long olgeta i kam strong long ol samting we oli no save luk. Maet bae yu save statem blong askem wan i givim wan sot toktok blong eksperiens blong Tomas long Jon 20:19–29. Yu save soem vidio ia tu “Blessed Are They That Have Not Seen, and Yet Have Believed” (ChurchofJesusChrist.org). Ol memba blong klas oli save raetem long bod wan lis blong ol samting we God i askem yumi blong bilivim, we yumi no save luk. Afta yu save askem olgeta blong serem ol eksperiens we i mekem testemoni blong olgeta i kam moa strong, long ol samting mo blesing we i kam long laef blong olgeta taem oli praktisim fet blong olgeta.

Jon 21:1–17

Lod i invaetem yumi blong fidim ol sipsip blong Hem.

• Wanem i save helpem ol memba blong klas blong yu, blong akseptem invitesen blong Sevya blong “givim kakae long ol sipsip [blong Hem]”? Blong statem, yu save invaetem olgeta blong ridim Jon 21:15–17 blong olgetawan, riplesem nem blong Saemon long nem blong olgeta mo “ol smol sipsip blong mi” mo “ol sipsip blong mi” wetem ol nem blong ol pipol oli filim se Lod i wantem olgeta blong givim seves—olsem eksampol, olgeta we oli mekem wok blong givhan long olgeta, ol neba, o pipol we oli save olgeta long wok o long skul. Afta long sam minit, ol memba blong klas oli save serem ol filing we oli gat. ?Wanem yumi lanem abaot Sevya aot long aksen blong Hem long Jon 21:4–13? ?Wanem yumi save mekem blong givim kaekae long ol smol sipsip mo ol sipsip blong Sevya? Sot toktok we i kam long Elda Gary E. Stevenson insaed long “Sam Moa Risos” i save help blong ansarem kwestin ia.

Sam Moa Risos

?Olsem wanem yumi save “givim kaekae long sipsip [blong Hem]”?

Elda Gary E. Stevenson i eksplenem olsem wanem yumi save fufilim komanmen blong Lod blong givim kaekae long sipsip blong Hem:

?Huia i man blong lukaot long sipsip? Evri man, woman mo pikinini insaed long kingdom blong God i wan man blong lukaot long sipsip. I no nidim koling. Taem yumi kamaot long ol wota blong baptaes, yumi kasem wok ia blong mekem. Yumi go mo givhan long ol narawan wetem lav from se hemia nao wanem Sevya blong yumi i wantem yumi blong mekem. … Taem ol neba blong yumi oli stap long trabol long laef o long spirit, yumi ron go helpem olgeta. Yumi karem ol hevi samting blong wanwan long yumi, blong mekem se oli nomo hevi. Yumi krae wetem olgeta we oli krae. Yumi leftemap tingting blong olgeta we oli nidim fasin blong leftemap tingting [luk long Mosaea 18:8–9]. Lod, wetem lav, i wet se bae yumi mekem hemia. Mo dei bae i kam taem bae oli jajem yumi from wok we yumi tekem blong lukaot gud long ol sipsip blong Hem [luk long Matiu 25:31–46]” (“Shepherding Souls,” Liahona, Nov. 2018, 111).

Stap Kam Antap long Fasin blong Yumi blong Stap Tij

Putum wan taem i stap blong olgeta we oli lanem samting, oli serem wanem oli lanem. “Taem olgeta we oli lanem samting oli serem wanem we oli stap lanem, oli no filim Spirit nomo mo mekem testemoni blong olgeta i kam strong moa, be tu, oli stap leftemap tingting blong ol nara memba blong klas blong faenemaot ol trutok olgetawan. … Putum sam taem i stap blong studen i serem samting long evri lesen—long sam kes, bae yu faenem se ol toktok insaed long klas ia oli lesen ia nao” (Teaching in the Savior’s Way,30