“31 Julae–6 Ogis. Ol Wok 22–28: ‘Wan Man blong Wok blong Mi mo Wan Witnes,’” Kam Folem Mi—Blong Sandei Skul: Niu Testeman 2023 (2022)
“31 Julae–6 Ogis. Ol Wok 22–28,” Kam Folem Mi—Blong Sandei Skul: 2023
31 Julae–6 Ogis
Ol Wok 22–28
Wan Man blong Wok blong Mi mo Wan Witnes
Ridim Ol Wok 22–28 wetem prea long hat blong yu se bae Tabu Spirit i givim insperesen long yu, blong yu save wanem blong tingting nomo long hem, we bae i helpem ol memba blong klas blong yu. Raetemdaon eni aedia we i kam long maen blong yu; ol tingting ia bae oli stat blong plan blong yu blong tij.
Invaetem Ol Memba blong Serem Wanem Oli Gat
Askem ol memba blong klas blong raetemdaon wan ves long Ol Wok 22–28 we i tajem olgeta long wik ia. Putum ol ansa blong olgeta tugeta mo ridim sam tugeta. Invaetem sam memba blong klas blong serem from wanem nao ol toktok ia i gat minim long laef blong olgeta.
Stap Tijim Doktrin
Wan testemoni i wan toktok blong talemaot trutok we wan i gat tru long save mo biliv blong hemwan.
-
Testemoni blong Pol long Festas mo king Agripa i stap olsem wan janis blong tokbaot wanem i minim blong talemaot o serem testemoni. Yu save askem ol memba blong klas blong luklukbak long Ol Wok 22:1–21 o 26:1–29. ?Wanem yumi lanem long eksampol blong Pol abaot serem testemoni? ?Wanem sam moa prinsipol, abaot fasin blong serem testemoni, yumi lanem long toktok blong Presiden M. Russell Ballard long “Sam Moa Risos”? Singsing o plei hym ia “Testimony” (Hymns, no. 137) i save invaetem Spirit i kam long toktok blong yufala long klas.
-
Nomata we Pol i no bin lukaotem witnes blong spirit we i kasem long rod blong Damaskes, hem i wok ful laef blong hem afta, blong mentenem mo difendem testemoni blong hem (luk long Ol Wok 22:10, 14–16; 26:19). Eksampol blong Pol i save helpem klas blong yu blong andastanem se wan testemoni i nidim wok mo sakrifaes. Blong statem wan storian, maet wan memba blong klas i save tokbaot hadwok blong hem blong kam wan man blong miusik we i gat ol skil, wan artis, o wan atlet. ?Olsem wanem taem yumi developem wan skil olsem i semmak blong kasem wan testemoni mo mekem i kam moa strong? ?Wanem ol wok yumi mas mekem blong kasem wan testemoni mo mekem i kam moa strong? (Luk tu long Alma 5:46).
Yumi gat responsabiliti blong givhan long ol narawan.
-
?Lod i singaotem Pol blong stap olsem “wan givhan” (Ol Wok 26:16), be wanem nao toktok ia stap minim? Blong helpem ol memba blong klas lanem moa olsem wanem oli save givhan long ol narawan, i no mata yu givim olsem wan wok long olgeta o yufala i save mekem tugeta, yu save raetem long bod wan kwestin we i olsem Wanem i minim blong givhan? Invaetem ol memba blong klas oli save lukaotem ol ansa long ol risos we oli stap ia: Matiu 20:25–28; Ol Wok 26:16–18; 3 Nifae 18:29–32; Jean B. Bingham, “Ministering as the Savior Does,” Liahona, May 2018, 104–7. Taem oli stap serem wanem oli faenem, leftemap tingting blong olgeta blong tokbaot ol wei we yumi evriwan i save givhan long ol nara man, wetem ol koling blong yumi. Yu save soem vidio ia tu “The Miracle of the Roof” (ChurchofJesusChrist.org).
Sapos yumi lisin long ol profet blong Lod, bae Hem i lidim yumi mo protektem yumi long ivel.
-
Invaetem ol memba blong klas blong tokbaot ansa blong kapten blo ol soldia taem i harem Pol i profesae se sip bae i kasem “plante trabol” mo ol laef tu bae oli lus (luk long Ol Wok 27:10–11). ?From wanem kapten ia i ansa long wei ia? Mae ol memba blong klas oli save serem wanem oli save talem long kapten blong ol soldia blong helpem hem blong i gat fet long profesi blong Pol. ?Wanem nara lesen yumi save lanem long Ol Wok 27 abaot folem wokman blong Lod? Sam long ol memba blong klas maet oli gat ol eksperiens we taem oli folem wanem profet i talem, nomata taem i defren long wanem ol pipol raon abaot oli stap talem. Invaetem sam memba blong klas blong serem ol eksperiens blong olgeta.
Sam Moa Risos
Stap serem testemoni.
Presiden M. Russell Ballard i bin tokbaot testemoni blong Pol long King Agripa mo i tijim wanem i minim blong yumi serem testemoni:
“Ol testemoni miting blong yumi i nid blong fokas moa long Sevya, ol doktrin blong gospel, blesing blong Restoresen, mo ol tijing blong ol skripja. Yumi nid blong riplesem ol stori, travel stori, ol toktok wetem ol stret testemoni. Olgeta we oli givim wok long olgeta blong toktok mo tij long ol miting blong yumi, oli nid blong mekem wetem paoa blong doktrin we bae man i harem mo i filim, i leftemap spirit mo mekem man i glad. …
“… Oltaem i gud blong talemaot lav mo tank yu, ol kaen toktok ia oli no gat kaen testemoni we i statem faea blong bilif long laef blong ol nara man. Blong serem testemoni hem i ‘blong talemaot witnes tru long paoa blong Tabu Spirit, talemaot trutok wetem tru tingting we i kamaot long save o biliv blong wan man’ [Gaed long ol Skripja, “Testifae,” churchofjesuschrist.org]. Taem yu talemaot trutok long wan klia fasin i mekem jenisim laef blong ol man. Hemia nao samting we i jenisim ol hat. Hemia nao wanem Tabu Spirit i save konfemem long hat blong ol pikinini blong God” (“Pure Testimony,” Liahona, Nov. 2004, 41).
Stap Kam Antap long Fasin blong Yumi blong Stap Tij
Rere fastaem. Taem yu tingting hevi long olsem wanem nao ol gospel prinsipol we yu stap tijim i save blesem ol memba blong klas blong yu, ol tingting mo ol filing bae i kam long yu evri dei truaot long evri dei laef blong yu—taem yu stap travel i go long wok, taem yu stap mekem ol wok long haos, o stap wetem ol famli o ol fren. Yu no tekem se blong rere long saed blong spirit i wan samting we yu mas mekem taem from, be tekem se i wan samting we yu stap mekem oltaem” (Teaching in the Savior’s Way, 12).