Pol i stap raetem wan leta

7–13 Ogis

Rom 1–6

Paoa blong God blong Save Sevem Man

Wetem prea ridim Rom 1–6 mo tingbaot ol memba blong klas blong yu taem yu stap rid. Hemia bae i helpem yu harem save voes blong Spirit taem yu stap mekem rere blong tij.

serem pikja aekon

Invaetem Ol Memba blong Serem Wanem Oli Gat

Tingting blong givim sam minit long ol memba blong klas blong lukaotem insaed long Rom 1–6 ol ves we Tabu Spirit i bin helpem olgeta blong andastanem gud moa. Afta oli save serem ves we oli jusum wetem wan we i sidaon kolosap long olgeta.

tijing aekon

Stap Tijim Doktrin

Rom 1:16–17

“Mi mi no sem nating long gud nius ya.”

• Plante man oli gat ol eksperiens we oli jikim olgeta from bilif blong olgeta. Blong helpem ol memba blong klas taem oli fesem kaen eksperiens olsem, yu save invaetem olgeta blong ridim Rom 1:16–17 mo tingbaot ol eksampol insaed long buk blong Ol Wok long ples we Pol i soem se hem i no sem nating long gospel ia. Maet ol memba blong klas oli save serem ol risen from wanem oli no sem blong serem gospel blong Jisas Kraes. O oli save serem eksperiens we olgeta o ol narawan oli soem we oli no sem long gospel ia.

  Ol memba blong klas oli leftemap han blong olgeta.

  Yumi no save sem blong serem testemoni blong yumi blong gospel.

Rom 2:28–29

Tru fasin blong stap olsem wan disaepol oli save faenem long komitmen we i kam insaed, i no long ol wok nomo we yumi stap mekem.

• ?Olsem wanem yumi save wokemaot yumiwan, long hamas yumi bin stap olsem wan disaepol? Kaonsel blong Pol long Rom i save helpem yumi tingbaot blong lukluk moa long “hat [mo] long spirit” (Rom 2:29) bitim blong stap lukluk long aksen we i stap aotsaed nomo. Blong helpem ol memba blong klas blong yu andastanem toktok blong Pol, yu save raetem toktok ia we i stap long Rom 2:28–29 long bod. Riplesem toktok ia Jiu wetem Lata-dei Sent mo toktok ia Sakomsaes wetem kavenan. ?Wanem nao jenis ia i mekem yumi kam blong andastanem moa abaot tijing blong Pol? Yufala i save toktok raon tu long ol samting we yumi stap mekem olsem ol memba blong Jos we i gat moa mining mo moa paoa folem wanem “Spirit blong God i mekem long hat blong man” (Rom 2:29).

Rom 3–6

“Be taem we fasin nogud i kam bigwan moa, God i stap givhan long ol man antap moa bakegen, long glad hat blong hem.”

• ?Olsem wanem nao yu save helpem ol memba blong klas oli andastanem tijing blong Pol abaot fet, ol wok, mo glad hat? Tingting blong serem tufala stori we i stap ia blong helpem olgeta i andastanem se yumi no lukluk long ol gudfala wok we yumi mekem olsem wan wei blong pruvum se yumi klin inaf, o lukluk long glad hat blong Kraes olsem wan risen blong mekem eskius from ol mistek mo sin blong yumi. Ol memba blong klas oli save lukaotem ol trutok long Rom 3:20–31; 5:1–2; 6:1–2, 21–23 we i save helpem Gloria mo Justin. ?Wanem sam moa trutok long “Sam Moa Risos” we i save helpem ol memba blong klas i andastanem hamas stret mo gud wok mo gladhat blong Kraes i impoten?

  Situesen 1

  Wan fren nem blong hem Gloria i filim se i tumas long hem blong wokhad blong kam wan fetful disaepol blong Kraes. Hem i bin wokhad blong mekem evri samting we hem i filim se hem i mas mekem, be oltaem hem i wari se hadwok blong hem i no naf nomo. “Mi mi gud inaf?” hem i stap tingting. “Bae Lod i akseptem mi?”

  Situesen 2

  Wan fren we nem blong hem Justin i no wari tumas blong mekem ol joes we i stret mo gud. Hem i bilif long Jisas Kraes, hem i atendem ol jos miting blong hem, mo Hem i wan papa we i gat lav mo wan gudfala neba. Be, hem i jusum blong no laef folem standet blong save kwalifae hem blong kasem wan tempol rekomen. Taem ol famli mo ol fren oli traem blong leftemap tingting blong hem blong stap rere blong go long tempol, hem i ansa, “mi wan gud man. Mi gat fet long Kraes. Hem i pemaot praes blong ol sin blong mi finis, mo mi no ting se bae Hem i putum mi aot long selestial kingdom from ol smol samting olsem.”

risos pikja bokis

Sam Moa Risos

Fet, gladhat, mo ol wok.

Situesen 1

• Ita 12:27

• Moronae 10:32–33

• J. Devn Cornish, “Am I Good Enough? Will I Make It?,” Liahona, Nov. 2016, 32–34

• Presiden Dieter F. Uchtdorf i bin tijim: “Oli no save pem fasin blong sevem man wetem mane blong fasin blong stap obei, blad blong Kraes nao i pemaot. … Gladhat i wan presen we i kam long God, mo tingting blong hat blong yumi blong stap obei long evri komanmen blong God, i olsem han blong yumi long laef ia i go long Papa blong blong yumi long Heven blong kasem tabu presen ia” (“The Gift of Grace,” Liahona, May 2015, 109–10).

Situesen 2

• Jemes 2:17–26

• Hileman 12:23–24

• D. Todd Christofferson, “Abide in My Love,” Liahona, Nov. 2016, 48–51

• Presiden Uchtdorf i bin tijim: “Sapos gladhat i wan presen blong God, from wanem nao hem i impoten tumas blong stap obei long ol komanmen blong God? ?From wanem westem taem wetem ol komanmen blong God—o sakem sin, from hem i wan komanmen? … Blong stap obei long ol komanmen blong God i wan samting we i gro aot long yumi tru lav we i no gat en mo fasin blong talem tank yu long God from yumi luksave gudfala fasin blong Hem. Kaen lav ia wetem fasin blong talem tangkyu bae i olsem merikel we i mekem wok blong yumi i joen wetem glad had blong God” (“The Gift of Grace,” 109).

Kam Antap long Fasin blong Yumi blong Stap Tij

Koling blong yu i kam tru long insperesen. Olsem wan tija, Lod i bin singaotem yu blong blesem ol pikinini blong Hem. Lod i wantem yu blong gat sakses, taem yu laef klin inaf blong kasem help blong Hem, bambae Hem i givim long yu revelesen ia we yu stap lukaotem. (Luk long Teaching in the Savior’s Way, 5.)