“14–20 Ogis. Rom 7–16: ‘Yufala I Mas Holem strong Ol Stret Fasin blong Yufala, blong Winim Ol Rabis Fasin,’” Kam Folem Mi—Blong Sandei Skul: Niu Testeman 2023 (2022)
“14–20 Ogis. Rom 7–16,” Kam Folem Mi—Blong Sandei Skul: 2023
14–20 Ogis
Rom 7–16
“Yufala I Mas Holem strong Ol Stret Fasin blong Yufala, blong Winim Ol Rabis Fasin”
Rid long Rom 7–16, mo raetemdaon ol tingting mo filing blong yu abaot olsem wanem blong helpem ol memba blong klas oli lanem samting aot long ol skripja ia. Taem yu tingting hevi long ol tingting mo filing we yu raetemdaon, bae oli save lidim yu i go long plante aktiviti blong lanem samting we i gat mining.
Invaetem Ol Memba blong Serem Wanem Oli Gat
Tingting blong ridim Rom 10:17 mo 15:4 mo askem ol memba blong klas blong oli serem ol skripja we i stap long Rom 7–16 we i bildim fet blong olgeta long Jisas Kraes o givim hop long olgeta.
Stap Tijim Doktrin
Yumi save kam “blong joen wetem Kraes.”
-
Olsem ol Lata-dei Sent, yumi biliv se ol toktok we i olsem “yu kasem raet ia blong gat ol gudfala samting we i blong God” mo “joen wetem Kraes blong kasem” i minim se wetem help blong Jisas Kraes, yumi save kam olsem Papa long Heven mo kasem evri samting we Hem i gat (Rom 8:17; luk tu long Doktrin mo Ol Kavenan 132:20–21). Blong helpem ol memba blong klas blong luk olsem wanem doktrin ia oli tijim truaot long ol skripja ia, yu save invaetem olgeta blong oli fomem ol smol grup o go long tu mo stadi sam long ol skripja we oli listim long “Sam Moa Risos.” Afta ol memba blong klas oli save serem wanem oli lanem mo tokbaot from wanem doktrin ia i impoten tumas.
-
Wan stori we Presiden Dallin H. Oaks i givim olsem wan eksampol we i stap long “Sam Moa Risos” i save helpem ol memba blong klas tokbaot olsem wanem yumi mekem yumi rere blong kasem “raet ia blong gat ol gudfala samting we i blong God” (Rom 8:17). ?Wanem sam long ol “loa mo prinsipol” Presiden Oaks i stap tokbaot? Wanem bae i defren long laef blong yumi, blong save se yumi “gat raet ia blong gat ol gudfala samting we i blong God, mo joen wetem Kraes blong kasem”? (Rom 8:17).
“Huia i save seraotem yumi long lav blong Kraes?
-
Toktok raon tugeta long Rom 8 bae i save givim janis blong helpem ol memba blong klas oli filim lav blong Sevya. Tingting blong soemaot wan pikja blong Jisas Kraes (luk long aotlaen blong wik ia long Kam Folem Mi—Blong Wanwan Man, Woman mo Famli) taem yufala ridim Rom 8:18, 28, 31–39 olsem wan klas. Yu save invaetem ol memba blong klas blong oli save serem eni tingting mo filing we oli kasem afta we oli ridim ol ves ia. Sam oli save serem olsem wanem oli kasem testemoni blong ol trutok ia we oli fanem insaed long ol ves ia.
Evri komanmen blong God oli save hapen tru long komanmen ia blong lav.
-
Blong helpem ol memba blong klas oli luk olsem wanem evri komanmen i gat “wan nomo we i kavremap evriwan” hem i komanmen blong lavem neba blong yu (Rom 13:9), invaetem olgeta blong mekem wan lis blong evri komanmen we oli save tingting long hem long bod. Ridim tugeta Rom 13:8–10 mo Matiu 22:36–40, toktok raon long hem wan klas, rilesensip ia bitwin God mo neba blong yumi mo stap obei long evri komanmen we i stap long bod. ?Olsem wanem nao trutok ia i jenisim wei we yumi stap tingting long ol komanmen mo fasin blong stap obei? Eksampol, ?wanem trutok ia i talem abaot stamba tingting blong ol komanmen?
“I gud yumi livim fasin ya, we yumi stap jajem narafala man.”
-
Blong talemaot smol wanem i stap long Rom 14, yu save poenemaot se sam long ol Sent blong Rom long taem ia oli stap toktok agensem olgeta bakegen abaot fasin blong stap praktisim kalja olsem, fasin blong olgeta blong kakae mo lukluk blong olgeta abaot ol holidei. ?Wanem semmak samting yumi stap fesem tedei? Maet ol memba blong klas oli save lukluk tru long Rom 14 mo givim long wan sentens nomo olsem samari blong kaonsel blong Pol. ?Wanem advaes nao yumi save serem wetem wanwan long yumi abaot olsem wanem yumi no mas gat wan tingting blong stap jajem man? Maet ol memba blong klas oli save faenem ol aedia long mesej blong Presiden Dieter F. Uchtdorf “The Merciful Obtain Mercy,” Liahona, May 2012, 70–77.
Sam Moa Risos
Stap kasem “evri samting we Papa i gat” (Doktrin mo Ol Kavenan 84:38).
-
“Becoming Like God” (Gospel Topics, topics.ChurchofJesusChrist.org)
Presiden Dallin H. Oaks i serem parabol ia:
“Wan rij papa i save se sapos hem i blong givim ol rij samting blong hem long pikinini we i no developem waes mo save we i strong inaf, bae pikinini ia i westem ol rij samting ia nomo. Papa ia i talem long pikinini blong hem:
“‘Evri samting we mi gat mi wantem tumas blong givim long yu—i no ol rij samting nomo we mi gat, be tu posisen mo fasin blong mi long ol man. Wanem we mi gat mi save givim isi nomo long yu, be huia mi yu mas winim yuwan. Blong kwalifae from ol rij samting we i stap ia, yu mas lanem wanem mi bin lanem, mo laef folem laef we mi bin laef folem. Bae mi givim long yu ol loa mo prinsipol we mi yusum blong kasem waes mo save blong mi. Folem eksampol blong mi, mekem gud olsem we mi bin mekem, mo bae yu kam olsem mi, mo evri samting we mi gat bae i blong yu’” (“The Challenge to Become,” Ensign, Nov. 2000, 32).
Stap Kam Antap long Fasin blong Yumi blong Stap Tij
Faenem ol risos blong sapotem ol prinsipol ia. Antap long aedia blong tij we i stap finis long aotlaen ia, yu save jenisim smol ol aktiviti we i stap long aotlaen blong wik ia long Kam Folem Mi—Blong Wanwan Man, Woman mo Famli blong yusum long klas blong yu. (Luk tu long Teaching in the Savior’s Way, 17–18.)