« ថ្ងៃទី ៣១ ខែ កក្កដា–ថ្ងៃទី ៦ ខែ សីហា ។ កិច្ចការ ២២–២៨ ៖ ‹ ជាអ្នកបម្រើ ហើយជាទីបន្ទាល់ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៣១ ខែ កក្កដា–ថ្ងៃទី ៦ ខែ សីហា ។ កិច្ចការ ២២–២៨ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

ថ្ងៃទី ៣១ ខែ កក្កដា–ថ្ងៃទី ៦ ខែ សីហា

កិច្ចការ ២២–២៨

« ជាអ្នកបម្រើ ហើយជាទីបន្ទាល់ »

សូមអាន កិច្ចការ ២២–២៨ ដោយអធិស្ឋាននៅក្នុងចិត្តថា ព្រះវិញ្ញាណបរិសុទ្ធនឹងបំផុសគំនិតបងប្អូនឲ្យដឹងថា ត្រូវផ្ដោតលើអ្វីដែលវានឹងជួយសមាជិកក្នុងថ្នាក់របស់បងប្អូន ។ សូមកត់ត្រាគំនិតនានាដែលមាននៅក្នុងគំនិតរបស់បងប្អូន គំនិតទាំងនេះអាចជាការចាប់ផ្ដើមនៃផែនការសម្រាប់ការបង្រៀនរបស់បងប្អូន ។

អញ្ជើញឲ្យចែកចាយ

សូមឲ្យសមាជិកក្នុងថ្នាក់សរសេរសេចក្ដីយោងបទគម្ពីរមួយមកពី កិច្ចការ ២២–២៨ ដែលពួកគេចាប់អារម្មណ៍នៅសប្ដាហ៍នេះ ។ សូមប្រមូលចម្លើយរបស់ពួកគេ ហើយអានខគម្ពីរទាំងនោះពីរបីរួមគ្នា ។ សូមអញ្ជើញសមាជិកក្នុងថ្នាក់បីបួននាក់ឲ្យចែកចាយថា ហេតុអ្វីបានជាខគម្ពីរទាំងនេះមានអត្ថន័យចំពោះពួកគេ ។

បង្រៀនគោលលទ្ធិ

កិច្ចការ ២២:១–២១; ២៦:១–២៩

ទីបន្ទាល់គឺជាការប្រកាសអំពីសេចក្ដីពិតដោយផ្អែកលើចំណេះដឹង ឬជំនឿផ្ទាល់ខ្លួន ។

ទីបន្ទាល់របស់ប៉ុលទៅកាន់លោកភេស្ទុស និងព្រះរាជាអ័គ្រីប៉ា អាចជាឱកាសមួយដើម្បីពិភាក្សាអំពីអត្ថន័យនៃការថ្លែងទីបន្ទាល់ ។ បងប្អូនអាចសូមឲ្យសមាជិកក្នុងថ្នាក់រំឭក កិច្ចការ ២២:១–២១ ឬ ២៦:១–២៩ សាឡើងវិញ ។ តើយើងរៀនអ្វីខ្លះមកពីគំរូរបស់ប៉ុលស្ដីពីការថ្លែងទីបន្ទាល់ ? តើគោលការណ៍បន្ថែមទៀតអ្វីខ្លះ ស្ដីពីការថ្លែងទីបន្ទាល់ដែលយើងរៀនមកពីសេចក្ដីថ្លែងការណ៍របស់ប្រធាន អិម រ័សុល បាឡឺដ នៅក្នុង « ធនធានបន្ថែមទាំងឡាយ » ? ការច្រៀង ឬការចាក់ទំនុកតម្កើងបទ « ទីបន្ទាល់ » ( ទំនុកតម្កើង ល.រ. ៧៤ ) អាចនឹងយាងព្រះវិញ្ញាណឲ្យចូលមកការពិភាក្សារបស់បងប្អូន ។
ទោះជាប៉ុលមិនបានស្វែងរកសាក្សីខាងវិញ្ញាណ ដែលលោកបានទទួលនៅលើផ្លូវទៅកាន់ស្រុកដាម៉ាសក្ដី ក៏លោកបានចំណាយពេលវេលា ដែលលោកនៅមានសេសសល់ក្នុងជីវិតរបស់លោកខិតខំដើម្បីថែរក្សា ហើយការពារទីបន្ទាល់របស់លោកដែរ ( សូមមើល កិច្ចការ ២២:១០, ១៤–១៦; ២៦:១៩ ) ។ គំរូរបស់ប៉ុលអាចជួយសមាជិកក្នុងថ្នាក់របស់បងប្អូនឲ្យយល់ថា ទីបន្ទាល់មួយតម្រូវឲ្យមានការប្រព្រឹត្ត និងពលិកម្ម ។ ដើម្បីចាប់ផ្ដើមការពិភាក្សាមួយអំពីការណ៍នេះ ប្រហែលជាសមាជិកក្នុងថ្នាក់ម្នាក់អាចពិពណ៌នាអំពីការខិតខំរបស់គាត់ ឬនាងដើម្បីក្លាយជាតន្ត្រីករ សិល្បករ ឬអត្តពលករដ៏ជំនាញម្នាក់ ។ តើការអភិវឌ្ឍជំនាញមួយបែបនេះស្រដៀងគ្នានឹងការទទួល និងការពង្រឹងទីបន្ទាល់មួយតាមរបៀបណា ? តើយើងត្រូវខិតខំធ្វើអ្វីខ្លះដើម្បីទទួលបាន និងពង្រឹងទីបន្ទាល់មួយ ? ( សូមមើលផងដែរ អាលម៉ា ៥:៤៦ ) ។

កិច្ចការ ២៦:៩–២៣

យើងមានការទទួលខុសត្រូវមួយ ដើម្បីផ្ដល់ការងារបម្រើដល់មនុស្សដទៃ ។

ព្រះអម្ចាស់បានហៅប៉ុលឲ្យធ្វើជា « អ្នកបម្រើ » ( កិច្ចការ ២៦:១៦ ) ប៉ុន្តែតើពាក្យនេះមានន័យដូចម្ដេច ? ដើម្បីជួយសមាជិកក្នុងថ្នាក់ឲ្យរុករករបៀបដែលពួកគេអាចផ្ដល់ការងារបម្រើដល់មនុស្សដទៃបាន ទោះដោយមាន ឬគ្មានការចាត់តាំងជាផ្លូវការក្ដី នោះបងប្អូនអាចសរសេរនៅលើក្ដារខៀននូវសំណួរដូចជា តើការផ្ដល់ការងារបម្រើមានន័យដូចម្ដេច ? សូមអញ្ជើញសមាជិកក្នុងថ្នាក់ឲ្យរកមើលចម្លើយនៅក្នុងធនធានដូចតទៅនេះ ៖ ម៉ាថាយ ២០:២៥–២៨; កិច្ចការ ២៦:១៦–១៨; នីហ្វៃទី៣ ១៨:២៩–៣២; ជីន ប៊ី ប៊ីងហាំ « Ministering as the Savior Does » Liahona ខែ ឧសភា ឆ្នាំ ២០១៨ ទំព័រ ១០៤–៧ ។ នៅពេលពួកគេចែកចាយអ្វីដែលពួកគេរកឃើញ សូមលើកទឹកចិត្តពួកគេឲ្យពិភាក្សាអំពីវិធីដែលពួកគេទាំងអស់គ្នាអាចផ្ដល់ការងារបម្រើដល់មនុស្សដទៃ រួមទាំងនៅក្នុងការហៅរបស់យើងក្នុងសាសនាចក្រផងដែរ ។ បងប្អូនក៏អាចបង្ហាញវីដេអូ « The Miracle of the Roof » ( នៅលើគេហទំព័រ ChurchofJesusChrist.org ) បានផងដែរ ។

កិច្ចការ ២៧

ប្រសិនបើយើងស្ដាប់តាមព្យាការីរបស់ព្រះអម្ចាស់ នោះទ្រង់នឹងដឹកនាំយើង ហើយការពារយើងពីអំពើអាក្រក់ ។

សូមអញ្ជើញសមាជិកក្នុងថ្នាក់ឲ្យជជែកអំពីចម្លើយរបស់មេទ័ព នៅពេលប៉ុលបានព្យាករថា សំពៅនឹង « ខូចខាតជាច្រើន » ហើយនឹងមានការបាត់បង់ជីវិត ( សូមមើល កិច្ចការ ២៧:១០–១១ ) ។ ហេតុអ្វីមេទ័ពអាចឆ្លើយតបតាមរបៀបនោះ ? ប្រហែលជាសមាជិកក្នុងថ្នាក់អាចចែកចាយអ្វីដែលពួកគេនឹងនិយាយទៅកាន់មេទ័ព ដើម្បីជួយគាត់ឲ្យមានសេចក្ដីជំនឿទៅលើការព្យាកររបស់ប៉ុល ។ តើយើងអាចរៀនអ្វីខ្លះទៀតមកពី កិច្ចការ ២៧ អំពីការធ្វើតាមពួកអ្នកបម្រើរបស់ព្រះអម្ចាស់ ? សមាជិកមួយចំនួនក្នុងថ្នាក់របស់បងប្អូនប្រហែលជាធ្លាប់មានបទពិសោធន៍ កាលដែលពួកគេបានធ្វើតាមការដឹកនាំរបស់ពួកព្យាការី សូម្បីតែនៅពេលវាខុសពីគំនិតរបស់មនុស្សជុំវិញខ្លួនពួកគេក្ដី ។ សូមអញ្ជើញសមាជិកក្នុងថ្នាក់ពីរបីនាក់ឲ្យចែកចាយបទពិសោធន៍របស់ពួកគេ ។

ធនធានបន្ថែមទាំងឡាយ

ការថ្លែងទីបន្ទាល់ ។

ប្រធាន អិម រ័សុល បាឡឺដ បានថ្លែងអំពីទីបន្ទាល់របស់ប៉ុលនៅចំពោះព្រះភ័ក្រ្ដរបស់ស្ដេចអ័គ្រីប៉ា ហើយបានបង្រៀនយើងអំពីអត្ថន័យនៃការថ្លែងទីបន្ទាល់ ៖

« ការប្រជុំថ្លែងទីបន្ទាល់របស់យើងត្រូវផ្ដោតលើព្រះអង្គ សង្គ្រោះ គោលលទ្ធិនៃដំណឹងល្អ ពរជ័យនៃការស្ដារឡើងវិញ និងការបង្រៀននៃបទគម្ពីរ ។ យើងត្រូវជំនួសដំណើររឿង សៀវភៅស្ដីពីការធ្វើដំណើរ និងការបង្រៀនជាមួយនឹងទីបន្ទាល់បរិសុទ្ធ ។ អស់អ្នកដែលបានទទួលការទុកចិត្តឲ្យថ្លែង ហើយបង្រៀននៅក្នុងការប្រជុំរបស់យើងចាំបាច់ត្រូវធ្វើកិច្ចការនេះជាមួយអានុភាពខាងគោលលទ្ធិដែលនឹងធ្វើឲ្យគេស្ដាប់ឮ ហើយទទួលអារម្មណ៍ ដោយលើកស្ទួយស្មារតី ហើយស្អាងសមាជិករបស់យើង ។ …

« … កាលការសម្ដែងសេចក្ដី ស្រឡាញ់ និងការដឹងគុណគឺជារឿងល្អ នោះការសម្ដែងបែបនេះ មិនអាចជំនួសទីបន្ទាល់ដែលនឹងបង្កាត់ភ្លើងនៃជំនឿមួយនៅក្នុងជីវិតរបស់មនុស្សដទៃបានឡើយ ។ ការថ្លែងទីបន្ទាល់គឺជាការ ‹ ធ្វើសាក្សីដោយព្រះចេស្ដានៃព្រះវិញ្ញាណបរិសុទ្ធ ធ្វើសេចក្ដីថ្លែងដោយម៉ឺងម៉ាត់ពីសេចក្ដីពិត ដោយសម្អាងទៅលើតម្រិះ ឬជំនឿរបស់ខ្លួនផ្ទាល់ › [ សេចក្ដីណែនាំដល់បទគម្ពីរទាំងឡាយ « ធ្វើបន្ទាល់ » នៅលើគេហទំព័រ scriptures.ChurchofJesusChrist.org ] ។ ការប្រកាសដ៏ច្បាស់អំពីសេចក្ដីពិតធ្វើឲ្យមានភាពខុសប្លែកមួយនៅក្នុងជីវិតរបស់មនុស្ស ។ នោះគឺជាអ្វីដែលផ្លាស់ប្ដូរដួងចិត្ត ។ នោះគឺជាអ្វីដែលព្រះវិញ្ញាណបរិសុទ្ធអាចបញ្ជាក់នៅក្នុងដួងចិត្តនៃបុត្រាបុត្រីរបស់ព្រះ » ( « Pure Testimony » Liahona ខែ វិច្ឆិកា ឆ្នាំ២០០៤ ទំព័រ ៤១ ) ។

ការកែលម្អការបង្រៀនរបស់យើង

រៀបចំខ្លួនទុកជាមុន ។ « នៅពេលបងប្អូនពិចារណាអំពីរបៀបដែលគោលការណ៍ទាំងឡាយនៃដំណឹងល្អ ដែលបងប្អូនកំពុងបង្រៀន នឹងផ្ដល់ពរជ័យដល់សមាជិកក្នុងថ្នាក់របស់បងប្អូន នោះគំនិត និងចំណាប់អារម្មណ៍ទាំងឡាយនឹងកើតមានមកក្នុងជីវិតប្រចាំថ្ងៃរបស់បងប្អូន––នៅពេលបងប្អូនធ្វើដំណើរទៅធ្វើការ ធ្វើការងារក្នុងផ្ទះ ឬប្រាស្រ័យទាក់ទងជាមួយគ្រួសារ និងមិត្តភក្ដិ ។ សូមកុំគិតថា ការរៀបចំខ្លួនខាងវិញ្ញាណជាអ្វីមួយដែលបងប្អូនត្រូវឆ្លៀតពេលធ្វើ ប៉ុន្តែផ្ទុយទៅវិញជាអ្វីមួយដែលបងប្អូនចង់ធ្វើជានិច្ច » ( ការបង្រៀនតាមរបៀបរបស់ព្រះអង្គសង្រ្គោះ ទំព័រ ១២ ) ។