Juļae 31–O̧kwōj 6

Jerbal 22–28

“Ri kaki im Ri kōnnaan (Rikam̧ool)”

Riiti Jerbal 22–28 kōn juon jar ilo būruōm̧ bwe Jetōb Kwojarjar eo enaaj im̧we eok n̄an jeļā ta eo n̄an pedped ioon me enaaj jipan̄ ro uwaan kūlaaj eo am̧. Je jabdewōt ļōmņak ej itok n̄an ļōmņak; men kein remaron̄ jinoin karōk in katakin eo am̧.

Kajjitōk bwe ren Kwaļo̧k

Kajjitōk ippān ro uwaan kūlaaj eo n̄an je juon eoon in jipan̄ an jeje ko rekwojarjar jān Jerbal 22–28 me ekar im̧we er wiik in. Ain uwaak ko aer im riiti jejjo iaan eoon ko ippān doon. Kajjitōk ippān jejjo ro uwaan kūlaaj eo n̄an kwaļo̧k etke eoon kein eļap meļeļeier n̄an er.

Katakin Katak eo

Jerbal 22:1–21; 26:1–29

Juon naan in kam̧ool ej juon naan in kean̄ kōn m̧ool eo pedped ioon jeļā eo an juon make ak tōma.

• Naan in kam̧ool eo an Paul n̄an Festus im Kiin̄ Agrippa emaron̄ in juon iien em̧m̧an n̄an kōnono kōn ta meļeļe in n̄an kwaļo̧k naan in kam̧ool. Kwomaron̄ kajjitōk ippān ro uwaan kūlaaj eo n̄an etale Jerbal 22:1–21 ak 26:1–29. Ta eo jej ekkatak jān waanjon̄ak eo an Paul kōn kwaļo̧k naan in kam̧ool? Ta pedped in katak ko jet kōn kwaļo̧k naan in kam̧ool jej ekkatak jān ennaan eo an Būreejtōn M. Russell Ballard ilo “Kein Jipan̄ ko Jet”? Al ak kōjan̄ al eo “Testimony” (Hymns, nō. 137) maron̄ karuwaineneik tok Jetōb eo n̄an iien ekōnono eo ami.

• Em̧ool men̄e Paul ekar jab kappukōt kam̧ool eo ilo jetōb ekar bōke ilo iaļ eo ļo̧k n̄an Damascus, ekar joļo̧k aolepān mour eo an jerbal n̄an dāpij wōt im bōbrae naan in kam̧ool eo an (lale Jerbal 22:10, 14–16; 26:19. Waanjon̄ak eo an Paul emaron̄ jipan̄ kūlaaj eo am̧ meļeļe bwe juon naan in kam̧ool ej aikuji jerbal im kaarmejete. N̄an jino juon iien ekōnono kōn menin, bōlen juon uwaan kūlaaj eo emaron̄ kōmeļeļeik kijejeto eo an n̄an erom juon rial, juon rijin̄a, ak rikkure ekapeel. Ekōjkan an kōļapļo̧k kain kapeel eo ainļo̧k wōt bōk im kōkajoorļo̧k juon naan in kam̧ool? Ta kijejeto ko jej aikuj kōm̧m̧ani n̄an bōk im kōkajoorļo̧k juon naan in kam̧ool? (lale barāinwōt Alma 5:46.

Jerbal 26:9–23

Ewōr juon ad eddo n̄an rūkaki n̄an ro jet.

• Irooj ekar kūr Paul n̄an erom “juon ri kaki” (Jerbal 26:16), bōtaab ta meļeļe in naan in ? N̄an jipan̄ ro uwaan kūlaaj eo etale ekōjkan aer maron̄ rikwaļo̧k n̄an ro jet, kōn ak kōn an wōr juon ak ejjeļo̧k juon ijjitōn̄, kwomaron̄ je ioon boot eo juon kajjitōk āinwōt Ta meļeļe in n̄an rūkaki? Kajjitōk ippān ro uwaan kūlaaj eo n̄an kappukōt uwaak ko ilo kein jipan̄ kein: Matu 20:25–28; Jerbal 26:16–18; 3 Nipai 18:29–32; Jean B. Bingham, “Jerbal in Karejar āinwōt Rilo̧mo̧o̧r ekar Kōm̧m̧ane,” Liaona, Māe 2018, 104–7. Ilo aer kwaļo̧k ta eo rej loe, kōketak er n̄an ekōnono kōn wāween ko jemaron̄ aolep rūkaki n̄an ro jet, ekoba kūr ko ad ilo Kabun̄ in. Kwomaron̄ barāinwōt kwaļo̧k pija in alooj eo “The Miracle of the Roof” (ChurchofJesusChrist.org).

Jerbal 27

Eļan̄n̄e jej ron̄jake rikanaan ro an Irooj, E enaaj tōl kōj im kōjparok kōj jān nana.

• Kajjitōk ippān ro uwaan kūlaaj eo n̄an kōnono kōn uwaak eo an senturiōn eo ke Paul ekar kanaan bwe wa eo enaaj kar en̄taan “elōn̄ jako” im mour ko renaaj jako (lale Jerbal 27:10–11). Etke senturiōn eo ekajoor ekar uwaak ilo jekjek eo? Bōlen ro uwaan kūlaaj eo remaron̄ kwaļo̧k ta eo renaaj kar ba n̄an senturiōn eo n̄an jipan̄ e wōr an tōmak ilo kanaan eo an Paul. Ta katak ko jet jemaron̄ ekkatak jān Jerbal 27 kōn ļoor ro rikarejeran Irooj? Jet uwaan kūlaaj eo emaron̄ kar wōr aer en̄jake ko ke raar ļoor tōl eo an rikanaan ro jekdo̧o̧n n̄e ekar oktak jān ļōmņak ko an armej ro ipeļaikier. Kajjitōk ippān jejjo ro uwaan kūlaaj eo n̄an kwaļo̧k en̄jake ko aer.

Kein Jipan̄ ko jet

Kwaļo̧k naan in kam̧ool

Būreejtōn M. Russell Ballard ekar kōnono kōn naan in kam̧ool eo an Paul im̧aan Kiin̄ Agrippa im kar katakin ta meļeļe in n̄an kōj n̄an kwaļo̧k naan in kam̧ool.

“Kweilo̧k in kwojkwoj ko ad ej aikuj ļapļo̧k aer pedped ioon Rilo̧mo̧o̧r eo, katak ko an gospel eo, kōjeraam̧m̧an ko an Jepļaaktok eo, im katak ko an jeje ko rekwojarjar. Jej aikuj in bōk jikin bwebwenato ko, kwaļo̧k kōn jikin ko jaar etal n̄ani, im kwaļo̧k (lecture) kōn naan in kam̧ool ko rerreo. Ro me rej lōke n̄an kōnono im katakin ilo kweilo̧k ko ad rej aikuj in kōm̧m̧ane āindein kōn kajoor in katak eo me enaaj jim̧ro ron̄ im en̄jake, ļōn̄aj jetōb ko im kōkajoorļo̧k armej ro ad. …

“… Ilo an aolep iien em̧m̧an n̄an kwaļo̧k iakwe im kam̧m̧oolol, kain en̄jae kein rejjab ejake kain naan in kam̧ool eo me enaaj jino juon kijeek in tōmak ilo mour ko an ro jet. N̄an kwaļo̧k naan in kam̧ool ej ‘n̄an kwaļo̧k kam̧ool kōn kajoor eo an Jetōb Kwojarjar; n̄an kōm̧m̧ane juon naan in kean̄ ekwojarjar kōn m̧ool eo pedped ioon jeļā eo an juon make’ [Unin Tōl n̄an Jeje ko Rekwōjarjar, “Kam̧ool,” scriptures.ChurchofJesusChrist.org]. Naan in kean̄ eo ealikkar an m̧ool eo ej kōm̧m̧ane juon oktak ilo mour ko an armej ro. En̄in ej ta meļeļe eo ukōt bōro ko. En̄in ej ta eo Jetōb Kwojarjar emaron̄ kapene ilo būruōn ajri ro nejin Anij” (“Pure Testimony,” Liahona, Nob. 2004, 41).

Kōkōm̧anm̧anļo̧k Ad Katakin

Maanjabpopo m̧oktaļo̧k. “Ilo am̧ kōļmenļo̧kjeņ elmen an pedped in gospel eo kwoj katakin naaj kōjeraam̧m̧an ro uwaan kūlaaj eo am̧, ļōmņak im im̧we ko renaaj waļo̧k ilo aolepān mour eo am̧—ilo am̧ ilo̧k im jerbal, kōm̧m̧ani jerbal ko ilo m̧weo, ak iiaio̧ ippān baam̧le ak ro m̧ōttam̧. Jab ļōmņak kōn m̧aanjabpopo eo ilo jetōb n̄e juon men kōm̧m̧an iien n̄an e ak āinwōt juon men kwoj aolep iien kōm̧m̧ane” (Teaching in the Savior’s Way, 12).