Corinth, Southern Greece, Forum eo im Civic Center, unoke jān Balage Balogh/www.ArchaeologyIllustrated.com

O̧kwōj 21–27

1 Korint 1–7

“Koṃwin Jiṃor Weeppān Ļọk”

Elder Jeffrey R. Holland ekar katakin bwe elōn̄ wōt armej rej “itok [n̄an kabun̄ in] pukōt juon en̄jake in jetōb” (“A Teacher Come from God,” Ensign, May 1998, 26). Ilo am̧ riiti 1 Korint 1–7, jar ilo ļōmņak kōn ta eo kwomaron̄ kōm̧m̧ane n̄an jipan̄ ejake en̄jake ko ilo jetōb ilo kūlaaj eo am̧.

Kajjitōk bwe ren Kwaļo̧k

Ļōmņak in kajjitōk ippān ro uwaan kūlaaj eo n̄an je ekōjkan aer kar jerbalke ta eo rej ekkatak jān jeje ko rekwojarjar. Kajjitōk ippān juon uwaan kūlaaj eo n̄an kwaļo̧k ta eo raar je.

Katakin Katak eo

1 Korint 1:10–17; 3

Ro uwaan Kabun̄ eo an Kraist rej kajjieon̄ in bōro kuk.

• Ekōnono kōn jepta ko im̧aan in 1 Korint emaron̄ in juon iien em̧m̧an n̄an kalōk bōro kuk eo eļapļo̧k ibwilijin ro uwaan ward eo. Kwomaron̄ jino kōn kajjitōk ippān ro uwaan kūlaaj eo n̄an kōnono kōn juon club, kumi, tiim, ak bar doulul ko jet rej uwaan me ewōr juon aer bōro kuk eļap. Etke kumi in ej en̄jake eļap bōro kuk? Innām kwomaron̄ etale jet iaan katak ko an Paul kōn bōro kuk ilo 1 Korint 1:10–13; 3:1–11. Ta eo eoon kein, ippānļo̧k en̄jake ko ad, rej katakin kōn ta jipan̄ ko rej ejake bōro kuk im ta eo rej tōn kakkure? Ta kaarmejete ko jej aikuj in kōm̧m̧ani n̄an maron̄ bōk bōro kuk eo? Ta kōjeraam̧m̧an ko rej itok n̄an ro me rej bōro kuk? Lale barāinwōt waanjon̄ak eo an Sister Sharon Eubank ilo “Kein Jipan̄ ko Jet.”

• Paul ej kōjerbal pija eo kōn juon em̧ n̄an kōketak bōro kuk ilo 1 Korint 3:9–17. Ekōjkan an waanojn̄ak in maron̄ jipan̄ ro uwaan kūlaaj eo em̧m̧anļo̧k aer meļeļe kōn bōro kuk? N̄an waanjon̄ak, ālkin riiti eoon kein ippān doon, kwomaron̄ leļo̧k n̄an kajjojo uwaan kūlaaj eo juon būļak im kōtļo̧k bwe ren jerbal ippān doon n̄an kalōk juon men. Ilo jekjek ta jej “menin kalōk an Anij ”? (1 Korint 3:9). Ekōjkan an Anij kalōk kōj kajjojo? Ta eo jej kalōk ippān doon āinwōt Armej ro Rekwojarjar? Ta eo jemaron̄ kōm̧m̧ane āinwōt juon ward eippān doon me jeban maron̄ kōm̧m̧ane āinwōt kajjojo armej?

1 Korint 1:17–31; 2; 3:18–20

N̄an kadedeļo̧k jerbal eo an Anij, jej aikuji māletlet eo an Anij.

• En̄in ej juon ļōmņak n̄an jipan̄ ro uwaan kūlaaj eo am̧ pedped ioon Anij: Ajije ro uwaan kūlaaj eo n̄an kumi ko im kajjitōk ippāer n̄an etale 1 Korint 1:17–31; 2; ak 3:18–20 kappukōt naan ko āinwōt māletlet im bwebwe. Innām remaron̄ kwaļo̧k ilo kumi ko aer ta eo eoon kein rej katakin kōn māletlet ilo jerbal eo an Irooj. Ta men ko kōn gospel eo remaron̄ in āinwōt bwebwe n̄an jet armej? Ekōjkan an men kein kwaļo̧k māletlet eo an Anij? Bōlen ro uwaan kūlaaj eo remaron̄ barāinwōt kwaļo̧k en̄jake ko me raar lōke ilo māletlet eo an Anij, ijello̧kin eo aer make, n̄an kadedeļo̧k jerbal eo An.

Lale 1 Korint 6:9–20

Ābwinni kanniōk ko ad rej kwojarjar.

• N̄an jino juon ekōnono kōn eoon kein, kwomaron̄ je ioon boot eo kajjitōk ko āinwōt kein: Ekōjkan an Irooj kōņaan bwe jen lale ānbwin ko ad? Ekōjkan an menin oktak jān wāween eo Setan ej kōņaan bwe jen ļōmņak kōn ānbwin ko ad? Ta meļeļe in bwe ānbwin ko ad rej tampeļ ko an Jetōb Kwojarjar eo? Kajjitōk ippān ro uwaan kūlaaje o n̄an pukōt uwaak ko n̄an kajjitōk kein ilo 1 Korint 6:9–20 (lele barāinwōt Katak im Bujen Ko 88:15; Moses 6:8–9).

• Iien ekōnono eo ami kōn kwojarjar eo an ānbwin ko ad emaron̄ koba juon iien bwebwenato kōn kien erreo. Bōlen kwomaron̄ kajjitōk ippān ro uwaan kūlaaj eo ta eo rej ekkatak jān Paul—barāinwōt jān kein jipan̄ ko jet an Kabun̄ in—me remaron̄ jipan̄ er kōmeļeļeik n̄an ro jet etke kein erreo ej aorōk. Jet iaan kein jipan̄ kein remaron̄ koba ko kar kōllaajraki ilo “Kein Jipan̄ ko Jet.”

Kein Jipan̄ ko jet

“Oktak ko maron̄ oktak n̄an men ko rem̧m̧an.”

Kōmeļeļe eo an Sister Sharon Eubank kōn ekōjkan an tiim in aōņōņ eo jie n̄an tōpar bōro kuk eo.

“Riaņōōņ ro rej aikuj lukkuun kate er make im ejjab iien eo wōt rej dāpij maron̄ ko rem̧ool an kajjojo iaer. Iako̧j ko rejjab wiin jān ro rejjab kōmaat aer. Riaņōōņ ro rem̧m̧an enij em̧m̧an aer ippān doon—juon eo emaron̄ tōl, juon eo emaron̄ dāpdep kadede, juon eo eperan n̄an jelm̧ae, juon eo emaron̄ kōm̧m̧an aeņōm̧m̧an. Ejjeļo̧k juon riaņōņ ej aorōkļo̧k jān bar juon, aolep im wōr tokjeer n̄an ļo̧o̧n, ak n̄e rej tin aņōōņ ippān doon, kajjojo rej aikuj kōm̧m̧an okoktak ekkar n̄an aikuj im maron̄ an ro jet—armej eo ekadu pein ij kajjieon̄ buuli, im eo eaitok pein ej kōm̧m̧an jon̄an n̄an eo ekadu pein.

“Oktak ko remaron̄ oktak n̄an jet men ko rem̧m̧an ijjeļo̧kin men ko rejjab em̧m̧an” (“Kōn Bōro Kuk ilo En̄jake Jej Bōk Kajoor ippān Anij,” Liaona, Nob. 2020, 56; lale Daniel James Brown, The Boys in the Boat: Nine Americans and Their Epic Quest for Gold ilo 1936 Berlin Olympics [2013], 161, 179).

Kōjeraam̧m̧an ko kōn erreo ilo m̧ōm̧ an kanniōk.

Jeffrey R. Holland, “Personal Purity,” Ensign, Nob. 1998, 76.

David A. Bednar, “Kōm̧ij Tōmak ilo Jetjet,” Liaona, Māe 2013, 42.

“Chastity: What Are the Limits?,” “I Choose to Be Pure” (pija in alooj ko), ChurchofJesusChrist.org

Kōkōm̧anm̧anļo̧k Ad Katakin

Kwaļo̧k naan in kam̧ool kōn Jisōs Kraist. Paul “iwōj kōn kōnono im mālōtlōt e kanooj eṃṃan, kwaļo̧k … naan in kam̧ool kōn Anij” (1 Korint 2:1). Naan in kam̧ool eo am̧ eļem waan kōn Rilo̧mo̧o̧r eo emaron̄ juon kein kareel eļap.