“O̧kwōj 14–20. Rom 7–16: ‘Anjọ Jān Nana kōn Eṃṃan,’” Itok, Ļoor Eō—N̄an Jabōt Jikuuļ: Kallim̧ur Ekāāl 2023 (2022)
“O̧kwōj 14–20. Rom 7–16,” Itok, Ļoor Eō—N̄an Jabōt Jikuuļ: 2023
O̧kwōj 14–20.
Rom 7–16.
“Anjọ Jān Nana kōn Eṃṃan”
Riiti Rom 7–16, im rekoote im̧we ko kwoj būki kōn ekōjkan jipan̄ ro uwaan kūlaaj eo ekkatak jān eoon in jeje ko rekwojarjar. Ilo am̧ kejekļo̧kjeņ kōn im̧weo ko am̧, remaron̄ tōlļo̧k n̄an m̧akūtkūt in ekkatak ko eļap meļeļeier.
Kajjitōk bwe ren Kwaļo̧k
Ļōmņak in riiti Rom 10:17 im 15:4 im kajjitōk ippān ro uwaan kūlaaj eo n̄an kwaļo̧k eoon in jeje ko rekwojarjar jān Rom 7–16 me ej kalōk tōmak eo aer ilo Jisōs Kraist ak leļo̧k n̄an er kōjatdikdik.
Katakin Katak eo
Jemaron̄ erom “ ri jolōt ippān Kraist.”
-
Āinwōt Armej ro Rekwojarjar ilo Raan-ko Āliktata, jej tōmak bwe eoon ko āinwōt kein “ri jolōt an Anij” im “ ri jolōt ippān Kraist” meļeļe ej bwe kōn jipan̄ eo an Jisōs Kraist, jemaron̄ eromļo̧k āinwōt Jemedwōj Ilan̄ im bōk aolep men ko ewōr Ippān (Rom 8:17; lale barāinwōt Katak im Bujen Ko 132:20–21). N̄an jipan̄ ro uwaan kūlaaj eo lo ekōjkan an katak in kar katakin ilo aolepān jeje ko rekwojarjar, kwomaron̄ kajjitōk ippāer n̄an ejake ruo iaan ruo ko ak kumi ko reddik im ekkatak jet iaan eoon in jeje ko rekwojarjar kar kōlaajraki ilo “Kein Jipan̄ ko Jet.” Innām ro uwaan kūlaaj eo remaron̄ kwaļo̧k ta eo raar ekkatak kake im ekōnono kōn etke katak in ej lukkuun in aorōk.
-
Waanjon̄ak eo kar letok jān Būreejtōn Dallin H. Oaks ilo “Kein Jipan̄ ko Jet” emaron̄ jipan̄ ro uwaan kūlaaj eo ekōnono kōn ekōjkan ad maron̄ m̧aanjabpopo n̄an erom “ri jolōt an Anij” (Rom 8:17). Ta jet iaan “kein ko im pedped in katak ko” Būreejtōn Oaks ej kōnono kake? Ta oktak eo ej kōm̧m̧ane ilo mour ko ad n̄an jeļā bwe jemaron̄ erom “ri jolōt an Anij, im ri jolōt ippān Kraist”? (Rom 8:17).
“Wōn enaaj kōjepeļ kōj jān iakwe eo an Kraist?”
-
Ekōnono kōn Rom 8 koba ippān emaron̄ letok juon iien em̧m̧an n̄an jipan̄ ro uwaan kūlaaj eo en̄jake iakwe eo an Rilo̧mo̧o̧r eo. Ļōmņak in kwaļo̧k juon pija in Jisōs Kraist (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko) ilo ami riiti Rom 8:18, 28, 31–39 āinwōt juon kūlaaj. Kwomaron̄ kajjitōk ippān ro uwaan kūlaaj eo n̄an kwaļo̧k jabdewōt ļōmņak ak en̄jake ko ewōr ippāer ālkin aer riiti eoon kein. Jet remaron̄ m̧ōņōņō in kwaļo̧k ekōjkan aer kar bōk naan in kam̧ool ko kōn m̧ool ko rej loi ilo eoon kein.
Aolepān kien ko an Anij rej kakūrm̧ooli ilo kien eo n̄an iakwe.
-
N̄an jipan̄ ro uwaan kūlaaj eo lo ekōjkan an aolep kien ko rej “kejel ilo” kien eo n̄an iakwe riturier (Rom 13:9), kajjitōk ippāer n̄an kōm̧m̧ane juon laajrak ioon boot eo kōn aolep kien ko remaron̄ ļōmņak kaki. Riiti ippān doon Rom 13:8–10 im Matu 22:36–40, im ekōnono kaki āinwōt juon kūlaaj kadkad eo ikōtaan Anij eo ej iakwe im ro rūturid im pokake kajjojo kien ko kar kōllaajraki ioon boot eo. Ekōjkan an m̧ool in ukōt wāween eo jej ļōmņak kōn kien ko im pokake? N̄an waanjon̄ak, ta eo m̧ool in ej elmakote kōn jibadbad eo an kien ko?
“jen jab … ekajete doon.”
-
N̄an leļo̧k jet kōļmenļo̧kjeņ ko n̄an Rom 14, kwomaron̄ kalikkar bwe jet iaan Armej ro Rekwojarjar armej in Rom ro raar iakwelel ippān doon kōn iminene in m̧anit ko, āinwōt iminene in m̧ōn̄ā im kautiej iien kakkije (holiday) ko. Ta jekjek ko reier wōt juon jej jelm̧ai rainin? Bōlen ro uwaan kūlaaj eo remaron̄ etale Rom 14 im letok juon jāntōj ilo tu kadu in kōn kapilōk eo an Paul. Ta naan in kapilōk eo jemaron̄ kwaļo̧ke ippān doon kōn ekōjkan joļo̧k ekajet? Bōlen ro uwaan kūlaaj eo remaron̄ lo ļōmņak ko ilo ennaan eo an Būreejtōn Dieter F. Uchtdorf “Tūriam̧okake Ej Bōk Tūriam̧o,” Liaona, Māe 2012, 70–77.
Kein Jipan̄ ko jet
Bōk “aolep men ko an [eo] Jema” (Katak im Bujen Ko 84:38).
-
“Erom Einwōt Anij” (Gospel Topics, topics.ChurchofJesusChrist.org)
Būreejtōn Dallin H. Oaks ekar kwaļo̧k būrabōļ in:
“Juon baba eo em̧wie ekar jeļā bwe eļan̄n̄e en kar leļo̧k m̧wie eo an n̄an juon ajri eo me ejjan̄in de eddōkļo̧k māletlet eo im eddōkļo̧k in ānbwin eo kar aikuji, menin jolet eo enaaj kar bōlen waan. Eo jemen ekar ba n̄an ajri eo nejin:
“Aolep men ko ewōr ippa ij ikdeelel n̄an liwaj n̄an kwe—ejjab m̧wie eo wōt aō, ak barāinwōt jerbal eo aō im ia eo ipād ie ibwilijin em̧m̧aan ro. Eo me ewōr ippa imaron̄ lewaj n̄an eok ejjab pen, ak bwe eo ewōr ippa kwoj aikuj in bōke kōn kwe make. Kwonaaj jetjet n̄an jolet eo am̧ kōn ekkatak ta eo ikar ekkatak im kōn mour āinwōt aō kar mour. Inaaj lewaj n̄an eok kien ko im pedped in katak ko me ikar būki kōn māletlet im jekjek. Ļoor waanjon̄ak eo aō, jeļā āinwōt aō kar jeļā, im kwonaaj erom āinwōt n̄a, im aolep bwe aolep men ewōr ippa renaaj am̧’” (“Jum̧ae eo n̄an Erom,” Ensign, Nob. 2000, 32).
Kōkōm̧anm̧anļo̧k Ad Katakin
Kappukot kein jipan̄ ko n̄an rie pedped in katak ko. Ilo kakobaba n̄an ļōmņak in katakin ko ilo unin tōl in, kwomaron̄ ukukōt m̧akūtkūt ko jān unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko n̄an kōjerbali ilo kūlaaj eo am̧. (Lale barāinwōt Teaching in the Savior’s Way, 17–18.)