Tūriam̧okake Ej Bōk Tūriam̧o
Jen Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
N̄e būruwōd ej obrak kōn iakwe eo an Anij, je erom “jouj n̄an doon, en em̧m̧an būruemi, joļo̧k nana jān doon.
Ro jeiū im jatū rejitenbōro, ejjab to Iaar bōk juon leta jān juon jinen eo einepata eo eaar akweļap kōn juon kōnono ilo kweilo̧k eo eļap kōn juon unin kōnono eo me enaaj kōjeram̧m̧an eļaptata ļaddik ro ruo nejin. Raar jino kōttoļo̧k er jān doon, im raar bōjrak aer kōnono ippān doon. Jineer eaar obrak kōn būrom̧ōj. Ilo leta eo eaar kalikkar n̄an eō bwe juon ennaan an kweilo̧k eo eļap kōn unin kōnono in enaaj kar bar kakobaik ajri ro nejin, im aolep men enaaj em̧m̧an.
Kajjitōk eo em̧ool im jān būruwōn sister in eaar juon iaan im̧we ko Iaar būki ilo allōn̄ ko rej jem̧ļo̧k ļo̧k me Ij aikuj in ba jet naan rainin kōn juon unin kōnono me ej juon n̄ūrbōktak eļapļo̧k—ejjab wōt n̄an eo jinen eaar inepata ak n̄an elōn̄ ilo Kabun̄ in im, ilo m̧ool, laļ in.
Ij bwilōn̄ kōn tōmak eo an jinen in eiakwe bwe juon enaan an kweiļo̧k eo eļap emaron̄ jipan̄ kemour jemjerā eo ikōtaan ajri ro nejin. Ij tōmak bwe lōke eo an eaar jab kanooj ļap ilo maron̄ ko rikōnono eo ak ilo “ewānik an naan in Anij,” eo eaar “eaar ļapļo̧k kajoor in an jelōt ļōmņak ko an armej ro jān … jabdewōt men.”1 Sister eo ejitōnbōro, Ij jar bwe Jetōb eo enaaj un̄ur būruwōn ajri ro nejūm̧.
Eļan̄n̄e Jemjerā ko Rej Etal im Nana
Jemjerā ko rerub im jorrāān eto aer waļo̧k toon wōt an armej mour. Cain eo etto eaar eo m̧oktata me kar kōm̧m̧an bwe en wōr an en̄jake nana im matōrtōr n̄an anjo ioon im kakkure en̄jake ko an. Eaar en̄jake ebanban im matōrtōr n̄an an eddōkļo̧k ilo e im kar kōtļo̧k bwe en̄jake kein ren kūrm̧ool m̧ae iien eaar jab ļōmņak kaki—uroor e ļaddik eo jatin make im erom ļo̧k, ilo jekjek eo, an eo Satan jemen riab.2
Jān tore eo m̧okta in bwebwenato en̄jake ko an ebanban im matōrtōr kar kōm̧m̧an bwe elōn̄ iaan bwebwenato ko rōkabūrom̧ōjm̧ōj ilo bwebwento. Eaar ukōt Saul ņae David, ro nejin Jacob ņae ļaddik eo jatier Joseph, Laman im Lamuel ņae Nipai, im Amalickiah ņae Moronai.
Ij kōtmāne bwe aolep armej ioon laļ in raar ļanootot ilo jet wāween ko kōn en̄jake in kakkure eo an akweel, illu eo, im bar kōro̧o̧l ļo̧k eo. Bōlen ewōr tore ko n̄e jej kile en̄jake in ilo kōj make. N̄e jej en̄jake metak, illu, ak ebanban, ebwe an pidodo n̄an ekajet armej ro jet, emakijkij an marok in kōketak eo kareel n̄an jerbal ko aer n̄an maron̄ kabun̄ būruwōn en̄jake ko ad make an illu.
Katak Eo
Aaet, jejeļā bwe menin ebōd. Katak eo ealikkar. Jej aolep pedped ioon Rilo̧mo̧o̧r eo; ejjeļo̧k iaad emaron̄ kar bōk lo̧mo̧o̧r elan̄n̄e ejjab kōn E. Pinmuur eo an Kraist ejjeļo̧k jem̧ļo̧k in im ej indeeo. Jeo̧rļo̧k jerawiwi ko ad ej itok kōn jekjek ko. Jej aikuj ukweļo̧k, im jej aikuj in m̧ōņōņō n̄an jeorļo̧k an ro jet bōd. Jisōs eaar katakin bwe jej aikuj jeo̧rļo̧k an doon bōd, kōnke ro me rejjab jeo̧rļo̧k aer bōd rej jutak kōn ruwier im̧aan Irooj, im jerawiwi eo eļapļo̧k ej pād wōt ilo er.3 Im “tūriam̧o, naaj tūriam̧okake er.”4
Aaet, naan kein relukkuun in jejjet—elan̄n̄e kōjerbali n̄an ro jet. Jemaron̄ lukkuun alikkar im kapidodo ad lale tōprak ko rekōmetak me rej itok n̄ero jet rej ekajet im jekpen ņae. Im em̧ool jejjab kōņaan eļan̄n̄e armej rej ekajete kōj.
Bōtaab n̄e ej itok n̄an bōd im būrom̧ōj ko ad make, emakijkij ad kwaļo̧k bwe ad illu ejim̧we im ad ekajet em̧m̧an im ejjejet. Men̄e jejjab maron̄ reiļo̧k n̄an en̄jake ko ilowaan bar juon, jej kōjatdikdik bwe jejeļā juon piktokin nana ak juon armej enana eļan̄n̄e jej lo paoktokin. Jej kōm̧mani jokalet ko n̄e ej itok n̄an makoko ko ad make kōnke jej en̄jake bwe, ilo jekjek eo ad, epād ippād aolep meļele ko jaikuji n̄an watōk ro jet rekajookok.
Rijilōk Paul ilo leta eo an n̄an Rom ro eaar ba bwe ro me rej liakeļo̧k ro jet rej “jab uwaak.” Iien eo jej ekajete jabdewōt, eaar kōmeļeļeik, jej liakeļo̧k kōj make, bwe ejjeļo̧k juon ejjab wōr an jerawiwi.5 M̧akoko in jeorļo̧k bōd ej juon jerawiwi eļap—juon Rilo̧mo̧o̧r eo eaar kakkōl ņae. Rikaļoor ro an Jisōs make raar pukōt iien ko n̄an ņa ruwōn doon im jab jeorļo̧k bōd an doon ilo būruwier. Kōnke kōn nana in, raar en̄taan im kanooj kaje er.6
Ad Rilo̧mo̧o̧r eaar lukkuun kalikkar an kōnono kōn unin kōnono in jon̄an epidodo n̄an jab meļeļe ta eo eaar ba. Rilo̧mo̧o̧r eo eaar ba bwe enaaj kar jeorļo̧k bōd an ro enaaj, bōtaab emenin aikuj n̄an kōj bwe jān jeorļo̧k bōd anaoleparmej7
Imaron̄ ke kobaik tok juon kōmeļeļe alikkar? N̄e Irooj ej aikuj bwe jān jeorļo̧k bōd an aolep armej ekoba jeorļok ad make bōd. Jet iien, ilubwilijin aolepen armej ro ilo laļ in, juon eo me epen tata jeorļo̧k an jeorļok bōd barāinwōt bōlen juon eo me eļap tata an aikuji jeorļo̧k bōd eo ad—ej armej eo ej reitok n̄an kōj ilo kūlaaj eo.
Pedped eo Eaorōk
Unin kōnono in an ekajete ro jet emaron̄ lukkuun katakin ilo ruo-wāween katakin. N̄e ej itok n̄an dike, ruruwe, kowaan, kajirere, matōrtōr, ak kōņaan kōm̧m̧an kōmetak jouj im kōjerbal kōmeļeļe in:
Kabōjrake!
Epidodo ke. Jej aikuj in kabōjrak ekajete ro jet im bōk jikin ļōmņak in ekajet ko im en̄jake ko kōn iakwe eo n̄an Anij im ajri ro Nejin. Anij ej Jemed. Jej ajri ro Nejin. Jej aolep jemjān jatin. Ijjab jeļā ewi wōt lukkuun wāween kalikkar menin aorōk an jab ekajet ro jet kōn juon alikkar ebwe, itok limo, im kareel n̄an kōm̧m̧an bwe kom̧ij kememej e iien otemjej. Imaron̄ kouti jeje ko rekwojarjar, Imaron̄ kōmeļeļeik katak eo, im em̧ool Inaaj kouti juon kōddāp ilo tulikin juon waan ettōr Iaar loe raan ko ļo̧k. Eaar eddāp iļokan juon waan ettōr eo rittōr eo eaar nana jidik tam̧m̧in, bōtaab naan ko ilo kōddāp kar katakin juon katak em̧ool. Ej riit, “Jab ekajet eō kōnke Aō jerawiwi eoktakļo̧k jān kwe.”
Jej aikuj kile bwe koj aolep jejjab wānōk—jej aikuj Anij. Jej ke aolep, ilo juon iien ak iien ko jet, pukōt jikin tūriam̧okake im akweļap kōn jouj? Jej ke kōņaan kōn aolepen kajoor an jetōb ko ad kōn tiriam̧o—n̄an jeorļo̧k ad bōk kōn bōd ko jaar kōm̧m̧ani im jerawiwi ko jaar kōm̧m̧ani?
Kōnke koj aolep jej pedped ioon tūriam̧o eo an Anij, ekōjkan ad maron̄ karmejete ro jet kōn jabdewōt jon̄ak kōn jouj eo jej lukkuun in kōņaan n̄an kōj make? Ro jeiū im jatū, jejjab ke aikuj jeorļo̧k bōd eo āinwōt ad kōņaan bwe ren jeorļo̧k ad bōd?
Iakwe eo an Anij
Epen ke n̄an kōm̧m̧ane menin?
Aaet, aaet.
Jeorļo̧k bōd ko ad make im ro jet ejjab pidodo. Ilo m̧ool, n̄an elōn̄ iaad emenin aikuj n̄an juon oktak in m̧wilid eļap im wāween ad ļōmņak—em̧ool juon oktak in bōro. Bōtaab ewōr ennaan em̧m̧an. “Oktak in ekajoor” 8 an bōro ej lukkuun ta eo ko̧jpeļ eo an Jisōs Kraist kar kajutake n̄an bōktok.
Ekōjkan an dedeļo̧k? Kōn iakwe eo an Anij.
N̄e būruwōd eobrak kōn iakwe eo an Anij, jet men rem̧m̧an im erreo rej waļo̧k n̄an kōj. Jej “kōjparok kien ko An; im kein ko An re jab eddo. “Bwe jabdewōt men eo Anij ej keotak e, ej bōk anjo̧ ioon laļ.”9
N̄e eļapļo̧k ad kōm̧m̧an bwe iakwe eo an Anij en kōjbwebweik ļōmņak ko im en̄jake ko ad—eļapļo̧k ad kōm̧m̧an bwe iakwe eo ad n̄an Jemedwōj Ilan̄ n̄an an ļapļo̧k ilo būruwōd—epidodo ļo̧k n̄an iakwe ro jet kōn juon iakwe erreo an Kraist. Ilo ad kōpeļļo̧k būruwōd n̄an iakwe eo emeram an iakwe eo an Anij, marok lep im m̧ōļo an matōrtōr im epanpan naaj āliktata jakoļo̧k.
Āinwōt iien otemjeļo̧k, Kraist ej ad waanjon̄ak. Ilo katak ko An āinwōt ilo mour eo An, Eaar kwaļo̧k n̄an kōj iaļ eo. Eaar jeorļo̧k an ro renana bōd, nana, im ro me raar pukōt n̄an kakkure im kōmetak E.
Jisōs eaar ba epidodo n̄an iakwe ro me rej iakwe kōj; em̧ool rinana eo emaron̄ kōm̧m̧an men jab in. Bōtaab Jisōs Kraist eaar katakin juon kakien eutiej ļo̧k. Naan ko An rej kōnono kaki epepen ko etto im rej jerbal wōt rainin. Rej n̄an aolep ro me rej ikdelel n̄an erom An rikaļoor. Rej n̄an kom̧ im n̄a: “yokwe ro ri kōjdate kom̧, im jar kōn ro rej matōrtōr kom̧.”10
N̄e būruwōd rej obrak kōn iakwe eo an Anij, je erom “jouj n̄an doon, en em̧m̧an būruemi, joļo̧k nana jān doon, āinwōt Anij ilo Kraist Ear joļo̧k ami nana.”11
Iakwe eo em̧ool an Kraist emaron̄ kōm̧akūt ļo̧k en̄jake ko an dike im illu me rej kareel ad lale men ko, kōm̧m̧an bwe jān lo ro jet ilo wāween eo Jemedwōj Ilan̄ ej lo kōj: jejjab armej ro rejejjet im weppān me ewōr aer kōjatdikdik im aorōk eļapļo̧k jān maron̄ eo ad n̄an ļōmņake. Kōnke Anij eļap an iakwe kōj, jej aikuj barāinwōt iakwe im jeorļo̧k an doon bōd.
Wāween eo an Rikaļoor
Ro jeiū im jatū rejitenbōro, ļōmņak kōn kajjitōk kein āinwōt juon ami make teej:
Kwoj ke dāpij dike ņae ro jet?
Kwoj ke ruruwe, em̧ool eļan̄n̄e ta eo kwoj ba emaron̄ m̧ool?
Kwoj ke kōttoļo̧k eok make, ak iuun ļo̧k ro jet kōn jet men raar kōm̧m̧ani?
Kwoj ke ilo ittiņo ebanban e ro jet?
Kwoj ke kōņaan kōm̧m̧an jorrāān n̄an ro jet?
Eļan̄n̄e kwoj uwaak aaet n̄an kajjitōk kein, komaron̄ kōņaan kōjerbal ruo-wāween katakin eo m̧okta ļo̧k: Kabōjrak e!
Ilo juon laļ in ņotaik im lāj, epidodo n̄an lo un ko n̄an dike doon im kōm̧m̧an n̄an doon kōn jab kautiej. Bōtaab m̧okta jān ad kōm̧m̧ane āindein, jān kememej naan ko an Juon eo me ej ad M̧aajta im waanjon̄ak: “Eo iaami ejjeļo̧k an jero̧wiwi, en kade m̧okta kōj juon dekā.”12
Ro jeiū im jatū, jen door laļ ļo̧k dekā ko ad.
Jān jouj.
Jān jeorļo̧k bōd.
Jān kōnono aenōm̧m̧an ippān doon.
Kōm̧m̧an bwe iakwe eo an Anij ej kobrak būruwōd.
“Jen jerbale em̧m̧an n̄an armej otemjej.”13
Rilo̧mo̧o̧r eo eaar kalim̧m̧ur: “Kom̧win leļo̧k, im naaj lewōj n̄an kom̧; jon̄ak em̧m̧an, jooni, kōm̧akūti, im jiōbļo̧k naaj. … Bwe kōn jon̄ak eo kom̧ij jon̄ak kake [kwoj kōjerbale] naaj jon̄ak n̄an kom̧.”14
Kalim̧m̧ur in ej aikuj in ke kar bwe n̄an iien otemjej pedped wōt ioon kijejeto ko ad ioon m̧akūtkūt ko an jouj, jeorļo̧k bōd, im iakwe erreo eo ijello̧kin jabdewōt m̧wil nana?
Kōm̧m̧an bwe jān, āinwōt rikaļoor ro an Jisōs Kraist, ukōt ļo̧k nana kōn em̧m̧an.15 Kōm̧m̧an bwe jān jab ukōt ļo̧k ak kōtļo̧k bwe ad illu en anjo̧ iood.
“Bwe em̧ōj je, Kuņaō iden-oņe, Inaaj ņa oņeam̧, Irooj ej ba.
“A eļan̄n̄e eo ej kōjdate eok e kwōle, kwōn naajdik e; eļan̄n̄e e maro, kwōn kaidaak e . …
“Nana en jab anjo̧ jān eok, a kwōn anjo̧ jān nana kōn em̧m̧an.”16
Kememej: ilo jem̧ļo̧k in, ej tiriam̧okake eo ej bōk tiriam̧o.17
Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata, jekdo̧on ia eo jemaron̄ pād ie, kōm̧m̧an bwe ren jeļā kajied āinwōt juon armej eo me “kom̧ij yokwe doon.”18
Iakwe Doon
Ro jeiū im jatū, ebwe metak in bar im būrom̧ōj ilo mour in ilo ad jab kobaik ļo̧k n̄an e kōn kiliddep eo an make, kūtōtō, im matōrtōr.
Jejjab weppān.
Armej ro ipeļakiid rejjab weppān.19 Armej rej kōm̧m̧ani men ko me rekōmatōrtōr, rōkaeinepata, im kallulu. Ilo mour wabanban in enaaj iien otemjej āindein.
Mekarta, jej aikuj kōtļo̧k jekpen ņae ko ad. M̧ōttan jipadpad eo an mour wabanban eo ej n̄an katak ekōjkan joļo̧k kain men rōt kein. Ej meļeļe in wāween eo an Irooj.
Kememej, lan̄ eobrak kōn ro me ewōr ejja menin in wōt ippāer: Rej meļo̧kļo̧k i. Im rej jeorļo̧k aer bōd.
Door eddo ko ami ilo neen Rilo̧mo̧o̧r eo. Joļo̧k ekajet. Kōtļo̧k bwe Pinmuur eo an Kraist en ukōt im kemour būruwōmi. Iakwe doon. Jeorļo̧k an doon bōd.
Tūriam̧okake enaaj bōk tūriam̧o.
Kōn menin Ij kam̧ool ilo etan Eo me eaar lukkuun jejjet an iakwe im lukkuun kakkūrmool me Eaar letok An mour kon koj, ro M̧ōttan—ilo etan Jisōs Kraist, amen.