Kajoor in Lo̧mo̧ren eo
Jen Elder L. Tom Perry
Jen Doulul eo an Jon̄oulruo Rijilōk ro
Maron̄ kōjo̧o̧r kōj jān wāaween ko an nana im jerawiwi jān oktak ļo̧k n̄an katak ko an jeje ko rekwojarjar.
Ewōr juon m̧ōtta eo elukkuun in em̧m̧an eo eaar jilkintok juon tae n̄an kōņake ilo m̧wein̄an eo Iaar kōnono ilo kajjojo kweilo̧k ko reļļap. Ejeļā ekālel, kom̧ij errā ke?
In m̧ōtta edik ewōr jet apan̄ ko an reppen, im rej bōbrae ilo jet wāween ko, bōtaab ilo wāween ko jet e ejej uwaan. N̄an waanjon̄ak, an peran āinwōt mijenede eo maron̄ keidik n̄an e ej ļōmaro nejin Mosaia. Ij tōmak menin ej kōnke tōmak eo an ejej uwaan ekōm̧m̧an bwe tōmak eo an en dim. Ij tōmak ilo ļōmņak eo an Scott epen tōmak e bwe ejjab aolep ej membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata im bwe ejjab aolep raar riiti Bok in Mormon im ejjeļo̧k juon naan in kam̧ool kōn tallep in m̧ool eo an.
In jiron̄ kom̧ kōn juon iien ilo mour eo an Scott ke eaar kōm̧m̧ane ekāke eo an kein kajuon make n̄an loļo̧k būratōr eo an. Juon armej eo eaar jijet epaake e eaar ron̄ an Scott bwebwenato ippān juon armej ej jijet wōt turin:
“Iakwe, eta in Scott. Etam̧?”
Eo m̧ōttan ej jijet turin eaar kwaļo̧k etan.
“Ta jerbal eo am̧?”
“Ij juon engineer.”
“Em̧m̧an. Kwoj jokwe ia?”
“Ilo Las Vegas.”
“Ewōr juon am tampeļ ijōņ. Kwojeļā ke ia eo tampeļ eo an Mormon ej pād ie?”
“Aaet. Ej juon em̧ eaiboojoj.”
“Kwe ke Mormon.?”
“Jaab.”
“Ekwe, kwoj aikuj. Ej juon kabun̄ em̧m̧an. Em̧ōj ke am̧ riiti Bok in Mormon?”
“Jaab.”
“Ekwe, kwoj aikuj. Ej juon bok em̧m̧an.”
Ij errā kōn aolepen būruwō ippān Scott—Bok in Mormon ej juon bok em̧m̧an. Naan ko an Rikanaan Joseph Smith kar kouti ilo peij in kōmeļeļe eo an Bok in Mormon iien otemjej raar aorōk n̄an n̄a: “Iaar jiron̄ em̧m̧aan ro jeiū im jatū rej tōl tōmak in bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jaabdewōt bok ko jet.”
Iiō in ilo kūlaj in Jabōt Jikuuļ ko ad, jej ekkatak kōn Bok in Mormon. Ilo ad kōppopo im bōk kuņaad, emaron̄ itok limoid n̄an ļoor waanjon̄ak eo ekajoor an Scott n̄an kwaļo̧k iakwe eo ad kōn jeje kein rekwojarjar raorōk ippān ro jet rejjab jān tōmak in ad.
Unin tōl eo eļap an Bok in Mormon ej waļo̧k ilo eoon eo āliktata in jepta juon in 1 Nipai. Nipai ej je, “A lo, n̄a, Nipai, naaj kwaļo̧k n̄an kom̧ bwe kōn tiriam̧o an Irooj ej pād ioon aolep ro Eaar kālōt, kōn aer tōmak, n̄an kōm̧m̧an bwe ren kajoor em̧ool n̄an lo̧mo̧ren er make” (1 Nipai 1:20).
Ikōņaan kōnono kōn ekōjkan an Bok in Mormon, eo ej juon tiriam̧o eļap an Irooj kar kejparok e n̄an raan kein āliktata, kōjo̧o̧r kōj kōn katakin kōj ilo juon wāween erreo im “jim̧we tata” katak eo an Kraist.
Elōn̄ iaan bwebwenato ko jān Bok in Mormon rej bwebwenato in kōjo̧o̧r ko. Em̧m̧akūt eo an Liai n̄an āne jem̧aden ippān baam̧le eo an eaar kōn kōjo̧o̧r jān kakkure eo an Jerusalem. Bwebwenato eo an RiJared ro ej juon bwebwenato in kōjo̧o̧r, ejja āinwōt bwebwenato eo an RiMulek ro. Alma eo Edik kar kōjo̧o̧r e jān jerawiwi. Ritariņae ro an Helamōn kar kōjo̧o̧r er ilo pata eo. Nipai im Liai kar kōjo̧o̧r er jān kalbuuj. Unin kōnono kōn kōjo̧o̧r ej kein kam̧ool ilo aolepen Bok in Mormon.
Ewōr ruo bwebwenato ilo Bok in Mormon me relukkuun eier wōt juon im rej katakin juon katak aorōk. Eo m̧oktata jān bok in Mosaia, ijjino ilo jepta 20th. Ijin jej katak kōn Kiin̄ Limhi kar jokwe ilo ānen Nipai. RiLamen ro kanooj tariņaeik armej ro an Limhi. Tōprak in pata eo eaar RiLaman ro raar kōm̧m̧an bwe Kiin̄ Limhi en kakiene armej ro an, ak renaaj kar pād ilo kōm̧akoko n̄an er. Eaar juon kauwōtata eļap an aenōm̧m̧an. (Lale Mosaia 19–20.)
Ke armej ro an Limhi raar m̧ōk kōn kakkure ko an RiLaman ro, raar kareel kiin̄ eo n̄an tariņae ņae er. Jilu kōttan aer jorrāān. Eddo ko reddo kar likūt ioer. Āliktata raar kōttāik er make im kajoor ilo jar n̄an Irooj bwe En maron̄ kōjo̧o̧r er. (Lale Mosaia 21:1–14.) Eoon 15 ilo jepta 21 ej jiron̄ kōj kōn uwaak eo an Irooj: “Im kiiō Irooj eaar rum̧wij n̄an ron̄ kūr eo aer kōnke jerawiwi ko aer; mekarta Irooj eaar ron̄ kūr ko aer, im jino kapidodo buruōn ri Leman ro bwe ren jino kōmeraikļo̧k eddo ko aer; ijoke Irooj eaar jab lo ekkar bwe En kōtļo̧k er jān kōm̧akoko.”
Ejjab to ālkin an Ammon im juon kumi in em̧m̧aan edik jān Zarahemla kar jikrōk tok, im ippān Gideon—juon iaan ritōl ro an armej ro doon Limhi—raar kōm̧m̧ane juon karōk me eaar jejjet, im raar ko jān kakkure ko an RiLaman ro. Irooj eaar rum̧wij n̄an ron̄ jar ko aer. Ekte? Kōnke kōn jerawiwi ko aer.
Bwebwenato eo kein karuo ejja āinwōt ilo elōn̄ jekjek ko ak barāinwōt pen. Bwebwenato eo kar ļo̧o̧ke ilo Mosaia 24.
Alma im ro doon raar jokwe ilo ānen Helam, ke juon kumi in jarin tariņae an RiLaman ro raar itok n̄an tōrerein āne eo. Raar ioon er im jerbale juon mejļan aenōm̧m̧an. (Lale Mosaia 23:25–29.) Ejjab to ritōl ro an RiLaman ro raar jino kakijn̄en̄eik kōņaan eo aer ioon ro doon Alma im kar likūt eddo ko reddo ioer n̄an ineeki (lale Mosaia 24:8). Iloeoon 13 jej riiti, “Im ālkin men kein, ainikien Irooj eaar itok n̄an er ilo en̄taan ko aer, im ba: Kom̧in kotak bōrami im kom̧in inem̧m̧an, bwe I jeļā kōn bujen eo kkom̧ ar kōm̧m̧ane n̄an Eō; im Inaaj bujen ippān armej ro Aō im kōtļo̧k er jān kōm̧akoko.”
Armej ro doon Alma kar kōjo̧o̧r er jān pā ko pein RiLaman ro im ilo inem̧m̧an kar bar ro̧o̧l ļo̧k n̄an bar koba ippān armej ro doon Zarahemla.
Ta kar oktak eo ikōtaan armej ro doon Alma im armej ro doon Kiin̄ Limhi? Ealikkar, eaar wōr jet oktak ko: armej ro doon Alma raar aenōm̧m̧an im ļapļo̧k aer jim̧we; em̧ōj kadede kar aer peptaij im deļo̧n̄ ilo juon bujen ippān Irooj; raar kōttāik er make im̧aan Irooj em̧ool m̧okta jān an kar jorrāān ko aer ijjino. Aolep oktak kein raar kōm̧m̧ane bwe en jejjet im em̧m̧an jon̄an Irooj eaar m̧ōkaj an kōjo̧o̧r er ilo juon wāween ekabwilōn̄lōn̄ jān pein ro raar dāpij er ilo kōm̧akoko. Eoon kein rej katakin kōj kōn kajoor in kōjo̧o̧r eo an Irooj.
Kanaan ko rej kanaan kōn mour im mijen eo an Jisōs Kraist kar kalim̧m̧uri kōj kōn kōjo̧o̧r eo me Enaaj kar letok. Pinmuur eo An im Jerkakpeje eo rej letok n̄an kōj aolep juon jo̧o̧r jān mej ilo kanniōk im, eļan̄n̄e ukweļo̧k, jo̧o̧r jān mej ilo jetōb, ej bōktok ippān tok kōjeram̧m̧an ko an mour indeeo. Kalim̧m̧ur ko an Pinmuur eo im Jerkakpeje eo, kalim̧m̧ūr ko an kōjo̧o̧r eo jān mej ilo kanniōk im jetōb, Jemedwōj Ilan̄ eaar kwaļo̧k n̄an Moses bwe jerbal im aiboojoj eo An ej n̄an bōktok mour jab wabanban im mour indeeo an armej (lale Moses 1:39).
Ilo jum̧ae tōmak ko raiboojoj kar kōm̧m̧ani n̄an kōj ilo jeje ko rekwojarjar, jej lo kajoor in jum̧ae ko an rijum̧ae rej jum̧ae tōmak ko eto aer pād ilo jeje ko rekwojarjar—jeje ko me kar letok n̄an kōj tōl eo ilo aolepen epepen kein rellōn̄ ilo kōmeļeļeik aorōk ko indeeo im jon̄ak ko n̄an m̧wil eo ad ilo aolepen mour. Rej kwaļo̧k katak ko ilo Baibōļ rej riab im katak ko an M̧aaj ta eo ejem̧ļo̧k kitier. Ainikien ko aer rej ikōn̄ jon̄an kajjojo armej ej aikuj wōr anemkwoj n̄an kōm̧m̧ane jon̄ak ko an make; rej kajieon̄ ukōt jim̧we ko an ro rej tōmak, eoktak jān ta eo kar katakin ilo jeje ko rekwojarjar im ilo naan ko an rikanaan ro.
Ej juon kōjeram̧m̧an n̄an bōk bwebwenato eo kōn mijen eo an ad Irooj im Rilo̧mo̧o̧r ke eaar kwaļo̧k ilo Bok in Mormon n̄an kobaik tok kein kam̧ool eo kein karuo n̄an katak eo kar kwaļo̧k ilo Baibōļ. Etke eaorōk n̄an laļ in n̄an bōk jim̧or Baibōl eo im Bok in Mormon? Ij tōmak uwaak eo ej pād ilo 13th jepta in 1 Nipai. Nipai ej ļo̧o̧k e: “Im enjeļ eo eaar kōnono n̄a eō, im ba: Ļo̧o̧k kein ālik, ko im kwaar loi ibwilijin ro ri Aelōn̄ ko [Bok in Mormon], naaj kajutak m̧ool eo m̧okta [Baibōļ], ko kōn ri jilōk ro jon̄oulruo an Lam eo, im naaj kwaļo̧k men ko realikkar im reaorōk, ko em̧ōj kar bōk jān er; im naaj kwaļo̧k n̄an aolep laļ, lo, im armej, bwe Lam in Anij ej eo Nejin Anij Indeeo, im ri Lo̧mo̧r in laļ, im bwe aolep armej rej aikuj itok n̄an E, ak reban mour”(eoon 40).
Jekdo̧o̧n n̄e Baibōļ ak Bok in Mormon rej pād im kōn er make ejjab bwe. Erro jim̧or rej menin aikuj n̄an kōj n̄an katakin im katak kōn tallep im likieo in katak eo an Kraist. Aikuj eo n̄an bar eo juon ejjab kōjparōk erro jim̧or. Jim̧or Baibōl im Bok in Mormon rej menin aikuj n̄an lo̧mo̧o̧r im mour āinwōt Anij eo ad. Āinwōt an Būreejtōn Ezra Taft Benson kanooj kajoor an kar katakin: “N̄e jim̧or kōjerbali, Baibōļ eo im Bok in Mormon rej kakkure katak ko rebōd” (“A New Witness for Christ,” Ensign,Nob. 1984, 8).
Ikōņaan kiil kōn kwaļo̧k ruo bwebwenato ko—juon jān Kalim̧m̧ur M̧okta, im eo juon jān Bok in Mormon—n̄an kwaļo̧k ekōjkan an bok ko jerbal jokkun wōt juon ippān doon.
Bwebwenato eo kōn Abraham kōn kōjo̧o̧r eo an jān RiChaldean ro rej kabun̄ n̄an ekjab (lale Jenesis 11:27–31; Abraham 2:1–4). E im kōrā eo pāleen, Sarah, tok ālik jo̧o̧r jān būrom̧ōj eo aer im kar kalim̧m̧ūr bwe kōn ineer aolep laļ ko an laļ in renaaj kar jeram̧m̧an (lale Jenesis 18:18).
Kalim̧m̧ur M̧okta epād ie bwebwenato eo kōn an Abraham bōk Lot, ļaddik eo man̄eden, ippān jān Egypt. Kar leļo̧k n̄an e kālet eo m̧oktata kōn āne eo, Lot eaar kālet meļaaj in Jordan, im eaar kajutak em̧ nuknuk eo an kajujel ļo̧k n̄an Sodom, juon jikin kweilo̧k nana. (Lale Jenesis 13:1–12.) Elōn̄ wōt iaan jorrāān ko me Lot tok ālik eaar jujelm̧ai ilo mour, im raar ellōn̄, maron̄ ba tok jān kar jokālet eo an im̧aan ļo̧k n̄an kajitļo̧k kōjām in em̧ nuknuk eo an n̄an Sodom.
Abraham, jemen ritōmak, eaar ioon apan̄ an mour. Em̧ool, eaar lōn̄ apan̄ ko, bōtaab eaar juon mour ejeram̧m̧an. Jejjab jeļā ewi wōt wāween eo Abraham eaar kajujel ļo̧k kōjām in em̧ nuknuk eo an, bōtaab ewōr jet men ko ilo eoon eo āliktata in jepta 13th in Jenesis. Ej kwaļo̧k: “Innām Ebram [ak Abraham] ear kōm̧m̧akūt an m̧ōn kōppā im iten jokwe iturin wōjke ok ko an Mamre, ko rej pād i Hiborn, im ijo ear kalōk juon lokatok n̄an Jeova” (Jenesis 13:18).
Ilo aō jab jeļā, Ij tōmak kōn n̄a make kōjām eo an em̧ nuknuk eo an Abraham eaar jujel ļo̧k n̄an lokatok eo eaar kalōk e n̄an Irooj. Ekōjkan aō kōm̧m̧ane jem̧ļo̧k in? Ej kōnke Ijeļā bwebwenato eo kōn Bok in Mormon kōn kōmeļeļek ko an Kiin̄ Benjamin n̄an armej ro doon ke raar koba ippān doon n̄an ron̄jake kōnono eo an āliktata. Kiin̄ Benjamin eaar jiron̄ er n̄an kajujel ļo̧k kōjām in em̧ nuknuk ko aer n̄an tampeļ eo. (lale Mosaia 2:1–6).
Maron̄ kōjo̧o̧r kōj jān wāaween ko an nana im jerawiwi jān oktak ļo̧k n̄an katak ko an jeje ko rekwojarjar. Rilo̧mo̧o̧r eo ej rikōjo̧o̧r eo eļap, bwe Ej kōjo̧o̧r kōj jān mej im jān jerawiwi (lale Rom 11:26; ; 2 Nipai 9:12).
Ij kwaļo̧k bwe Jisōs ej RiKraist eo im jemaron̄ epaakeļo̧k E jān riiti Bok in Mormon. Bok in Mormon eo ej bar juon kalim̧m̧ur kōn Jisōs Kraist. Kalim̧m̧ur ko m̧oktata kōn Jisōs Kraist rej Kalim̧m̧ur M̧okta im Kalim̧m̧ur Ekāāl—ak Baibōļ eo.
Bar juon alen, jān kememej kōmeļeļe eo an eo m̧ōttan Scott kōn Bok in Mormon: “Ej juon bok em̧m̧an.” Im Ij kam̧ool n̄an kom̧ bwe ijo em̧m̧an tata an Bok in Mormon ej itok jān jokkun wōt juon ippān Baibōļ Kwojarjar eo, ilo etan Jisōs Kraist, amen.