Idajon̄jon̄ ko n̄an Anjo̧ Ioer
Jen Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kaj
Eļan̄n̄e ewōr ad tōmak ilo Jisōs Kraist, iien ko reppen tata im barāinwōt pidodo tata ilo mour maron̄ erom juon kōjeram̧m̧an
Iaar ron̄ an Būreejtōn Spencer W. Kimball, ilo juon m̧wein̄an in juon kweilo̧k kar kajjitōk bwe Anij en kar leļo̧k n̄an e idajon̄jon̄ ko n̄an anjo̧ ioer. Eaar ba: “Ewōr apan̄ ko reļļap im̧aad, iien ko reļļap rem̧m̧an n̄an tōpari. Ij karuwaineneik itok limo eo kōtmene kaki im en̄jake eo n̄an kōņaan ba n̄an Irooj, ilo ettā, ‘Letok n̄an eō idajon̄jon̄ kein,’ letok n̄an eō apan̄ kein.”1
Būruwō eaar im̧we, jeļā, āinwōt Iaar, jet iaan idajon̄jon̄ ko im apan̄ eo em̧ōj de an kar jelm̧ae. Iaar en̄jake juon ikirelel n̄an erom ļo̧k āinwōt e, juon rikarejeran Anij eperan. Ejjab to ālkin iien eo, juon bon̄ Iaar jar kōn juon teej n̄an kam̧ool kōn peran eo aō. Imaron̄ kememej ilo alikkar. Ilo joten eo Iaar bukwelōlō ilo jikin kiki eo aō kōn juon tōmak me eaar kobrak būruwō n̄an rup.
Ium̧win juon ak ruo raan ko jar eo aō eaar uwaak. Mālijon̄ eo epen tata an mour eo aō eaar kailbōkbōk im kōttāik eō. Eaar letok n̄an eō juon katak ruo m̧ōttan. M̧oktata, eaar ewōr aō kein kam̧ool bwe Anij eaar ron̄ im uwaake jar in tōmak eo aō. Ak eo kein karuo, Iaar jino katak eo me Ij katak wōt kake rainin n̄an katak kōn etke Iaar en̄jake lōke eo bwe joten eo juon kōjeram̧m̧an eļap emaron̄ itok jān apan̄ eo me eaar itok eļapļo̧k jān kōļļāik jabdewōt likjab.
Apan̄ eo eaar Iaar en̄jake raan ko jem̧aan kiiō āinwōt edik n̄an ta eo eaar waļo̧k jān tōre eo—n̄an n̄a im n̄an ro Iaar iakwe er. Elōn̄ iaami rej kiiō eļļā jān mālijon̄ ko an ānbwiin, ļōmņak, im en̄jake me maron̄ kar kōm̧m̧an bwe kom̧ij jar āinwōt juon rikarejeran Anij eļap im tiljek Iaar kanooj jeļā kajien. Nōōj eo an eaar ron̄ an kwaļo̧k e jān an metak, “Ke iaar kajieon̄ ilo aolepen aō mour n̄an erom em̧m̧an, etke menin eaar waļo̧k n̄an eō?”
Kom jeļā ekōjkan an Irooj kar uwaake kajjitōk eo n̄an Rikanaan Joseph Smith ilo jikin kalbuuj eo an:
Irooj eaar jiron̄ Joseph Smith bwe eļan̄n̄e aikuj in kar joļo̧k ilo ron̄, ak n̄an pein ruroor ro, im jem̧ļo̧k eo an mej eaar eļļā jān e; eļan̄n̄e ej aikuj in kar joļo̧k e ilo m̧wilaļ in dān ko; eļan̄n̄e n̄ōl in ņo ko rej jum̧ae e; eļan̄n̄e kōto ko rekajoor rej erom an rikejdet; eļan̄n̄e lan̄ko rej aiin marok lep, im aolep men ko rej koba n̄an jelm̧ae wāween eo; im ilōn̄ in men otemjej, eļan̄n̄e lon̄iin hell ej peļļo̧k leplep e lon̄iin n̄an kwe, kwoj aikuj jeļā bwe aolep men kein renaaj lewaj n̄an eok en̄jake, im naaj n̄an em̧m̧an eo am̧.
Irooj eaar ba bwe Nejin Armej emōj jilkintok ilaļ in aolepeer, Joseph eaar ke ļapļo̧k jān E?
Irooj eaar ba n̄an dāpij wōt wāween eo, im priesthood eo ej aikuj pād wōt ippān; bwe jon̄ak ko aer em̧ōj kōm̧m̧ani, rejjab maron̄ eļļā. Raan ko an Joseph kar jeļā kaki, im iiō ko an rejjab aikuj lōn̄ jon̄aer; ej aikuj jab mijak ta eo armej remaron̄ kōm̧m̧ane, bwe Anij enaaj pād ippān n̄an indeeo im indeeo.2
Āinwōt n̄an n̄a ejjeļo̧k bar uwaak em̧m̧an ļo̧k n̄an n̄a jān uwaak eo n̄an kajjitōk eo etke mālijon̄ ko rej itok im ta eo jej kōm̧m̧ane jān naan ko an Irooj Make, eo eaar eļļā jān mālijon̄ ko n̄an kōj me eļapļo̧k ad jorrāān jān ad maron̄ ļōmņake.
Komij kememej naan ko An ke Eaar kapilōk me jej aikuj, jān tōmak eo ilo e, ukweļo̧k:
Rilo̧mo̧o̧r eaar kakien e kōj n̄an ukweļo̧k n̄e jaab Enaaj kakkure kōj kōn An in naan im kōn An inepata im An illu, im en̄taan ko ad naaj ļap—ewi jon̄an aer ļap jejjab jeļā, ewi jon̄an an aiboojoj jejjab jeļā, ewi jon̄an aer pen n̄an būki jejjab jeļā.
Rilo̧mo̧o̧r eaar ba bwe eaar en̄taan kōn men kein n̄an aolep bwe ren jab maron̄ en̄taan eļan̄n̄e renaaj ukweļo̧k.
Rilo̧mo̧o̧r eaar ba bwe eļan̄n̄e armej rejjamin naaj ukweļo̧k, rej aikuj in en̄taan em̧ool āinwōt Eaar.
En̄taan eo an eaar kōm̧m̧an bwe e, em̧ool Anij, eo eļaptata iaan aolep, n̄an udiddid kōnke kōn metak, to̧o̧r bōtōktōk ilo aolep ron̄ in ānbwiin, im en̄taan jim̧or ilo ānbwiin im jetōb. Metak eo eaar kanooj ļap jon̄an eaar kajjitōk eļan̄n̄e emaron̄ n̄an e n̄an an anjo ioon;
Mekarta, Eaar leļo̧k aiboojoj eo n̄an Jemen, Eaar bōk m̧ōttan im kōjem̧ļo̧k kōppopo ko An n̄an kōj.3
Kom̧ im n̄a ewōr ad tōmak bwe wāween eo n̄an ļōn̄jak ilo im ilōn̄ in mālijon̄ ko ej n̄an tōmak bwe ewōr juon “wūno ilo Gilead”4 im bwe Irooj eaar kalim̧m̧ur, “I jāmin … ilo̧k jān eok.”5 En̄in ej ta eo Būreejtōn Thomas S. Monson eaar katakin kōj n̄an jipan̄ kōj im ro jej jerbal n̄an er ilo ta eo āinwōt emake ļo̧k im tōr jān jon̄an mālijon̄ ko.6
Ak Būreejtōn Monson eaar barāinwōt katakin ilo lo̧ļe bwe juon pedped in tōmak ilo m̧ool eo in an kalim̧m̧ur ko ebōk iien n̄an kalōke. Kom̧ maron̄ kar lo aikuj eo n̄an pedped eo ilo jikin kiki eo an juon eo epojak in ebbwer jān tariņae eo n̄an jipan̄ er niknik n̄an jem̧ļo̧k in. Eļan̄n̄e pedped eo an tōmak ejjab juon m̧ōttan būruwōd, kajoor eo n̄an niknik enaaj likjab.
Jibadbad eo aō rainin ej n̄an kōmeļeļeik ta eo Ijeļā kōn ewi wāween jemaron̄ kōm̧m̧ane me ej juon pedped edim. Ij kōm̧m̧ane kōn ettā eļap kōn ruo un ko. M̧oktata, ta eo Ij ba emaron̄ kabbwer jet ro me rej kakkōt ilo ioļapļap in apan̄ eo eļap im maron̄ en̄jake bwe pedped in tōmak eo aer ej jepepļo̧k. Im kein karuo, Ijeļā bwe em̧ool eļapļo̧k teej ko rej pād im̧aaō m̧okta jān an mour in jem̧ļok. Kapilōk eo Ij lewaj n̄an kom̧ ejjan̄in de kam̧oole kōn niknik eo aō make n̄an jem̧ļo̧k in.
Āinwōt juon kar likao Iaar jerbal ippān juon kontōrāāk in kōm̧m̧an pedped ko im bauntiejen ko in em̧ ko n̄an m̧ōko rekāāl. Ilo bwil in jōm̧m̧an ekaar pen n̄an jerbal n̄an kōpooj bwidej eo n̄an boom̧ eo me kōm̧ kar lukōt jimeņ eo n̄an pedped eo. Eaar ejjeļo̧k mijiin. Kōm kar ekkotak im jabōļ. Kajutak bauntiejen ko me renaaj to aer pād eaar jerbal pen ilo raan ko.
Eaar barāinwōt aikuj kijenmej. Ālkin am kar erake pedped eo kōm kar kōttar n̄an an m̧ōrā. Jon̄an wōt am kar kōņaan kōm̧ōkaj jerbal ko, kōm kar kōttar barāinwōt ālkin am erake pedped eo m̧okta jān am kar rupe boom̧ ko.
Im em̧ool ekanooj ļapļo̧k an kōpaļpaļ n̄an juo rikkal eo ekāāl eaar ta eo eaar āinwōt juon iien eo ejelimo im ebōk iien n̄an kōkōm̧anm̧an likūt baar ko ilowaan boom̧ ko n̄an kadedeļo̧k kapen pedped eo.
Ilo ejja wāween eo wōt, bwidej eo ej aikuj in kōkōm̧anm̧ōn kōpooj e n̄an pedped eo ad an tōmak n̄an jutak ņae lan̄ ko me renaaj itok n̄an mour otemjeļo̧k. Pedped in ekajoor n̄an juon pedped an tōmak ej m̧ool eo an juon make.
Ad kālet jim̧we eo ejjab m̧wijkōk jabdewōt iien kālet eo ej likūt im̧aad ej ejake pedped eo edim ium̧win tōmak eo ad. Emaron̄ jino ilo ad ajri wōt jān an aolep jetōb ej ļotak kōn menin letok eo an Jetōb eo an Kraist. Kōn Jetōb eo jemaron̄ jeļā n̄e eo jaar kōm̧m̧ane ta eo ejim̧we im̧aan Anij im n̄e jaar kōm̧m̧an bōd im̧aan Mejān.
Kālet ko, ko rej waļo̧k buki kōttan ilo enan̄in aolep raan, kōpooj pedped eo edim me im̧ōn tōmak eo ad ej ekkal ie. Wujkinen eo ipeļaakin me ej kein jerbal eo an tōmake eo ad ej lukōt ie ej ko̧jpeļ eo an Jisōs Kraist, kōn aolepen bujen ko an, kain̄i ko, im pedped ko.
Juon iaan kii ko n̄an niknik ilo tōmak ej lale iien eo ejejjet n̄an ad kapen ļo̧k. En̄in ej etke Iaar jab lo̧ļe n̄an kōļļā ilo iien eo em̧ōkaj tata ilo mour e aō kōn idajon̄jon̄ ko reutiej ļo̧k n̄an anjo̧ ioer im teej ko reļļap ļo̧k.
Kemour ejjab kajju itok kōn wāween iien, bōtaab ebōk iien. Rūttoļo̧k ejjab make kōm̧m̧ane. Ej jerbal n̄an Anij im ro jet ilo kije kōn aolepen būruwōd im ad me ej ukōt naan in kam̧ool eo ad kōn tōmak n̄an kajoor in jetōb eo epen an rup.
Kiiō, Ikōņaan kōketak ro me rej pād ilo ibwilijin mālijon̄ ko reppen, ro rej en̄jake tōmak eo aaer emaron̄ in bwe ra dik ļo̧k ium̧win inepata ejjab jem̧ļo̧k an inepata. Mālijon̄ make emaron̄ wāween eo ami n̄an kajoorļo̧k im āliktata bōk juon tōmak edim. Moronai, m̧aan eo nejin Mormon ilo Bok in Mormon, kar jiron̄ kōj ekōjkan bwe kōjeram̧m̧an eo en maron̄ kūrm̧ool. Ej katakin m̧ool eo ejej uwaan im em̧m̧an me ej jerbal em̧ool jon̄an eo edik an tōmak ej kōm̧m̧an bwe Anij en kōļapļok:
“Im kiiō, n̄a, Moronai, in kōnono jidik kōn men kein; In kwaļo̧k n̄an laļ bwe tōmak ej men ko kōjatdikdik kaki im jab loi; kōn menin, jab jum̧ae kōnke kom̧ij jab lo, bwe kom̧ij bōk ejjeļo̧k kam̧ool m̧ae ālkin melijon̄ in ami tōmak.
“Bwe eaar kōn tōmak Kraist eaar kwaļo̧k E make n̄an ro jemām, ālkin An kar jerkak jān ro remej; im Eaar jab kwaļo̧ke n̄an er m̧ae ālkin an kar wōr aer tōmak ilo E, bwe Eaar kwaļo̧k E make jab n̄an laļ.
“Ak kōn tōmak an armej Eaar kwaļo̧k E make n̄an laļ, im kaiboojoj etan Jemān, im kar kōpooj iaļ eo bwe ro jet ren maron̄ ri bōk jān menin letok jān lan̄, bwe ren maron̄ kōjatdikdik kōn men ko rejjab kar loi.
“Kōn menin, kom̧ maron̄ barāinwōt wōr ami kōjatdikdik, im ri bōk jān men in letok eo, eļan̄n̄e kom̧ naaj ak wōr ami tōmak.”7
M̧ōttan eo an tōmak in ekanooj aorōk tata im me kwoj aikuj kejparoke im kōjerbale ilo jabewōt jekjek eo kom̧ maron̄ e ej tōmak ilo Irooj Jisōs Kraist. Moronai eaar katakin kōn kajoor eo an tōmak in ilo wāween in: “Im barāinwōt jab ilo jabdewōt iien jabdewōt eaar jerbali men in bwilōn̄ ko m̧ae ālkin aer tōmak; kōn menin eaar m̧okta tōmak ilo eo Nejin Anij.”8
Iaar loļo̧k juon kōrā eo me eaar bōk kabwilōn̄lōn̄ kōn kajoor eo eaorōk n̄an niknik ilo jako jab maron̄ ļōmņak kaki kōn maron̄ eo ejej uwaan n̄an āliji naan ko, “Ij jela aō Dri Pinmuur ej mour.”9 Tōmak in im naan ko an naan in kam̧ool eo raar pād āinwōt an ememļo̧kjeņ ko an ajri ro nejin dikļo̧k bōtaab jamin n̄an jidik lukkuun jako.
Iaar bwilōn̄ n̄an katak bwe bar juon kōrā eo eaar jeorļo̧k an juon armej bōd me eaar kar kabōd e ium̧win iiō ko. Iaar bwilōn̄ im kar kajjitōk ippān etke eaar kālet n̄an jeorļo̧k bōd im meļo̧kļo̧k ium̧win elōn̄ iiō ko in kakkure ko renana.
Eaar ba ilo mera, “Eaar men eo epen tata Inan̄in kar kōm̧m̧ane. Iaar jeļā Ij aikuj in kar kōm̧m̧ane. Kōn menin Iaar.” Tōmak eo an bwe Rilo̧mo̧o̧r eo enaaj kar jeorļo̧k an bōd eļan̄n̄e en kar jeorļo̧k an ro jet bōd kōpooj e kōn juon en̄jake in aenōm̧m̧an im kōjatdikdik ilo an kar jelm̧ae mej allōn̄ ko m̧okta ālkin an kar meļo̧kļo̧k bōd eo an rijum̧ae eo an.
Liin eaar kajjitōk ippa, “N̄e Ij tōpar ļo̧k ijōņ, enaaj kōjkan ilo lan̄?”
Im Iaar ba, “Ijeļā jān ta eo Iaar loe jān maron̄ eo am̧ n̄an kōjerbal tōmak im n̄an jeorļo̧k bōd enaaj juon iien ro̧o̧l ļo̧k n̄an kapijuknen eaiboojoj n̄an kwe.”
Ebar wōr juon aō bar naan in kōketak n̄an ro me rej kiiō ļōmņak eļan̄n̄e tōmak eo aer ilo Jisōs Kraist enaaj bwe n̄an er n̄an aer em̧m̧an aer niknik n̄an jem̧ļo̧k in. Iaar jeram̧m̧an n̄an jeļā kajien jet iaami me rej ron̄jake kiiō ke kom̧ kar dikļo̧k, peran, kapeel eļapļo̧k jān elōn̄ ro ipeļakimi, kom̧ kar kālet n̄an kōm̧m̧ane ta eo Rilo̧mo̧o̧r eo enaaj kar kōm̧m̧ane. Jān kōjeram̧m̧an ko ami rellōn̄ kom̧ kar lo wāween ko n̄an jipan̄ im kea kōn ro kom̧ maron̄ kar kowaan er ak reilaļ ļo̧k n̄an er jān jikimi.
N̄e mālijon̄ ko reppen rej itok, tōmak eo n̄an niknik ilo jejjet enaaj pād ijo, kom̧ maron̄ jab kile ilo tōre in, bōtaab enaaj ekkal jān jerbal kōn iakwe eo erreo an Kraist, jerbal im jeorļo̧k bōd āinwōt Rilo̧mo̧o̧r eo naaj kar kōm̧m̧ane. Kom̧ij kalōk juon pedped an tōmak jān iakwe āinwōt an Rilo̧mo̧o̧r eo kar iakwe im jerbal n̄an E. Tōmak eo ami ilo E ej tōl n̄an m̧akūtkūt ko an iakwe an Kraist me enaaj bōktok kōjatdikdik n̄an kom̧.
Ejjamin rum̧ij n̄an kōkajoorļo̧k pedped eo an tōmak. Ewōr iien otemjej iien. Kōn tōmak ilo Rilo̧mo̧o̧r eo, kom̧ maron̄ ukweļo̧k im akweļap kōn jeorļo̧k bōd. Ewōr juon eo kom̧ maron̄ jeorļo̧k an bōd. Ewōr juon eo kom̧ maron̄ ļōmņak kake. Ewōr juon eo kom̧ maron̄ jerbal n̄an e. Kom̧ maron̄ kōm̧m̧ane menin jabdewōt jikin eo kom̧ij pād ie im mekarta make ļo̧k im jorrāān eo kom̧ maron̄ en̄jake.
Ijjab maron̄ kalim̧m̧uri juon jem̧ļo̧k n̄an apan̄ eo ami. Ijjab maron̄ ba n̄an kom̧ bwe mālijon̄ ko ami renaaj n̄an kom̧ renaaj an jidik wōt iien. Juon iaan m̧wil ko an mālijon̄ ilo mour ej bwe renaaj āinwōt ad lale iien en kadikdik ļo̧k im nan̄ bōjrak.
Ewōr jilu un ko n̄an menin. Jeļā un kein ejjab leļo̧k eļap kaenōm̧m̧an, ak emaron̄ lewaj n̄an kom̧ juon en̄jake in kijenmej. Rej itok jān juon wōt m̧ool: ilo iakwe eo Aer eweppān n̄an kom̧, Jemedwōj Ilan̄ im Rilo̧mo̧o̧r eo rej kōņaan bwe kom̧ij jejjet n̄an Er n̄an mour ilo baam̧le ko indeeo. Ro wōt me raar jejjet kwaļ er kōn Pinmuur eo an Jisōs Kraist maron̄ pād ijōņ.
Jinō eaar ire ippān kenjer ium̧wi enan̄in 10 iiō ko. Kōm̧adm̧ōd ko im m̧wijm̧wij ko im āliktata pād wōt ilo jikin kiki eo an kar jet iaan mālijon̄ ko an.
Ij kememej an jema ba ke eaar lale an bōk kūtuwōn āliktata, “Juon leddik jidikdik em̧ōj an ilo̧k n̄an kapijuknen eo an n̄an kakkije.”
Juon iaan rikōnono ro ilo ilomej eo an eaar likao eo pāleen sister eo an im eo m̧ōttan Būreejtōn Spencer W. Kimball. Ilubwilijin naan in nōbar ko eaar kwaļo̧k, Ij kememej juon men āinwōt in: “Jet iaami emaron̄ in wōr an ļōmņak bwe Mildred eaar aitok an en̄taan im kanooj ļap kōnke kōn jet men ko eaar kōm̧m̧ani rebōd me kar menin aikuj mālijon̄ ko. Jaab, eaar bwe Anij eaar kōņaan kōrabōl ļo̧k jidik.” Ij kememej ilo iien eo iaar ļōmņak, “Eļan̄n̄e juon kōrā eo em̧m̧an eaar aikuj jon̄an kōrabōlbōl eo, ta eo im̧aan n̄an n̄a?”
Eļan̄n̄e ewōr ad tōmak ilo Jisōs Kraist, iien ko reppen tata im barāinwōt pidodo tata ilo mour maron̄ erom juon kōjeram̧m̧an. Ilo aolep jekjek, jemaron̄ kālet jim̧we eo kōn tōl eo an Jetōb. Ewōr ippād ko̧jpeļ eo an Jisōs Kraist n̄an ļōme im tōl mour ko ad eļan̄n̄e jej kālet e. Im kōn rikanaan ko rej kwaļo̧k n̄an kōj jikin eo ad ilo karōk in lo̧mo̧o̧r eo, jemaron̄ mour kōn kōjatdikdik eweppān im juon en̄jake in aenōm̧m̧an. Jejamin aikuj in en̄jake bwe jemake wōt ak jab iakwe ilo jerbal in jipan̄ an Irooj kōnke jejjan̄in kar. Jemaron̄ en̄jake iakwe eo an Anij . Rilo̧mo̧o̧r eo eaar kalim̧m̧ur kōn enjeļ ro n̄an pād ituanmiin̄ im ituambwijmaron̄ n̄an kotak kōj.10 Im iien otemjej ej dāpij An naan.
Ij kam̧ool bwe Anij Jemed ej mour im bwe Nejin Jitōnbōro ej ad Rilo̧mo̧o̧r. Jetōb Kwojarjar eo eaar kapen m̧ool eo ilo kweilo̧k in im naaj bar ilo ami pukōt e ilo ami ron̄jake im ilo ami ekkatak kōn ennaan ko tok ālik an rikarejeran ro kōmālim er an Irooj repād ijin rainin. Būreejtōn Thomas S. Monson ej rikanaan eo an Irooj n̄an aolepen laļ in rainin. Ij kam̧ool ilo etan Jisōs Kraist, amen.