Etke Jerbal eo an Priesthood
Jen Būreejtōn Dieter F. Uchtdorf
Rikakplōklōk eo Kein Karuo ilo Būreejtōnji eo Kein Kajuon
Meļeļe etke jej mour kake ko̧jpeļ in im etke priesthood eo enaaj jipan̄ kōj n̄an lo jibadbad eo ekwojarjar an aolepān men in.
Ij m̧ōņōņō kōn iien in em̧m̧an n̄an kweilo̧k ippān em̧m̧aan ro an priesthood im laudin̄din̄ ippāmi ilo iien in im aiboojoj eo an ko̧jpeļ eo an Jisōs Kraist. Ij kipeļ eok kōn tōmak eo am, jerbal ko am, im am mour jim̧we.
Jej kwaļo̧k juon kajoor eo epen me ilo ad aolep bōk ekkapit eo n̄an priesthood eo an Anij jān ro em̧ōj aer leke kōn mālim eo ekwojarjar an priesthood. Ej juon kōjeram̧m̧an eļap. Ej juon eddo ekwojarjar.
EtkeKajoor eo
Jem̧aanļo̧k Iaar kejokļo̧kjeņ kōn ruo kūr ko raorōk Iaar būki āinwōt juon rikabwijer priesthood eo ilo Kabun̄ in.
Kūr ko jinointata raar itok n̄an eō ke Iaar juon tikōn. Iaar kobaļo̧k ippān baam̧le eo aō ilo branch eo an kabun̄ in ilo Frankfurt, Germany. Kōm ar jeram̧m̧an n̄an bōk elōn̄ armej ro rōm̧m̧an ilo branch eo edik am. Juon iaer eaar branch būreejtōn eo am, Brother Landschulz. Iaar lukkuun in nōbar e, men̄e jet iien ej tin lukkuun lej, lukkuun jejjet, im enan̄in aolep iien ej kōņak juon juut emarok. Ij kememej ke iaar juon ļaddik kōm̧m̧an kōjak ippān ro m̧ōtta kōn nuknuk ko rōmōr an branch būreejtōn eo kar am.
Ekōm̧m̧an bwe in ettōn̄ n̄an emļo̧kjeņ kōn menin kiiō kōnke elukkuun in pidodo jon̄an jodikdik in raan kein ren loe eō ilo ejja lukkuun in jekjek in wōt.
Juon Jabōt, Būreejtōn Landschulz eaar kajjitōk eļan̄n̄e emaron̄ in kōnono ippa. Ļōmņak eo aō m̧oktata, “Ta eo ebōd Iaar kōm̧m̧ane?” Ļōmņak eo Aō eaar iur lo antoone elōn̄ men ko Iaar kōm̧m̧ani me emaron̄ kar im̧we kōnono eo ikōtaan juon branch būreejtōn im juon tikōn.
Būreejtōn Landschulz eaar kūr eō n̄an juon ruum̧ edik—im̧ōn jar eo am ejjeļo̧k juon opiij n̄an branch būreejtōn eo—im ijo eaar letok juon kūr n̄an eō n̄an jerbal āinwōt juon būreejtōn n̄an doulul eo an tikōn ro.
“Ej juon jerbal eaorōk,” eaar ba, innām eaar bōk an iien im kōmeļeļeik etke. Eaar kōmeļeļeik ta eo im Irooj ekōņaan jen eō im ekōjkan aō naaj bōk jipan̄.
Ijjab lukkuun kememej ta eo eaar ba, ak Ij lukkuun kememej kar en̄jake eo aō. Iaar en̄jake juon jetōb, Jetōb kwojarjar eaar kobrak aō āinwōt n̄e eaar kōnono n̄an eō. Iaar en̄jake bwe en̄in eaar Kabun̄ eo an Rilo̧mo̧o̧r. Im Iaar en̄jake bwe kūr eo eaar letok eaar im̧we jān Jetōb Kwojarjar. Ij kememej aō diwōjļo̧k jen ruum̧ eo edik juon en̄jake em̧m̧anļo̧k jān kar m̧okta.
Enan̄in 60 iiō ko rem̧ootļok jen raan eo, im Ij kaorōk wōt en̄jake kein kōn leke im iakwe.
Ke Iaar ļōmņak likļo̧k kōn en̄jake in, Iaar kajieon̄ in baj ļōmņak ewōr jete tikōn ro ilo branch eo am ilo iien eo. N̄an jeļā eo aō, Ij tōmak eaar wōr ruo. Mekarta, emaron̄ in kar ļap.
Eaar lukkuun jab kabōņōņōik eļan̄n̄e eaar wōr juon tikōn ak juon jarļepju. Iaar en̄jake utiej, im Iaar kōņaan jerbal n̄an maron̄ eo aō em̧m̧an tata im jab kainepataik branch būreejtōn eo aō im Irooj.
Ij kile kiiō bwe branch būreejtōn eo emaron̄ kar kōm̧m̧ane m̧akūtkūt eo (kōn ļetok juon kūr n̄an eō) ijjeļo̧kin ļōmņake ilo iien eo ej kūr eō n̄an jerbal in. Emaron̄ kar pidodo an jiron̄ eō ilo hallway eo ak ilo kweilo̧k eo am ilo priesthood me In kar juon būreejtōn kāāl n̄an doulul eo an tikōn ro.
Ijjeļo̧kin, eaar jolo̧k iien ippa im jipan̄ eō meļeļe ejjab wōt kōn ijjitōn̄ ta eoim eddo eo aō ekāāl ak, ta eo eaorōkļo̧k, etke.
Bwe ej juon men Ijjamin naaj meļo̧kļo̧k.
Meļeļe eo an bwebwenato in ejjab tin kōmeļeļeik ekōjkan leļo̧k kūr ko ilo Kabun̄ in (bōtaab menin ekar juon waanjon̄ak em̧m̧an n̄an eō kōn wāween eo ejejjet n̄an kōm̧m̧ane). Ej juon ekkatak ekkar n̄an lōn̄aj kajoor in tōl an priesthood me ekairuj jitōbin juon armej im im̧we m̧akūtkūt eo.
Eaikuj jejjet aō kememej kōn un ko indeeo likin men ko kar kakien kōj n̄an kōm̧m̧ani. Pedped ko raorōk repidodo an ko̧jpeļ in reaikuj in m̧ōttan mour ko ad, men̄e eļan̄n̄e ej meļeļe in ekkatak kaki bar juon alen. Ejjab meļeļe bwe eaikuj wōnm̧aanļo̧k jerbal eo ak jalimo. Ak, n̄e jej katakin pedped ko an ko̧jpeļ in ilo imoko im̧ōd ak ilo kabun̄ in, ellowetak eo n̄an mour kake ko̧jpeļ in im juon naan in kam̧ool ekajoor eaikuj kwaļo̧k jeļāļo̧kjeņ, aenōm̧m̧an, im m̧ōņōņō n̄an jetōb ko an armej ro jej katakin.
Jān tikōn eo ekāāl tata eaar ekkapit n̄an pris eo eutiej tata, jej aolep elaajrak kōnta jemaron̄ im aikuj kōm̧m̧ane ilo eddo ko ad ilo priesthood. Ta eo ej aorōk ilo jerbal eo ad, im jaikuj in pād ie. Ak ej pād ilo etke jerbal eo an priesthood jaar lo ellowetak eo, m̧ōņōņō, im kajoor eo an priesthood.
Ta jerbal in jipan̄ an priesthood eo ej katakin kōj ta eo n̄an kōm̧m̧ane. Etke epen ej im̧we jetōb eo.ul.
Ta ej karon̄, ak etke ej ukōt.
Juon lutōkļo̧k kōn “Em̧m̧an” n̄an Kōm̧m̧ani Men ko
Bar juon kūr an priesthood me Iaar ļōmņak kake kar letok n̄an eō elōn̄ iiō ko lo̧k ke, Iaar make bōk baam̧le eo aō. Kōm eaar bar ro̧o̧l n̄an Frankfurt, Germany, im Iaar bōk eļapļo̧k wōņāāō ilo jikin jerbal me ejelet aō iien em̧m̧an. Ilo tōre in boup eo ilo mour e aō, Elder Joseph B. Wirthlin eaar letok juon kūr n̄an eō n̄an jerbal āinwōt juon stake būreejtōn.
Ilo iien intōrpiu eo aō ippān, elōn̄ ļōmņak ko reitok ilo kōļmenļo̧kjeņ eo aō, ejjab kōn ta eo ej kabōņōņō me Imaron̄ in kar jab wōr iien n̄an kūr in ekkar. Mekarta Iaar en̄jake ettā im utiej kōn kūr in, Iaar kōļmenļo̧kjeņ jidik eļan̄n̄e Imaron̄ bōke menin. Ak eaar baj juon wōt ļōmņak kōnke Ijeļā bwe Elder Wirthlin eaar kūr jān Anij im bwe e ej kōm̧m̧ae jerbal eo an Irooj. Ta imaron̄ kōm̧m̧ane ijjeļo̧kin bōke?
Ewōr iien ko n̄e enaaj wōr m̧akūtkūt kōn tōmak men̄e jejab jeļā ia eo m̧akūtkūt ko ad renaaj tōl ļo̧k kōj, leke bwe Anij enaaj kakke kōj kōn uwaak ko im tōl eo jeaikuji n̄e jej jerbal kōn tōmak. Im Iaar bōk e ilo m̧ōņōņō, jeļā bwe Anij enaaj kōpooj.
Ilo kar raan in ijjitōn̄ in, kōm eaar m̧ōņōņō āinwōt juon stake n̄an bōk kaminene jān jet iaan rūkaki ro rōm̧m̧antata im ritōl ro ilo Kabun̄ in—em̧m̧aan ro āinwōt Elder Russell M. Nelson im Būreejtōn Thomas S. Monson. Aer katakin eaar āinwōt juon kōjeram̧m̧an jān lan̄ im juon im̧we n̄an kōm. Ej pād wōt Ippa naan in kakememej ko Iaar būki ilo kar m̧wein̄an in kaminene kein. Em̧m̧aan rein raar letok n̄an kōm meļeļe kōn ta meļeļe ko n̄an kalōk im kōkajoorļo̧k aelōn̄ in kiin̄ eo an AnijJen kalōk naan in kam̧ool eo an juon make im kōkajoorļo̧k baam̧le ko. Rej jipan̄ kōj n̄an loe ekōjkan n̄an bōk m̧ool eo an ko̧jpeļ in im pedped ko n̄an iien ko ad rallikar im n̄an iien eo ejejjet. N̄an likūt ilo wāween eo juon, ritōl ro reim̧we raar jipan̄kōm̧ n̄an loe etke ko̧jpeļ eo, im kōm eaar kōjerkak kōm make im iļo̧k im jerbal n̄an karōke ta.
Ekar jab m̧okta jen am kar kūr bwe eaar ļap wōt men ko juon stake būreejtōnji emaron̄ kōm̧m̧ane—elukkuun in lōn̄, ilo m̧ool, bwe eļan̄n̄e kōm eaar jab likūt im̧we ko im̧aantata, kōm maron̄ kar jerwane in kōm̧m̧an ko ewōr tokjeer. Keidi aorōk ko im̧aantata raar jino in waļo̧k, ukļo̧k kōttōpar ko am jān visōn eo kar kwaļo̧k jān Em̧m̧aan ro. Eaar lōn̄ men ko n̄an kōm̧m̧ani “em̧m̧an” ak eaar jab aoleper elap tokjeier
Kōm eaar ekkatak juon katak eaorōk: m̧ool eo me jet men em̧m̧an ejjab aolep iien ebwe un n̄an ad iien im ko jet. M̧akūtkūt ko ad, eļmako̧t ko, im karōk ko reaikuj in im̧we jān pedped eo etkejerbal eo ad ilo priesthood im rejjab kōn jabdewōt ak itok lim̧o an iien in. Ijjelo̧kin, remaron̄ in m̧ad ilo kijejeto ko ad, kōm̧ōjņoik kajoor eo ad, im kalimjōk wōt kōņaan ko ad, ilo mour in jetōb kanniōk me rejjab pād ilo io̧ļapen rikaļooran.
Em̧m̧aan ran, jej aolep jeļā bwe ebōk ekkatak ippād‐make n̄an kalimjōk wōt men ko raorōk me ewōr kajoor eo eļap n̄an kōļapļo̧k iakwe eo ad n̄an Anij im armej, m̧are ko, kōkajoorļo̧k baam̧le ko, im kalōk aelōn̄ in kiin̄ eo an Anij. Āinwōt leen juon wōjke ippān juon lutōkļo̧k in ra ko im bōlōk ko, mour ko ad rej aikujin dim bwe jen kōjerbal kajoor eo ad im iien n̄an kadedeļo̧k lukkuun kōtōpar eo ad—n̄an “e ban jebar im em̧m̧an leen”!1
Kwojab Make Iaam
Kōn menin ekōjkan ad jeļā ta n̄an kālet? Ewōr ippād kajjojo eddo eo n̄an kile menin n̄an kōj make. Mekarta, kar kakien kōj n̄an niknik ekkatak jeje ko rekwojarjar, ron̄jake naan ko an rikanaan ro, im kōm̧m̧an juon tiljek in ekkatak im jar eobrak kōn‐tōmak.
Em̧m̧aan raņ rejitōn bōro, Anij em̧ool (ilo kakūrm̧ool kallim̧ur ko an). Kōn Jetōb Kwojarjar, E enaj kōnono aenōm̧m̧an n̄an jetōb ko ad im būruwōd ekkar n̄an iaļ eo jej aikuj in ļoore kajjojo tōre ilo mour ko ad.
Eļan̄n̄e būruwōd erreo—eļan̄n̄e jejab pukot aiboojoj eo ad make ak aiboojoj eo an Anij Ekajoor Pōtata, eļan̄n̄e jenaaj pukōt n̄an kōm̧m̧an An kilan, eļan̄n̄e jekōņaan n̄an kōjeram̧m̧an mour ko an baam̧le ko im armej ro ad—jenaaj jamin naaj make iaad. Āinwōt ekkā an Būreejtōn Monson ekkā an kakememej kōj, “n̄e jej pād ilo jerbal eo an Irooj, jemaron̄ in bōk jipan̄ an Irooj.”2
Jemedwōj Ilan̄ enaaj etal im̧aam̧ ļo̧k. E enaaj pād ilo tūanm̧oon im tūamiin̄, im An Jetōb enaaj pād ilo būruwōm̧, im enjeļ ro an renaaj jepooļ eok, n̄an kotak eok.3
Kajoor eo an Kōm̧m̧an
Em̧m̧aan ro rejitenbōro ippa, kōjeram̧m̧an kein rekwojarjar n̄an jerbal eo ad ilo priesthood rej jerbal ekkar n̄an tiljek ko ad im kōņaan ko ad n̄an karmejete, im ad kōņaan n̄an kōm̧m̧ane ta eo ejim̧we. Jej aikuj in jet ro n̄an jerbal im jab kipel er n̄an kōm̧m̧an. Kwaļo̧k naan em̧m̧an, ijoke kwaļo̧k ko ren jab tōl ļo̧k n̄an kōm̧m̧ane rej āinwōt kijeek ko ijeļo̧kin kōm̧ānān ak dān eo me ejjab kwaļo̧k dān.
N̄e jej bōk katak eo kajoor in ekwojarjar an ko̧jpeļ ej bōk juon im̧we ekajoor iood im kajoor eo an priesthood ej kobrak kōj kōn elowetak.
Thomas Edison, em̧m̧aan eo me kōm̧m̧ane tōm̧a ko, eaar ba bwe “juon ļōmņak eaorōkļo̧k n̄e ej jerbal”.4 Ilo juon bar wāween, katak eo an ko̧jpeļ in ej eļapļo̧k an erom̧ em̧m̧an n̄e ej jerbal.
Jen jab kōtļo̧k an katak ko an priesthood n̄an janiknik ilo būruwōd im jab mour kake ilo būruwōd. Eļan̄n̄e ewōr juon m̧are ak baam̧le eo eaikuj lo̧mo̧o̧r—emaron̄ barāinwōt baam̧le ko ad make—jen jab kōttar im lale. Ijoke, jen kam̧oolol Anij kōn karōk in m̧ōņōņō eo me ekobaik tōmak, ukweļo̧k, jeorļo̧k bōd, im ijjino ko rekāāl. Bōk katak ko an priesthood me renaaj kōkarbab kōj āinwōt ļōmaro pālele, im ļaddik ro remeļeļe etke priesthood eo im kajoor eo n̄an bōke im lo̧mo̧o̧ren aiboojoj eo im kwojarjar ko an baam̧le indeeo.
Kweilo̧k eo eļap ej aolep iien juon iien em̧m̧an n̄an jimo̧r ron̄jake (pedped ko an ko̧jpeļ in) im kōm̧m̧an (i). Kōn menin jen “ri kōm̧anm̧an naan eo, im jab ri ron̄jake wōt” 5 Em̧m̧aan ran, Ij kūr kom̧ n̄an ļōmņak kōn naan ko kar kōnono kaki jān rijerbal ro an Anij ilo wiik in. Innām bukwelōlō. Kajjitōk Anij, Jemed Ilan̄, n̄an kōmeramļo̧k ļōmņak eo am un̄n̄ur būruōmi. Akweļap ippān Anij kōn tōl ilo kajjojo raan in mour ko am im ilo eddo ko am ilo Kabun̄ in. Ļoor im̧we ko an Jetōb—jab karum̧ijļo̧k. Eļan̄n̄e kwonaaj kōm̧m̧ane aolepen men in, Ij kallim̧ur bwe Irooj ejamin kōtļo̧k eok bwe kwon jerbal make iaam.
Wōnm̧aanļo̧k ilo Kijenmej
Jejeļā bwe kejokdoon jekjek ko ad rōm̧m̧antata, men ko rejjab aolep iien etal ekkar n̄an karōk. Jej kōm̧m̧an bōd ilo mour im ilo jerbal in jipan̄ eo ad ilo priesthood. Jet iien jej tibbo̧k im pedo.
N̄e Irooj ej kapilōk kōj n̄an wōnm̧aanļo̧k ilo kijenmej m̧ae jenaaj weppān, 6 Ej kile bwe ebōk iien im kijejeto. Meļeļe etke jej mour kake ko̧jpeļ in im etke priesthood eo enaaj jipan̄ kōj n̄an lo jibadbad eo ekwojarjar an aolepān men in. Enaaj letok n̄an kōj lōn̄aj im kajoorn̄an kōm̧m̧ane men ko rejim̧we, men̄e renaaj pen. Kalimjōk wōt pedped ko raorōk ilo mour kōn ko̧jpeļ enaaj kōjeram̧m̧an kōj kōn iakwe, meletlet, im tōl.
Jejjab wōnm̧aanļo̧k wōt ilo jerbal in eļap ke? 7Aaet, em̧m̧aan ran, jej!
Tōl jen Jetōb Kwojajar, jenaaj ekkatak jān bōd ko ad. Eļan̄n̄e jej kōm̧m̧ane juon bōd, jenaaj baj wōnm̧aanļok ilo ad eddōkļo̧k. Eļan̄n̄e jenaaj likjab, jenaaj etal wōt. Jej jamin naaj mōk, jej jamin naaj ebbwer.
Āinwōt juon jarlepju in em̧m̧aan ro an priesthood eo an Anij indeeo, jenaaj jutak ippān doon, aerā n̄an aerā, kalimjōk ko̧jpeļ eo em̧ōj an jepļaaktok an Jisōs Kraist im m̧ōņōņō in jerbal n̄an ad Anij im armej kōn wūjļepļo̧k im iakwe.
Anij Emour!
Em̧m̧aan ro rejitōnbōro, Ij kam̧ool n̄an kom̧ rainin bwe Anij Jemed im Nejin, Jisōs Kraist, remour. Rej lukkuun m̧ool! Rej lukkuun pād!
Kwoj jab make iaam. Jemed ilo Lan̄ ej kea kōn eok im kōņaan kōjeram̧m̧an im dāpij eok ilo jim̧we.
Jeļā bwe Anij ej kōnono n̄an armej ilo tōre kein. Enaaj kōnono n̄an eok!
Rikanaan Joseph Smith eaar ba ta eo eaar loe. Kabun̄ eo an Jisōs Kraist im Armej ro Rekwojarjar ilo Raan‐ko Āliktata em̧ōj an jepļaaktok n̄an laļ in kōn kajoor im mālim eo an Anij Ekajoor Pōtata.
Ej aō jar bwe āinwōt rikabwijer priesthood eo An, jenaaj aolep iien jerbal ilo itok limo etkeun eo im jerbal in jipan̄ eo an priesthood im kōjerbal wōt pedped ko an ko̧jpeļ in em̧ōj an jepļaaktok n̄an kōm̧m̧an oktak ilo mour ko ad im mour ko an ro jej jerbal n̄an er.
Ilo ad kōm̧m̧ane wāween in, kajoor eo an Pinmuur eo enaaj kakwojarjar, karreoik, im kōkāāl jetōb ko ad im m̧wil ko ad m̧ae jenaaj erom̧ em̧m̧aan ro me jekōņaan erom̧. Kōn men in Ij kam̧ool ilo etan Jisōs Kraist, amen.