Kam̧m̧oolol ko Liļo̧k n̄an Anij
Jen Elder Russell M. Nelson
Jen Doulul eo an Jon̄oulruo Rijilōk ro
Ewi jon̄an an em̧m̧an n̄e aolep remaron̄ lapļo̧k aer uwōta kōn an Anij letok im iakwe im kwaļo̧k kam̧m̧oolol n̄an E.
Ro jeiū im jatū rejitōnbōro, kōmij kam̧m̧oolol kom̧ kōn rejtak in jipan̄ eo im wujlepļo̧k eo ami. Kōmij kwaļo̧k am kam̧m̧oolol im iakwe n̄an kom̧ kajjojo.
Jem̧aanļo̧k, Sister Nelson im N̄a kar lem̧ōņōņō kōn aiboojoj eo an ek ko ilo juon jikin ek. Ek ko kōn elōn̄ kain kōļar ko im okoktakin ļam ko im jon̄an ko raar aō tok aō tak. Iaar kajjitōk ippān eo ej lale ebaak, “Wōn en naajdik ek kein raiboojoj?”
Ekar uwaak,‟N̄a.”
Innām Ikar kajjitōk,‟Renan̄in ke kar kam̧m̧oolol eok?”
Eaar uwaak,‟Rejjan̄in!”
Iaar kōlmenļo̧kjeņ kōn jet armej Ijeļā kajier me rejjab uwōta kōn aer Rikōm̧anm̧an im “pilawe in mour” eo aer em̧ool.1 Rej mour raan otemjeļo̧k kōn jab jeļā kōn Anij im em̧m̧an eo An n̄an er.
Eļapļo̧k an em̧m̧an eļān̄n̄e aolep armej remaron̄ ļapļo̧k aer ļōmņak kōn kajoor kwojarjar eo an Anij im iakwe im kwaļo̧k kammoolol n̄an E. Ammon eaar katakin, “jen leļo̧k kam̧m̧oolol ko n̄an [Anij], bwe E ej kōm̧m̧ani jerbal ko re jim̧we indeeo.”2 Jon̄an kam̧m̧oolol eo ad ej juon jon̄ak eo kōn iakwe eo ad n̄an E.
Anij ej Jemen jetōb ko ad.3 Ewōr An juon ānbwin in kanniōk im dii eaiboojoj, weppān.4 Jaar mour Ippān ilo lan̄ m̧okta jān ad kar ļotak.5 Im ke Eaar kōm̧anm̧an kōj ilo kanniōk, jaar kōm̧anm̧an ilo nememe eo an Anij, kajjojo kōn ānbwin in make.6
Ļōmņak n̄an naajdik ānbwiinied. Lukkuun in m̧ool itok jān lan̄. Menin aikuj an kōto, m̧ōn̄ā, im dān rej aolep itok n̄an kōj āinwōt menin letok ko jān juon Jemedwōj Ilan̄ eo ej iakwe. Laļ eaar kōm̧anm̧an n̄an rejtake pād in ad ilo mour wabanban in.7 Jaar ļotak kōn juon maron̄ n̄an eddōkļo̧k, iakwe, m̧are, im ejaaki baam̧le ko.
M̧are im baam̧le rej kapit jān Anij. Baam̧le eo ej ippān doon eo eļap tata an aorōk ilo iien in im indeeo. Ium̧win karōk in m̧ōņōņō eo eļap an Anij, baam̧le ko remaron̄ liāp ilo tampeļ ko im m̧aan jabpopo n̄an bar ro̧o̧l n̄an jokwe im̧aan Mejān ekwojajar indeeo. En̄in ej mour indeeo! Ej kakūrm̧ool ikdelel ko reļļap tata an jetōb an armej—ikdelel eo jān jinoin n̄an ippān doon ejjeļo̧k jem̧ļo̧k in ippān ro uwaan baam̧le an juon.
Jej m̧ōttan jipadpad eo An ekwojarjar: Jemedwōj Ilan̄ eaar kwaļo̧k bwe jerbal im aiboojoj eo an ej n̄an bōktok mour jab wabanban im mour indeeo an armej.8 N̄an maron̄ bōk menin kōttōpar ko, “bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke ilo E en jab jako, a en mour indeeo.”9 Jerbal jab in eaar juon iakwe an Anij eutiej kwaļo̧k e. “Bwe [E] eaar jab jilkintok Nejin n̄an laļ bwe En ekajet laļ, a bwe laļ en mour kōn E.”10
Io̧lapen n̄an karōk indeeo eo an Anij ej mijen eo an Nejin, Jisōs Kraist.11 Eaar itok n̄an lo̧mo̧o̧ren ro nejin Anij.12 Kōn Pinmuur eo an Irooj, jerkakpeje (ak mour jab wapanpan) ar erom juon men em̧ool.13 Kōn Pinmuur eo, mour indeeo eaar pidodo n̄an aolep ro renaaj karbōb. Aindein Jisōs eaar kōmeļeļeļeik:
‟N̄a jerkakpeje eo im mour eo. Eo ej lōke Eō, men̄e e mej, enaaj bar mour:
‟Im jabdewōt eo ej mour im lōke Eō, e jamin mej indeeo.”14
Kōn Pinmuur eo an Irooj im menin letok eo An kōn jerkakpeje―kōn ennaan eo kōn Ijtō ekōbōkakkak—kam̧m̧oolol ko Liļo̧k n̄an Anij!
Menin letok ko an Ānbwin
Jemedwōj Ilan̄ ej iakwe ro Nejin.15 Eaar kōjeram̧m̧an kajjojo kōn menin letok ko an ānbwin im jetōb. In kōnono kōn kajjojo iaer. N̄e kom̧ij al “N̄a Nejin Anij,” ļōmņak kōn menin letok eo An n̄an kom̧ kōn ānbwin eo ami make. Elōn̄ m̧wil ko rekabwilōn̄lōn̄ kōn ānbwinimi rej kapen kōn “āinwōt Anij ilo m̧wilōmi” eo ami make.16
Kajjojo m̧ōttan ko reddik ilo ānbwinnim ej menin letok aiboojoj jen Anij. Kajjojo māj emaron̄ kepaaktok men ko loi n̄an kalimjōki. Eke im m̧ajōļ ko rej kōjbwebweik ruo māj ko n̄an kōm̧m̧ane juon pija jilu m̧wein̄an ko. Māj ko rej ekkeijel n̄an kōmālij eo, eo ej ļo̧o̧ki ta eo loe.
Menono eo ami epen meļeļe kōn an baam̧.17 Ewōr emen peļōp rōuub me ej kōjbwebweik iaļ in an bōtōktōk to̧o̧r. Peļōp kein rej peļļo̧k im kilōk elōn̄ ļo̧k jān 100,000 kōttan juon raan—36 milien kōttan juon iiō. N̄an kiiō, ijello̧kin kakkure jān nan̄inmej, rej maron̄ jutak ilo kain en̄taan kein renan̄in jet iien ko raitok.
Ļōmņak kōn jejtōm̧ in bōbrae eo an ānbwin eo. N̄an kejparok e jān jorrāān, ej kile metak. N̄an uwaak e m̧ōn̄ān̄e in kinej eo, ej kōm̧m̧an antibody ko. Kūl eo ej leļo̧k kejparok eo. Ej kakkōl ņae jorrāān eo me lukkuun bwil ak m̧ōļo emaron̄ kwaļo̧k.
Ānbwin eo ej kōkāal jeeļ ko rejjab jerbal im ukōt jon̄ak ko an m̧ōttan ko an raorōk make. Ānbwin eo ej kemour m̧wijm̧wij ko, ebbōj ko, im di ko rebūlo̧k an. Maron̄ eo an n̄an tūm̧wōņ im orļo̧k ej bar juon menin letok ekwojarjar jān Anij.
Jej aikuj kememej bwe juon ānbwin eo eweppān ejjab aikuj in tōpar jipadpad eo ekwojarjar an juon armej. Ilo m̧ool, jet iaan jetōb ko rem̧m̧an tata rej pād ilo ānbwin ko roub im jab weppān. Kajoor ilo jetōb eo eļap emakijkij an eddōkļo̧k jān armej ro kōn apan̄ ko an ānbwin, kōnke relukkuun in apan̄.
Jabdewōt eo ej ekkatak kōn jerbal ko an ānbwin an armej em̧ool em̧ōj an kar lo an Anij kōm̧akūt pōtata im kajoor eo An.18 Kōnke ānbwin eo ej tōl kōn kien ekwojarjar, jabdewōt kemour ej itok kōn pokake kien eo letok me kōjeram̧m̧an eo ej kobaik tok.19
N̄an kiiō jet armej ebōd aer ļōmņak bwe m̧wil kein rekabwilōn̄lōn̄ raar jide im waļo̧k ak kar tōprak in jān ļōmņak an rijaintiij juon jikin. Kajjitōk ippāmi make, “Juon bokkoļo̧k ilo juon jikin jeje ej kwaļo̧k juon tikjinede?” Āinlok wōt in ej Āinwōt juon eo ejjab lukkuun āinwōt juon. Bōtaab eļan̄n̄e āindein, ejjamin maron̄ kar kōkōm̧anm̧ane alen ko repotaktak ak bar kōm̧m̧ane juon bok kāāl make iaan!
Eļan̄n̄e maron̄ eo an ānbwiin n̄an kajejjet an jerbal, bōbrae, bar kōm̧m̧ane, kien e, im bar ejaake kar n̄an wōnm̧aanļo̧k ilo ejjeļo̧k jon̄an, mour ijin enaaj kar wōnm̧aanļo̧k indeeo. Aaet, jenaaj kar lokjak wōt ijin ioon laļ in! Tiriam̧o kake n̄an kōj, ad Rikōm̧anm̧an eaar kōm̧m̧an jon̄an iiō im jekjek ko jet me naaj kar āliktata tōprak in mej in ānbwiin eo ad. Mej, āinwōt ļotak, ej m̧ōttan mour. Jeje ko Rekwojarjar rej katakin bwe “eaar jab mennin aikuj bwe en kar bar wiaiki armej jān mej ilo kanniōk, bwe men in enaaj kar kakkure karōk in m̧ōņōņō eļap.”20 N̄an bar ro̧o̧l n̄an Anij ilo iaļ eo jej ņa etan mej ej juon lan̄lōn̄ n̄an ro rej iakwe E im rej m̧aanjabpopo n̄an ioon E.21 Āliktata iien eo enaaj itok n̄e kajjojo “jetōb im … ānbwiin naaj bar koba ilo … jekjek eo an eweppān; ra im makwōj jim̧or, naaj kōrool n̄an jekjek eo eweppān an,”22 jamin bar jepeļļo̧k jān doon. Innām menin letok kein an ānbwiin, kam̧m̧oolol ko liļo̧k n̄an Anij!
Menin Letok ko an Jetōb
Aorōk in wōt ejja ānbwiin eo, ej jerbal āinwōt juon ānbwin n̄an juon jetōb indeeo. Jetōb ko ad raar pād ilo mour eo m̧okta23 im naaj wōnm̧aanļo̧k wōt n̄an mour ālkin an mej ānbwiin eo.24 Jetōb eo ej leļo̧k n̄an ānbwiin eo en̄jake ko an mour im m̧wil.25 Ilo mour in im eo tok juon, jetōb im ānbwin, n̄e koba ippān doon, ej erom juon jetōb emour kōn aorōk eutiej.
Because one’s spirit is so important, its development is of eternal consequence. It is strengthened as we communicate in humble prayer with our loving Heavenly Father.26
M̧wil ko me jenaaj ekajet kaki juon raan rej aolep ilo jetōb.27 Men kein ekoba iakwe, wānōk, m̧ool, jouj im jerbal in jipan̄ ro jet.28 Jetōb eo ami, ippān im jikin ilo ānbwiinūmi, ej maron̄ kaddōkļo̧k im kwaļo̧k m̧wil kein ilo wāween ko me raorōk n̄an eddōkļo̧k indeeo eo ami.29 Eddōkļo̧k ilo jetōb ej tōpare kōn bun̄tōn ko an tōmak, ukweļo̧k, peptaij, menin letok eo an Jetōb Kwojarjar, im niknik n̄an jem̧ļo̧k in, ekoba bōk menin letok kwojarjar eo im kain̄i ko an liāp an tampeļ eo kwojarjar.30
Ejja āinwōt an ānbwiin eo aikuji m̧ōn̄ā raan otemjeļo̧k n̄an mour, jetōb eo aikuj in bar najdik barāinwōt. Jetōb eo ej naajdik kōn m̧ool indeeo. Iiō eo ļo̧k jaar kemeeme e 400th iiō dettan ukook eo an Kiin̄ James Baibōļ eo ilo In̄lij. Im Bok in Mormon eo eaar pād ippān enan̄in 200 iiō ko. Em̧ōj an kiiō kar ukook n̄an 107 kajin ko. Kōnke kōn men kein im jeje ko rekwojarjar jet raorōk, jejeļā bwe Anij ej Jemed Indeeo im bwe Nejin, Jisōs Kraist, ej ad Rilo̧mo̧o̧r im Ripinmuur. Kōn menin letok ko an jetōb, kam̧m̧oolol ko liļo̧k n̄an Anij!
Menin Letok ko an Ko̧jpeļ
Jejeļā bwe rikanaan ro an elōn̄ epepen ko, āinwōt Adam, Noa, Moses, im Abraham, aolep raar katakin kōn kwojarjar eo an Jemedwōj Ilan̄ im kōn Jisōs Kraist. Rikanaan eo ad ilo epepen in eaar kwaļo̧k kadkad in jān Jemedwōj Ilan̄ im Jisōs Kraist ke Raar waļo̧k ļo̧k n̄an Rikanaan Joseph Smith ilo 1820. Kabun̄ in eaar ejaak ilo 1830. Kiiō 182 iiō ko tok ālik, jej pād wōt ium̧win bujen eo n̄an kajedeed ko̧jpeļ eo n̄an “aolep laļ, im bwij, im lo ko, im armej.” 31 Ilo ad kōm̧m̧ane āindein, jim̧or ro rej leļo̧k im bōk renaaj jeram̧m̧an.
Ewōr ippād eddo eo n̄an katakin ro Nejin im karuj ilo er jeļā eo aer kōn Anij. Iiō ko rellōn̄ remoot ļo̧k Kiin̄ Benjamin eaar ba:
“Kom̧in leke Anij; kom̧in tōmak bwe E emour, im bwe Eaar kōm̧anm̧an men otemjej, jim̧or ilo lan̄ im ilo laļ; kom̧in leke bwe Ippān epād jeļā otemjeļo̧k, im kajoor otemjeļo̧k, jim̧or ilo lan̄ im laļ; …
“… Kom̧in tōmak bwe kom̧ij aikuj ukweļo̧k jān jerawiwi ko ami im eļļo̧k jān i, im kōttāik kom̧ im̧aan Anij; im kajjitōk ilo m̧ool in bōro bwe Enaaj jeorļo̧k bōd kko ami; im kiiō, eļan̄n̄e kom̧ij tōmak aolep men kein lale bwe kom̧in kōm̧mani.”32
Anij ej āinwōt inne, rainin, im indeeo, ak kōj jejjab. Kajjojo raan, ej ad kōttōpar n̄an tōpar kajoor eo an Pinmuur eo bwe jān maron̄ m̧ool ilo oktak, erom ļo̧k āinwōt Kraist, im karbōb n̄an menin letok eo an mour āinwōt Anij im mour indeeo ippān Anij, Jisōs Kraist, im baam̧le ko ad.33 Kōn kajoor kein, maron̄ kein, im menin letok ko an ko̧jpeļ eo, kam̧m̧oolol ko liļo̧k n̄an Anij!
Ij kam̧ool bwe E ej mour, bwe Jisōs ej RiKraist eo, im bwe Kabun̄ in An, kar kōjepļaaktok ilo raan-ko āliktata n̄an kōtōprak jipadpad eo an ekwojarjar. Jej tōl rainin jān Būreejtōn Thomas S. Monson, eo jej iakwe im rejtake kōn aolepen būruwōd, ilo ad barāinwōt rejake rikakipilōklōk ro an im Jon̄oulruo Rijilōk ro āinwōt rikanaan ro, rilolo ro, im ribōk m̧adenļo̧k ro, Ij kam̧ool ilo etan eo ekwojarjar etan Jisōs Kraist, amen.