Im juon Ajri E Dik Enaaj Tōl Er
Jen Būreejtōn Boyd K. Packer
Būreejtōn eo an Doulul eo an Jon̄oulruo Rijilōk ro
Ļōm̧aro im lim̧aro pālele rej aikuj meļeļe bwe kūr eo aer im̧aan tata—me rejjamin naaj kōtļo̧k jān e—ej n̄an doon innām n̄an ro nejier.
Jet iiō remootļo̧k, ilo juon bon̄ em̧ōļo ilo juon jikin tūrein ilo Japan, Iaar ron̄ juon kōļaļļaļ ilo wintō in ijo ij pād ie. Ijo eaar jutak juon ļaddik epio̧ eaar kōņak juon jōōt epotaktak ippān juon taae epotak etoon eo jibwin n̄iin eaar ebbōj. Bōran eaar obrak kōn kwōdkwōdi. Eaar jibwe juon tiin ejjo im kuwat im juon jibuun, ej kōkaļļe in juon riatajinemjen. Ke Iaar kakkōt n̄an kōpeļļok kōjām eo n̄an leļo̧k an jāān, tūrein eo eaar em̧m̧akūt.
Ijjamin naaj meļo̧kļo̧k ļaddik jidikdik eo ekwōle kar jutak ilo m̧ōļo, jibwe tiin eo n̄iin ejjeļo̧k kobban. Ak Imaron̄ ke meļo̧klo̧k ewi jon̄an aō kar ilo ejjeļo̧k maron̄ en̄jake ke tūrein eo eaar jino em̧m̧akūt im kōmakeik e ilo jikin eo.
Jet iiō ko tok ālik ilo Cusco, juon jikin kweilo̧k eutiej ilo Andes Peru, Elder A. Theodore Tuttle im n̄an kar kōm̧m̧ane juon kweilo̧k in kwojkwoj ilo juon ruum̧ eaitok, ewaidikdik me eaar peļļo̧k ļo̧k n̄an iaļ eo. Eaar bon̄, im eaar lukkuun m̧ōļo. Ke Elder Tuttle eaar kōnono, juon ļaddik edik, bōlen jiljino iiō dettan, kar jede ilo m̧aan kōjām eo. Eaar kōņak juon jōōt epotaktak me eaar enan̄in tōpar bukien.
Ilo tuanmiin̄ūm kar juon tebōl jidikdik kōn juon piliej in pilawā n̄an kwojkwoj eo. Riatijinemjen in ekwōl jān iaļ eo eaar lo pilawā eo im jidik wōt an etal ilo dipin m̧weo n̄an e. Eaar epaak an tōpar tebōļ eo ke juon kōrā ilo jikin etetal eo eaar lo e. Kōn juon kōjōboulul eļap, eaar bōkļo̧k n̄an e n̄an maron̄ eo. Iaar būrom̧ōj ippa make.
Tokālik ļaddik eo eaar jepļaaktok. Eaar itok dipin m̧weo tok, kalimjōk eō jidik. Ke eaar epaake ļo̧k ijo me kōrā eo enaaj kar lo e ie, Iaar kajutak peiū, im eaar ettōr tok n̄an n̄a. Iaar likūt ioon neeō.
Innām, āinwōt juon men ej jutak kake, Iaar likūt e ioon jea eo an Elder Tuttle. Ālkin jar in ikkilōk eo, eļap aō būrom̧ōj, laddik jidikdik in ekwōle eaar jako ļo̧k ilo bōn̄ōn eo.
Ke Iaar ro̧o̧l n̄an im̧weo im̧ō, Iaar jiron̄ Būreejtōn Spencer W. Kimball kōn en̄jake eo aō. Eaar kanooj m̧weiur im kar jiron̄ eō, “Kwar kabwijer juon laļ ioon neem̧.” Eaar ba n̄an n̄a elōn̄ ļo̧k jān juon kōttan, “En̄jake in eaar kanooj ļap meļeļe in jān kar ami jeļā.”
Ke Iaar loļo̧k laļ ko ilo Latin America epaakeļo̧k 100 kōttan, Iaar pukōt ļaddik jidikdik jab in ilo mejān aolep armej. Kiiō Ijeļā ta meļeļe eo an Būreejtōn Kimball.
Iaar bar ioon juon ļaddik ewudiddik ilo iaļ ko ilo Salt Lake City. Eaar bon̄ ilo bar juon joten m̧ōļo. Kōm kar em̧m̧akūt jān juon kōjota in Kūrijm̧ōj ilo juon hotel. Ilo iaļ eo kar itok jiljino ak ralitok ļaddik ro rōkauwaron̄ron̄. Aoleper raar aikuj in kar pād ilo m̧weo jān m̧ōļo.
Juon ļaddik ejjeļo̧k kar an kopā. Ekanooj emakikij an ekāke n̄an kako an m̧ōļo. Eaar jako ļo̧k ilo turājet in iaļ eo, ejjeļo̧k pere n̄an juon apartment edik, ejorrāān im juon jikin babu eo ejjab bwe ko̧o̧j ko n̄an kōmeņeņe e.
Ilo bon̄, n̄e ij ko̧o̧joj, Ij kōm̧m̧ane juon jar kōn ro me ejjeļo̧k jikin aer kiki emeņeņe n̄an ro̧o̧l n̄an m̧weo.
Iaar jerbal ilo Osaka, Japan, ke Pata eo an Laļ in II eaar jem̧ļo̧k. Jikin eo eaar jepeeļo̧k, im iaļ ko raar meno̧kno̧k kōn m̧ōttan jimeeņ, melokarar, im m̧ōttan baam̧ ko. Men̄e enan̄in aolep wōjke ko raar itipidikdik, jet iaer raar jutak wōt kōn ra ko rōbūlo̧klo̧k i dāpdep ko im wōr an peran n̄an kwaļo̧k jet juļ ko ewōr bōlōk ko.
Juon leddik eaidik ej juujuj im nuknuk kōn juon nuknuk epotaktak, ekōļar kimono eaar boub ilo aiin bōlōk ko reiaļļo an sycamore n̄an lowaan juon bouquet. Ajri in edik eaar jab ekkōl kōn jorrāān eo me eaar jepool e ilo an kar tallōn̄ ioon ejouj in kopej n̄an kobaik ļo̧k bōlōk ko rekāal n̄an aae eo an. Eaar lo juon eo eaiboojoj emake ilo laļ eo an. Bōlen Ij aikuj ba liin eaar lo juon m̧ōttan eo eaiboojoj an laļ eo an. Ilo juon jekjek n̄an ļōmņak kōn e ej kōļapļo̧k tōmak eo aō. Ajri eo eaar juon waanjon̄ak in kōjatdikdik.
Mormon eaar katakin bwe “a ajri ro re dik re mour ilo Kraist”1 im aikuj jab ukweļo̧k.
Emaron̄ kar iiō eo 1900, ruo mijenede ro raar jerbal ilo toļ ko iturōk in United States. Juon raan, jān ioon bat eo, raar lo armej ro rej aiin doon ilo meļaaj eo epād laļ ettoļo̧k. Mijenede ro raar jab emakijkij an lōn̄ ro me remaron̄ in kar kwaļo̧k n̄an er, kōn menin raar jino walaļļo̧k n̄an meļaaj eo.
Juon ļaddik eaar maļon̄, im raar tōn kōm̧m̧an juon ilomej. Jemen im jinen raar ijjilōk ļo̧k n̄an rikwaļo̧k eo n̄an an “ekōnono” ilo ilomej eo an ļaddik eo nejier. Mijenede ro raar jutak ituļokan ke rikwaļo̧k eo ej itok itak jujelļo̧k n̄an baba im m̧am̧a eo rebūrom̧ōj im jino kwaļo̧k eo an. Eļan̄n̄e ro jinen im jemen raar kōtmene n̄an bōk kaenōm̧m̧an jān rikwaļo̧k in, renaaj kar inepata.
Eaar kanooj kalel er kōn aer kar kōm̧m̧an bwe ļaddik eo edik en kar peptaij. Raar kowaan n̄an peptaij e kōn juon un ak bar juon, im kiiō ejjeļo̧k iien. Eaar lukkuun jiron̄ er bwe ļaddik jidikdik eo em̧ōj an ilo̧k n̄an hell. Eaar aer bōd. Renaaj kar ņa ruwier kōn en̄taan eo an ejjeļo̧k jem̧ļo̧k in.
Ālkin an jem̧ļo̧k kwaļo̧k eo im kar jibūūn lōb eo, elder ro raar jibadōkļo̧k jinen im jemen eo rebūrom̧ōj. “Kōmij rikarejeran Irooj,” kōm kar jiron̄ m̧am̧a eo, “im kōm kar itok kōn juon ennaan n̄an kwe.” Ke ro jinen im jemen rōm̧altato raar ron̄jake, elder ro ruo raar riit jān m̧adenļo̧k ko im kwaļo̧k naan in kam̧ool eo aer kōn jepļaaktok eo an kii ko n̄an lo̧mo̧o̧ren rimour im rimej jim̧or.
Ewōr aō tiriam̧o n̄an rikwaļo̧k jab eo. Eaar kōm̧m̧ane ijo em̧m̧an tata emaron̄ kar kōn jon̄an meram im jeļā eo ippān. Bōtaab eļapļo̧k me ej aikuj in kar maron̄ leļo̧k. Epād tallep in ko̧jpeļ eo.
Elder ro raar etal āinwōt rikaenōm̧m̧an ro, āinwōt rūkaki ro, āinwōt rikarejeran Irooj, āinwōt rikwaļo̧k ro kar kōmālim er an ko̧jpeļ eo an Jisōs Kraist.
Ajri rein me Iaar kōnono kaki rej jutak ilo etan aolep ajri ro nejin Jemedwōj Ilan̄. “Lo ajri raņ men in jolōt jān Jeova, im … e m̧ōņōņō armej eo im nien m̧ade eo an e obrak kaki.”2
Kōm̧anm̧an eo an mour ej juon eddo eļap n̄an juon ripālele kar m̧are. N̄an erreo im jinen im jemen ro rej bōk eddo in ej juon idajon̄jon̄ eo eļaptata an mour in. Ejjeļo̧k juon em̧m̧aan ak kōrā renaaj maron̄ keotak ajri ro make. Kar kōm̧m̧an wōt bwe ajri ro en wōr ruo jinen im jemen—juon baba im m̧am̧a jim̧or. Ejjeļo̧k bar juon jon̄ak ak jekjek maron̄ bōk jikin menin.
Jem̧aan juon kōra eaar kōn kemejaaļaļ jiron̄ eō bwe ilo ke eaar juon rijikuuļ in kaļōōj eaar kōm̧m̧ane juon bōd ļapļap ippān ļaddik eo jeran. Eaar kōm̧m̧an karōk n̄an m̧an lo̧jien. Ilo iien eo ejejjet raar kadiwōjļo̧k im kar m̧are im wōr jet nejier bar ajri. Eaar jiron̄ eō ewi jon̄an an kar en̄taan kiiō eaar kalimjōk baam̧le eo an, ajri ro nejin raiboojoj, im lo ilo ļōmņak eo an juon jikin ejjeļo̧k kobban ijo me ajri eo eaar jako jān e.
Eļan̄n̄e ripālele in rej meļeļe im kōjerbal Pinmuur eo, renaaj jeļā bwe en̄jake ko im metak eo raar ekkeijel ļo̧k ippāer maron̄ ejjeer. Ejjeļo̧k metak naaj pād indeeo. Ejjab pidodo, bōtaab mour eaar jab jipadpad n̄an pidodo ak jokkuun wōt juon jim̧or. Ukweļo̧k im kōjatdikdik aitok kitien me jeorļo̧k bōd ej bōktok naan iien otemjej ļap tokjen kijejeto eo.
Bar juon ripālele edik kar jiron̄ eō kōn kōmejaļaaļ ej kab m̧ōj aer itok jān juon taktō ijo eaar jiron̄ er bwe reban maron̄ in neji kōn er make. Raar rub būruwier kōn ennaan eo. Raar ilbōk ke Iaar jiron̄ er bwe ebwe aer kar jeram̧m̧an. Raar kejōkļo̧kjeņ etke Iaar ba men rōt eo. Iaar jiron̄ er jekjek eo aer eaar eļapļo̧k an em̧m̧an jān ripālele ro jet me raar maron̄ in erom ro jinen im jemen bōtaab raar joļo̧k im kowaan e eddo jab eo kōn ļōmņak kōn er make.
Iaar jiron̄ er, “Kwoj kōņaan nejūm̧ ajri, im bwe ikirelel eo enaaj pedped eļap ioon kōņaan e am̧ ilo mour eo am̧ laļ in im ālkin kōnke enaaj lewaj dim ilo jetōb im en̄jake. Āliktata, kwonaaj em̧m̧anļo̧k kōnke kwar kōņaan nejūm̧ ajri im ear jab maron̄ wōt nejūm̧, āinwōt kar keidi n̄an ro me raar maron̄ ak raar jab wōn nejier ajri.”
Ripālele ro rejjab m̧are im kōn menin ejjeļo̧k nejier. Jet, kōn jet jekjek ko rōtōr jān jon̄an aer maron̄, rej karūttoļo̧k ajri ro āinwōt m̧am̧a ro im baba ro ejjeļo̧k rejtaer. Men kein rej jon̄ak ko an jidik wōt iien. Ilo jekjek eo indeeo an men ko—ejjab aolep iien ilo mour in—ikdelel eo an jim̧we im jan̄ in iuwade naaj kūrm̧ool.
“Eļan̄n̄e ilo mour in wōt jej kōjatdikdik kōj ilo Kraist, kōj armej in tūriam̧o iaan armej otemjej.”3
Menin kōttōpar eo eļap tata an aolep m̧akūtkūt ilo Kabun̄ in ej n̄an lo ļeo im lio pāleen im ajri ro nejier m̧ōņōņō ilo kapijuknen, kejparok kōn pedped ko im kakien ko an ko̧jpeļ eo, kar liāp ilo inem̧m̧an ilo bujen ko an priesthood eo indeeo. Ļōm̧aro im lim̧aro pālele rej aikuj meļeļe bwe kūr eo aer im̧aan tata—me rejjamin naaj kōtļo̧k jān e—ej n̄an doon innām n̄an ro nejier.
Juon iaan elolo ko raorōk an jinen im jemen ej bwe jej katak eļapļo̧k kōn ta jerbal eo elukkuun in aorōk jān ajri ro nejin jān ad kar kōm̧m̧ane jān ro jined im jemed. Jej itok n̄an kile m̧ool eo ilo kanaan eo an Aiseia bwe “juon ajri e dik enaaj tōl er.”4
Ilo Jerusalem, “Im Jisōs ej kūrtok juon ajri e dik n̄an Ippān, im kajutak e eoļōpaer,
“Im ba, Em̧ool Ij ba n̄an kom̧, eļan̄n̄e ko̧m jab oktak im erom āinwōt ajri e dik, kom̧ jāmin deļo̧n̄ ilo aelōn̄ in lan̄.
“Innām jabdewōt eo ej make kōttāik e āinwōt ajri in e dik, e in eļaptata ilo aelōn̄ in lan̄.”5
“A Jisōs ej ba, Kom̧win kōtļo̧k ajri re dik, im jab bōbrae er, bwe ren itok n̄an Ippa; bwe ro āierwōt aer aelōn̄ in lan̄.
“Im Ej likūt pein ioer, im ilo̧k jān ijo.”6
Jej riit ilo Bok in Mormon kōn loļo̧k eo an Jisōs Kraist n̄an Laļ eo Ekāāl. Eaar kemour im kōjeram̧m̧an armej ro im kakien er bwe ajri ro nejier reddik rej aikuj bōkļo̧k er n̄an E.
Mormon ej ļo̧o̧ke, “Raar bōktok ro re dik nejier im door ioon bwidej ipeļaakin E, im Jisōs eaar jutak ilo ioļapļap; im jarlepju eo eaar ņa iaļan m̧ae er aolep kar bōktok n̄an e.”7
Innām eaar jiron̄ armej ro n̄an bukwelōlō. Kōn an ajri pād Ipeļaakin, Rilo̧mo̧o̧r eo eaar bukwelōlōk im kōm̧m̧ane juon jar n̄an Jemedwōj ilo Lan̄. Ālkin jar eo, Rilo̧mo̧o̧r eo eaar jan̄, “im eaar bōk ro re dik nejier, juon ilo̧k juon, im kōjeram̧m̧an er, im jar n̄an Jemān kōn er.
“Im ke Eaar kōm̧m̧ane men in Eaar bar jan̄.”8
Imaron̄ meļeļe en̄ajke ko kar kwaļo̧k jān Rilo̧mo̧o̧r eo n̄an ajri ro. Ekanooj in ļap ijo n̄an kar katak jān waanjon̄ak kein An ilo pukōt n̄an jar kōn, kōjeram̧m̧an, im katakin “ro re dik.”9
Iaar kein 10 ilo juon baam̧le 11 nejin ajri. Jon̄an aō jeļā, ejjeļo̧k juon iaan jema ak jinō kar jerbal ilo juon kūr eutiej ilo Kabun̄ in.
Ro jinōm im jemām raar tiljek ilo jerbal ilo aolepen kūr ko aer āinwōt ro jinen im jemen. Jemām eaar tōl kapijuknen eo am ilo jim̧we, ejjan̄in kar kōn illu ak mijak. Im kajoor in waanjon̄ak eo an jemām eaar ļapļo̧k kōn kapilōk ejouj eo an eo jinōm. Ko̧jpeļ eo ej juon kareel ekajoor ilo mour eo an aolep kōm kajjojo ilo Packer baam̧le im n̄an epepen eo tok juon im eo tok juon im eo juon, jon̄an wōt eo kōm kar loe.
Ij kōjatdikdik n̄an ekajet āinwōt juon armej em̧m̧an āinwōt jema. M̧okta jān aō ron̄ naan ko “em̧man am̧ kōm̧m̧an” jān Jemedwōj Ilan̄, I kōjatdikdik n̄an ron̄jaki m̧oktata jān eo jema ilo laļ in.
Elōn̄ iien ko Iaar pok kōn etke kar aikuj in kūr eō āinwōt juon Rijilōk innām āinwōt juon Būreejtōn an Doulul eo an Jon̄oulruo Rijilōk ro kōjekdo̧o̧n itok jān juon kapijuknen ijo jema maron̄ kar ņa etan jeniknik. Ejjab n̄an wōt uwaan Jon̄oulruo eo me ejejjet kōmeļeļe jab in.
Āliktata, imaron̄ lo im meļeļe bwe emaron̄ in kōnke kōn jekjek eo me kar kūr eō. Im imaron̄ meļeļe etke ilo aolep men jej kōm̧m̧ane ilo Kabun̄ in jej aikuj leļo̧k iaļ eo āinwōt ritōl ro n̄an ro jinen im jemen im ajri ro n̄an wōr iien ippān doon āinwōt juon baam̧ļe. Ritōl ro an priesthood eo rej aikuj in mejmejkaruo n̄an kōm̧m̧an bwe Kabun̄ in en kōjeram̧m̧an n̄an baam̧le.
Elōn̄ men ko kōn mour kōn ko̧jpeļ eo an Jisōs Kraist me rejjab maron̄ jon̄i kōn ta eo ej būne ak je ilo ļo̧o̧k ko an ro rej pād. Jej kaboub kōj kōn m̧ōko im bajet ko im būrookraam̧ ko im m̧akūtkūt ko. Ilo kōm̧m̧ane men kein, epidodo n̄an jab kalimjōk jetōb eo an ko̧jpeļ eo an Jisōs Kraist.
Jet iien juon ej itok n̄an n̄a im ba, “Būreejtōn Packer, eban kar em̧m̧an eļan̄n̄e … ?”
Emakijkij aō kabōjrak er im ba, “Jaab,” kōnke Ij kōtmene bwe ta eo ļoore enaaj juon m̧akūtkūt ak būrookraam̧ kāāl me enaaj kobaik waj juon eddo in iien im wāween ko an jāān ioon baam̧ļe eo.
Iien an baam̧le ej iien kwojarjar im ej aikuj in kejparoke im kautieje. Kōmij libjerjer membōr ro am n̄an kwaļo̧k kije n̄an baam̧le ko aer.
Ke kōmro kar jino in m̧are, lio pāleō im n̄a kar jokālet bwe kōm naaj kar bōk ajri ro me naaj kar ļotak tok n̄an kōm kōn eddo eo ilo pād ilo ļotak eo aer im eddōk eo. Ilo iien eo ejejjet, raar ejaake baam̧le ko aer make.
Ruo kōttan ilo m̧are eo am, ilo iien ļotak eo an juon iaan ļaddik ro reddik nejim, taktō ro raar ba, “Ijjab ļōmņak ajri in enaaj mour.”
Iien ko jim̧or menin eaar kwaļo̧k uwaak eo jān kōm̧ bwe kōm̧ naaj kar wujlepļo̧k am mour eļan̄n̄e ļaddik in euddik nejim emaron̄ mour. Ilo tōre eo an kajjitōk eo, kōm̧ kar kile bwe ejja wujlepļo̧k in wōt ej āinwōt ta eo Jemedwōj Ilan̄ ej en̄jake kōn kajjojo kōj. Juon ļōmņak an lan̄.
Kiiō ilo ad pād ilo jem̧ļo̧k in mour ko ad, Sister Packer im n̄a meļeļe im ewōr kam̧ool in bwe baam̧le ko remaron̄ n̄an indeeo. Ilo ad pokake kien ko im mour kōn ko̧jpeļ ilo likieo in, naaj kejparok im kōjeram̧m̧an kōj. Ippān ajri ro nejim im jibūm im kiiō ro nejin ro jibūm, jar eo am ej bwe kajjojo iaan baam̧le ko am rej rūttoļo̧k naaj wōr ejjab kije in wōt n̄an ro reddik raorōk.
Baba im m̧am̧a ro, tokālik n̄e kom̧ij kabwijer juon ajri ej kar ļotak ilo peimi, emaron̄ wōr ami visiōn eo itulowa kōn ittiņo̧ ko im jipadpad ko an mour. Enaaj em̧m̧an ļo̧k ami meļeļe etke Kabun̄ in ej āinwōt in im etke baam̧le eo ej doulul eo im̧aantata ilo iien in im indeeo. Ij kwaļo̧k bwe ko̧jpeļ eo an Jisōs Kraist ej m̧ool, bwe karōk in pinmuur eo, eo kar ņa etan karōk in m̧ōņōņō, ej juon karōk n̄an baam̧le ko. Ij jar Irooj bwe baam̧le ko an Kabun̄ in renaaj jeram̧m̧a, ro jine im jemen im ajri ro, bwe jerbal in enaaj dāpwil m̧aanļo̧k āinwōt kōņaan eo an Jemed. Ij kwaļo̧k kam̧ool in ilo etan Jisōs Kraist, amen.