Ta an Kraist Ļōmņak kōn Eō?

Jen Elder Neil L. Andersen

Jen Doulul eo an Jon̄oulruo Rijilōk ro

Ilo ami iakwe E, lōke E, tōmak E, im ļoor E, kom̧ naaj en̄jake iakwe eo An im kōmālim eo An.

Juon rinuuj jān juon māākjiin an Brazil eaar katak kōn Kabun̄ in ilo kōppopo n̄an juon nuuj in bwebwenato eaorōk.¹ Eaar keidi katak ko ad im loļo̧k jikin kamminene ko an mijenede ro im humanitarian ro. Eaar kōnono ippān ro jeran jen Kabun̄ in im ippān ro jet ro rejjab jouj. Ilo intōrpiu eo an ippa, rinuuj in āinwōt elukkuun pok ke kajjitōk, “Ewi wāween an juon armej jab kile kom̧ Rikūrijin? Ijeļā bwe ej kōnono kōn Kabun̄ in, ak ilo juon wāween iaar kajjitōk ippa make, im kar lo aō make kōļmenļo̧kjeņ ippa make, “Mour eo aō ej ke kwaļo̧k iakwe im kijejeto eo Ij en̄jake kōn Rilo̧mo̧o̧r eo?”

Jisōs eaar kajjitōk ippān Ri Parisi ro, “Kom̧ij ļōmņak ta kōn Ri Kraist?”² Ilo ekajet eo āliktata, wāween ad rikaļoor ej jamin naaj ekajet jen jerad ak rikōjdat ro. Ijjelo̧kin, āinwōt an Paul ba, “Kōj otemjej jenaaj jutak im̧aan tūroon in ekajet an Kraist.”³Ilo raan eo ņe kajjitōk ko raorōk n̄an kōj kajjojo renaaj āinwōt, “Kōm̧ij ļōmņak ta kōn Ri Kraist?”

Men̄e Ej iakwe aolep armej, Jisōs ej ekajet ilo juon wāween kipel kōnono n̄an jet ro Ipeļaakin āinwōt rijeļā m̧oņ,⁴ ribwebwe,⁵ im rikōm̧m̧an nana.⁶Ej kōmālim im kūr ro jet ro nejin aelōn̄ in lan̄⁷im meram in laļ.⁸Ej jab kōmālim kōnono n̄an jet āinwōt ro epilo mejeir⁹ rej jab jebar im le.¹⁰Eaar kakien ro jet āinwōt ro rereeo buruweir¹¹im rej kwōle im maro kōn kwojajar.¹²Eaar kwaļo̧k an burom̧ōj bwe jet rej jab tōmak¹³im er rej jān laļ,¹⁴ ak ro jet E eļap an kautiej er āinwōt ro kālet er,¹⁵ rū kaloran,¹⁶ro jeran.¹⁷Im kiiō kōj kajjojo ren kajjitōk, “Ta an Kraist ļōmņak kōn e?”

Būreejtōn Monson eaar kōmeļeļeik raan kein ad ilo aer em̧m̧akūt ļo̧k “jej aikuj mejmejkaruo ilo juon laļ eo me m̧anit eo em̧ōj an kanooj oktak jen men ko an jetōb .”¹⁸Ej juon iien ejjab eddōk ļo̧k ilo jab tōmak ilo Kraist im katak ko An.

Ilo jukjukinped in epok, jej lan̄lōn̄ ilo ad erom rikaļoor ro an Jisōs Kraist. Jej lo im̧we eo an Irooj peļaakūd. Mejān kajjik eo ad eaiboojoj im epād im̧aad. “Men in ej mour indeeo,” Jisōs eaar jar, “bwe ren jeļā Kwe juon wōt Anij e m̧ool, im Jisōs Kraist, eo Kwaar jilkintok.”¹⁹Erom juon rikaļoor ilo raan kein an mejān kajjik eo enaaj juon bāāj in nōbar n̄an indeeo.

Ennaan eo jaar ron̄ ilo kweilo̧k in eļap rej kakkōļļe ko jān Irooj kōn iaļ eo ilo ad rikaļoor. Ilo ad kar ron̄jake ilo raan ko ruo rem̧ootļo̧k, jar n̄an tōl an jetōb, im ilo ad ekkatak im jar kōn ennaan kein ilo raan ko im̧aan, Irooj ej kōjeram̧m̧an kōj kajjojo kōn tōl letok n̄an kajjojo jen menin letok eo an Jetōb Kwojarjar eo. En̄jake kein rej ukōt ļo̧k kōj eļap ļo̧k n̄an Anij, ukweļo̧k, pokake, tōmak, im lōke. Rilo̧mo̧o̧r eo eaar uwaak n̄an m̧akūtkūt in tōmak ko ad. “Eļan̄n̄e armej ej yokwe Eō, e naaj kōjparok Aō in naan; im Jema enaaj yokwe e, im kom naaj itok n̄an e, im jokwe ippān.”²⁰

Jisōs ej kūr “Kwōn itok im ļoor Eō”²¹ej jab wōt n̄an ro raar pojak ilo jetōb. Ilo m̧ool, rikaļoor ej jab juon jiāe n̄an jidik, ak ej juon kūr n̄an aolep. Iaļ in ad an rikaļoor ej jab juon iaļ ekadu ipeļaakin jikin ettōr eo ak em̧ool ak juon jikin ettōr aitok. Ej juon em̧m̧akūt eo eaitok n̄an laļ an celestial.

Kūr in ej juon kūr n̄an jerbal aolep iien. Jisōs eaar ba: “Eļan̄n̄e kom̧ij yokwe eō, kom̧ naaj kōjparok kien ko Aō.”²²“Eļan̄n̄e jabdewōt armej e kōņaan itok ilo̧katok, en make kaarmejjete, im kotak an debwāāl raan otemjej, im ļoor Eō.”²³ Jemaron̄ jab pād ilo jon̄an eo em̧m̧an tata aolep ran, ak eļan̄n̄e jej kajjieon̄, kūr eo an Jisōs eobrak kōn rōjan̄ im kōjatdikdik: “Kom̧win itok n̄an Ippa, kom̧ otemjej rej jerbal im ban, im Inaaj kakkijeik kom̧.”²⁴

Jekdoon ia kwoj pād ie kiiō ilo iaļ eo an rikaļoor, kwoj pād ioon iaļ eo ejim̧we, iaļ eo n̄an mour indeeo. Ippān jemaron̄ kotak im kōkajoorļo̧k doon ilo raan ko im̧an reļļap im aorōk. Jekdoon ta men ko reppen rej pād im̧aad, m̧ōjņo̧ ko relikjab n̄an kōj, ak repen aer jebooļ kōj, jen tōmak ilo Nejin Anij, eo eaar kwaļo̧k, “Eo ej tōmak ej maron̄e men otemjej.”²⁵

In kwaļo̧k ippāmi ruo waanjon̄ak ko an rikaļoor ilo m̧akūtkūt. Juon ej jān mour eo an Rikanaan Thomas S. Monson, ej kōmeļeļeiki kajoor ejouj im katak ko an Jisōs, “A eo eļaptata iaami, enaaj ri karijerami.”²⁶

Enan̄in 20 iiō ko rem̧ootļo̧k Būreejtōn Monson eaar kōnono ilo kweilo̧k eo eļap kōn juon jiron̄ 12 iiō rito̧o̧n eaar en̄taan kōn kānjer. Eaar kwaļo̧k kōn peran eo an im jouj eo an ro jeran n̄an kōtak lōn̄ ļo̧k e n̄an Moun Timpanogos ilo central Utah..

Jejjo iiō ko remootļo̧k Iaar ioon Jami Palmer Brinton im kar ron̄ bwebwenato eo ilo juon wāween eoktak—wāween eo ej ta eo Būreejtōn Monson eaar kōm̧m̧ane n̄an e.

Jami eaar ioon Būreejtōn Monson ilo M̧aaj 1993, juon raan ālkin kar jiron̄ ļo̧k e bwe kinej eo ilōn̄ in bukie eo ituanbwij maron̄ in eaar juon kānjer in di emōkaj an eddōk. Kōn jipan̄ an jemān, Būreejtōn Monson eaar kōm̧m̧an juon kōjeram̧m̧an in priesthood, “Jisōs enaaj pād ituanbwij maron̄im im tuanmiin̄im n̄an kam̧ōņōņōik eok.”

“Ālkin an em̧m̧akūt jen opiij eo an raan eo,” Jami eaar ba, “Iaar mejaļ juon bujāān̄ kar lo̧klo̧k n̄an wiil jea eo aō im kar leļo̧k n̄an e. ‘Kom̧m̧an tata! eaar jei ilo leta ko rerōōj.”

Jen Kōm̧admōd ko an nan̄inmej eo im mwijmwij eo n̄an kāājmour ne eo, Būreejtōn Monson eaar jab meļo̧klo̧k e. Jami eaar ba, Būreejtōn Monson eaar kwaļo̧k waanjon̄ak in ta meļeļein n̄an erom juon rikaļoor an Kraist em̧ool. [Eaar] kotak eō jān burom̧ōj n̄an kōjatdikdik eļap im ejjeļo̧k jem̧ļo̧kin.” Jilu iiō ko ālkin kweilo̧k eo aer kein kajuon, Jami eaar bar juon alen jijet ilo opiij eo an Būreejtōn Monson. Ke kweilo̧k eo eaar jem̧ļo̧k, eaar kōm̧m̧ane juon men eo me Jami ej jamin naaj meļo̧kļo̧k e. Kōn menin kōn wāween an Būreejtōn Monson ļōmņak kōn jet men, eaar kabwilōn̄ e kōn ejja bujāān̄ eo me eaar leļo̧k n̄an e jilu iiō ko m̧okta. “Kwom̧m̧an tata!” bujāān eo eaar kwaļo̧k. Eaar kōjparok e, jeļā bwe enaaj bar jepļaakļo̧k n̄an opiij eo an n̄e ej mour jān kānjer. Jon̄oul emen iiō ko ālkin kweilo̧k eo aer kein kajuon, Būreejtōn Monson eaar kōm̧m̧ane m̧are eo an Jami Palmer im Jason Brinton ilo Salt Lake Temple.²⁷

Jemaron̄ in ekkatak eļap ļo̧k jān rikaļoor an Būreejtōn Monson. Ekkā jet iien ej kakememej Ritōl ro Routiej n̄an kememej kajjitōk in epidodo: “Ta Jisōs enaaj kar kōm̧m̧ani?”

Jisōs eaar jiron̄ ļo̧k ritōl an jikin kweilo̧k eo, “Kwōn jab lōln̄o̧n̄, kwōn tōmak wōt.”²⁸ Rikaļoor ej tōmak E ilo iien aenōm̧m̧an im tōmak E ilo iien eppen, n̄e metak ko ad im mijak ko ad rej aenōm̧m̧an jen wōt tōmak eo bwe E ej iakwe kōj im kōjparok kalim̧m̧ur ko An.

Ejjab etto iaar ioon juon baam̧le eo ej juon waanjon̄ak eaiboojoj kōn wāween eo jej tōmak E. Olgan im Soline Saintelus, jān Port-au-Prince, Haiti, kar jiron̄ eō bwebwenato eo aer.

Ilo Jānwōde 12, 2010, Olgan eaar pād ilo jikin jerbal im Soline eaar pād ilo kabun̄ eo ke juon m̧akūtkūt in laļ enana eaar kakkure Haiti. Ajri ro jilu nejier—Gancci, ļalem iiō, Angie, jilu iiō, im Gansly, juon iiō—kar pād ilo m̧weo ilo apartment eo aer ippān juon m̧ōttāer.

Kakkure in eļap eaar jelōt aolep jikin. N̄e kom̧ maron̄ keememej, jon̄oul taujin raar mej Jānwōde eo ilo Haiti. Olgan im Soline raar ettōr kaiūr jon̄an eo remaron̄ e n̄an apartment eo aer n̄an pukōt ajri ro. Apartment eo jilu po ie ijo baam̧le eo Saintelus raar jokwe ie eaar rum̧ļo̧k.

Ajri ro raar jab rōļo̧k. Ejjeļo̧k jerbal in lo̧mo̧o̧r enaaj maron̄ leļo̧k n̄an juon em̧ eo elukkuun jorrāān.

Olgan im Soline Saintelus raar jim̧or jerbal āinwōt mijenede ro rej jerbal aolep raan im raar m̧are ilo tampeļ eo. Raar tōmak ilo Rilo̧mo̧o̧r eo im ilo kalim̧m̧ur ko An n̄an er. Buruweer raar rub. Raar jab maron̄ dāpij aer jan̄.

Olgan eaar jiron̄ eō bwe ilo tōmak eo an awa eo emarok eaar jino jar. “Jemedwōj Ilan̄,” eļan̄n̄e enaaj an kilaam̧, eļan̄n̄e emaron̄ juon iaan ajri ro nejū emour.” jouj, jouj jipan̄ kōm̧.” Eaar etal jebooļe peļaakin m̧weo, jar kōn im̧we. Ro ritturin raar kajjieon̄ kainōm̧m̧an e im jipan̄ e kile jako eo an ajri ro nejin. Olgan eaar wōnm̧aanļo̧k wōt etetal kabooļe dōkā ko rerub im jorrāān an m̧weo kōjatdikdik, jar. Innām juon men ekabwilōn̄lōn̄ eaar waļo̧k. Olgan eaar ron̄ jan̄ an juon nin̄nin̄ elukkuun mera emaron̄ ron̄ jidk wōt. Eaar ainikien jan̄ an nin̄nin̄ eo nejin.

Ium̧win awa ko ro riturin raar lukkuun kōb ibuļōn dōkā ko rerub, kōjeekdoon mour ko aer make. Ilo bon̄ōn̄ eo emarok, kōn ainikien ko reļļaaj an ama ko im jijeļ ko, rijerbal ro rej lo̧mo̧o̧r raar bar ron̄ bar juon ainikien. Raar bōjrak jān aer den̄den̄ im ron̄jake. Raar jab maron̄ tōmak ta eo raar ron̄jake. Eaar ainikien juon nin̄nin̄ edik—im eaar al. Ļalem iiō rūtoon Gancci tok ālik eaar ba bwe eaar jeļa bwe jemān enaaj ron̄ ainikien eļan̄n̄e ej al. Kōn jon̄an eddo eo an jimāān ko rerub tokālik eaar kwaļo̧k unin jebjeb in jimettan in pein, Gancci eaar al al eo an em̧m̧an tata ippān, “ N̄a Nejin Anij.”²⁹

Ke awa ko raar eļļā, lukwōļpen marok eo, mej, burom̧ōj an elōn̄ ļaddik im leddik ro jet raiboojoj nejin Anij ilo Haiti, baam̧le eo Saintelus eaar juon kabwilōn̄lōn̄ n̄an er. Gancci, Angie, im Gansly kar lo er remour ium̧win m̧weo ejorrāān.³⁰

Kabwilōn̄lōn̄ ko rej jab aolep iien to̧rto̧r liklak. Ilo iien ko jej lukkuun kājekļo̧kjeņ kake etke kabwilōn̄lōn̄ eo jaar lukkuun jar kake ejjab waļo̧k ijin im kiiō. Ak ilo ad lōke ilo Rilo̧mo̧o̧r eo, kar kalim̧m̧ur bwe kabwilōn̄lōn̄ enaaj kōm̧m̧an. Men̄e ilo mour in ak ilo mour eo juon, aolep renaaj kōm̧m̧an. Rilo̧mo̧o̧r eo eaar kwaļo̧k: “En jab pok būruemi, im en jab lōln̄o̧n̄.”³¹“Ilo laļ kom̧ij en̄taan, a kom̧win m̧ōņōņō; N̄a Iar bōk anjo̧ ioon laļ.”³²

Ij kam̧ool bwe ilo ami iakwe E, lōke E, tōmak E, im ļoor E, kom̧ naaj en̄jake iakwe eo An im kōmālim. Ilo ami kajjitōk, “Ta an Kraist ļōmņak kōn eō?” kom̧ naaj jeļā bwe kom̧ rej Aō rikaļoor; kom̧ rej M̧ōtta. Jen jouj eo An Enaaj kōm̧m̧an n̄an kom̧ ta eo kom̧ij jab maron̄ kōm̧m̧ane n̄an kom̧ make.

Jepojak in kōttar kōnono ko āliktata an rikanaan eo ad ejitōn bōro. Būreejtōn Thomas S. Monson eaar ekkapit āinwōt juon Rijilōk an Irooj Jisōs Kraist ke Iaar 12 iiō rūttoo. Kōn eļap ļo̧k jen 48 iiō ko jaar jeram̧m̧an n̄an ron̄jake an kwaļo̧k an kam̧ool kōn Jisōs Kraist. Ij kam̧ool bwe e ej kiiō jutak āinwōt juon Rijilōk erūtto tata an Rilo̧mo̧o̧r eo ioon laļ in.

Kōn iakwe im kautiej n̄an elōn̄ rikaļoor ro an Jisōs Kraist ro rej jab membōr an Kabun̄ in, jej ettā kwaļo̧k bwe enjeļ ro raar kōro̧o̧ltok n̄an laļ in ilo raan ko ad. Kabun̄ eo an Jisōs Kraist ilo An kar ejaake etto em̧ōj an bar jepļaaktok, ippān kajoor eo, kain̄i ko, im kōjeram̧m̧an ko an lan̄. Bok in Mormon eo ej bar juon kalim̧m̧ur in Jisōs Kraist.

Ij kam̧ool bwe Jisōs Kraist ej Rilo̧mo̧o̧r eo an laļ in. Eaar en̄taan im mej kōn jerawiwi ko ad im kar jerkak ilo raan eo kein kajilu. Eaar jerkakpeje. Ilo juon raan tokālik, aolep bukie renaaj bukwelōlō im aolep lo̧ renaaj kwaļo̧k bwe E ej Ri Kraist.³³Ilo raan ņe, inepata eo ad ej jamin erom, “Ro jet rej ke kile eō Rikūrijin?” Ilo iien eo, mej ko mejād renaaj lukkuun iookļo̧k E, im jetōb ko ad renaaj rūm̧ļo̧k ilo kajjitōk eo, “Ta an Kraist ļōmņak kōn e?” Ej mour. I barāinwōt kam̧ool ilo etan Jisōs Kraist, amen.