Bwe Eo Ejebwābwe Maron̄ Loe
Jen Elder M. Russell Ballard
Jen Doulul eo an Jon̄oulruo Rijilōk ro
Ilo ami pukōt n̄an mour kōn ko̧jpeļ eo im katak eo an Kraist, Jetōb Kwojarjar enaaj tōl kom̧ im baam̧le eo ami.
Ekkar n̄an jeje ko rekwojarjar, Liaona eo eaar “juon ball edoulul eo wāween kōm̧m̧anmōne eaar eltan pā ko rekabeel” ewōr ruo pā redik, juon eaar jitōn̄ļo̧k iaļ eo baam̧le eo an Jemed Liai ej aikuj etal ie ilo āne jem̧aden (1 Nipai 16:10).
Ij ļōmņak Ijeļā etke Liai eaar ļap an bwilōn̄ ke m̧oktata eaar loe, kōnke Ij kememej en̄jake eo aō make m̧oktata Iaar kam̧oole juon GPS eo kar kōjerbale. Ilo ļōmņak e aō eaar juon kein jerbal an raan kein “kōn kōm̧anm̧anmōne eaar eltan pā ko rekabeel.” Lo juon jekjek, ilo jet wāween Ijjab maron̄ pijaik ļo̧k, kein jerbal in edik, epād lowaan talboon eo aō, maron̄ ba kajien ia eo ij pād ie im ba n̄an eō lukkuun ekōjkan tōpar ļo̧k ijo ikōņaan etal n̄an e.
Jim̧or n̄an lio pāleō, Barbara, im n̄a, GPS eo ej juon kōjeram̧m̧an. N̄an Barbara ej meļeļe in ejjab aikuj in ba n̄an eō n̄an bōjrak im kajjitōk kōn iaļ ko; im n̄an n̄a ej meļeļe in imaron̄ jim̧we n̄e ij ba, ijjab aikuj in kajjitōk ippān jabdewōt. Ijeļā lukkuun ia eo ij etal n̄an e.”
Ro jeiū im jatū, ewōr ippād juon kein jerbal em̧ool eļap ļo̧k an kōbaļbaļ jān GPS eo em̧m̧an tata. Aolep rej jejļo̧k jān iaļ eo aer ilo juon tōre, kōn jet wāween. Ej kōn im̧we ko an Jetōb Kwojarjar me maron̄ bar bōktok kōj ilo inem̧m̧an n̄an iaļ eo ejim̧we, im ej kōn en̄taan in pinmuur eo an Rilo̧mo̧o̧r eo me maron̄ bar kōro̧o̧l kōj n̄an kapijuknen.
Jebwābwe maron̄ kōjerbale n̄an aolepen jukjukinpād ko barāinwōt n̄an kajjojo armej. Rainin jej mour ilo juon tōre ilo an ļap wōt ijo ilo laļ in ej pok, eļaptata kōn aorōk ko im men ko im̧aan tata ilowaan kapijuknen ko ad.
Jibuki iiō ko remootļo̧k, Būreejtōn Joseph F. Smith eaar kobaik m̧ōņōņō eo kajju n̄an baam̧le im kar kakkōl kōj n̄an kōmaat ad kijejeto ie. Eaar ba: “Ejjab maron̄ wōt juon m̧ōņōņō eo em̧ool ejeno̧lo̧k im make wōt jān m̧weo. … Ejjeļo̧k m̧ōņōņō ilo an ejjeļo̧k jerbal in jipan̄, im ejjeļo̧k jerbal in jipan̄ eļapļo̧k jān eo me ej ukōt kapijuknen eo ļo̧k n̄an juon jikin ekwojarjar, im eo ej kōkōm̧anm̧anļo̧k im kejparok mour in baam̧le. … kapijuknen eo ej ta eo ej aikuj em̧m̧m̧anļo̧k” (Teachings of Presidents of the Church: Joseph F. Smith [1998], 382, 384).
Ej kapijuknen ko im baam̧le ko ad me rej aikuji em̧m̧anļo̧k eo ilo laļ in eobrak kōn wuj waan an mour in im meno̧kno̧k ko an laļ. Juon waanjon̄ak ekailbōkbōk ej kōn eddōk ļo̧k eo kōn kajetokjān m̧are ijin ilo United States. Ilo jino in iiō in New York Times eaar kwaļo̧k bwe “oran ajri ro rej ļotak n̄an kōrā ro rejjab m̧are em̧ōj an tōpar juon jon̄ak eļap: eļapļo̧k jān jimettan in keotak ko n̄an kōrā in Amedka ro ilaļ in 30 iiō dettaer rej waļo̧k itulikin m̧are” (Jason DeParle im Sabrina Tavernise, “Unwed Mothers Now a Majority Before Age of 30,” New York Times, Feb. 18, 2012, Al).
Jej barāinwōt jeļā bwe ibwilijin ripālele ro ilo United States me rim̧are, enan̄in jimettanier rej jepel. Jekdo̧o̧n ro me raar m̧are wōt rej meļo̧kļo̧k in kōkajoor m̧are eo aer kōn kōtļo̧k an men ko jet jelet jemjerā ko an baam̧le ko aer.
Inepata eo āinļo̧k wōt ej ettal eo eļap an eddōk ikōtaan m̧weie im jeram̧ōl im kōtaan ro me rej kajieon̄ dāpij aorōk ko im kalim̧m̧ur ko an baam̧le im ro me rej ebbwer jān kejparok menin. Ilo bōnbōn ko, ro me edik jeļāļo̧kjeņ im ewaļo̧k kōn dik kōļļā ko aer rej ro me edik aer kōņaan m̧are im etal n̄an jar im eļap ļo̧k aer kōņaan koba ļo̧k ilo jorrāan ko im n̄an neji itulikin m̧are. Im m̧wil kein rej barāinwōt jorrāān ilo enan̄in aolepen laļ in. (Lale W. Bradford Wilcox and others, “No Money, No Honey, No Church: The Deinstitutionalization of Religious Life among the White Working Class,” available at www.virginia.edu/marriageproject/pdfs/Religion_WorkingPaper.pdf.)
Itujab eo juon in ta eo elōn̄ raar ļōmņak, jeram̧m̧an im jeļāļo̧kjeņ rej āinwōt ekkeijel n̄an juon kōņaan eo eutiej kōn bōk iminene kaki an baam̧le ko im aorōk ko.
Lukkuun kajjitōk eo, aaet, ej kōn un eo im tōprak eo. M̧ōttan ko jet an jukjukinpād eo ekajoor ļo̧k ke aorōk im baam̧le ko kōnke eļapļo̧k aer jeļāļo̧kjeņ im jeram̧m̧an, ak eļapļo̧k ke aer jeļāļo̧kjeņ im jeram̧man kōnke kōn aorōk ko aer im kajoor an baam̧le ko? Ilo Kabun̄ in aolepen laļ in jejeļā bwe tōre ko āliktata. N̄e armej rej kōm̧m̧ani kalim̧m̧ur ko an baam̧le im kabun̄ n̄an pedped ko an ko̧jpeļ, rej jino kōm̧m̧an em̧m̧anļo̧k ilo jetōb im emakijkij ilo kanniōk barāinwōt.
Im aaet jukjukinpād ko ekkā aer kajoorļo̧k ilo an baam̧le ko kajoorļo̧k. Kalim̧m̧ur ko n̄an baam̧le im aorōk ko rej un ko raorōk. Enan̄in jabdewōt men ej jelete. N̄e ripālele ro rej m̧are im kōm̧m̧ani kalim̧m̧ur ko n̄an doon, ekanooj ļap aer kōļapļo̧k iien ko aer kōn jeram̧m̧an. N̄e ajri ro rej ļotak ilo bujen m̧are eo im wōr jim̧or jiner im jemer, iien ko aer rem̧m̧an im aer kōņaan eo aer kōn jikin jerbal eļap an ļap. Im n̄e baam̧le ko rej jerbal im ikkure ippān doon, ro iturier im jukjukinpād ko rej romaak, menin jeram̧m̧an rej ļapļo̧k, im būrookraam̧ ko kōm̧m̧ani an kien n̄an jipan̄ rej menin aorōk.
Kōn menin ennaan eo enana ej bwe jepeepļo̧k an baam̧le ej kōm̧m̧an bwe ļapļo̧k in oran jorrāān ko an ikitōltōl im menin jeram̧m̧an. Bōtaab ennaan eo em̧m̧an ej bwe, āinwōt un im tōprak ko jet, jorrāān ko remaron̄ in oktak eļan̄n̄e ta eo kōm̧m̧ani ej oktak. Nana ko rej ņar mejļaer kōn mour kōn pedped ko im aorōk ko rejim̧we. Ro jeiū im jatū, un eo ekanooj in aorōk an tōre in ad mour ej baam̧le ko ad. Eļan̄n̄e jenaaj wujlepļo̧k ad n̄an un in, jenaaj kōkōm̧anm̧an ļo̧k aolep m̧ōttan ko jet an mour ko ad im naaj erom, āinwōt juon armej im āinwōt juon kabun̄, juon waanjon̄ak im juon kōkaļļe n̄an aolep armej ro an laļ in.
Bōtaab menin ejjab pidodo ilo juon laļ eo me bōro ko rej oktak ļo̧k ilo elōn̄ iaļ ko im ijo juon laļ elikieo ej āinwōt jab bōjrak an em̧akūtkūt im okoktak ilo juon jon̄an eo jan̄in kar ļōmņak kake m̧okta. Ejjeļo̧k men eto an pād ilo juon tōre aitok. Jon̄ok ko, iminene ko, jekjek ko rebun̄bun̄, jim̧we ilo kien, im em̧ool ļōmņak ko kōn jim̧we im bōd rej okoktak. Āinwōt an rikanaan Aiseia kar loe, bōd ej pijaik āinwōt jim̧we im jim̧we āinwōt bōd (lale Aiseia 5:20).
Jeno̧ļo̧k ilo jetōb eļapļo̧k an depakpak ļo̧k jān m̧okta ilo an nana ļapļo̧k an kapo jān m̧okta im mera im kanōk armej n̄an marok—jekdo̧o̧n n̄e m̧ool eo im meram eo an ko̧jpeļ eo kan̄ōltok m̧ool eo ilo bōro im utiej an laļ in, n̄an eo ej pukōt ta eo erreo im em̧m̧an.
Kōj jemaron̄ dik ilo bōnbōn, bōtaab āinwōt membōr ro an Kabun̄ in jemaron̄ kijoone ettal kein rej ļapļo̧k. Jejeļā kajoor eo an jerbal in jipan̄ eo an Kraist me ej aiintok ajri ro nejin Anij jekdo̧o̧n ta jekjek ko aer ilo jetōb im menin jeram̧m̧an. Juon iiō emootļo̧k Būreejtōnji eo Kein Kajuon kar kūr kōj n̄an bōk kuņaam ilo juon raan in jerbal in jipan̄ kememej e 75 iiō dūtto̧o̧n būrookraam̧ in welfare eo ejipan̄ armej ro n̄an erom ļo̧k un̄are-peier make. Milien awa ko kar liļo̧k jān membōr ro ad aolepen laļ in.
Kabun̄ in ej juon jikin likōpejn̄ak ilo m̧aļo in eļan̄n̄e, juon emjak ilo dān ko rokoktak im jepeļļo̧k rejjab bōjrak, im juon kōkaļļe n̄an ro me rej kaorōk im pukōt jim̧we. Irooj ej kōjerbal Kabun̄ in āinwōt juon kein jerbal ilo kūnōōr tok ajri ro Nejin ilo aolepen laļ in n̄an kejparok eo an ko̧jpeļ eo An.
Jetōb eo an Elisha, eo ejjeļo̧k jem̧ļo̧kin, ej barāinwōt juon kajoor eļap ilo jipadpad ko an Irooj n̄an kōttōpar indeeo an ajri ro Nejin. Ilo naan ko an Malakai, Jetōb eo an Jetōb Kwojarjar ej ukōt būruon jemeir n̄an ro nejier, im būruon nejier n̄an ro jemeir” (Malakai 4:6).
Kabun̄ in ej jutak āinwōt juon waanjon̄ak an bōro eoktak im āinwōt juon jon̄ak kōn em̧m̧an ilo laļ in. Ibwilijin membōr ro an Kabun̄ in me rej m̧are ilo tampeļ im ro emakikij aer pād ilo kweilo̧k ko ilo Jabōt, jon̄an jepel eo eļap an dik ļo̧k jān eo an laļ in, im baam̧le ko rej pād wōt ilo epaake doon im eļap an emakijkij an ekōnono. Ājmour eo an baam̧le ko ad rem̧m̧anļo̧k, im jej mour jet iiō aitok ļo̧k jān armej ro jet. Jej leļo̧k eļapļo̧k kōn menin jipan̄ ko kōn jāān im eļapļo̧k jerbal in jipan̄ n̄an ro rej pād ilo aikuj, im eļapļo̧k ad kōņaan pukōt jikin jeļāļo̧kjeņ ko rōutiej ļo̧k. Ij kwaļo̧k men kein ejjab n̄an kōmejāje ak n̄an kam̧ool bwe mour em̧m̧an ļo̧k (im ļapļo̧k an m̧ōņōņō) ilo an bōro ko oktak n̄an baam̧le eo im ilo an baam̧le ko mour ilo meram in ko̧jpeļ eo an Kraist.
Kōn menin ta eo jemaron̄ kōm̧m̧ane n̄an kabōjrak erom Jebwābwe? M̧oktata, imaron̄ke kwaļo̧k bwe jān kōllaajrak aorōk tata ko. Likūt jabdewōt men kom̧ij kōm̧m̧ani itulikin kapijuknen eo ilo m̧ōjņo n̄an im ilo rejtake ta eo ej waļo̧k ilowaan kapijuknen eo ami. Kememej kapilōk eo an Būreejtōn Harold B. Lee bwe “men eo aorōk tata … jerbal eo kom̧ naaj kōm̧m̧ane enaaj pād wōt ilowaan wōt kapijuknen eo ami” (Teachings of Presidents of the Church: Harold B. Lee [2000], 134) im Būreejtōn David O. McKay “Ejjeļo̧k bar tōprak maron̄ kōļļāik n̄an likjab eo ilo kapijuknen eo” (kar kout jān J. E. McCulloch, Home: The Savior of Civilization [1924], 42; ilo Conference Report, Epr. 1935, 116).
Karōk mour eo ami make n̄an leļo̧k iien n̄an jar im jeje ko rekwojarjar im m̧akūtkūt an baam̧le. Leļo̧k jan ajri ro nejimi reddik eddo ko ilo kapijuknen eo me naaj katakin er kilen jerbal. Katakin er bwe mour kōn ko̧jpeļ eo enaaj tōl er ļo̧k jān nana, m̧ōm̧ an kanniōk, im nana eo ilo Intōrnet eo, kein ron̄jake alooj ko, im pitio keem ko. Rejjamin naaj jebwābwe, im renaaj kōpooj n̄an kōjbweweik eddo eo n̄e jej lōke er.
Kein karuo, jej aikuj in kōm̧m̧ani men ko ilo laajrak eo ejim̧we! M̧are m̧okta innām baam̧le. Ekanooj lōn̄ ro ilo laļ in em̧ōj aer meļo̧ļo̧k laajrak in men ko rejim̧we im ļōmņak remaron̄ jājini ak ukōt e. kōm̧akūtļo̧k jabdewōt mijak eo ami kōn tōm̧ak. Ļōke kajoor eo an Anij n̄an tōl kom̧.
N̄an kom̧ ro kom̧ij jan̄in m̧are, kanooj kōmaat ami maron̄ n̄an pukōt eo m̧ōttam̧ indeeo . Likao ro, kememej bar jet men Būreejtōn Joseph F. Smith eaar ba: “Jeļo̧k rejtan … [ej bōk] n̄an ļōmņak e aitia eo me [en̄in ej] ekakrelel kōnke [ej bōktok] ippān tok eddo eo ejjab ļap. … Bōd eo ej pād ippān likao ro. Jab maron̄ dāpij iiō ej tōl er jān iaļ ko an jerbal im eddo. … Jiron̄ ro er ro ejelet er … [im] naaj m̧are eļan̄n̄e remaron̄, im naaj bōk ilo m̧ōņōņō eddo ko an mour in baam̧le” (Gospel Doctrine, 5th ed. [1939], 281).
Im n̄an jiron̄ ro, Ikōņaan kobaik bwe kom̧ij aikuj barāinwōt jab meļo̧kļo̧k eddo in. Ejjeļo̧k jikin jerbal maron̄ bōkwaj n̄an kom̧ eļap kūrm̧ool āinwōt karūttoļo̧k juon baam̧le. Im n̄e kom̧ij tōpar dedjab kā aō, kom̧ naaj kile menin em̧ool eļapļo̧k.
Jilu, ļōm̧aro im lim̧aro pālele, kom̧ij aikuj in m̧ōttā ro reier wōt juon ilo m̧are eo ami. Kōmakijkij riiti im meļeļe kean̄ eo kōn baam̧le im ļoor e. joļo̧k kajoor ko rejjab jim̧we ilo jabdewōt jekjek. Ejjeļo̧k juon ej an juon eo pāleen ak ajri ro nejid; Anij ej Jemen aolepedwōj im eaar letok n̄an kōj maron̄ eo kōn baam̧le ko ad make, eo me kar im̧aanļo̧k An wōt, n̄an jipan̄ kōj erom ļo̧k āinwōt E. Āinwōt ajri ro Nejin jej aikuj katak ilo kapijuknen eo n̄an iakwe Anij im n̄an jeļā bwe jemaron̄ kajjitōk Ippān kōn jipan̄ eo jej aikuji. Aolep, m̧are ak make ļo̧k, maron̄ m̧ōņōņō im jipan̄ ilowaan wōt jekdo̧o̧n baam̧ļe rōt eo ami.
Im āliktata, kōjerbal kein jipan̄ ko an baam̧le an Kabun̄ in. Ilo karūttoļo̧k ajri ro, baam̧le ko remaron̄ pukōt jipan̄ eo an ward eo. rejtak im jerbal ippān doon ippān ritōl ro an priesthood im radik ko im bōk em̧m̧an eo an būrookraam̧ ko an jodikdik ro im baam̧le an Kabun̄ in. Kememej bar juon men kōn naan eo aorōk an Būreejtōn Lee—bwe Kabun̄ in ej dumej eo kōn ta eo jej kalōk baam̧le ko ad indeeo (lale Teachings of Presidents of the Church: Harold B. Lee [2000], 148).
Kiiō, eļan̄n̄e kōn jabdewōt un kom̧ kajjojo ak āinwōt juon baam̧le kar jebwābwe jān iaļ eo ami, innām kom̧ij aikuj kōjerbal wōt katak ko an Rilo̧mo̧o̧r eo jān Luk, jepta 15, n̄an kajim̧we iaļ eo ami. Ijin Rilo̧mo̧o̧r eo ej ba kōn kijejeto eo an juon jabōt ilo pukōt jiip eo ejebwābwe, kōn juon kōrā ej pukōt jāān dekā eo ejako, im kōn karuwainene eo kar bōk jān nejin eo ejerwaan eaar bar jepļaak n̄an kapijuknen eo. Etke Jisōs eaar katakin kōn būrabōļ kein? Eaar kōņaan bwe jā.n jeļā bwe ejjeļo̧k iaad naaj jebwābwe bwe jeban maron̄lo iaļ eo ad bar juon alen kōn Pinmuur eo An im katak ko An.
Ilo ami pukōt n̄an mour kōn ko̧jpeļ eo im katak eo an Kraist, Jetōb Kwojarjar enaaj tōl kom̧ im baam̧le eo ami. Kom̧ naaj bōk juon GPS ilo jetōb n̄an jiron̄ kom̧ iien otemjej ia eo kom̧ pād ie im ia eo kom̧ij etal n̄an e. Ij kwaļo̧k kam̧ool bwe Ripinmuur jerkakpeje an aolep armej ej iakwe kōj, im Eaar kalim̧m̧ur eļan̄n̄e kom̧ naaj ļoor E, Enaaj tōl kōj ilo inem̧m̧an n̄an im̧aan mejān Jemedwōj Ilan̄, jān men kein Ij kam̧ool ilo etan Jisōs Kraist, amen.