Ekōjkan Bōk M̧adenļo̧k im Im̧we n̄an Mour eo Am̧ Make
Jen Elder Richard G. Scott
Jen Doulul eo an Jon̄oulruo Rijilōk ro
Etke Irooj ekōņaan bwe jān jar n̄an E im kajjitōk? Kōnke en̄in ej wāween bōk m̧adenļo̧k.
Jabdewōt eo ej jutak ilo jjikin kwaļo̧k in n̄an kwaļo̧k juon ennaan ej en̄jake kajoor im rejtak eo an membōr ro ilo aolepen laļ in. Ij kam̧oolol bwe ejja rejtak in wōt emaron̄ itok jān juon m̧ōtta eo ejitōnbōro epād iturājet eo juon in rōn̄ōl eo. Ko̧mool, Jeanene.
Jetōb Kwojarjar ej letok meļeļe eo aorōk me jej aikuji n̄an tōl kōj ilo iaļ eo ad ilo mour in. N̄e meļeļe eo ej oktak im alikkar im aorōk, ej aikuj bōk taitōļ eo an m̧adenļo̧k. N̄e ej juon kōro̧ro in im̧we ko emakijkij ad būki n̄an tōl kōj bun̄tōn kōn bun̄tōn n̄an juon men eaorōk, ilo jekjek in ennaan in aō, ej im̧we.
Juon waanjon̄ak an m̧adenļo̧k enaaj juon tōl me Būreejtōn Spencer W. Kimball eaar bōke ālkin jabenejnej eo eaitok im ejjab bōjrak an n̄an Irooj ikkijien leļo̧k priesthood n̄an aolep em̧m̧aan ro rerreo ilo Kabun̄ in ke ilo iien eo eaar pād wōt ippān wōt jet.
Bar juon waanjon̄ak kōn m̧adenļo̧k ej tōl in kar letok jān Būreejtōn Joseph F. Smith: “Ij tōmak jej em̧m̧akūt im ad pād im̧aan jemān rikwoj meļān in lan̄ ro im kōn ad armej in lan̄. Jejjab jepeļļo̧k jān er. … Eļap ad epaake ilo kadkad n̄an ro nuked, n̄an rūtto ro ad, … ro em̧ōj aer em̧m̧akūt jān kōj n̄an laļ eo an jetōb. Jejjab maron̄ meļo̧kļo̧k er; ejjab bōjrak ad iakwe er; iien otemjej jej dāpij ememļo̧k ko im en̄jake ko ad kōn er. … Eļan̄n̄e ej wāween eo in ippād ilo mour wabanban in, kar jepool kōn m̧ōjņo̧ ko ad ilo mour in, … ewi jon̄an an m̧ool men in … n̄an tōmak bwe ro raar tiljek, ro raar mej … maron̄ lo kōj em̧m̧an ļo̧k jān ad maron̄ lo er; bwe eļapļo̧k an em̧m̧an aer jeļā kajier. … Jej mour ilo tore in aer, rej lo kōj, rej n̄ūrbōktak kōn jeram̧m̧ān eo ad, rej iakwe kōj kiiō eļapļo̧k jān m̧okta. Bwe kiiō rej lo kauwōtata ko me rej kapo kōj; … iakwe eo aer n̄an kōj im ikrelel eo aer kōņ em̧m̧an eo ad ej aikuj in em̧m̧anļo̧k jān ta eo jej en̄jake kōn kōj make.”1
Jemjerā ko maron̄ kōkajoorļo̧k kōn armej ro em̧ōj aer mej me jejeļā im iakwe er. Menin ej dedeļo̧k kōn kijejeto eo ad ekije n̄an wōnmaanļo̧k wōt ilo kōm̧m̧ane ta eo ejim̧we. Jemaron̄ kōkajoorļo̧k jemjerā eo ad ippān kajjojo ro em̧ōj aer em̧m̧akūt me jej iakwe kōn kile bwe jepel eo ej an jidik wōt iien im bwe bujen ko kar kōm̧m̧ani ilo tampeļ eo rej indeeo. N̄e jab jokod pokaki, kain kam̧ool bwe kile eo indeeo an kalim̧m̧ur ko rej pād ippāer.
Juon jekjek eo elukkuun in alikkar an m̧adenļo̧k ilo mour e aō eaar waļo̧k ke Iaar lukkuun in im̧we jān Jetōb n̄an kajjitōk ippān Jeanene Watkins n̄an liāp ippa ilo tampeļ.
Juon iaan katak ko raorōk me kajjojo iaad ej aikuj in katak ej kajjitōk. Etke Irooj ekōņaan bwe jān jar n̄an E im kajjitōk? Kōnke en̄in ej wāween bōk m̧adenļo̧k.
Ke Iaar jelm̧ae juon men elukkuun in pen, en̄in ej wāween eo Ij kajieon̄ meļeļe ta eo n̄an kōm̧m̧ane. Ij jitlo̧k. Ij jar n̄an pukōt im meļeļe jeje ko rekwojarjar me enaaj lukkuun jipan̄. Wāween in ej āliji. Ij jino riiti juon eoon in jeje ko rekwojarjar; Ij kejōkļo̧kjeņ kōn ta meļeļe in eoon eo im jar kōn im̧we. Innām ij kejōkļo̧kjeņ im jar n̄an jeļā eļan̄n̄e em̧ōj aō bōk aolep men ko Irooj ekōņaan bwe in kōm̧m̧ani. Emakijkij an en̄jake ko itok kōn eļapļo̧k meļeļe an katak eo. Emōj aō lo bwe ej juon jon̄ak n̄an juon wāween eo em̧m̧an n̄an katak jān jeje ko rekwojarjar.
Ewōr jet pedped ko me kōjerbali me ej kōkōm̧anm̧an ļo̧k m̧adenļo̧k. M̧oktata, koba ļo̧k n̄an en̄jake ko āinwōt illu ak kōmetak ak kowadon̄ naaj kadiwōjļo̧k Jetōb Kwojarjar. En̄jake kein rej aikuj in julo̧k, ak jekjek eo n̄an m̧adenļo̧k edik.
Bar juon pedped ej kakkōl eo kōn kōjak. M̧ōņōņō eo, ejjab jejjet eļaaj enaaj kainepata Jetōb eo. Juon kōjak eo em̧m̧an ej jipan̄ m̧adeņļo̧k; m̧ōņōņō eo eļaaj ejjab. Juon jeļā eo kōn kōjak ej juon jikin kadiwōjļo̧k an apan̄ an mour.
Bar juon rūkōjdāt n̄an m̧adenļo̧k ej itok jān koļap im ekeroro ilo ta eo ba. Lukkuun mera ilo kōnono enaaj kōkōm̧anm̧an ļo̧k kajoor eo n̄an bōk m̧adenļo̧k.
Iturājet eo juon, ekōnono eo ilo jetōb emaron̄ kōkōm̧anm̧anļo̧k kōn kamineneik mour ājmour. Kejemourur, bwe awa in kiki, im jejjet m̧ōn̄ā ej kōļapļo̧k maron̄ eo ad n̄an bōk im meļeļe m̧adenļo̧k. Jenaaj mour ekkar n̄an iien eo kar karōke. Ijowōt ke, jemaron̄ jim̧or kōkōm̧anm̧anļo̧k em̧m̧an in jerbal in jipan̄ eo ad im ājmour eo ad kōn kōm̧m̧ani kālet ko ilo mejmejkaruo, jejjet.
Ej aorōk bwe m̧akūtkūt ko ad aolep raan ren jab kōm̧ad kōj jān ron̄ajke Jetōb eo.
M̧adeņļo̧k emaron̄ barāinwōt letok ilo juon ettōņak n̄e jab wōt kile oktak eo jān kiki n̄an jaje kiki. Eļan̄n̄e kom̧ij kajieon̄ ļo̧o̧ke tipdik in ettōņak eo ilo m̧ōņōņō iien eo wōt, kom̧ maron̄ ļo̧o̧ke eļap meļeļe, ak ilo juon bar juon wāween em̧ōkaj an jako ļo̧k. Ekōnono eo eim̧we ilo bon̄ ekkā an itok ippān tok kōn juon en̄jake eo ekwojarjar n̄an aolepen en̄jake eo. Irooj ej kōjerbal kajjojo ro me eļap ad kautiej er n̄an katakin kōn m̧ool ko ilo juon ettōņak kōnke jej ļōke er im naaj ron̄jake kapilōk eo aer. En̄in ej wāween an Irooj kōm̧m̧ane katakin eo kōn Jetōb Kwojarjar. Mekarta, E emaron̄ pād ilo ettōņak eo ej kōm̧m̧an bwe en jim̧or pidodo n̄an meļeļe im eļapļo̧k an un̄ur būruwōd kōn katak eo ej n̄an kōj jān juon eo jej iakwe im kautiej.
N̄e ej n̄an kalim̧m̧ur ko an Irooj, Emaron̄ bōktok jabdewōt men n̄an ememļo̧kjeņ ko ad ko. Ļōmņak in ej aikuj in jab karuj jibadbad eo ad n̄an ļo̧o̧ke en̄jake ko an Jetōb eo. Im̧we eo lukkuun in kar ļo̧o̧ke ej kwaļo̧k Anij bwe ekōnono ko An rej kwojarjar n̄an kōj. Ļo̧o̧k eo enaaj barāinwōt kōkōm̧anm̧ānļo̧k maron̄ eo ad n̄an kememej m̧adeņļo̧k eo. Kain ļo̧o̧k in an tōl eo an Jetōb ej aikuj kejparok e jān an jako ak kakkure jān ro jet.
Jeje ko rekwojarjar rej letok kapen eo ekajoor kōn ekōjkan an m̧ool eo, kar mour kake iien otemjej, kōpeļļo̧k kōjām eo n̄an im̧we eo n̄an jeļā ta eo n̄an kōm̧m̧ane im, ia eo aikuji n̄an kōm̧m̧an, bwe maron̄ ko an juon en em̧m̧anļo̧k kōn kajoor in ekwojarjar. Jeje ko rekwojarjar rej kwaļo̧k ekōjkan an maron̄ eo an juon anjo̧ ioon inepata, pere, im apan̄ ko āinwōt reppen kar kōkajooriļo̧k jān Irooj ilo iien aikuj. Ilo ami kejōkļo̧kjeņ kōn waanjon̄ak ko, enaaj itok juon kapen e eo kōn Jetōb Kwojarjar bwe en̄jake ko aer rem̧ool. Kom̧ naaj itok n̄an jeļā bwe ejja jipan̄ in wōt ej pād n̄an kom̧.
Em̧ōj aō kar lo kajjojo rej jelm̧ae apan̄ ko me kar jeļā ta eo n̄an kōm̧m̧an ke eaar ļap jān jeļā eo aer make kōnke raar lōke ilo Irooj im kar jeļā bwe Enaaj kar tōl er n̄an uwaak ko me raar menin ekairir.
Irooj eaar kwaļo̧k, jej aikuj katakin jāņ ijo eutiej. Jej aikuj kōkwojarjar kōj make im naaj kōpālpel kōj kōn kajoor.2 Naan eo kōkwojarjar kom̧ make emaron̄ kapokpok. Būreejtōn Harold B. Lee eaar kōmeļeļeik n̄an juon iien bwe kom̧ maron̄ bōk jikin naan ko kōn eoon eo “kejparok kien ko aō.”Riiti ilo wāween eo kapilōk eo āinwōt ealikkar.3
Juon ej aikuj erreo ilo ļōmņak im ānbwin jān m̧okta im wōr an kōttōpar erreo bwe Irooj en maron̄ im̧we. Juon eo ej pokake n̄an kien ko An Irooj ej lōke. Armej in ewōr an maron̄ n̄an im̧we eo An n̄an jeļā ta eo n̄an kōm̧m̧ane im, n̄e aikuji, kajoor kwojarjar eo n̄an kōm̧m̧ane.
N̄an an kwojarjar kajoorļo̧k ilo an eddōk im alikkar n̄e aikuji, ej aikuj in katōke ilo juon peļaak eo ejim̧we. Jejke, utiej bōro, im kōnkōm̧m̧an rej āinwōt bwidej edōkāke me jamin naaj kwaļo̧k leen ilo jetōb.
Ettā bōro ej juon bwidej kōņe me eddōkļo̧k ilo jetōb im kwaļo̧k leen im̧we n̄an jeļā ta eo n̄an kōm̧m̧ane. Ej letok maron̄ n̄an kajoor eo ekwojarjar n̄an kadedļo̧k ta eo ej aikuj kōm̧m̧an. Juon eo m̧weiur kōn juon ikrelel n̄an nōbar ak kile ejjamin naaj karbōb n̄an katakin jān Jetōb. Juon eo me ekabbūl ak eo ej kōtļo̧k en̄jake ko an n̄an kareel jokālet ko ejjamin kajoor ilo tōl jān Jetōb.
N̄e jej m̧akūtkūt āinwōt kein kōm̧adm̧ōd ilo etan ro jet, epidodo ļo̧k ad im̧we jān n̄e jej ļōmņak wōt kōn kōj make. Ilo jekjek eo an jipan̄ ro jet, Irooj emaron̄ kobaik tok tōl ko n̄an jeram̧m̧an eo ad make.
Jemedwōj Ilan̄ eaar jab likūt kōj ioon laļ in n̄an likjab ak n̄an ļe ilo aiboojoj. Emaron̄ in āinwōt jekkar, bōtaab en̄in ej etke kile uwaak ko n̄an jar emaron̄ jet iien lukkuun pen. Jet iien jejjab lo̧ļe ilo kajieon̄ jelm̧ae mour kōn pedped ioon jeļā ko ad make im maron̄ eo. Eļap ļo̧k an lo̧ļe n̄an kōj n̄an pukōt kōn jar im im̧we ekwojarjar n̄an jeļā ta eo n̄an kōm̧m̧ane. Pokake eo ad ej kam̧ool bwe n̄e emenin aikuj, jemaron̄ karbōb n̄an kajoor eo ekwojarjar n̄an kōtōprak juon unin kōnono aorōk.
Āinwōt elōn̄ iaad, Oliver Cowdery eaar jab kile kein kam̧ool eo kōn uwaak ko em̧ōj kar liļo̧k jān Irooj. N̄an kōpeļļo̧k mejān, im māj ko, mejād, m̧adenļo̧k in kar leļo̧k kōn Rikanaan Joseph Smith:
Irooj eaar jiron̄ Oliver bwe eaar jeram̧m̧an kōn ta eo eaar kōm̧m̧ane; bwe eaar kajjitōk im an emakijkij in kajjitōk eaar bōk kōmeļeļe jān Jetōb eo an Anij. Eļan̄n̄e eaar jab āindein, enaaj kar jab itok n̄an jikin eo me eaar pād ie ilo tōre eo.
Irooj eaar ba n̄an Oliver, kwojeļā bwe kwar kajjitōk ippa im Iaar kōmeļeļeik ilo ļōmņak eo am̧; im kiiō Ij jiron̄ eok men kein bwe kwon maron̄ jeļā bwe em̧ōj kōmeļeļeik eok jān Jetōb eo an m̧ool.4
Eļan̄n̄e kom̧ij en̄jake bwe Anij eaar jab uwaaki jar ko ami, kejōkļo̧kjeņ kōn eoon kein—innām lukkuun pukōt kein kam̧ool eo ilo mour eo ami make me Emaron̄ in kar m̧ōj an uwaak e kom..
Kein bakajjeen ko ruo me ej kwaļo̧k en̄jake im im̧we rej itok jān Anij rej leen aenōm̧m̧an ko ilo būruwōmi im juon en̄jake emeņeņ. Ilo ami ļoor pedped ko Iaar ekōnono kaki, kom̧ naaj pojak n̄an kile m̧adenļo̧k eo ilo iien ko raorōk ilo mour eo ami make.
An ļapļo̧k ami epaake jiōb in tōl kwojarjar eo, enaaj ļapļo̧k ami m̧ōņōņō ijin im n̄an indeeo—eļapļo̧k jān in, Ekimuur ļo̧k eddōkļo̧k eo ami im maron̄ eo n̄an jerbal. Ejjab likieo aō meļeļe ekōjkan an kōm̧m̧an, bōtaab tōl jab in ilo mour eo ami ejjab bōk ļo̧k anemkwoj in kālet eo ami. Kom̧ maron̄ kōm̧m̧ani jokālet ko kom̧ij kālet n̄an kōm̧m̧ani. Ak kememej, m̧wil eo n̄an kōm̧m̧an jim̧we ej bōktok aenōm̧m̧an in ļōmņak im m̧ōņōņō.
Eļan̄n̄e kālet ko rebōd, remaron̄ kajim̧wi kōn ukweļo̧k. N̄e jekjek ko an rej lukkuun kōm̧m̧ani, Pinmuur eo an Jisōs Kraist, ad Rilo̧mo̧o̧r, ej letok juon deeor jān eddo ko an jim̧we n̄an bōd ko kar kōm̧mani. Ekanooj in pidodo im lukkuun in aiboojoj jān maron̄ keidi. Ilo ami wōnm̧aanļo̧k n̄an mour jim̧we, kom̧ naaj iien otemjej im̧we n̄an jeļā ta eo n̄an kōm̧m̧ane. Jet iien elolo eo an ta m̧akūtkūt eo n̄an bōk ej aikuji kijejeto ko rebwe im lōke eo ilo m̧ōttan eo am̧. Aaet kom̧ naaj im̧we n̄an jeļā ta eo n̄an kōm̧m̧ane ilo ami tōpar jekjek ko n̄an tōl rōt in ekwojarjar ilo mour eo am̧, ņa etan, pokake kien ko an Irooj, lōke ilo karōk in m̧ōņōņō eo An ekwojarjar, im bōbrae eo an jabdewōt men me ej jum̧ae.
Ekōnono ippān Jemed ilo Lan̄ ejjab juon men edik. Ej juon iien em̧m̧an ekwojarjar. Ej pedped ioon indeeo, pedped ko rejjab okoktak. Jej bōk jipan̄ jān Jemedwōj ilo Lan̄ ej kōn tōprak in ad tōmak, pokake, im jim̧we kōjerbal anemkwoj in kālet.
Kōm̧m̧an bwe Irooj en im̧we kom̧ n̄an meļeļe im kōjerbal pedped ko me rej tōl n̄an m̧adenļo̧k an juon make im im̧we eo, ilo etan Jisōs Kraist, amen.