“14–20 ʻAokosi. Loma 7–16: ‘Ikuna ʻa e Koví ʻaki ʻa e Leleí’” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Foʻou 2023 (2022)
“14–20 ʻAokosi. Loma 7–16,” Haʻu, ʻo Muimui ʻIate Au—Maʻá e Lautohi Faka-Sāpaté: 2023
14-20 ʻAokosi
Loma 7–16
“Ikuna ʻa e Koví ʻaki ʻa e Leleí”
Lau ʻa e Loma 7–16, pea lekooti e ngaahi ongo ʻokú ke maʻu fekauʻaki mo e founga ke tokoniʻi ai ʻa e kau mēmipa e kalasí ke nau ako mei he folofolá. ʻI hoʻo fakalaulauloto ki he ngaahi ongo ʻokú ke maʻú, te nau lava ʻo fakaiku ki ha ngaahi ʻekitivitī ako mahuʻingamālie.
Fakaafeʻi e Feʻinasiʻakí
Fakakaukau ke lau ʻa e Loma 10:17 mo e 15:4 pea kole ki he kau mēmipa ʻo e kalasí ke nau vahevahe ʻa e ngaahi potufolofola mei he Loma 7–16 ʻokú ne langaki ʻenau tui kia Sīsū Kalaisí pe ʻoange kiate kinautolu ha ʻamanaki leleí.
Akoʻi ʻa e Tokāteliné
Te tau lava ʻo hoko ko ha “kau hoko fakataha mo Kalaisi.”
-
ʻI heʻetau hoko ko ha Kāingalotu ʻo e Siasí, ʻoku tau tui ʻoku ʻuhinga e ongo kupuʻi lea hangē ko e “kau hoko ki he ʻOtuá” mo e “kau hoko fakataha mo Kalaisí” te tau lava ʻo hangē ko e Tamai Hēvaní mo maʻu e meʻa kotoa pē ʻoku ʻAʻaná ʻi he tokkoni ʻa Sīsū Kalaisí (Loma 8:17; vakai foki, Tokāteline mo e Ngaahi Fuakava 132:20–21). Ke tokoni ke ʻilo ʻe he kau mēmipa ʻo e kalasí ʻa e founga ʻoku akoʻi ai ʻa e tokāteline ko ʻení ʻi he kotoa ʻo e folofolá, te ke lava ʻo fakaafeʻi kinautolu ke nau tauhoa pe faʻu ha fanga kiʻi kulupu pea ako ha niʻihi ʻo e ngaahi potufolofola kuo lisi ʻi he “Ngaahi Maʻuʻanga Tokoni Kehé.” Hili ia pea ʻe lava ke vahevahe ʻe he kau mēmipa ʻo e kalasí ʻa e meʻa kuo nau akó pea mo aleaʻi ʻa e ʻuhinga ʻoku fuʻu mahuʻinga ai ʻa e tokāteline ko ʻení.
-
ʻE lava ke tokoni e tala fakatātā naʻe fai ʻe Palesiteni Tāleni H. ʻOakesi ʻi he “Ngaahi Maʻuʻanga Tokoni Kehé” ki he kau mēmipa ʻo e kalasí ke nau aleaʻi ʻa e founga te tau lava ai ʻo teuteu ke hoko ko e “kau hoko ʻo e ʻOtuá” (Loma 8:17). Ko e hā ha niʻihi ʻo e ngaahi “fono mo e ngaahi tefitoʻi moʻoni” naʻe ʻuhinga ki ai ʻa ʻEletā ʻOakesí? Ko e hā haʻane kehe ʻi heʻetau moʻuí ke tau ʻilo te tau lava ʻo hoko ko ha “kau hoko ki he ʻOtuá, mo e kau hoko fakataha mo Kalaisi”? (Loma 8:17).
“Ko hai te ne fakamāvae ʻa kitautolu mei he ʻofa ʻa Kalaisí?”
-
ʻE hanga ʻe haʻamou aleaʻi fakataha e Loma 8 ʻo ʻomi ha faingamālie ke tokoniʻi ai e kau mēmipa ʻo e kalasí ke nau ongoʻi e ʻofa ʻa e Fakamoʻuí. Fakakaukau ke fakaʻaliʻali ha fakatātā ʻo Sīsū Kalaisi (vakai, fokotuʻutuʻu ʻo e uike ní ʻi he Haʻu ʻo Muimiu ʻIate au—Maʻá e Fakafoʻituituí mo e Ngaahi Fāmilí) he lolotonga hoʻomou lau fakakalasi ʻa e Loma 8:18, 28, 31–39. Te ke lava ʻo fakaafeʻi e kau mēmipa ʻo e kalasí ke nau vahevahe ha faʻahinga fakakaukau pe ongo ʻoku nau maʻu hili ʻenau lau e ngaahi veesi ko ʻení. ʻE ʻi ai ha niʻihi te nau fie vahevahe ʻa e founga ne nau maʻu ai ha fakamoʻoni ki he ngaahi moʻoni ne nau maʻu ʻi he ngaahi veesi ko ʻení.
ʻOku fakakakato kotoa e ngaahi fekau ʻa e ʻOtuá ʻi he fekau ke ʻofá.
-
Ke tokoni ke ʻiloʻi ʻe he kau mēmipa ʻo e kalasí ʻa e founga ʻoku “mahino ngofua” ai e ngaahi fekaú kotoa ʻi he fekau ke ʻofa ki ho kaungāʻapí (Loma 13:9), fakaafeʻi kinautolu ke lisi ʻi he palakipoé ʻa e kotoa ʻo e ngaahi fekau, te nau lava ʻo fakakaukau ki aí. Lau fakataha ʻa e Loma 13:8–10 mo e Mātiu 22:36–40, pea aleaʻi fakakalasi ʻa e fekauʻaki ʻo e ʻofa ki he ʻOtuá mo hotau kaungāʻapí pea mo e talangofua ki he ngaahi fekau takitaha ʻoku lisi ʻi he palakipoé. ʻOku liliu fēfē ʻe he foʻi moʻoni ko ʻení ʻa e anga ʻetau fakakaukau ki he ngaahi fekaú mo e talangofuá? Hangē ko ʻení, ko e hā ʻoku fokotuʻu mai ʻe he foʻi moʻoni ko ʻení fekauʻaki mo e taumuʻa ʻo e ngaahi fekaú?
“ʻOua naʻa tau … fefakamaauʻaki.”
-
Ke maʻu ha puipuituʻa ki he Loma 14, te ke lava ʻo fakamahino ange naʻe fefakakikihiʻaki ha niʻihi ʻo e Kāingalotu Lomá ʻiate kinautolu fekauʻaki mo e ngaahi tōʻonga fakafonuá, hangē ko e founga maʻumeʻatokoní mo e tauhi ʻo e ngaahi ʻaho mālōloó. Ko e hā ha ngaahi tūkunga meimei tatau ʻoku tau fehangahangai mo ia he ʻahó ni? Mahalo naʻa lava ke vakaiʻi vave ʻe he kau mēmipa ʻo e kalasí ʻa e Loma 14 pea ʻomai ha fakamatala nounou sētesi pē taha ʻo e faleʻi ʻa Paulá? Ko e hā ha faleʻi te tau lava ʻo fevahevaheʻaki ai kau ki he founga ke tau fakaʻehiʻehi ai mei he fefakamaauʻakí? Mahalo naʻa lava ke maʻu ʻe he kau mēmipa ʻo e kalasí ha ngaahi fakakaukau ʻi he pōpoaki ʻa e Palesiteni Tieta F. ʻUkitofá “ʻOku Maʻu ʻa e ʻAloʻofá ʻe he Kau Manavaʻofá,” Liahona, Mē 2012, 70–77.
Ngaahi Maʻuʻanga Tokoni Kehé
Maʻu ʻa e “meʻa kotoa pē ʻoku maʻu ʻe [he] Tamaí” (Tokāteline mo e Ngaahi Fuakava 84:38).
Naʻe fakamatala ʻe ʻEletā Tāleni H. ʻOakesi ʻa e tala fakatātā ko ʻeni:
“Naʻe ʻiloʻi ʻe ha tamai koloaʻia kapau te ne tuku ʻene koloá ki ha taha ʻo ʻene fānaú ʻa ia kuo teʻeki ke ne maʻu ʻa e poto mo e lahi ʻoku totonu ke ne maʻú mo aʻusiá, mahalo ʻe mole taʻeʻaonga ʻa e koloá. Naʻe pehē leva ʻe he tamaí ki heʻene tamá:
“‘Ko e meʻa kotoa pē ʻoku ou maʻú ʻoku ou loto ke foaki ia kiate koe—ʻo ʻikai ke ngata ʻi heʻeku koloá, ka ko hoku tuʻungá mo e tufakanga ʻi he kakaí. ʻOku faingofua pē ke u foaki atu kiate koe ʻa e meʻa ʻoku ou maʻú, ka ko e meʻa kuó u aʻusiá, kuo pau ke ke ngāueʻi ia ke ke maʻu maʻau. Te ke fakafeʻungaʻi koe ke maʻu ho tofiʻá ʻaki haʻo ako ʻa e meʻa kuó u akó pea mo hoʻo moʻui ʻo hangē ko ʻeku moʻuí. Te u ʻoatu kiate koe ʻa e ngaahi fonó mo e ngaahi tefitoʻi moʻoni te ke lava ʻo maʻu ai ʻa e potó mo e tuʻunga ʻoku ou ʻi aí. Muimui ki heʻeku sīpingá, ʻo pule ʻo hangē ko ʻeku pulé, pea te ke hoko ʻo hangē ko aú, pea ʻe ʻaʻau ʻa e meʻa kotoa pē ʻoku ou maʻú’” (“The Challenge to Become,” Ensign, Nov. 2000, 32).
Ko Hono Fakatupulaki ʻEtau Founga Akoʻí
Kumi ha ngaahi maʻuʻanga tokoni ke ne poupouʻi e ngaahi tefitoʻi moʻoní. Makehe mei he ngaahi fakakaukau fakafaiako ʻi he fokotuʻutuʻu ko ʻení, te ke lava ʻo lililu ʻa e ngaahi ʻekitivitī mei he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fakaʻaongaʻi ʻi hoʻo kalasí. (Vakai foki, Faiako ʻi he Founga ʻa e Fakamoʻuí, 17–18.)