11–17 Sepitema

2 Kolinitō 1–7

“Mou Fakalelei mo e ʻOtuá”

ʻI hoʻomou lau ʻi he uiké ni ʻa e 2 Kolinitō 1–7, fakakaukau ki ha kau mēmipa pau ʻo e kalasí—ʻa kinautolu ʻoku omi ki he kalasí mo kinautolu ʻoku ʻikaí. ʻE tāpuekina fēfē kinautolu ʻe he ngaahi tefitoʻi moʻoni ʻo e ngaahi vahe ko ʻení?

Fakaafeʻi e Feʻinasiʻakí

ʻE lava ke ʻaonga ki he kau mēmipa ʻo e kalasí haʻanau fefakafanongoʻaki ʻi he ngaahi fakakaukau fekauʻaki mo e founga ke ʻai ai ʻenau ako folofolá ke ola lelei angé. ʻOange ha ngaahi miniti siʻi ki he meʻá ni ʻi he taimi kotoa pē.

Akoʻi ʻa e Tokāteliné

2 Kolinitō 1:3–7; 4:6–10, 17–18; 7:4–7

ʻE lava ke hoko hotau ngaahi faingataʻaʻiá ko ha tāpuaki.

• ʻE lava ʻo tokoni e ngaahi aʻusia naʻe fakamatalaʻi ʻe Paulá mo e faleʻi naʻá ne fai ʻi he 2 Kolinitoó ki he kau mēmipa ʻo e kalasí ke nau fakakaukau ki he ngaahi tāpuaki ʻe lava ke maʻu mei honau ngaahi faingataʻaʻiá. Ke kamataʻi ha fealeaʻaki, te ke ala kole ki ha mēmipa ʻo e kalasí ke haʻu mateuteu ke fakamatala fekauʻaki mo ha founga naʻe tāpuekina ai ʻene moʻuí ʻe ha faingataʻa pe meʻa naʻá ne ʻilo mei ha taha kehe naʻá ne kātekina ha faingataʻa. Peá ke toki ʻoange leva ki he kau mēmipa ʻo e kalasí ha ngaahi miniti siʻi ke nau vakaiʻi ʻa e 2 Kolinitō 1:3–7; 4:6–10, 17–18; mo e 7:4–7, ʻo kumi ʻa e meʻa naʻe akoʻi ʻe Paula fekauʻaki mo e taumuʻa mo e ngaahi tāpuaki ʻo e ngaahi faingataʻá. Kole ki he kau mēmipa ʻo e kalasí ke nau vahevahe e meʻa ne nau maʻú. ʻE lava ke ke fokotuʻu ange ke nau lau leʻolahi ha veesi ne nau maʻu ai ha akonaki pau pea vahevahe leva ha aʻusia pe ko ha fakamoʻoni ʻoku felāveʻi mo e akonaki ko iá.

• Ke tānaki atu ki hoʻomou fealeaʻakí, fakakaukau ke mou hivaʻi fakataha ʻa e himi manako ʻo e kau mēmipa ʻo e kalasí, ʻoku fakamoʻoni ki he fakafiemālie mo e ngaahi tāpuaki ʻoku foaki mai ʻe he Tamai Hēvaní mo e Fakamoʻuí, ʻi he taimi ʻo e faingataʻá—hangē ko e “ʻE Kāinga Kuo Langa Ha Tuʻunga” (Ngaahi Himi, fika 37). Hili hoʻomou hiva fakatahá, te ke ala fakaafeʻi e kau mēmipa ʻo e kalasí ke kumi ha kupuʻi lea ʻi he 2 Kolinitō 1 mo e 4 ʻoku nau ongoʻi ʻoku feʻunga mo e pōpoaki ʻo e himí.

2 Kolinitō 2:5–11

Ko e fakamolemolé ko ha tāpuaki ia ʻoku tau fakatou foaki mo maʻu.

• Kuo tau aʻusia kotoa ha taimi naʻe “fakatupu mamahi” mai ai ha taha kiate kitautolu pe ki hotau fāmilí (veesi 5). Mahalo ʻe lava e kau mēmipa ʻo e kalasí ke fakatotolo ʻi he 2 Kolinitō 2:5–11, ʻo kumi e faleʻi ʻa Paula fekauʻaki mo e founga ʻoku totonu ke tau fai ki ha taha kuó ne fakamamahiʻi kitautolu. Fakakaukau ke fakaafeʻi e kau mēmipa ʻo e kalasí ke nau toe vakaiʻi ʻa e Mātiu 5:43–48 mo e Luke 15:11–32 ke ʻilo lahi ange ki he founga ʻoku totonu ke tau fai kiate kinautolu kuo nau fakamamahiʻi kitautolú. ʻOku tau uesia fēfē kitautolu mo e niʻihi kehé ʻi he taimi ʻoku tau fili ai ke ʻoua ʻe faʻa fakamolemolé?

2 Kolinitō 5:14–21

ʻE lava ke tau fakalelei ki he ʻOtuá, ʻo fakafou ʻi he Fakalelei ʻa Sīsū Kalaisí.

• ʻOku ōmai ha kakai tokolahi ki he lotú mo ha loto-holi ke ongoʻi ofi ange ki he ʻOtuá, pea ʻe lava ke tokoni kiate kinautolu hano aleaʻi e 2 Kolinitō 5:14–21. Ke kamatá, ʻe lava ʻa e kau mēmipa ʻo e kalasí ke vakaiʻi ʻa e ʻuhinga ʻo e foʻi lea fakaleleí, mahalo ʻo kamata ʻaki hano kumi e foʻi leá ʻi ha tikisinali. Ko e hā ha ngaahi ʻilo ʻoku ʻomi ʻe he meʻá ni fekauʻaki mo e fakalelei ki he ʻOtuá? Ko e hā ha ngaahi ʻilo kehe ʻoku tau maʻu mei he fakamatala “Fakaleleí, Fakaleleiʻí” ʻi he Fakahinohino ki he Ngaahi Folofolá? ʻOku tokoni fēfē ʻa e ngaahi ʻilo ko ʻení ke mahino kiate kitautolu ʻa e 2 Kolinitō 5:14–21? Mahalo te ke fie maʻu ke fakaafeʻi e kau mēmipa ʻo e kalasí ke nau vahevahe e ngaahi ongo ʻoku nau maʻu fekauʻaki mo e Fakamoʻuí, ʻa ē ʻoku hanga ʻe Heʻene Fakaleleí ʻo fakaʻatā ke tau toe fakataha mo e ʻOtuá.

2 Kolinitō 7:8–11

ʻOku fakaiku ʻa e mamahi faka-ʻOtuá ki he fakatomalá.

• ʻOku ʻomi ʻe he 2 Kolinitō 7:8–11 ha fakamatala ʻaonga ki he mamahi faka-ʻOtuá, mo hono fatongia ʻi he fakatomalá. Ko e hā ʻoku tau ako fekauʻaki mo e mamahi faka-ʻOtuá mei he 2 Kolinitō 7:8–11 mo e ngaahi lea ʻa Palesiteni Tieta F. ʻUkitofa ʻi he “Ngaahi Maʻuʻanga Tokoni Kehé”? Ko e hā ʻoku mahuʻinga ai ʻa e mamahi faka-ʻOtuá ki he fakatomalá?

• Mahalo te ke ongoʻi mālohi ke poupouʻi ha fealeaʻaki ʻoku toe loloto ange ki he fakatomalá. Kapau ko iá, te ke lava ʻo ʻahiʻahiʻi ha meʻa hangē ko ʻení: Hiki ʻi he palakipoé ʻa e Ko e fakatomalá ko e . Kole ki he kau mēmipa ʻo e kalasí ke nau kumi ha ngaahi founga ke fakakakato ai e kupuʻi lea ko ʻení, ʻo fakaʻaongaʻi e ngaahi meʻa kuo nau ako mei he 2 Kolinitō 7:8–11, pea mei he ngaahi folofolá mo ha ngaahi maʻuʻanga tokoni kehe ʻi he Ngaahi Tefito ʻo e Ongoongoleleí “Fakatomalá” (topics.ChurchofJesusChrist.org). Te tau ala fakaʻaongaʻi fēfē nai ʻa e ngaahi akonaki ko ʻení ke tokoni ki ha taha ke mahino ʻa e founga ke fakatomala fakamātoato aí?

Ngaahi Maʻuʻanga Tokoni Kehé

‘Oku fakatupu ʻe he mamahi faka-ʻOtuá ha liliu mo ha ʻamanaki lelei.

Naʻe fakamatalaʻi ʻe Palesiteni Tieta F. ʻUkitofa:

“ʻOku ueʻi hake ʻe he mamahi ʻoku taau mo e ʻOtuá ʻa e liliu mo e ʻamanaki lelei tuʻunga ʻi he Fakalelei ʻa Sīsū Kalaisí. ‘Oku fusi hifo kitautolu ʻe he mamahi fakamāmaní, toʻo atu e ʻamanaki leleí, pea fakalotoʻi kitautolu ke tau fakavaivai ki ha ngaahi ‘ahiʻahi kehe.

“‘Oku fakatupu ‘e he mamahi ʻoku taau mo e ‘Otuá ‘a e uluí mo ha liliu ‘o e lotó. ‘Okú ne ngaohi kitautolu ke tau fehiʻa ʻi he angahalá kae ʻofa ʻi he meʻa ʻoku leleí. ʻOkú ne poupouʻi kitautolu ke tau tuʻu hake ʻo ʻaʻeva ʻi he maama ʻo e ʻofa ʻa Kalaisí. Ko e fakatomala moʻoní ko hano liliu, ka ʻoku ʻikai ko hano fakamamahiʻi” (“Te Ke Lava ʻo Fai ia He Taimí Ni!,” Liahona, Nōvema 2013, 56).

Ko Hono Fakatupulaki ʻEtau Founga Akoʻí

Fakakau kinautolu ʻoku faingataʻaʻiá. Ko e taimi ʻe niʻihi, ko e meʻa pē ʻe fie maʻu ʻe he kau mēmipa ʻo e kalasí ʻa ia ʻoku faingataʻaʻiá ke nau ongoʻi ʻoku ʻofaʻi kinautolu. Fakakaukau ke ke ʻoange ha ngāue ke nau kau ai ʻi he lēsoni ka hokó. ʻOua te ke foʻi kapau he ʻikai ke nau fai ha meʻa ʻi hoʻo ʻuluaki feingá. (Vakai, Ko e Faiako ʻi he Founga ‘a e Fakamo‘uí, 8–9.)