18–24 Sepitema

2 Kolinitō 8–13

“ʻOku ʻOfa ʻa e ʻOtuá ki ha Foaki Fiefia”

ʻI hoʻo lau ʻa e 2 Kolinitō 8–13, fakakaukau ki he kakai ʻokú ke akoʻí, pea palani ha ngaahi ʻekitivitī ʻe tokoni kiate kinautolu ke nau ʻiloʻi e ngaahi tefitoʻi moʻoni ʻi he ngaahi vahe ko ʻení. Pea vakaiʻi leva e fakamatala ko ʻení ke maʻu ha ngaahi fakakaukau lahi ange.

Fakaafeʻi e Feʻinasiʻakí

Ko ha founga ʻeni ʻe taha ke fakaafeʻi ai ʻa e kau mēmipa ʻo e kalasí ke nau vahevahe ʻa e meʻa ne nau ako mei he 2 Kolinitō 8–13: kole ki hanau niʻihi tokosiʻi ke hiki ʻi he palakipoé ha kupuʻi lea manako mei heʻenau laukongá pea vahevahe ʻa e ʻuhinga ʻoku mahuʻingamālie ai kiate kinautolu ʻa e ngaahi kupuʻi lea ko ʻení.

Akoʻi ʻa e Tokāteliné

2 Kolinitō 8:1–15; 9:6–15

ʻOku vahevahe fiefia ʻe he Kāingalotú ʻa e meʻa ʻoku nau maʻú, ke tāpuekina ʻa e masivá mo e paeá.

• Kuo fekauʻi ʻe he ʻOtuá Hono Kāingalotú ke nau tokoni ʻo tokangaʻi ʻa kinautolu ʻoku faingataʻaʻiá, pea ʻe lava e ngaahi fakamatala ʻi he 2 Kolinitō 8–9 ʻo ueʻi e kāingalotú ʻi heʻenau feingá. Ke tokoni ke nau ʻilo ʻa e ngaahi potufolofola ko ʻení, te ke lava ʻo hiki ʻi he palakipoé ʻa e ngaahi fehuʻi hangē ko ʻení Ko e hā ʻoku tau foaki aí? mo e Ko ʻetau foakí ʻoku totonu ke founga fēfē? ʻE lava ke kumi ʻe ha vaeua ʻo e kalasí ʻa e ngaahi talí ʻi he 2 Kolinitō 8:1–15, pea kumi ʻe he vaeua ʻe tahá ʻi he 2 Kolinitō 9:6–15. (Te ke ala fakamatalaʻi ange naʻe lea ʻa Paula ʻi he vahe 8, veesi 1–5, ki ha Kāingalotu Masitōnia ko ha sīpinga ʻo e foaki ʻofá.) ʻE tokoniʻi fēfē nai kitautolu ʻe he ngaahi tefitoʻi moʻoni naʻe akoʻi ʻe Paulá ke tau toe tokanga ange ki he kakai masiva mo faingataʻaʻiá?

2 Kolinitō 11:1–4

ʻOku totonu ke tau tokanga taha ki he “angatotonu ʻa ia ʻoku ʻia Kalaisí.”

• ʻOku ongoʻi mafasia ʻa e kāingalotu ʻo e Siasí he taimi ʻe niʻihi, ʻi he ngaahi fiemaʻu ʻo e moʻuí—kau ai mo e ngaahi meʻa ʻoku nau pehē ko ha ngaahi fiemaʻu ʻo e hoko ko ha mēmipa ʻo e Siasí. ʻE lava ke tokoni ʻa e faleʻi ʻa Paula fekauʻaki mo e “angatotonu ʻa ia ʻoku ʻia Kalaisí” (2 Kolinitō 11:3). Mahalo te mou lava ke lau fakataha ʻa e 2 Kolinitō 11:3 pea aleaʻi pe ʻoku ʻuhinga ki he hā ʻa e “angatotonu ʻa ia ʻoku ʻia Kalaisí.” Te ke lava ʻo kole ki he kau mēmipa ʻo e kalasí ke nau fakakaukauloto ki hano fakaafeʻi kinautolu ʻe ha nusipepa ke nau tohi ha fakamatala fekauʻaki mo e ongoongolelei ʻo Sīsū Kalaisí, ʻo ʻikai toe ʻova he foʻi lea ʻe 100. Tuku ange ha taimi ke hiki ai ʻenau ngaahi fakamatalá, pea tuku ke nau fevahevaheʻaki e ngaahi meʻa ne nau hikí. Kapau te nau fie maʻu tokoni, te nau lava ʻo vakai ki he Sione 3:16–17; 3 Nīfai 27:13–21; lea ʻa Palesiteni Tieta F. ʻUkitofa ʻi he “Ngaahi Maʻuʻanga Tokoni Kehé.” ʻE lava ke vahevahe ʻe he kau mēmipa ʻo e kalasí ha ngaahi fakakaukau fekauʻaki mo e founga ke “fakafaingofuaʻi ai [ʻetau] ngāue ʻi he tuʻunga fakaākongá.”

2 Kolinitō 12:5–10

ʻOku feʻunga e ʻaloʻofa ʻa e Fakamoʻuí ke ne tokoniʻi kitautolu ke tau maʻu ha mālohi ʻi hotau vaivaiʻangá.

• Ko e hā te ke talaange ki haʻo kaungāmeʻa kuó ne lotua ha fakafiemālie mei ha mahaki ka ʻokú ne ongoʻi kuo ʻikai tali ʻa e lotu ko ʻení? Fakakaukau ke fakaafeʻi e kau mēmipa ʻo e kalasí ke nau fakalaulauloto ki he fehuʻi ko ʻení ʻi heʻenau lau fakalongolongo ʻa e 2 Kolinitō 12:5–10. Hili ia, pea te nau lava ke vahevahe ʻa e ngaahi ʻilo mei he ngaahi veesi ko ʻení, ʻe ala tokoni ʻi he tūkunga ko ʻení. Te nau lava foki ke vahevahe ha ngaahi aʻusia, ʻi ha taimi ne nau maʻu ai ha ivi ʻi he ngaahi vaivaí, ʻo fakafou ʻi he ʻaloʻofa ʻa Sīsū Kalaisí, pe ʻi Hono mālohi mo e tokoni fakalangí. Naʻe faitokonia fēfē ʻe he aʻusia ko iá ʻenau moʻuí? Ko e hā ʻoku mahuʻinga ai ke tau falala ki he taimi tēpile ʻa e ʻEikí?

Ngaahi Maʻuʻanga Tokoni Kehé

Te tau lava ʻo fakafaingofuaʻi ʻetau founga ki hono moʻui ʻaki e ongoongoleleí.

Naʻe akoʻi ʻe Palesiteni Tieta F. ʻUkitofa:

“Kāinga, ʻoku ʻikai fie maʻu ke taulōfuʻu pe faingataʻa hono moʻui ʻaki e ongoongoleleí.

“ʻOku mātuʻaki fakahangatonu pē ia. ʻE lava ke fakamatalaʻi ia ʻo hangē ko ʻení:

• ʻOku hanga ʻe he fanongo ki he folofola ʻa e ʻOtuá ʻi he loto-fakamātoató, ʻo tataki kitautolu ke tau tui ki he ʻOtuá mo falala ki Heʻene ngaahi talaʻofá.

• Ko e lahi ange ʻetau falala ki he ʻOtuá, ko e lahi ange ia hono fakafonu hotau lotó ʻaki ha ʻofa kiate Ia mo e niʻihi kehé.

• Koeʻuhí ko ʻetau ʻofa ki he ʻOtuá, ʻoku tau holi ai ke muimui kiate Ia pea ʻai ke fenāpasi ʻetau tōʻonga moʻuí mo ʻEne folofolá.

• Koeʻuhí ko ʻetau ʻofa ki he ʻOtuá, ʻoku tau fie tauhi ai kiate Ia; ʻoku tau fie faitāpuekina e moʻui ʻa e niʻihi kehé mo tokoniʻi e masivá mo e faingataʻaʻiá.

• Ko e lahi ange ʻetau fononga ʻi he hala ʻo e tuʻunga fakaākongá, ko e lahi ange ia ʻetau holi ke ʻilo e folofola ʻa e ʻOtuá.

“Pea ʻoku pehē ai pē, mei he sitepu ki he sitepu, ʻa hono fakafonu kitautolu ʻaki e tui, ʻamanaki lelei, mo e ʻofa faka-Kalaisi ʻoku fakautuutú.

“ʻOku mātuʻaki faingofua, pea ʻaonga ʻaupito.

“ʻE kāinga, kapau ʻe faifaiange peá ke pehē ʻoku ʻikai fuʻu ʻaonga fēfē ʻa e ongoongoleleí kiate koe, ʻoku ou fakaafeʻi koe ke ke kiʻi tuʻu ʻi ha tuʻunga māʻolunga, ʻo vakaiʻi hoʻo moʻuí, pea fakafaingofuaʻi hoʻo founga ki he tuʻunga fakaākongá. Tokanga taha ki he ngaahi tefitoʻi tokāteliné, tefitoʻi moʻoní, mo e fakaʻaongaʻi ʻo e ongoongoleleí. ʻOku ou palōmesi atu ʻe tataki mo tāpuakiʻi koe ʻe he ʻOtuá ʻi ho halá ke ke aʻusia ha moʻui ʻoku fiefia angé pea ʻe ʻaonga lelei ange ai e ongoongoleleí kiate koe” (“ʻOku ʻAonga ʻAupito!,” Liahona, Nōvema 2015, 22).

Ko Hono Fakatupulaki ʻEtau Founga Akoʻí

Ngāue fakataha mo e kau mēmipa ʻo e fāmilí. “Ko e kakai ko ia ʻoku nau maʻu ha ivi tākiekina mālohi taha ʻi ha tahá—ʻo tatau pē he leleí pe koví—meimei ko kinautolu ia ʻi hono ʻapí. Koeʻuhí ko ʻapi ʻa e tefitoʻi feituʻu ʻoku moʻui ʻaki mo ako ai e ongoongoleleí, ʻe ola lelei ange hoʻo ngaahi feinga ke fakamālohia ha mēmipa ʻo e kalasí, ʻi he taimi ʻokú ke ngāue fakataha ai mo e … kau mēmipa ʻo e fāmilí” (Ko e Faiako ‘i he Founga ‘a e Fakamoʻuí, 8).