O Paulo o loo faalauina atu se tusi mai le falepuipui

9–15 Oketopa

Filipi; Kolose

“Ou Te Mafaia Mea Uma Lava i le Faamalosi Mai o Keriso ia te Au”

Amata i le faitauina o le Filipi ma le Kolose, ma mafaufau loloto ma le agaga tatalo i le aoaoga faavae ua finagalo le Alii e te aoaoina atu. Tuu atu i le Agaga e taitaia oe ao e mafaufau i fesili ma punaoa e mafai ona e faaaogaina e aoao ai lenei aoaoga faavae.

aikona o le fefaasoaai

Valaaulia le Fefaasoaai

Valaaulia tagata o le vasega e faasoa mai se upu se tasi po o se fasifuaitau e aotele ai mea sa latou aoaoina mai le Filipi ma le Kolose ona faamatala lea pe aisea na latou filifilia ai lena upu po o le fasifuaitau. Uunaia i latou e faasoa atu fuaiupu o mau o se vaega o le latou faamalamalamaga.

aikona o le aoao atu

Aoao Atu le Aoaoga Faavae

Filipi 2:1–5, 14–18; 4:1–9; Kolose 3:1–17

E avea i tatou ma tagata “fou” pe a tatou ola i le talalelei a Iesu Keriso.

• Atonu e te manao e fesoasoani i lau vasega ia vaai faalemafaufau i le uiga o le “toeseina le tagata tuai” ma le “oofu i le tagata fou” e ala ia Iesu Keriso (Kolose 3:9–10). Ina ia faia lenei mea, e mafai ona e faaali atu ni ata o le taimi muamua ma le taimi mulimuli ane o se mea tuai ua liua i se mea fou (e pei o se fasi meaafale, se fale, po o se uila). E mafai e tagata o le vasega ona talanoa i auala e “faafouina” ai i tatou e ala i lo tatou faatuatua ia Iesu Keriso ma lo tatou naunau e ola i Lana talalelei. E avea o se vaega o lenei talanoaga, e mafai ona e fai atu i le afa o le vasega e suesue le Filipi 2:1–5, 14–18; 4:1–9 ae o le isi afa e suesue i le Kolose 3:1–17, ma faailoa ai uiga o le “tagata tuai” ma le “tagata fou.” E mafai foi ona e valaaulia ni nai tagata o le vasega e faasoa mai pe na faapefea ona fesoasoani le i ai o le faatuatua ia Iesu Keriso ma le ola i Lana talalelei ia i latou e avea ai ma ni tagata fou.

Filipi 4:1–13

E mafai ona tatou maua le olioli ia Keriso, e tusa lava po o a o tatou tulaga.

• E ui ina ese o tatou tulaga mai i tulaga a Paulo, ae e mafai ona tatou aoao uma mai i lona naunau ia lotomalie ma olioli i tulaga uma o lona olaga. Ina ia amata se talanoaga i lenei autu, e mafai ona e toe faamanatuina nisi o tofotofoga sa oo ia Paulo (tagai, mo se faataitaiga i le, 2 Korinito 11:23–28). Ona mafai lea ona e fai atu i tagata o le vasega e toefaamanatu le Filipi 4:1–13 e sue ai le fautuaga na tuuina mai e Paulo lea e mafai ona fesoasoani ia tatou olioli ai, e oo lava i taimi o tofotofoga.

• Atonu e mafai e tagata o le vasega ona faasoa mai ni aafiaga na latou lagonaina ai “le manuia mai le Atua, o loo silisili lava i mea uma e manatu i ai” (Filipi 4:7) pei sa latou lagonaina ai le faamalosi “mai o Keriso” (fuaiupu 13) e ausia se mea na semanu e le mafai ona latou faia.

• Afai e te manao e suesue atili i lenei autu, e mafai ona e fai i se tagata o le vasega e faasoa mai nisi o tala musuia po o faamatalaga mai le saunoaga a Peresitene Russell M. Nelson “Olioli ma le Ola ai Faaleagaga” (Liahona, Nov. 2016, 81–84). Pe e mafai foi e le vasega ona matamata i le vitio “Trial of Adversity” (ChurchofJesusChrist.org). Na faapefea ona maua e tagata i le saunoaga a Peresitene Nelson po o le tamaitai i le vitio ona maua le olioli, e ui lava i o latou tulaga faigata?

• Talu ai ua faateteleina le amioleaga i le lalolagi i aso nei, o le a manuia lau vasega mai le fautuaga a Paulo e “mafaufau i” mea e moni, matagofie, logoleleia, mama, pe tauleleia (Filipi 4:8). Atonu e mafai ona e tofia tagata taitoatasi o le vasega (po o vaega toalaiti o tagata o le vasega) se tasi o uiga auaumama o loo lisiina i le Filipi 4:8 po o le Mataupu Faavae o le Faatuatua 1:13. E mafai e i latou taitoatasi ona faaaoga le Topical Guide e sue ai mau e uiga i a latou uiga auaumama na tofitofi atu ma faasoa mai i le vasega mea latou te maua. E mafai foi ona latou faasoa mai ni faataitaiga o na uiga auaumama i olaga o tagata. E faapefea ona tatou “saili atu i nei mea”?

Kolose 1:12–23; 2:2–8

A tatou “mauaa” ia Iesu Keriso, ua faamalosia i tatou e faasaga i faatosinaga o le lalolagi.

• O le molimau a Paulo e uiga i le Faaola o loo maua i le Kolose 1:12–23; 2:2–8 ua tuuina mai ai se avanoa lelei mo tagata o le vasega e mafaufau loloto ma faamalosia ai o latou lava faatuatua. E mafai e tagata o le vasega ona suesue i nei fuaiupu e maua ai mea e faamalosia ai o latou faatuatua ia Iesu Keriso. O le a le uiga o le ia “mauaa ma ia atiina ae ia [Iesu Keriso]”? (Kolose 2:7). O le ata o le laau o loo i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga ma le vitio “Spiritual Whirlwinds” (ChurchofJesusChrist.org) e mafai ona fesoasoani i tagata o le vasega i le talanoaina o le fuaiupu lenei. O a ni mea e mafai ona faamalosia pe faavaivaia aa o se laau? E faapefea e le “mauaa ma atiina ae ia [Iesu Keriso]” ona faamalosia i tatou e tetee atu i tosinaga faalelalolagi? (tagai Kolose 2:7–8; tagai foi Helamana 5:12; Eteru 12:4).

• E mafai ona e valaaulia tagata o le vasega e lisi mai mea o loo i le Kolose 1:12–23; 2:2–8 o loo aoao mai ai e mafai ona tatou faia e alo ese ai mai le “poto le aoga e faasese ai” lea e mafai ona “faaleagaina” ai lo tatou faatuatua ia Keriso (Kolose 2:8). E mafai faapefea ona tatou lagolago i le tasi ma le isi i a tatou taumafaiga ia mulimuli i le Faaola ma alo ese mai taufaasese a Satani?

Faaleleia o Lo Tatou Aoao Atu

Faaaoga musika. O musika paia e valaaulia ai le faatosinaga a le Agaga Paia. E mafai ona fatuina ai se siosiomaga faaaloalo ma musuia ai tautinoga ma faatinoga. Mafaufau pe mafai faapefea ona avea ma se vaega o lau vasega le “aoao atu ma apoapoai le tasi i le isi i salamo ma viiga” (Kolose 3:16; tagai foi Aoao Atu i le Ala a le Faaola,22).