o se aiga o loo matamata i ata

2–8 Oketopa

Efeso

“Ina ia Faaatoatoaina ai le Au Paia”

O mafaufauga ma lagona e uiga i le po o le a, ma pe faapefea ona aoao atu o le a oo mai a’o e suesue ma le agaga tatalo i le Efeso, lauga o le konafesi aoao aupito lata mai, le otootoga lenei, ma le Sau, Mulimuli Mai ia te Au—Mo Tagata Taitoatasi ma Aiga.

aikona o le fefaasoaai

Valaaulia le Fefaasoaai

Mafaufau e valaaulia tagata o le vasega e tusi i luga o le laupapa se aotelega e tasi le fuaiupu o se mea sa latou aoaoina ia latou suesuega i lenei vaiaso. Ia filifili solo mai ni nai aotelega, ma valaaulia tagata o le vasega na tusia e faasoa mai o latou manatu.

aikona o le aoao atu

Aoao Atu le Aoaoga Faavae

Efeso 2:19–22; 4:4–8, 11–16

O perofeta ma aposetolo—ma i tatou uma—e faamalosia ma faalotogatasia le Ekalesia.

• Pe mafai ona outou fausia faatasi ma lau vasega se mea e faailoa ai le auala o “atiina ae [le Ekalesia] i luga o le faavae o le au aposetolo, atoa ma le au perofeta” ma le ala e avea ai le Faaola ma “maatulimanu”? (Efeso 2:20). Atonu e mafai e tagata o le vasega ona faaigoa poloka po o ipu pepa ma faatulaga i se olo po o se piramita, o Iesu Keriso ma aposetolo ma perofeta e fausia ai le faavae. Ona e faaali atu lea o le mea o le a tupu pe afai e aveese ia Keriso po o le au aposetolo ma perofeta. Aisea e avea ai le maatulimanu autu ma se faatusa lelei mo Iesu Keriso ma Lana matafaioi i le Ekalesia? (Mo se faamatalaga e uiga i le maatulimanu autu, tagai “Puanoa Faaopoopo.”) E mafai e tagata o le vasega ona saili i le Efeso 2:19–22; 4:11–16 mo faamanuiaga tatou te maua ona o aposetolo, perofeta ma isi taitai o le Ekalesia. O a ni mea e mafai ona tatou faia e atiina ae ai o tatou olaga i a latou aoaoga?

maatulimanu o se fale

O Iesu Keriso o le maatulimanu o le Ekalesia.

• Afai na faalogo tagata o lau vasega i le konafesi aoao talu mai le taimi mulimuli sa outou feiloai ai, valaaulia i latou e faasoa mai ni mea sa aoao mai i le taimi o le konafesi sa fesoasoani e faataunuu ai faamoemoega o loo tauina mai i le Efeso 4:11–16.

• Atonu e mafai ona e tuuina atu i tagata o le vasega se taimi e lisi ai nisi o “valaauga” po o tiutetauave ua ia i tatou o ni tagata auai o le Ekalesia a Keriso (tagai Efeso 4:1)—mo se faataitaiga, o se uso po o se tuafafine o auaunaga, o se matua amiotonu, o se soo o Keriso, ma isi mea faapena. Ona mafai lea ona latou faafesuiaia [a latou] lisi ma se isi tagata o le vasega, faitau le Efeso 4:4–8, 11–16, ma faasoa mai auala e fesoasoani ai le faataunuuina o tiutetauave i luga o a latou lisi e siitia ai le tino o Keriso. E mafai faapefea ona tatou galulue faatasi ia lotogatasi i lalo o le “tasi le Alii, e tasi le faatuatuaga, e tasi le papatisoga”?

Efeso 5:25–6:4

O le mulimuli i le faataitaiga a le Faaola e mafai ona faamalolosia ai sootaga faaleaiga.

• Ina ia fesoasoani i tagata o le vasega e faaaoga le fautuaga a Paulo e uiga i sootaga faaleaiga, e mafai ona e tusia fesili e pei o nei i luga o le laupapa: E mafai faapefea ona tatou mulimuli i le faataitaiga a le Faaola i le ala tatou te taulimaina ai tagata o o tatou aiga? (tagai Efeso 5:25). O le a le uiga ia te oe o le “ava i lou tama ma lou tina”? (Efeso 6:1–3). E faapefea ona tatou tausia fanau i “le faafailelega ma le apoapoaiga a le Alii”? (Efeso 6:4). E mafai e tagata o le vasega ona talanoaina nei fesili, i vaega po o se vasega, a o latou faitauina mau e faatatau i ai. E mafai ona e valaaulia tagata o le vasega e faasoa mai ni faataitaiga ua latou vaaia o tagata o loo ola i auala o loo faamatala mai e Paulo.

Efeso 6:10–18

O le a fesoasoani le ofutau o le Atua e puipui i tatou mai le tiapolo.

• O le a se mea o le a fesoasoani ia musuia ai tagata o le vasega ia taumafai e oofu i le ofutau atoatoa o le Atua i aso taitasi? E mafai ona e tapenaina se gaoioiga lea e faafetaui ai e tagata o le vasega ni fasi vaega o le ofutau i mataupu faavae po o uiga auaumama ua faatusa i ai i le Efeso 6:14–17. E mafai faapefea ona fesoasoani ia vaega taitasi o le ofutau e puipui i tatou mai le amioleaga? (Mo nisi o fesoasoaniga, tagai “Punaoa Faaopoopo.”) E faapefea ona tatou ofuina lenei ofutau? O a ni mea e mafai ona tatou faia e faailoa ma faamalosia ai soo se vaivaiga i la tatou ofutau?

aikona o punaoa

Punaoa Faaopoopo

O le a le maatulimanu autu?

O le maatulimanu autu o le maa lea e muamua faataatia o se faavae. E avea lea ma se vaega e faatatau atu i ai mo le fuaina ma le faataatiaga o isi maa, lea e tatau ona ogatasi ma le maatulimanu autu. Ona na te tauaveina le mamafa o le fale atoa, o lea o le maatulimanu autu e tatau ona malo, mausali, ma faatuatuaina (tagai “The Cornerstone,” Ensign, Ian. 2016, 74–75).

O le ofutau o le Atua.

E sulu faataamilo sulugatiti i le upumoni: O le fasi ofutau lenei e pei o se fusipau e fusi faataamilo i le sulugatiti. O le upu sulu e mafai foi ona faauigaina i le puipuia, oponiina, pe faamalosia.

Ufifatafata o le amiotonu”O se ufifatafata e puipuia le fatu ma isi totoga taua.

Ia faaseevaeina ia vae i le saunia o le tala lelei o le filemu:E faatatau lenei mea i le ufiufi e puipui ai vae o se fitafita.

Talipupuni o le faatuatua:O se talita e mafai ona puipuia ai toetoe o soo se vaega o le tino mai osofaiga eseese.

Pulou o le Faaolataga:O se pulou e puipui ai le ulu.

Pelu o le Agaga:O se pelu e mafai ona tatou faia ai se gaoioiga e tau faasaga atu i le fili.

Faaleleia o Lo Tatou Aoao Atu

Taumafai malosi mo le alofa faaKeriso. O au fegalegaleaiga ma i latou e te aoaoina e tatau ona faaosofia i le alofa. O le a faamanuiaina oe ma lau au aoao a’o e tatalo ia atiina ae le alofa faaKeriso ma saili i auala e faaali atu ai (tagai Aoao Atu i le Ala a le Faaola,6; Moronae 7:48).