faifeautalai tamaitai o loo talanoa atu i se alii talavou

16–22 Oketopa

1 ma le 2 Tesalonia

“Faaatoatoaina Le Mea Ua Le Lava i Lo Outou Faatuatua”

Na aoao mai Alema, “Ia outou lē faalagolago i se tasi e avea ma o outou aoao po o so outou faifeau, vagana ai o ia o se tagata o le Atua, o loo savali i ona ala ma tausi i ana poloaiga” (Mosaea 23:14). O le a le mea o loo fautua mai e lenei mau i le auala e tatau ona e saunia ai oe lava e aoao atu?

aikona o le fefaasoaai

Valaaulia le Fefaasoaai

Tuu atu i tagata o le vasega ni nai minute e vaai vave ai i le 1ma le 2 Tesalonia ma sue se fuaiupu e faagaeetia ai i latou. Valaaulia i latou e faasoa atu a latou fuaiupu i se isi tagata o le vasega, ona fai atu lea i ni nai paga e faasoa mai se mea ua latou aoaoina mai le tasi ma le isi.

aikona o le aoao atu

Aoao Atu le Aoaoga Faavae

1 Tesalonia 1:5–8; 2:1–13

O auauna a le Alii e tatau ona talai atu i le loto faamaoni ma le alofa.

• Sa amata e Paulo lana Tusi i a Tesalonia i le faamanatu atu i le Au Paia o le auala sa faasoa atu ai e ia ma isi le talalelei ia i latou. Atonu o se avanoa lelei lea mo tagata o lau vasega e iloilo ai auala o loo latou faia i le aoao atu ma le aoao mai i le tasi ma le isi. E mafai ona e valaaulia tagata o le vasega e faitau le 1 Tesalonia 1:5–8; 2:1–13 ma faailoa mai mataupu faavae e faatatau i le faasoa lelei atu o le talalelei. Ona mafai lea ona latou tusia ni fesili e faavae i nei fuaiupu, o le a fesoasoani ia i latou i le iloiloina o a latou taumafaiga e aoao atu le talalelei i isi. Mo se faataitaiga, atonu o se tasi o fesili o le “Pe o au ea o se faataitaiga o mea ua ou iloa?” (tagai 1 Tesalonia 1:7). E mafai faapefea e le mulimuli i mataupu faavae i lenei fasifuaitau ona fesoasoani ia tatou avea ai ma ni faifeau lelei ia i latou tatou te aoaoina?

1 Tesalonia 3:9–13; 4:1–12

Ao tatou mulimuli ia Iesu Keriso, e mafai ona Ia faia i tatou ma ni [tagata] paia.

• Sa aoao e Paulo le Au Paia i Tesalonia e faapea, “E lei valaauina i tatou e le Atua ia amioleaga, a ia faapaiaina lava” (1 Tesalonia 4:7). Ina ia amata se talanoaga e uiga i le paia, e mafai ona usu e lau vasega po o se tagata se toatasi le pese “More Holiness Give Me” (Hymns, no. 131). Fai i tagata o le vasega e talanoa i ia uiga auaumama o le paia o loo taua i le viiga e faapea ona tulaga ese ia i latou. Tusi i luga o le laupapa le Mea paia e tele mo au, tele …, ma valaaulia tagata o le vasega e vaavaai mo upu ma fasifuaitau mai le 1 Tesalonia 3:9–13; 4:1–12 e faauma ai le fuaiupu. E mafai faapefea ona tatou atinaeina nei uiga auaumama?

• O le valaaulia ia paia e foliga mai e lofituina. Atonu e aoga pe a malamalama tagata o le vasega, o le atinaeina o le paia o se faagasologa faifai pea e manaomia ai ona tatou “faasilisili pea i ai” i le aluga o taimi (1 Tesalonia 4:10). Ina ia faapupula atu lenei faagasologa, e mafai ona e valaaulia se tagata o le vasega e talanoa atu e uiga i se taleni po o se mea na ausia lea e alu ai se taumafaiga faifai pea i le aluga o taimi, e pei o le faiga o se ie soosoo po o le taina o se mea faimusika. E faapefea ona talitutusa lenei mea ma le faagasologa o le avea ma se [tagata] paia? Valaaulia tagata o le vasega e toefaamanatu le 1 Tesalonia 3:9–13; 4:1–12 ma faasoa mai ni malamalamaaga manino e faatatau i taumafaiga e manaomia e avea ai ma se [tagata] paia i auala o loo faamatalaina e Paulo. O le a se mea na fesoasoani ia i tatou e agai ai i luma i le faapaiaina?

1 Tesalonia 4:11–12; 2 Tesalonia 3:7–13

E tatau ona tatou galulue e tausi i tatou lava ma i latou e le tagolima.

• O fesili e pei o nei, e mafai ona musuia ai se talanoaga e uiga i le fautuaga a Paulo e faatatau i le galue: O a taunuuga o le paie? O a faamanuiaga o le galue? O le a sou manatu i le uiga o le tala a Paulo i upu “filemu” ma le “fifilemu”? (1 Tesalonia 4:11; 2 Tesalonia 3:12). Atonu e te manao e tusi fesili e pei o nei i luga o le laupapa mo tagata o le vasega e mafaufau loloto i ai ao latou faitau i le 1 Tesalonia 4:11–12 ma le 2 Tesalonia 3:7–13. O le a se isi mau e fesoasoani ia tatou malamalama ai i le taua o le galue ma tulaga matautia o le paie? (tagai i fautuaga i le “Punaoa Faaopoopo”).

2 Tesalonia 2

O le a muamua se liliuese i le Afio Mai Faalua o Iesu Keriso.

• Atonu e aoga ona talanoa i nisi o faataoto sa faaaoga e perofeta e faamatala ai le Liliuese, e pei o se tete’a ese (tagai 2 Tesalonia 2:3), o se oge (tagai Amosa 8:11–12), luko saua o e le faasaoina le lafu mamaoe (tagai Galuega 20:28–30), ma taliga feu (tagai 2 Timoteo 4:3–4). Mafaufau e vaevae tagata o le vasega i ni paga ma fai atu ia i latou e faitau se tasi pe sili atu o mau nei (po o isi e te filifilia) ma faamatala mai mea o aoao mai e fuaiupu e uiga i le Liliuese Tele. O le a le mea ua aoao mai e perofeta e uiga i le Liliuese ma aafiaga o le a i ai?

• E ui o le a le oo le Ekalesia i se isi “pau ese” (2 Tesalonia 2:3) e pei ona sa i ai anamua, ae e mafai lava ona tatou pauu ese taitoatasi. O le a le mea o fautua mai e le 2 Tesalonia 2 e uiga i le ala e mafai ai ona tupu lenei pau ese (tagai fuaiupu 9–10) ma pe mafai faapefea ona tatou aloese ai? (tagai fuaiupu 15–17).

aikona o punaoa

Punaoa Faaopoopo

Mau e uiga i le galue ma le paie.

• Kenese 3:19

• Mataio 21:28–32

• Mosaea 2:10–16

• Mataupu Faavae ma Feagaiga 42:42; 58:27; 60:13; 75:29

Faaleleia o Lo Tatou Aoao Atu

Faaaoga metotia eseese. E mafai ona faigofie ona masani i se sitaili faapitoa e tasi e aoao atu ai, ae o metotia eseese faafaiaoga e oo atu i tagata eseese o le vasega. Vaavaai mo ni auala e suisui ai le faiga o lou aoao atu, e pei o le faaaogaina o vitio, faatufugaga, po o musika, po o le tuu atu i tagata o le vasega ni avanoa e aoao atu ai (tagai Aoao Atu i le Ala a le Faaola,22).