Si Jesukristo nagsangyaw sa ebanghelyo didto sa kalibotan sa mga espiritu

Si Kristo Nagsangyaw didto sa Kalibotan sa Espiritu, ni Robert T. Barrett

Nobyembre 20–26

1 ug 2 Pedro

“Busa Napuno Kamo Pag-ayo sa Kalipay nga Dili Malitok sa Pulong”

Hinumdumi nga ang imong katuyoan mao ang pagtudlo sa mga tawo, dili lang ang pagpresentar og usa ka leksiyon. Samtang magbasa ka sa mga Sulat ni Pedro, hunahunaa ang indibidwal nga mga sakop sa klase. Unsa nga mga baroganan ang makatabang kanila sa pag-ugmad sa ilang hugot nga pagtuo?

pagpaambit nga icon

Dapita ang Pagpaambit

Isulat ang mga ulohan sa 1 Pedro ug 2 Pedro diha sa pisara. Hatagi og panahon ang mga sakop sa klase sa pagrebyo niining mga sulat, ug dapita sila sa pagsulat ubos niining mga ulohan og pulong o mga pulong nga ilang nakita nga makahuluganon. Dayon gamita ang mga lista sa pagdapit sa mga tawo sa pagpaambit sa ilang mga hunahuna.

icon sa pagtudlo

Itudlo ang Doktrina

1 Pedro 1:3–9; 2:19–24; 3:14–17; 4:12–19

Ako makakita og kalipay atol sa mga panahon sa pagsulay ug pag-antos.

• Usa ka paagi sa pagrebyo sa tambang ni Pedro diha sa 1 Pedro 1:3–9; 2:19–24; 3:14–17; ug 4:12–19 mao ang pagdapit sa mga sakop sa klase sa paghunahuna mahitungod sa usa ka tawo nga ilang nailhan nga nakasinati og usa ka pagsulay. Hatagi sila og panahon diha sa klase sa paghimo og sulat ngadto nianang tawhana, lakip na ang mga kamatuoran gikan niining mga bersikulo nga makadasig nianang tawhana (tan-awa usab sa Doktrina ug mga Pakigsaad 121:1–8; 123:17). Dayon ang mga sakop sa klase mahimong maghisgot mahitungod sa mga kamatuoran nga ilang gipili.

1 Pedro 1:13–20; 2:1–12

Gitawag kita nga mahimong “mga katawhan sa Dios.”

• Ang mga pagtulon-an ni Pedro diha sa 1 Pedro 1:13–20 ug 2:1–12 mahimong makapadasig—sa Iyang katawhan—ug sa unsay Iyang gilaoman kanato. Tingali mahimo nimong dapiton ang mga sakop sa klase sa pagsiksik niining mga bersikulo nga mangita sa mga paghulagway kon unsa ang gipasabot sa mahimong “mga katawhan sa Dios” (1 Pedro 2:10) ug dayon hisgotan kon unsay ilang makit-an. Mahimo nimong ipasabot nga ang pulong “pinili” diha sa 1 Pedro 2:9 nagpasabot nga “linukat” o “tinipigan”. Unsa ang gitudlo niini kanato mahitungod sa paagi kon unsay gibati sa Dios kanato ug sa unsang paagi Niya gusto nga magpakabuhi kita?

1 Pedro 3:18–20; 4:6

Ang ebanghelyo gisangyaw ngadto sa mga patay aron mahukman sila sa makiangayong paagi.

• Ang Unang Sulat ni Pedro gilangkoban og usa sa pipila ka pakisayran diha sa Biblia sa pagbisita ni Jesukristo sa kalibotan sa mga espiritu human sa Iyang kamatayon—usa ka panghitabo nga ang modernong pagpadayag nakatabang kanato nga mas hingpit nga masabtan. Aron matabangan ang mga sakop sa klase nga mapalambo pa ang ilang panabot bahin sa kalibotan sa mga espiritu, mahimo nimo silang dapiton sa pagbasa sa mosunod nga mga kasulatan ug isulat kon unsay ilang nakat-onan diha sa pisara: Juan 5:25; 1 Pedro 3:18–20; 4:6; Alma 40:7–14, 21; Doktrina ug mga Pakigsaad 138:11–32 (tan-awa usa sa “Dugang nga mga Kapanguhaan.”) Nganong importante man ang pagkahibalo sa pagbisita sa Manluluwas ngadto sa kalibotan sa mga espiritu? Sa unsa nga paagi kini nga kahibalo nakaapekto sa atong gibati mahitungod sa Dios ug sa Iyang plano sa kaluwasan?

2 Pedro 1:1–11

Pinaagi sa gahom ni Jesukristo, makapalambo kita sa atong balaanong mga kinaiya.

• Aron maawhag kadtong imong gitudloan diha sa ilang mga paningkamot nga mas mahisama kang Jesukristo, mahimo nimo silang dapiton sa pagpangita sa Kristohanong mga kinaiya nga gihulagway diha sa 2 Pedro 1:1–11. Ikonsiderar ang pagsulat niining mga kalidad diha sa pisara ug hangyoa ang mga sakop sa klase nga ipasabot kini. Ang mga sakop sa klase mahimo dayon nga maghisgot kon sa unsang paagi nga ang pagpalambo og usa ka kalidad mosangpot sa pagpalambo sa ubang mga kalidad. Hatagi sila og panahon sa pagpamalandong kon hain nga kalidad ang gusto nilang mas palamboon pa gayod.

usa ka gilala nga kurtina sa labihan ka kuti nga paagi

Ang matag Kristohanong kalidad nga atong mapalambo makatabang nato sa pag-lala og espirituhanong kurtina sa pagkadisipulo.

mga kapanguhaan nga icon

Dugang nga mga Kapanguhaan

Ang buhat sa pagtubos sa mga patay nagpamatuod sa misyon ni Kristo.

Si Elder D. Todd Christofferson nagtudlo:

“Unsa ang padulngan sa dili mahihap nga binilyon kinsa nabuhi ug namatay nga walay nahibaloan kabahin ni Jesukristo? Uban sa Pagpahiuli sa ebanghelyo ni Jesukristo miabot ang pagsabot kon sa unsang paagi ang wala mabunyagi nga patay matubos ug kon sa unsang paagi ang Dios mahimong usa ka ‘hingpit, makiangayong Dios, ug usa ka maloloy-on nga Dios usab’ [Alma 42:15].

“Samtang buhi pa, si Jesus nanagna nga Siya usab mosangyaw ngadto sa mga patay [tan-awa sa Juan 5:25]. Si Pedro misulti kanato nga kini nahitabo sa milabay nga panahon tali sa Paglansang sa Manluluwas ug sa Pagkabanhaw [tan-awa sa 1 Pedro 3:18–19]. Si Presidente Joseph F. Smith misaksi diha sa panan-awon nga ang Manluluwas mibisita sa kalibotan sa mga espiritu [tan-awa sa Doktrina ug mga Pakigsad 138:30, 33]. …

“Ang atong dakong paningkamot sa pagtubos sa mga patay, ug ang panahon ug mga kapanguhaan nga atong gibutang luyo niana nga pasalig mao, labaw sa tanan, ang usa ka pagpahayag sa atong pagsaksi kabahin ni Jesukristo. Kini naglangkob ingon ka gamhanan nga pamulong nga atong mahimo kabahin sa Iyang balaan nga kinaiya ug misyon. Kini nagpamatuod, una, kabahin sa Pagkabanhaw ni Kristo, ikaduha, kabahin sa walay kinut[o]bang epekto sa Iyang Pag-ula; ikatulo, nga Siya lamang ang tinubdan sa kaluwasan; ikaupat, nga Siya naghan-ay sa mga kondisyon alang sa kaluwasan; ug, ikalima, nga Siya mobalik pag-usab.” (Ang Katubsanan sa mga Patay ug ang Pagpamatuod ni Jesus,” Liahona, Nob. 2000, 9–10).

Pagpalambo sa Atong Pagtudlo

Itudlo ang “ngano.” “Usahay ang mga tigkat-on—ilabi na ang kabatan-onan—naghunahuna kon sa unsang paagi ang mga baroganan sa ebanghelyo adunay kalabotan ngadto kanila o nganong kinahanglan silang mosunod og piho nga mga sugo. Hinoon, kon sila nakasabot sa mahangtorong plano sa Langitnong Amahan alang sa kalipay sa Iyang mga anak, ang mga hinungdan sa mga baroganan sa ebanghelyo ug mga sugo mahimong mas klaro ug ang kadasig sa pagsunod magkadako” (Pagtudlo sumala sa Pamaagi sa Manluluwas, 20).