“Nobyembre 27–Disyembre 3. 1–3 Juan; Judas: “Ang Dios Gugma” Dali, Sunod Kanako—Alang sa Sunday School: Bag-ong Tugon 2023 (2021)
Nobyembre 27–Disyembre 3. 1–3 Juan; Judas,” Dali, Sunod Kanako—Alang sa Sunday School: 2023
Hingpit nga Gugma, ni Del Parson
Nobyembre 27–Disyembre 3
1–3 Juan; Judas
“Ang Dios Gugma”
Unsa nga mga tema ug mga sumbanan ang mahinungdanon alang kanimo samtang nagbasa ka sa1–3 Juan ug Judas? Unsaon nimo sa paggamit niini aron matabangan ang mga sakop sa imong klase?
Dapita ang Pagpaambit
Dapita ang pipila ka sakop sa klase sa pagpaambit sa mga tema o piho nga mga kamatuoran nga mahinungdanon ngadto kanila samtang nagtuon sila sa mga Sulat ni Juan ug Judas. Unsa ang mga mensahe gikan niining mga sulat ang labing mahinungdanon ngadto kanila ug sa ilang mga pamilya?
Itudlo ang Doktrina
1 Juan 1:5–10; 2:3–11; 3:1–3; 4:7–21; 5:1–3
Ang Langitnong Amahan ug si Jesukristo hingpit nga mga ehemplo sa kahayag ug gugma.
-
Sa unsang paagi nga matabangan nimo kadtong imong gitudloan nga makaila sa kahayag ug gugma sa Langitnong Amahan diha sa ilang kinabuhi? Mahimo nimong sugdan pinaagi sa pagsulat sa mga pulong nga kahayag ug gugma diha sa pisara. Hangyoa ang mga sakop sa klase nga ipaambit ang ubang mga pulong nga mosantop sa hunahuna kon maghunahuna sila niining duha ka pulong. Ang matag sakop sa klase mahimo dayon nga magtuon sa usa sa mosunod nga mga tudling sa kasulatan, nga mangita og butang sa mga bersikulo nga nagtudlo mahitungod sa kahayag ug gugma: 1 Juan 1:5–10; 2:3–11; 3:1–3; 4:7–12; 4:16–21; 5:1–3. Hangyoa ang pipila kanila sa pagpaambit sa klase kon unsa ang ilang nakit-an. Mahimo usab nimong dapiton ang mga sakop sa klase sa pagpaambit og mga kasinatian sa dihang sila mibati sa kahayag ug gugma sa Dios.
-
Mahimo nimong dapiton ang mga sakop sa klase nga motan-aw sa suga diha sa kisame o sa kahayag nga nag-agi sa bintana ug ipaambit kon unsay ilang nahibaloan mahitungod sa pisikal nga kahayag. Sa unsang paagi nga ang pisikal nga kahayag nahisama sa espirituwal nga kahayag? Ang mga sakop sa klase makatuon sa mosunod aron makakita og dugang nga mga ideya kon giunsa sa Dios ug sa iyang Anak sa paghatag og kahayag sa atong mga kinabuhi: Salmo 27:1; Juan 1:4–5; 1 Juan 1:5–7; 3 Nephi 11:11; Doktrina ug mga Pakigsaad 88:6–13; ug usa ka himno mahitungod sa kahayag, sama sa “Ang Dios Kahayag Ko” (Mga Himno, nu. 46). Ang mga sakop sa klase makapaambit usab og mga kasinatian kabahin sa pagtinguha ug pagdawat og espirituwal nga kahayag diha sa ilang kinabuhi.
1 Juan 2:18–28; 4:3; 2 Juan 1:7–11; 3 Juan 1:9–11; Judas
Kita kinahanglan gayod “[mopuyo] diha sa doktrina ni Kristo.”
-
Ang mga pagtulon-an ni Juan ug Judas mahitungod sa apostasiya makatabang sa mga sakop sa klase sa pagkonsiderar kon unsaon nga ang ilang hugot nga pagtuo magpabilin nga lig-on diha ni Jesukristo. Ikonsiderar ang pagdapit sa katunga sa klase sa pagsiksik alang sa mga paghulagway sa sayop nga mga pagtulon-an o apostasiya diha sa 1 Juan 2:18–23, 26–28; 4:3; 2 Juan 1:7–11; 3 Juan 1:9–11 ug ang laing katunga sa pagsiksik alang sa maong mga paghulagway diha sa Judas. O mahimo silang mangita og mga tubag sa mga pangutana sama niini: Giunsa man sa paghulagway ni Juan ug Judas ang usa ka anti-kristo? (tan-awa usab sa Ang Giya ngadto sa mga Kasulatan, “Anti-kristo,” ). Aduna bay bisan unsa nga butang niining mga bersikulo nga daw magamit sa mga hagit nga atong giatubang karon? Unsay ipasabot sa “[pagpuyo] diha sa Doktrina ni Kristo? (2 Juan 1:9).
-
Migamit si Judas og makapainteresado nga imahe sa paghulagway sa mga mini nga mga magtutudlo, o kadtong kinsa “nagbiaybiay sa mga butang nga wala nila hisabti” (Judas 1:10). Mahimo nimong dapiton ang pipila ka sakop sa klase nga magdrowing sa pisara og pipila ka imahe nga gihulagway diha sa Judas 1:12–13 samtang ang ubang mga sakop sa klase motag-an kon unsa nga mga pulong ang gidrowing sa ilang kauban. Sa unsang paagi nga kining mga imahe nagrepresentar sa mini nga mga magtutudlo ug mga anti-Kristo? Pananglitan, sa unsang paagi nga ang daotang mga gipangbuhat nakamugna og “hugaw nga mansa sa [atong] mga pagsalosalo”? Unsa may atong mahimo aron mapalig-on ang atong kaugalingon batok sa mga “magbugalbugal”? (tan-awa sa Judas 1:18–21). Ngano kaha nga misugyot man si Judas nga kita “adunay kalooy” (Judas 1:22) niadtong mobugalbugal sa ebanghelyo?
“Wala nay labaw nga makalipay kanako kay sa balita nga ang mga anak ko nagkinabuhi sumala sa kamatuoran” (3 Juan 1:4).
Ang hingpit nga kalipay moabot samtang motabang kita sa uban nga “nagkinabuhi sumala sa kamatuoran.”
-
Tingali adunay mga tawo sa imong klase kinsa makasaysay kon unsay gibati ni Juan sa dihang miingon siya nga “gikalipay [niya] pag-ayo” kay sa makadungog nga si Gayo (usa sa iyang “mga anak”) [nagpaka]buhi sumala sa kamatuoran. Ang mga sakop sa klase mahimong makabenepisyo gikan sa pagkadungog sa mga kasinatian sa usag usa. Tingali mahimo nimong sugdan pinaagi sa pagbasa og dungan sa 3 Juan 1:1–4 ug sa mga kasulatan diha sa “Dugang nga mga Kapanguhaan.” Unsay gitudlo niining mga kasulatan kanato mahitungod sa tinubdan sa tinuod nga kalipay? Ang mga sakop sa klase mahimong maghisgot kon unsay ilang gibati isip mga ginikanan, mga misyonaryo, mga lider sa Simbahan, o mga magtutudlo sa dihang nahibalo sila nga ang mga tawo nga ilang gitudloan magsubay sa kamatuoran. Mahimo nimong kontakon daan ang pipila ka sakop sa klase sa dili pa magklase ug hangyoion sila nga magdala og mga litrato sa mga tawo nga ilang natabangan nga madala ngadto kang Kristo ug isulti ang ilang mga kasinatian.
Dugang nga mga Kapanguhaan
Mga kasulatan mahitungod sa pagtabang sa uban nga magsubay sa kamatuoran.
Pagpalambo sa Atong Pagtudlo
Pag-ampo alang sa mga sakop sa imong klase. Ingon nga ang Manluluwas nag-ampo alang kang Pedro (tan-awa sa Lucas 22:32), kinahanglan gayod nga imong hinganlan diha sa pag-ampo kadtong imong gitudloan, magtinguha sa pagsabot sa ilang piho nga mga panginahanglan. Sa pagbuhat nimo sa ingon, ang Langitnong Amahan mo-“andam sa ilang mga kasingkasing” (Alma 16:16) ug motabang kanimo nga mahibalo kon unsay itudlo aron matubag ang ilang mga panginahanglan (tan-awa sa Pagtudlo sumala sa Pamaagi sa Manluluwas, 6).