“Disyembre 4–10. Gipadayag 1–5: ‘Himaya ug Gahom, Alang sa … Nating Karnero hangtod sa Kahangtoran’” Dali, Sunod Kanako—Alang sa Sunday School: Bag-ong Tugon 2023 (2021)
“Disyembre 4–10. Gipadayag 1–5,” Dali, Sunod Kanako—Alang sa Sunday School: 2023
Disyembre 4–10
Gipadayag 1–5
“Himaya,, ug Gahom … sa Nating Karnero hangtod sa Kahangtoran”
Ang pagdawat og espirituwal nga mga impresyon makatabang kanimo sa pag-ila nga ang Espiritu Santo gusto nga motudlo kanimo. Ang pagrekord ug pagsunod niadtong mga pag-aghat nagpakita nga imo kining gihatagan og bili ug nagtinguha nga makadawat pa og dugang.
Dapita ang Pagpaambit
Samtang magsugod ka sa paghisgot-hisgot, mahimong makatabang ang pagdapit sa mga sakop sa klase sa pagpaambit og pipila ka mga mensahe nga ilang nakit-an sa basahon sa Gipadayag atol sa ilang personal o pamilya nga pagtuon. Pananglitan, unsa ang ilang nakat-onan mahitungod sa plano sa Langitnong Amahan sa pagluwas sa Iyang mga anak? Unsa ang ilang makat-onan mahitungod sa Manluluwas ug sa Iyang tahas diha sa plano? Awhaga ang mga sakop sa klase sa pagpadayon og pangita alang sa importanting mga mensahe mahitungod ni Jesukristo ug sa plano sa kaluwasan samtang sila magpadayon sa pagbasa sa Gipadayag diha sa panimalay. Hatagi sila og oportunidad atol sa umaabot nga mga leksiyon aron makapaambit kon unsa ang ilang makit-an.
Itudlo ang Doktrina
Si Jesukristo mao ang Buhi nga Anak sa Buhi nga Dios.
-
Ang larawan ug mga simbolismo diha sa Gipadayag 1 klarong nagpamatuod nga si Jesukristo buhi ug nga Siya naggiya sa Iyang Simbahan. Tingali ang mga sakop sa klase mahimong mosulat diha sa pisara og pipila ka mga pulong gikan sa Gipadayag 1 nga naglakip sa larawan o simbolismo ug mopaambit kon unsa ang gitudlo sa matag usa niini mahitungod kang Jesukristo. Pananglitan, unsay atong makat-onan gikan niining mga simbolo kon giunsa paggiya ni Kristo ang Iyang Simbahan karon? Sa unsang paagi nga ang paghulagway ni Juan sa Manluluwas ikatandi ngadto sa usa nga anaa sa Doktrina ug mga Pakigsaad 110:1–4?
Si Jesukristo personal nga nakaila kanato ug motabang kanato sa pagbuntog sa atong mga hagit.
-
Ang pagbasa sa mga mensahe sa Ginoo ngadto sa nagkadaiyang mga branch sa Simbahan diha sa Gipadayag 2–3 makatabang nga mapasaligan pag-usab ang mga sakop sa klase nga ang Manluluwas nakaila kanila. Tingali mahimo nimong dapiton sila nga ganiron sa pagtan-aw [scan] kining mga kapitulo sa pagpangita og ebidensiya nga si Jesukristo nasayod sa mga pagsulay ug kalig-on sa matag branch. Mahimo usab sila nga makapaambit og mga kasinatian diin mibati sila nga nahibalo ang Manluluwas sa ilang talagsaong mga kahimtang. Unsa nga tambag ang gihatag sa Ginoo ngadto sa mga Santos nga makatabang usab kanato nga mabuntog ang atong mga panglimbasog?
-
Dinhi niining samang mga kapitulo ang Ginoo mihimo og makapadasig nga mga saad niadtong kinsa makabuntog. Mahimo nimong dapiton ang mga sakop sa klase nga magtinabangay nga magpares sa pagsiksik sa Gipadayag 2–3 aron makit-an ang mga saad sa Ginoo. Tingali mahimo usab silang magdrowing og mga hulagway nga magrepresentar og pipila niining mga saad, dayon ipaambit sa klase kon unsay ilang makit-an. Sa unsang paagi nga kining mga saad makapadasig kanato nga mopadayon sa pagpaningkamot nga mabuntog ang atong kaugalingong mga pagsulay ug mga kahuyang?
Si Jesukristo lamang ang makahimong posible sa plano sa Langitnong Amahan.
-
Ang usa ka butang sa leksiyon makatabang ba sa imong klase nga makasabot sa simbolismo diha sa Gipadayag 5 mahitungod sa Manluluwas nga miabli sa gisilyohan nga basahon? Mahimong magdala ka og makaon diha sa usa ka kinandadohan nga sudlanan aron ipaambit sa klase. Sa dili pa magklase, isekreto og hatag sa usa ka tawo ang yawe sa kandado. Ihulagway ngadto sa klase kon unsay anaa sa sulod sa sudlanan, ug tugoti ang pipila ka sakop sa klase sa pagsulay og abli sa kahon sa dili pa kini ablihan sa tawo nga adunay yawe. Dayon ang klase mahimong motandi niining butang sa leksiyon ngadto sa Gipadayag 5. Ang mga pangutana nga sama niini mahimong makatabang: Sa unsang paagi nga ang kaluwasan sa mga anak sa Langitnong Amahan sama sa kinandadohan nga sudlanan o gisilyohan nga basahon? Nganong si Jesukristo lamang ang bugtong makaabli sa mga silyo? (tan-awa ang kinutlo sa “Dugang nga mga Kapanguhaan”).
-
Sama sa nagsadya nga mga tawo nga nahisgotan diha sa Gipadayag 5, mahimo usab kita karon nga mopalanog sa atong mga tingog sa pagdayeg sa Manluluwas isip ang Usa nga takos nga motanyag kanato og kaluwasan. Tingali ang mga sakop sa klase mahimong magdungan sa pagpanganta og usa ka paborito nga himno sa pagdayeg mahitungod sa Maluluwas, sama sa “Himaya sa Dios sa Kahitas-an” (Mga Himno, nu. 24). Ang mga sakop sa klase mahimong moila sa mga kamatuoran nga gitudlo sa himno mahitungod ni Jesukristo. Unsa nga mga pagkasusama nga atong makita tali sa mga mensahe sa atong mga himno ug sa mga pamahayag diha sa Gipadayag 5:9–14?
Dugang nga mga Kapanguhaan
Si Jesukristo lamang ang makaula alang kanato.
Naghulagway sa mga panghitabo sa kinabuhi sa wala pa dinhi sa yuta, si Elder Jeffrey R. Holland nagtudlo:
“Si Kristo miboluntaryo sa pagtah[o]d sa moral nga kabubut-on sa tanang mga tawo bisan og Siya miula alang sa ilang mga sala. Sa maong paagiha, Iyang ibalik ngadto sa Amahan ang tanang himaya alang sa maong matubsanong gugma.
“Kining walay kinut[o]ban nga Pag-ula ni Kristo nahimong posible tungod kay (1) Siya lamang ang walay sala nga tawo sukad nga nagpuyo niini nga yuta ug busa dili ubos sa espirituhanon nga kamatayon nga resulta gikan sa sala, (2) Siya lamang ang Bugtong Anak sa Amahan ug busa nakabaton og mga hiyas sa pagkadios nga nakahatag Kaniya og gah[o]m sa pisikal nga kamatayon, ug (3) Siya lamang ang bugtong mapainubsanon kaayo ug andam didto sa konseho sa kinabuhi nga wala pa dinhi sa yuta nga i-orden nang daan ngadto niana nga pag-alagad” (“Ang Pag-ula ni Jesukristo,” Liahona, Mar. 2008, 35).
Pagpalambo sa Atong Pagtudlo
Gamita ang mga kasulatan ug ang mga pulong sa mga propeta sa ulahing mga adlaw. “Ang Ginoo misugo kanato nga ‘motudlo sa usag usa sa doktrina sa gingharian’ [Doktrina ug mga Pakigsaad 88:77] ug sa paggamit sa mga kasulatan aron ‘magtudlo sa mga baroganan sa [Iyang] ebanghelyo’ [Doktrina ug mga Pakigsaad 42:12]. Ang mga kasulatan ug mga pulong sa mga propeta ug mga apostoles sa ulahing mga adlaw mao ang tinubdan sa mga kamatuoran nga atong gitudlo” (Pagtudlo sumala sa Pamaagi sa Manluluwas, 21).