Si Jesus nagtindog taliwala sa mga bitoon

Sinagol nga art ni Eric Johnson: The Grand Council [Ang Dakong Konseho], ni Robert T. Barrett; pundok sa mga bitoon sa maayong kabubut-on European Space Agency

Disyembre 11–17

Gipadayag 6–14

“Gibuntog sa atong mga Kaigsoonan … pinaagi sa Dugo sa Nating Karnero”

Si Joseph Smith miingon nga ang basahon sa Gipadayag “mao ang labing yano nga mga basahon nga sukad gipasulat sa Dios” (sa Journal, Disyembre 1842–Hunyo 1844; Basahon 2, 10 Marso 1843–14 Hulyo 1843, 98, JosephSmithPapers.org). Unsaon nimo sa pagtabang sa mga sakop sa klase nga makakita og yano nga mga kamatuoran niining mga kapitulo?

pagpaambit nga icon

Dapita ang Pagpaambit

Aron matabangan ang mga sakop sa klase sa pagrebyo sa mga ideya nga anaa kanila samtang sila nagtuon sa Gipadayag 6–14, isulat ang mga numero 6 hangtod sa 14 diha sa pisara. Ang mga sakop sa klase mahimong mosulat sa tupad sa usa ka numero sa bisan unsang mga ideya nga ilang makit-an diha sa tugbang nga mga kapitulo nga may kalabotan sa usa ka tawo nga nabuhi sa ulahing mga adlaw.

icon sa pagtudlo

Itudlo ang Doktrina

Gipadayag 6

Si Jesukristo nag-abli sa silyo sa basahon.

• Sa pagtabang sa mga sakop sa klase nga mahanduraw ang basahon uban sa pito ka mga silyo (tan-awa sa Gipadayag 5:1), mahimo nimong ipasabot nga ang karaan nga mga linukot nga papel [scrool] mao kasagaran ang gisilyohan pinaagi sa gamayng clay [kulonon nga yuta] o wax [talo]. Usa ka singsing o estampa iduot ngadto sa clay o wax sa dili pa kini mogahi, nga magpakita sa awtoridad sa tawo kinsa misilyo sa papel nga linukot ug magdumili sa dili awtorisadong tawo sa pag-abli niini. Ang mga sakop sa klase makapaambit dayon og bisan unsang hunahuna o mga pag-aghat nga ilang naangkon samtang nagbasa mahitungod niining basahon sa Gipadayag 6; Doktrina ug mga Pakigsaad 77:6–7; ug ang latid karong semanaha sa Dali, Sunod Kanako—Alang sa Indibiduwal ug mga Pamilya. Ngano kaha nga importante nga masayod sa simbolikanhong kahulogan niining basahon? Ngano kaha nga importante nga masayod nga ang Manluluwas mao ang moabli sa matag silyo sa basahon? (tan-awa sa Gipadayag 5:1–9).

Gipadayag 7–11

“Ang mga gingharian niining kalibotan mamahimong mga gingharian sa atong Ginoo.”

• Ang Gipadayag 7–11 mahimong lisod masabtan. Ang usa ka panalangin sa klase sa Sunday School mao nga ang mga sakop sa klase makatabang sa usag usa nga makasabot sa mga kasulatan. Makahimo ka og usa ka lista sa mga pangutana nga anaa sa mga sakop sa klase mahitungod niining mga kapitulo ug modapit kanila sa pagpaambit og mga ideya sa usag usa. Awhaga ang tanang sakop sa klase—kadtong kinsa tingali mobati nga mas nakahibalo ug kadtong kinsa tingali mobati nga wala sila masayod og ingon ka daghan—sa pagpaambit sa ilang mga ideya mahitungod niining mga kapitulo.

• Tingali imong masugdan ang usa ka panaghisgotan pinaagi sa pagpangutana sa mga sakop sa klase kon unsa ang nagbalik-balik nga mga tema ang ilang nakit-an diha sa Gipadayag 7–11. Makapaambit sila og mga bersikulo diin kining mga tema makit-an ug mapasabot kon nganong ang mga tema makahuloganon. Kon nagkinahanglan sila og tabang, mahimo nimong isugyot nga mobasa sila sa Gipadayag 11:15–17. Unsa nga mga tema ang ilang nakit-an niining mga bersikulo, ug sa unsang paagi nga kining tema gipahayag sa ubang mga bersikulo sa Gipadayag 7–11? Bisan og kining mga kapitulo naghulagway og mga gubat ug mga sakit, unsa ang atong makit-an nga naghatag kanato og paglaom ug kamasaligon diha ni Jesukristo?

Gipadayag 12–14

Kita makabuntog ni Satanas “pinaagi sa dugo sa Kordero, ug pinaagi sa pulong sa [atong] pagpamatuod.”

• Ang pagkahibalo mahitungod sa Gubat sa Langit makatabang kanato nga mas makasabot sa kinabuhi dinhi sa yuta. Ang mga sakop sa klase mahimong mobasa sa Hubad ni Joseph Smith, Pinadayag 12:7–11 (diha sa Ang Giya ngadto sa mga Kasulatan) ug motino kon unsaon nato pagbuntog si Satanas ug ang iyang mga panon. Unsa pay ubang mga ideya nga atong maangkon gikan sa mga tampo bahin sa Gubat sa Langit diha sa Ang Giya ngadto sa mga Kasulatan? Unsa ang atong makat-onan nga makatabang kanato sa pagbuntog sa kaaway?

• Ang gubat tali sa maayo ug daotan mao ang gihulagway diha sa Gipadayag 13–14. Unsa ang gitudlo diha sa kapitulo 13 ngari kanato mahitungod kon sa unsang paagi ang dragon nakig-away niini nga gubat? Sumala sa kapitulo 14, giunsa sa pagpakig-away sa Kordero niini? Mahimong makapa-interesado ang paghimo og usa ka lista sa mga paagi nga ang matag habig makig-away niining gubat sumala niining duha ka kapitulo. Unsa ang mga pagkasusama ug mga kalainan ang atong nakita?

• Unsay gipasabot nga ang Kordero “gipatay sa wala pa ang pagkatukod sa kalibotan”? (Gipadayag 13:8; tan-awa usab sa Gipadayag 5:6). Ikonsiderar ang pagtabang sa mga sakop sa imong klase nga makakita og mga tubag niini nga pangutana pinaagi sa pagbasa sa Mosiah 3:13 ug Moises 7:47 isip usa ka klase. Unsay gipasabot sa pagbuntog ni Satanas “pinaagi sa dugo sa Kordero”? (Gipadayag 12:11).

Gipadayag 14:6–7

“Unya nakita ko ang laing anghel … nagdala sa walay kataposang mensahe”

• Ang latid karong semanaha sa Dali, Suno Kanako—Alang sa mga Indibidwal ug mga Pamilya nagsugyot og mga pagkat-on mahitungod sa lain-laing mga anghel kinsa mipahiuli “sa walay kataposang mensahe ngadto … sa tanang katawhan sa kalibotan” (Gipadayag 14:6). Dapita ang mga sakop sa klase sa pagpaambit kon unsay ilang nakat-onan. Unsa ang gitudlo kanato sa Doktrina ug mga Pakigsaad 133:36-40 mahitungod sa Gipadayag 14:6–7? Sa unsang paagi nga kita makaapil sa buhat sa anghel nga nahisgotan diha sa Gipadayag 14:6–7?

Pagpalambo sa Atong Pagtudlo

OK ra nga moingon og “Wala ko kahibalo.” “Samtang natural lang nga gustong motubag sa matag pangutana, sa pipila ka mga sitwasyon angay nga moingon lang og, ‘Wala ko kahibalo. Atong tun-an kana nga pangutana sa atong kaugalingon niini nga semana, ug ato kanang hisgotan sa sunod higayon’” (Pagtudlo sumala sa Pamaagi sa Manluluwas, 24). Dayon hangyoa ang mga sakop sa klase sa pagsiksik sa mga kasulatan ug sa ubang mga kapanguhaan sa Simbahan alang sa mga tubag.