bag-ong natawo nga bata

Little Lamb [Gamay nga Nati nga Karnero]ni Jenedy Paige

Disyembre 18–24

Pasko

“Maayong Balita sa Dakong Kalipay”

Ang mga panaghisgotan sa ebanghelyo gamhanan sa espirituhanong paagi kon nakasentro kini kang Jesukristo. Samtang magtuon ka sa pagkatawo ug misyon ni Jesukristo karong semanaha, tinguhaa ang inspirasyon gikan sa Espiritu Santo aron masayod kon sa unsang paagi nga masentro gayod nimo ang inyong panaghisgotan sa klase diha sa Manluluwas.

pagpaambit nga icon

Dapita ang Pagpaambit

Dapita ang mga sakop sa klase sa pagpaambit kon unsay ilang gibuhat o nabuhat sa nangagi isip mga indibidwal o mga pamilya sa pagsaulog sa pagkatawo sa Manluluwas sa mga paagi nga mas nakapaduol kanila ngadto Kaniya.

icon sa pagtudlo

Itudlo ang Doktrina

Mateo 1:18–25; Lucas 1:26–38; 2:1–20

Si Jesukristo mipakig-angay [condescended] nga magpakatawo dinhi sa yuta.

• Ang Pasko usa ka maayong panahon sa pagpamalandong ug pagsaulog sa pagpakig-angay ni Kristo—sa Iyang kaandam nga mobiya sa “pangagamhanan sa Iyang Amahan didto sa kahitas-an, aron magpakabuhi uban sa tawo, nga magpakamatay alang sa tawo” (Again We Meet around the Board,” Hymns, nu. 186). Aron sa pagdasig og usa ka panaghisgotan kabahin niini nga hilisgotan, mahimo nimong pangutan-on ang mga sakop sa klase kon unsay ilang nakat-onan diha sa ilang personal o pamilya nga pagtuon karong semanaha kon si kinsa si Jesukristo sa wala pa Siya matawo (tan-awa sa Juan 17:5; Mosiah 7:27; Doktrina ug mga Pakigsaad 76:12–14, 20–24; Moises 4:2). Dayon mahimo nimong ipakita ang imahe diha sa latid karong semanaha sa Dali, Sunod Kanako—Alang sa mga Indibidwal ug mga Pamilya samtang magbasa ang mga sakop sa klase mahitungod sa pagkatawo sa Manluluwas (tan-awa sa Mateo 1:18–25; Lucas 1:26–38; 2:1–20). Awhaga sila sa pagpaambit sa ilang mga hunahuna ug mga pagbati samtang gitandi nila ang sa wala pa sa mortal nga himaya sa Manluluwas ngadto sa Iyang pamainubsanong pagkahimugso.

• Usa ka pangutana sama sa gipangutana sa anghel kang Nephi diha sa 1 Nephi 11:16 mahimong usa ka maayong paagi sa pagsugod og panaghisgotan sa klase, bisan og lahi ang mga pulong nga imong gamiton niini. Siguro mahimo nimong isulat diha sa pisara ang Unsa man ang pagpakig-angay sa Dios? ug hangyoa ang mga sakop sa klase sa pagpamalandong niining pangutana samtang mobasa sila sa 1 Nephi 11:17–33. Hangyoa sila sa pagpaambit og bisan unsang mga hunahuna mahitungod sa Manluluwas nga gidasig niining mga bersikulo. Unsa nga mga hulagway ang imong mapakita sa klase nga nagpakita sa mga sitwasyon gikan sa kinabuhi sa Manluluwas nga gihulagway ni Nephi?

• Ang musika usa ka talagsaong paagi sa pagdapit sa Espiritu nganha sa inyong klase. Ikonsiderar ang pagdapit og usa ka tawo sa pagpatukar og kanta sa Pasko o sa pagbasa o magdungan sa pagkanta og pipila ka himno isip usa ka klase (tan-awa sa Mga Himno, mga nu. 201–14). Ang mga sakop sa klase mahimong mangita og mga pulong diha niining mga himno ug sa mga kasulatan nga nalista gamit ang mga himno nga nakapadugang sa ilang pasalamat alang sa Manluluwas ug sa Iyang kaandam nga moanhi sa yuta.

Si Jesus nagluhod didto sa Tanaman sa Getsemani

Getsemani, pinaagi ni J. Kirk Richards

Lucas 4:16–21; Juan 3:16

Si Jesukristo mituman sa Iyang misyon, nga nakapahimo niining posible nga makapanunod kita og kinabuhing dayon.

• Aron matabangan ang mga sakop sa klase sa paghisgot sa mga rason nga natawo si Jesukristo, mahimo nimo silang dapiton sa pagpangita ug pagpaambit og mga kasulatan nga nag-summarize sa Iyang misyon (tan-awa sa latid karong semanaha diha sa Dali, Sunod Kanako—Alang sa mga Indibidwal ug mga Pamilya alang sa pipila ka ehemplo). Tingali ang mga sakop sa klase mahimong mangita ug mobasa sa mga bersikulo nga magpares o sa ginagmay nga mga grupo. Unsa ang ilang makat-onan mahitungod sa misyon ni Kristo gikan sa mga bersikulo nga ilang nakit-an? Unsa ang atong makat-onan mahitungod sa Iyang misyon gikan sa pipila ka tawag nga gihatag Kaniya diha sa mga kasulatan? (tan-awa sa Ang Giya ngadto sa mga Kasulatan, “Jesukristo”).

• Ang mga sakop sa klase mahimong makakat-on mahitungod sa misyon sa Manluluwas pinaagi sa pagbasa sa “Ang Buhi nga Kristo: Ang Pagpamatuod sa mga Apostoles” (ChurchofJesusChrist.org) ug sa pagpaambit sa mga pamahayag nga ilang makit-an nga nagpasabot nganong mianhi Siya sa yuta. Hatagi ang mga sakop sa klase og panahon sa pagpamalandong sa ilang mga pagpamatuod bahin ni Jesukristo ug sa Iyang misyon. Mahimo ba silang mopaambit og personal nga mga kasinatian o mga istorya gikan sa kinabuhi sa Manluluwas nga nakapalambo sa ilang pagtuo o gugma alang Kaniya? Sa unsang paagi nga ang pagtuon sa Bag-ong Tugon karong tuiga nakatampo og mas makahuluganong panahon sa Pasko?

Pagpalambo sa Atong Pagtudlo

Paggahin og panahon alang sa pagpaambit sa mga tigkat-on. “Kon ang mga tigkat-on mopaambit sa ilang nakat-onan, sila dili lamang mobati sa Espiritu ug molig-on sa ilang kaugalingong mga pagpamatuod, apan nag-awhag usab sila sa ubang mga sakop sa klase sa pagdiskobre sa mga kamatuoran sa ilang mga kaugalingon. … Pagreserba og panahon alang sa pagpakigbahin sa mga estudyante diha sa matag leksiyon—sa pipila ka sitwasyon, mahimo nimong mabantayan nga kini nga mga diskusyon mao ang leksiyon” (Pagtudlo sumala sa Pamaagi sa Manluluwas, 30).