Si Jesukristo mitimbaya sa mga tawo atol sa Iyang Ikaduhang Pag-anhi

The City Eternal [Ang Mahangturong Dakbayan], ni Keith Larson

Disyembre 25–31

Gipadayag 15–22

“Ang Magamadaugon Makapanag-iya Niining Maong Panulundon”

Unsa may gitudlo sa gubat tali sa maayo ug daotan nga gihulagway diha sa Gipadayag mahitungod sa kaimportante sa pagsunod kang Kristo dinhi sa yuta? Human mamalandong niining baroganan, ikonsiderar ang mga panginahanglan sa mga sakop sa imong klase. Unsa nga mga kamatuoran gikan sa Gipadayag ang makatabang kanila sa paghimo og matarong nga mga pagpili?

pagpaambit nga icon

Dapita ang Pagpaambit

Samtang ang mga sakop sa imong klase moabot na sa hinapos sa ilang pagtuon sa Bag-ong Tugon, awhaga sila sa pagpaambit sa ilang mga hunahuna mahitungod sa Bag-ong Tugon. Dapita sila sa pagpaambit kon sa unsang paagi ang ilang pagtuon sa kasulatan nakatabang kanila nga mas makaila si Jesukristo ug mahimong mas mahisama Kaniya.

icon sa pagtudlo

Itudlo ang Doktrina

Gipadayag 17–18

Kinahanglan gayod nga ipalayo nato ang atong kaugalingon gikan sa pagkadaotan sa kalibotan.

• Dili gayod nindot ang pagbasa mahitungod sa pagkadaotan sa Babilonia ug sa pagkapukan niini diha sa Gipadayag 17–18, apan makatabang kini tungod kay ang Babilonia mahimong usa ka simbolo sa daotan nga kalibotan nga atong gipuy-an karon. Siguro mahimo nimong bahinon kining mga kapitulo tali sa mga sakop sa klase ug hangyoon sila sa pagpangita sa mga tubag sa mga pangutana nga sama niini: Nganong ang mga tawo madani man sa Babilonia, o sa pagka-kalibotanon? Nganong makuyaw ang Babilonia? Unsay mahitabo sa Babilonia? Unsa nga mga pasidaan ang gihatag ni Juan nga makatabang kanato nga malikayan ang kapalaran sa Babilonia?

• Human sa pagbasa sa Gipadayag 18:4, ang mga sakop sa klase mahimong maghisgot kon unsaon nila “paggawas sa” Babilonia ug “aron dili makaapil sa iyang kasal-anan.” Mahimo sila nga mopaambit og mga kasulatan o mga mensahe gikan sa mga lider sa Simbahan ang nakatabang kanila nga makabatok sa mga tintasyon sa Babilonia, o sa kalibotan. Ikonsiderar ang pagbasa sa pamahayag ni Elder Quentin L. Cook diha sa “Dugang nga mga Kapanguhaan.” Ang mga sakop sa klase makapaambit og mga ideya kon unsaon sa paggamit ang duha ka baroganan nga nahisgotan ni Elder Cook. Unsaon nato sa pagsabot nga kita “makagawas” sa Babilonia? (tan-awa, pananglitan sa, Isaias 52:11; Doktrina ug mga Pakigsaad 25:10). Unsay atong mahimo aron sa pag-awhag sa uban sa pagbuhat sa ingon?

Gipadayag 19–20

Makapangandam kita alang sa Ikaduhang Pag-anhi sa Ginoo ug sa Adlaw sa Paghukom.

• Ang Ikaduhang Pag-anhi ni Jesukristo kasagarang gitawag og “dako ug makalilisang nga adlaw sa [Ginoo]” (Joel 2:31), ug base sa Gipadayag 19–20, morag maayo kana nga paghulagway. Ikonsiderar ang pagsulat diha sa pisara sa mga panghitabo nga gihulagway diha sa Gipadayag 19:5–20:15. Dapita ang mga sakop sa klase sa pagpangita sa mga bersikulo nga naghulagway niining mga panghitabo. Nganong kini nga mga panghitabo gitawag man og dako ug makalilisang? Unsa ang atong makat-onan gikan niining mga bersikulo mahitungod sa Manluluwas ug niadtong kinsa mosunod Kaniya? Unsay atong mabuhat karon aron malakip niadtong kinsa magmaya atol sa Iyang pag-anhi?

• Aron sa pagdasig og usa ka panaghisgotan mahitungod sa basahon sa kinabuhi ug sa kataposan nga paghukom, makadapit kamo og mga sakop sa klase sa paghimo og usa ka libro pinaagi sa pagpilo og kaupat sa piraso nga papel. Mahimo na dayon sila nga mobasa sa Gipadayag 20:12–15; 2 Nephi 9:14; 29:11 ug mamalandong kon unsa ang ilang gusto nga isulat mahitungod kanila diha sa basahon sa kinabuhi. Dapita sila sa pagsulat niadtong mga butang diha sa ilang mga libro, ug pagdapit og pipila ka mga sakop sa klase sa pagpaambit og butang nga ilang gisulat. Unsa ang mga pagpili nga atong mahimo karon aron nga kining mga butanga mahisulat diha sa libro sa kinabuhi? Sa pagtabang sa mga sakop sa klase nga dili mobati nga nawad-an og kadasig mahitungod sa ilang kaugalingong personal nga pag-uswag, ikonsiderar ang pagpaambit sa mensahe gikan ni “ Elder Jeffrey R. Holland “Busa Kamo Kinahanglan Magmahingpit—sa Katap[o]san” (Liahona, Nob. 2017, 40–42).

Si Jesus uban sa mga tawo nga anaa sa kahayag sa Iyang tuo nga kamot ug ang mga tawo nga anaa sa kangitngit sa iyang wala

The Last Judgement [Ang Kataposan nga Paghukom], ni John Scott

Gipadayag 21:1–22:5

Kon matinud-anon kita, mapanalanginan kita og celestial nga himaya.

• Bisan og ang ulahing mga adlaw gipanagna nga mapuno sa pagkadaotan ug kakuyaw, ang ganti nga nakita ni Juan alang sa mga matinud-anon mas molabaw pa gayod sa kalisdanan nga nag-una niini. Aron matabangan ang mga sakop sa klase nga masuhid kining nindot nga pagtapos sa Gipadayag, mahimo nimo silang dapiton sa pagrebyo sa Gipadayag 21:1–22:5, nga mangita sa mga pulong nga nakapadasig kanila nga maningkamot alang sa celestial nga himaya. Unsa nga mga saad ang gihatag ngadto sa mga matinud-anon? Sa unsang paagi nga kining paghulagway makatabang kanato kon kita mag-atubang sa atong kasamtangang mga hagit ug mga pagsulay?

mga kapanguhaan nga icon

Dugang nga mga Kapanguhaan

Pagpili sa pagkamatarong kay sa pagkadaotan sa Babilonia.

Si Elder Quentin L. Cook nagtudlo:

“Dili kita makalikay sa kalibotan. Ang pagpuyo nga mag-inusara dili mao ang tubag. Sa usa ka positibong bahin, ang atong kontribusyon ngadto sa kalibotan maoy kabahin sa atong hagit ug gikinahanglan kon atong palamb[o]on ang atong mga talento. …

… Ang mga miyembro sa Simbahan kinahanglan nga maapil sa kalibotan sa positibo nga paagi. Nan unsaon man nato sa pagbalanse sa panginahanglan nga positibong motampo sa kalibotan ug dili monunot ngadto sa mga sala sa kalibotan? [Tan-awa sa Doktrina ug mga Pakigsaad 25:10; 59:9] Duha ka baroganan ang makahimo og talagsaong kalainan.

1. Pahibaloa ang mga tawo nga usa ikaw ka mapasaligong Santos sa Ulahing mga Adlaw. …

2. Magmasaligon ug magsunod sa imong mga gituohan” (“Lessons from the Old Testamenent: In the World but Not,” Ensign, Peb. 2006, 54–55).

Pagpalambo sa Atong Pagtudlo

Tahora ang kabubut-on sa uban. “Ang mga tawo mas dali nga mohimo og makahuluganong mga kausaban sa ilang mga kinabuhi kon kana nga mga kausaban nagagikan sa ilang kaugalingong paggamit sa kabubut-on. Kon mohatag ka og imbitasyon sa paglihok, siguradoha nga motahod sa kabubut-on niandtong imong gitudloan” (Pagtudlo sumala sa Pamaagi sa Manluluwas, 35).