Si Kristo nagbarog uban sa usa ka batang babaye

Balm of Gilead [Balsamo sa Galaad], ni Annie Henrie

Oktubre 30–Nobyembre 5

Mga Hebreo 1–6

Si Jesukristo, “ang Tuburan sa Dayong Kaluwasan”

Ikonsiderar ang pagpaambit ngadto sa imong mga sakop sa klase sa pipila ka pag-aghat nga imong nadawat gikan sa Espiritu Santo mahitungod sa Mga Hebreo 1–6. Ang pagbuhat sa ingon mahimong makapadasig kanila nga magtinguha sa kaugalingon nilang mga hunahuna samtang magtuon sila sa mga kasulatan.

pagpaambit nga icon

Dapita ang Pagpaambit

Ang ubang mga sakop sa klase nga dili kanunayng mopaambit diha sa klase mahimong magkinahanglan lang og piho nga imbitasyon ug gamayng panahon nga makaandam. Mahimo nimong kontakondaan ang pipila kanila usa ka adlaw o duha ug hangyoon sila nga mangandam nga mopaambit og usa ka bersikulo gikan sa Mga Hebreo 1–6 nga makahuluganon ngadto kanila.

icon sa pagtudlo

Itudlo ang Doktrina

Mga Hebreo 1–5

Si Jesukristo mao “ang tuburan sa dayong kaluwasan.”

• Unsaon nimo pag-awhag ang mga sakop sa klase sa pagpaambit og makahuluganong mga kasulatan mahitungod ni Jesukristo nga ilang nakit-an diha sa ilang personal ug pamilya nga pagtuon karong semanaha? Ikonsiderar ang paghimo og lima ka kolum diha sa pisara, tag usa alang sa unang lima ka kapitulo sa Mga Hebreo. Dapita ang mga sakop sa klase nga mosulat diha sa tukma nga kolum sa mga pulong gikan niining mga kapitulo nga nagtudlo kanila mahitungod ni Jesukristo ug ang numero sa bersikulo kon diin kini makit-an. Sa unsang paagi nga ang pagkasayod niing mga butanga mahitungod sa Manluluwas makaapekto sa atong hugot nga pagtuo ug kaandam sa pagsunod Kaniya?

Mga Hebreo 2:9–18; 4:12–16; 5:7–8

Giantos ni Jesukristo ang tanang butang aron Siya makasabot ug makatabang kanato kon kita mag-antos.

• Ang Mga Hebreo 2:9–18; 4:12–16; 5:7–8 makatabang usab sa mga tawo nga nakaobserbar sa pag-antos diha sa kalibotan ug naghunahuna kon nakabantay o nagpakabana ba ang Dios. Tingali ang mga sakop sa klase mahimo nga mosiksik niining mga bersikulo aron makit-an ang mga kamatuoran nga makatabang sa maong mga pangutana. Unsay gitudlo niini mga bersikulo mahitungod sa mga tubag sa Manluluwas sa pag-antos sa katawhan? Mahimong makatabang usab ang pagdapit og mga sakop sa klase sa pagpaambit og mga ehemplo gikan sa mga kasulatan diin si Jesukristo misuporta ug mihupay sa mga tawo sa ilang pag-antos (tan-awa “Dugang nga mga Kapanguhaan”). Ang mga sakop sa klase makahisgot unsa ang ilang nakat-onan mahitungod kon sa unsang paagi ang Manluluwas makatabang kanato kon kita mag-atubang og malisod nga mga hagit.

Mga Hebreo 3:7–4:2

Ang mga panalangin sa Dios maanaa niadtong kinsa “wala mopatig-a sa [ilang] kasingkasing.”

• Ang Mga Hebreo 3 ug 4 naglangkob og usa ka pangamuyo ngadto sa mga Santos nga dili mopatig-a sa ilang kasingkasing ug sa ingon mosalikway sa mga panalangin nga gustong ihatag sa Dios ngadto kanila. Samtang ikaw ug ang imong klase magbasa sa Mga Hebreo 3:7–4:2, hisgoti ang mga paagi nga ang mga kasinatian sa karaang mga Israelita magamit nato karon, ingon nga kini nagamit sa mga Hebreo sa nag-unang Simbahan (tan-awa ang materyal sa pagtuon mahitungod niining mga bersikulo sa latid karong semanaha sa Dali, Sunod Kanako—Alang sa mga Indibidwal ug mga Pamilya). Usa ang atong mahimo aron magpabilin nga humok ang atong kasingkasing ug daling motubag ngadto sa kabubut-on sa Ginoo? (tan-awa sa Mga Panultihon 3:5–6; Alma 5:14–15; Ether 4:15). Ang mga sakop sa klase makapaambit kon sa unsang paagi nga sila ug ang uban nga ilang kaila napanalanginan tungod kay sila nagmahumok ug nagmahinulsulon sa kasingkasing.

Mga Hebreo 5:1–5

Kadtong moserbisyo diha sa gingharian sa Dios kinahanglang gitawag gayod sa Dios.

• Ang mensahe sa Mga Hebreo 5 mahitungod sa tighupot sa pagkapari ingon nga tinawag sa Dios nga mahimo sa tanan kinsa gi-set apart pinaagi sa awtoridad sa pagkapari sa pagserbisyo diha sa mga calling sa Simbahan. Aron matabangan ang imong klase nga makakat-on kon unsay kahulogan nga “sa Dios tinawag siya alang niini maingon kang Aaron,” ikonsiderar ang pagdapit kanila sa pagrebyo sa estorya bahin ni Aaron nga midawat sa iyang tawag diha sa Exodo 4:10–16, 27–31; 28:1. Unsa nga mga ideya gikan niining istorya nga makatabang kanato aron masabtan ang Mga Hebreo 5:1–5? Ang mga sakop sa klase makapaambit kon sa unsang paagi sila nakadawat og panghimatuod nga ang usa ka tawo gitawag sa Dios sa pagtuman og usa ka piho nga calling—lakip na, tingali, sa ilang kaugalingon. Sa unsang paagi nga kanang panghimatuod nakatabang kanila nga mas mopaluyo sa usa ka tawo sa iyang calling?

Si Moises nag-orden ni Aaron

“Walay magpili sa iyang kaugalingon aron mahimong pangulong pari kondili ang Dios maoy magpili kaniya sama sa iyang gibuhat kang Aaron.” (Mga Hebreo 5:4). Moses Calls Aaron to the Ministry [Si Moises Mitawag ni Aaron sa Pagpangalagad], ni Harry Anderson

mga kapanguhaan nga icon

Dugang nga mga Kapanguhaan

Mga ehemplo sa kasulatan bahin sa mga tawo nga gihupay ni Jesukristo.

• Juan 8:1–11: Gihupay sa Ginoo ang babaye nga nakasala sa pagpanapaw.

• Juan 11:1–46: Gihupay sa Ginoo sila si Maria ug Marta human sa kamatayon sa ilang igsoon, nga si Lazaro.

• Enos 1:4–6: Gipasaylo sa Ginoo ang mga sala ni Enos ug gitangtang ang kahasol sa iyang tanlag.

• Mosiah 21:5–15: Gipahumok sa Ginoo ang kasingkasing sa mga Lamanite aron mapagaan nila ang mga palas-anon sa katawhan ni Limhi.

• Mosiah 24:14–15: Ang Ginoo milig-on sa mga kasingkasing sa mga Lamanite aron nga mapagaan ang ilang mga palas-anon sa mga katawhan ni Limhi.

• Ether 12:23–29: Ang mga pulong sa Ginoo mihupay ni Moroni.

• 3 Nephi 17:6–7: Giayo sa Manluluwas ang mga Nephite sa ilang mga sakit.

• Doktrina ug mga Pakigsaad 121:7–10: Gihupay sa Ginoo si Joseph Smith (tan-awa usab sa Doktrina ug mga Pakigsaad 123:17).

Pagpalambo sa Atong Pagtudlo

Pagmugna og espirituwal nga kahimtang. Kon moawhag ka og malinawon, mahigugmaon nga kahimtang sa imong classroom, ang Espiritu mas daling makatandog sa kasingkasing niadtong imong gitudloan. Unsa ang imong mahimo aron sa pagdapit sa impluwensya sa Espiritu Santo diha sa imong klasehanan? Mahimo ba nimong usbon og han-ay ang mga lingkoranan o mogamit og mga hulagway o musika aron madapit ang Espiritu? (Tan-awa sa Pagtudlo sumala sa Pamaagi sa Manluluwas, 15.)