Christ Preaching in the Spirit World [Malanga ʻa Kalaisi ʻi he Maama Tataliʻanga ʻo e Ngaahi Laumālié], tā fakatātaaʻi ʻe Robert T. Barrett

20–26 Nōvema

1 mo e 2 Pita

“Fiefia ʻaki ʻa e Fiefia Taʻefaʻalaua pea Fungani Lelei”

Manatuʻi ko hoʻo taumuʻá ke akoʻi ʻa e kakaí, kae ʻikai ko hano fakamatalaʻi pē ha lēsoni. ʻI hoʻo lau ʻa e Ngaahi Tohi ʻa Pitá, fakakaukau ki he kau mēmipa fakafoʻituitui ʻo e kalasí. Ko e hā ha ngaahi tefitoʻi moʻoni ʻe tokoni ke langaki ʻenau tuí?

Fakaafeʻi e Feʻinasiʻakí

Hiki ʻi he palakipoé ʻa e ʻuluʻi tohi 1 Pita mo e 2 Pita . Tuku ange ha taimi ki he kau mēmipa ʻo e kalasí ke nau toe vakaiʻi ai e ngaahi tohi ko ʻení, pea fakaafeʻi leva ke nau tohi ʻi lalo ʻi he ongo ʻuluʻi tohi ko ʻení e ngaahi lea pe kupuʻi lea mei he ngaahi vahé ʻoku nau pehē ʻoku ʻuhingamālie. Fakaʻaongaʻi leva ʻa e lisí ke fakaafeʻi e kakaí ke nau vahevahe ʻenau ngaahi fakakaukaú.

Akoʻi ʻa e Tokāteliné

1 Pita 1:3–9; 2:19–24; 3:14–17; 4:12–19

Te u lava ʻo maʻu ha fiefia ʻi he lolotonga e taimi ʻo e ʻahiʻahí mo e faingataʻaʻiá.

• Ko ha founga ʻe taha ke toe vakaiʻi ai e faleʻi ʻa Pita ʻi he 1 Pita 1:3–9; 2:19–24; 3:14–17; mo e 4:12–19 ko hano fakaafeʻi e kau mēmipa ʻo e kalasí ke nau fakakaukau ki ha taha ʻoku nau ʻilo ʻoku tofanga ʻi ha faingataʻa. Tuku ange ha taimi he lolotonga ʻo e kalasí ke nau fai ai ha tohi ki he tokotaha ko iá, fakakau ai ha ngaahi moʻoni mei he ngaahi veesi ko ʻení ʻe lava ke ne fakalotolahiʻi ʻa e tokotaha ko iá (vakai foki, Tokāteline mo e Ngaahi Fuakava 121:1–8; 123:17). Hili ia pea toki talanoa e kau mēmipa ʻo e kalasí ki he ngaahi moʻoni naʻa nau filí.

1 Pita 1:13–20; 2:1–12

ʻOku ui kitautolu ke tau hoko ko e “kakai ʻa e ʻOtuá.”

• ʻE lava ke hoko ʻa e ngaahi akonaki ʻa Pita ʻi he 1 Pita 1:13–20 mo e 2:1–12 ko ha fakamanatu fakalaumālie ʻo e anga e ʻafioʻi kitautolu ʻe he ʻEikí—ko Hono kakaí—pea mo e meʻa ʻokú Ne ʻamanaki mai ke tau faí. Mahalo te ke lava ʻo fakaafeʻi e kau mēmipa ʻo e kalasí ke nau fakatotolo ʻi he ngaahi veesi ko ʻení ʻo kumi ʻa e ngaahi fakamatala ki hono ʻuhinga ke hoko ko ha “kakai ʻa e ʻOtuá” (1 Pita 2:10) pea toki aleaʻi ʻa e meʻa kuo nau maʻú. Te ke lava ke fakamatalaʻi ko e foʻi lea “fakatau” ʻi he 1 Pita 2:9 ʻoku ʻuhinga ia “kuo fakatau mai” pe “kuo fakatolonga.” Ko e hā ʻoku akoʻi mai ʻe he meʻá ni fekauʻaki mo e ongoʻi ʻa e ʻOtuá kiate kitautolú mo e founga ʻokú Ne finangalo ke tau moʻui aí?

1 Pita 3:18–20; 4:6

ʻOku malangaʻi ʻa e ongoongoleleí ki he kau pekiá koeʻuhí ke lava ʻo fakamaauʻi totonu kinautolu.

• ʻOku ʻi he ʻUluaki Tohi ʻa Pitá ha taha ʻo e ngaahi fakamoʻoni ʻi he Tohi Tapú ki he ʻaʻahi ʻa Sīsū Kalaisi ki he maama tataliʻanga ʻo e ngaahi laumālié hili ʻEne pekiá—ko ha meʻa ʻoku tokoni ai e fakahā ʻo onopōní ke mahino kakato ange kiate kitautolú. Ke tokoni ke fakaloloto ange e mahino ʻa e kau mēmipa ʻo e kalasí ki he maama tataliʻanga ʻo e ngaahi laumālié, te ke lava ʻo fakaafeʻi kinautolu ke nau lau e ngaahi potufolofola ko ʻení pea hiki ʻi he palakipoé ʻa e meʻa ʻoku nau akó: Sione 5:25; 1 Pita 3:18–20; 4:6; ʻAlamā 40:7–14, 21; Tokāteline mo e Ngaahi Fuakava 138:11–32 (vakai foki, “Ngaahi Maʻuʻanga Tokoni Kehé.”) Ko e hā ʻoku mahuʻinga ai ke ʻilo fekauʻaki mo e ʻaʻahi ʻa e Fakamoʻuí ki he maama tataliʻanga ʻo e ngaahi laumālié? ʻOku tokoniʻi fēfeeʻi ʻe he ʻilo ko ʻení ʻa e ongo ʻoku tau maʻu fekauʻaki mo e ʻOtuá mo ʻEne palani ʻo e fakamoʻuí?

2 Pita 1:1–11

Tuʻunga ʻi he mālohi ʻo Sīsū Kalaisí, te tau lava ai ʻo fakatupulaki hotau natula fakalangí.

• Ke fakalotolahiʻi kinautolu ʻokú ke akoʻí ʻi heʻenau feinga ke tatau ange mo Sīsū Kalaisí, te ke ala fakaafeʻi kinautolu ke nau tala atu ha ngaahi ʻulungaanga faka-Kalaisi ʻoku fakamatalaʻi ʻi he 2 Pita 1:1–11. Fakakaukau ke hiki ʻa e ngaahi ʻulungaanga lelei ko ʻení ʻi he palakipoé pea kole ki he kau mēmipa ʻo e kalasí ke nau fakamatalaʻi kinautolu. ʻE lava leva ke aleaʻi ʻe he kau mēmipa ʻo e kalasí ʻa e founga ʻoku fakaiku ai hono fakatupulaki ha ʻulungaanga ki hano fakatupualaki ha ngaahi ʻulungaanga lelei kehe. Tuku ange ha taimi ke nau fakalaulauloto ai pe ko e ʻulungaanga lelei fē te nau fie fakatupulaki kakató.

Ko e ʻulungaanga faka-Kalaisi kotoa pē ʻoku tau fakatupulakí ʻoku tokoni ia ke tau lalanga ha tupenu fakalaumālie ʻo e tuʻunga fakaākongá.

Ngaahi Maʻuʻanga Tokoni Kehé

ʻOku fakamoʻoni ʻa e ngāue ki he huhuʻi ʻo e kau pekiá ki he misiona ʻo Kalaisí.

Naʻe akoʻi ʻe ʻEletā D. Toti Kulisitofāsoni:

“Ko e hā ʻa e ikuʻanga ʻo e laui piliona kuo nau moʻui pea mate taʻe ʻi ai ha ʻilo kia Sīsuú? Naʻe maʻu ʻi hono Fakafoki mai ʻo e ongoongolelei ʻo Sīsū Kalaisí ʻa e mahino ki he founga ʻoku fakamoʻui ai ʻa e kakai pekia ne ʻikai ke papitaisó he ko e ʻOtuá ‘ko ha ʻOtua haohaoa, mo angatonu, kae ʻumaʻā ko ha ʻOtua ʻaloʻofa foki’ [ʻAlamā 42:15].

“Naʻe kikite ʻa Sīsū he lolotonga ʻEne kei moʻuí, te Ne toe malanga foki ki he kau pekiá [vakai, Sione 5:25]. ʻOku talamai ʻe Pita naʻe hoko ʻeni ʻi he vahaʻa taimi hono Tutuki ʻo e Fakamoʻuí mo ʻEne Toetuʻú [vakai, 1 Pita 3:18–19]. Naʻe fakamoʻoniʻi ʻe Palesiteni Siosefa F. Sāmita ʻi ha meʻa-hā-mai naʻe ʻaʻahi ʻa e Fakamoʻuí ki he maama tataliʻanga ʻo e ngaahi laumālié [vakai, Tokāteline mo e Ngaahi Fuakava 138:30, 33]. …

“Ko ʻetau vēkeveke ke huhuʻi ʻa e kakai pekiá pea mo e taimi mo e ngaahi maʻuʻanga tokoni ʻoku tau fakaʻaongaʻi ke fakahoko ʻaki iá, ko hono fakahā ia ʻo ʻetau fakamoʻoni kia Sīsū Kalaisí. Ko ha fakamatala mālohi ia ʻoku lava ke tau fai ʻo kau ki Hono ʻulungāngá pea mo Hono misiona fakalangí. ʻUluakí, ʻokú ne fakamoʻoni ki he Toetuʻu ʻa Kalaisí; uá, ki he taʻefakangatangata ʻo ʻEne Fakaleleí; tolú, ko Ia tokotaha pē ʻe maʻu ai ʻa e fakamoʻuí; faá, kuó Ne ʻosi fokotuʻu ʻa e ngaahi tuʻunga ke maʻu ai ʻa e fakamoʻuí, pea nimá, te Ne toe hāʻele mai” (“The Redemption of the Dead and the Testimony of Jesus,” Ensign, Nov. 2000, 9–10).

Ko Hono Fakatupulaki ʻEtau Founga Akoʻí

Akoʻi ʻa e “ʻuhingá.” “Taimi ʻe niʻihi, ʻoku fifili e kau akó—tautautefito ki he toʻu tupú—ki he founga ʻoku fekauʻaki ai e ngaahi tefitoʻi moʻoni ʻo e ongoongoleleí mo kinautolú pe ʻuhinga ʻoku totonu ai ke nau talangofua ki ha ngaahi fekau. Neongo ia, kapau ʻoku mahino kiate kinautolu e palani taʻengata ʻa e Tamai Hēvaní ki he fiefia ʻEne fānaú, ʻoku toe mahino lelei ange ai e ngaahi ʻuhinga ʻo e ngaahi tefitoʻi moʻoni ʻo e ongoongoleleí mo e ngaahi fekaú pea tupulaki ange ai e holi ke talangofuá” (Ko e Faiako ʻi he Founga ʻa e Fakamoʻuí, 20).