“Ritembwa 4–10. Te Kaotioti 1–5: ‘Ana Bwai te Tibutetei te Karaoiroaki, ma te Karineaki … n Aki Toki,’” Nakomai, Iriirai—Ibukin te Reirei n Tabati: Te Nu Tetemanti 2023 (2021)
“Ritembwa 4–10. Te Kaotioti 1–5,” Nakomai, Iriirai—Ibukin te Reirei n Tabati: 2023
Ritembwa 4–10
Te Kaotioti 1–5
“Ana Bwai te Tibutetei te Karaoiroaki, ma te Karineaki … n Aki Toki”
Karekean kairiiri n tamnei e buokiko n ataia bwa te Tamnei ae Raoiroi e tangiria n reireiniko. Tauan mwiin ao irakin namakin ake ko butimwaai ni kabonganai ao ni kan karekei riki.
Kaunga te Tibwatibwa
Ngkai ko moana te maroro, e kona n ibuobuoki kaoakiia kain te kiraati bwa a na tibwai tabeua rongorongo ake a kunei inanon ana boki Te Kaotioti inanon aia kamatebwai ibon irouia ke n utu. Te katoto, tera ae a reiakinna n ana baire Tamara are i Karawa ibukin kamaiuaia Natina? Tera are a reiakinna ibukin te Tia Kamaiu ao Tibwangana n te babaire aei? Kaungaia kain te kiraati bwa a na taratarai n tainako rongorongo aika a kakaawaki iaon Iesu Kristo ao te babaire ni kamaiu ngkai a reitinako ni wareka Te Kaotioti ni mweengaia. Anganiia aia tai n te kiraati ae e na roko bwa a na tibwa te bwai are a kunei.
Reirei te Reirei
Iesu Kristo bon Natin te Atua ae Maiu.
-
Katamneian ao Kanikina inanon Te Kaotioti 1 e kamatata raoi ni kakoaua bwa Iesu Kristo e maiu ao E kaira Ana Ekaretia. Tao kain te kiraati a kona ni korei iaon te burakibooti tabeua kiibu man Te Kaotioti 1 ake a karini katamnei ao kanikina ao n tibwaia bwa tera ae a reireiaki iai ibukin Iesu Kristo. Te katoto, tera ae ti reiakin man kanikina iaon aron Kristo ni kaira Ana Ekaretia ni boong aikai? E kanga ana kabwarabwara Ioane iaon te Tia Kamaiu ni kabotauaki ma are n Reirei ao Berita aika Tabu 110:1–4?
Iesu Kristo e kinaira n tatabemaniira ao e na buokiira n tokanikai iaon ara kangaanga.
-
Warekan ana rongorongo te Uea nakoia mwaanga aika kakaokoro n te Ekaretia inanon Te Kaotioti 2–3 e kona ni buokiia kain te kiraati ni kamatoa nakoia bwa te Tia Kamaiu e atai aroia nako. Tao ko kona ni kaoia bwa a na tarai nako mwakoro aikai ni kakai kakoaua bwa Iesu Kristo e atai kanganga ni mwaanga anako ao korakora. A kona naba n tibwa taneiai ake a namakinna iai bwa te Tia Kamaiu e atai aroia nako aika onoti. Tera ana reirei te Uea are e anganiira aika Itiaki are e kona naba ni buokiira n tokanikai iaon ara kangaanga?
-
Inanon naba mwakoro aikai te Uea e karaoi berita aika a kaungaaki iai nakoia ake a tokanikai. Ko kona ni kaoia kain te kiraati bwa a na mwakuri n ikatoatoa n ukeuke Te Kaotioti 2–3 ana berita te Uea. Tao a kona naba ni korei tamnei bwaai ake a tei ibukin tabeua berita aikai, imwiina a tibwaia ma te kiraati bwaai ake a kunei. A kanga berita aikai ni kaungaira bwa ti na reitinako ni kataia n tokanikai iaon oin kataakira ao kabwakara?
Bon ti Iesu Kristo ae e kona n kakoroa nanon ana baire Tamara are i Karawa.
-
Tera te kantaninga n te reirei are e buoka am kiraati bwa e na ota n te kanikina inanon Te Kaotioti 5 ibukin te Tia Kamaiu ni kaukakin te booki are e kainaki? Ko na bae n uota te kanre inanon nnena ae kainaki bwa kona tibwaia ma te kiraati. Imwain te kiraati, karaba n angan temanna te aomata kingin te roka. Kabwarabwara nakon te kiraati te bwai are inanon te kaonteina, ao anganiia kain te kiraati bwa a na kataia ni kauka te bwaoki imwain ae e na kaukia te aomata are iai irouna te king. Ngkanne te kiraati e kona ni kabotaua te kantaninga n te reirei nakon Te Kaotioti 5. Titiraki n aron aikai a kona n ibuobuoki: E kanga kamaiuaia natin Tamara are i Karawa ni katotonga te kaonteina are e rokanaki ke te boki ae kainaki? Bukin tera Iesu Kristo bon ti ngaia ae kona ni kauka te kabaebae? (taraa te kuotation inanon “Bwaai ni Ibuobuoki riki Tabeua”).
-
N ai aroia aomata aika kakatonga ao a kimwareirei ake a taekinaki n Te Kaotioti 5, ni bong aikai ti kona naba n tabeki bwanaara ni kamoamoa te Tia Kamaiu bwa Bon ti ngaia are e tau n anganiira te kamaiuaki. Tao a kona n anene kain te kiraati kunaia are a tatangiria n neboa te Tia Kamaiu, n aron “Ngke I wareka Rongorongon Iesu” (Kuna n Taromauri, no. 57). Kain te kiraati a kona ni katerei koaua n te kuna ake a reirei taekan Iesu Kristo. Tera bwaai aika titebo ake ti noori imarenan taekan te kuna n nebo ao katanoata inanon Te Kaotioti 5:9–14?
Bwaai n Ibuobuoki Riki Tabeua
Bon ti Iesu Kristo ae tiringaki ibukira.
Kabwarabwarai bwaai ake a riki n te maiu imwain te maiu aei, are e reirei iaona Unimwaane Jeffrey R. Holland:
“Kristo e anga nanona bwa e na karinea inaomataia aomata ni kabane n aia rinerine riki ngke E tiringaki ibukin aia bure. Ni karaoana, E na oki nakon te Tama ma te mimitong ni kabane ibukin ana tangira ni kamaiu.
“Ana Mwakurii ni Kamaiu Kristo ae akea tokina e kona n riki ibukina (1) Ti ngaia te aomata ae akea ana bure ae maeka iaon te aba ai ngaia are e aki katauaki bwa e na mate tamneina imwiin te bure, (2) Bon ti ngaia Ana Riki Temanna te Tama ai ngaia are iai irouna anua n atua are e anganna Mwaaka n tokanikai iaon te mate, ao (3) Bon ti ngaia ae tau ana nanorinano ao n tauraoi n te kauntira n te maiu imwain te maiu aei bwa e na kaman katabuaki ibukin te beku anne” (“Ana Mwakuri ni Kamaiu Iesu Kristo,” Riaona, Maati 2008, 35).
Kanakoraoan Ara Anga reirei
Kabonganai korbooki aika tabu ao aia taeka burabeti ni boong aikai. “Te Uea e a tia n tua nakoira bwa ‘ti na reiakini i marenara reirein te abanuea’ [Reirei ao Berita aika Tabu 88:77] ao ni kabonganai koroboki aika a tabu n ‘reirei tuan [Ana] euangkerio’ [Reirei ao Berita aika Tabu 42:12]. Koroboki aika tabu ao aia taeka burabeti ao abotoro aika ngkai bon oin taian koaua ake ti reireia.” (Teaching in the Savior’s Way, 21).