Tijem̧ba 4–10

Revelesōn 1–5

“Aiboojoj, im Kajoor, N̄an E … Lamb eo n̄an Indeeo”

Bōk im̧we ko ilo jetōb ejipan̄ eok kile bwe Jetōb Kwojarjar eo ekōņaan katakin eok. Je im ļoor im̧we ko rej kwaļo̧k bwe kwoj kaorōki im ikdeelel n̄an bōk eļapļo̧k.

Kajjitōk bwe ren Kwaļo̧k

Ilo am̧ jino juon iien ekōnono, emaron̄ in jipan̄ n̄an kajjitōk ippān ro uwaan kūlaaj eo n̄an kwaļo̧k jet iaan ennaan ko raar loi ilo bok in Revelesōn ilo iien ekkatak eo aer make ak an baam̧le eo. N̄an waanjon̄ak, ta eo raar ekkatak kōn karōk eo an Jemedwōj Ilan̄ n̄an lo̧mo̧o̧ren ajri ro Nejin? Ta eo raar ekkatak kōn Rilo̧mo̧o̧r eo im jerbal eo An ilo karōk in? Kōketak ro uwaan kūlaaj eo n̄an jab bōjrak jen aer kappukōt ennaan ko raorōk kōn Jisōs Kraist im karōk in lo̧mo̧o̧r eo ilo aer wōnm̧aanļo̧k wōt in riiti Revelesōn ilo m̧weo. Leļo̧k n̄an er juon iien em̧m̧an ilo katak ko ilju im jekļaj n̄an kwaļo̧k ta eo rej loe.

Katakin Katak eo

Revelesōn 1

Jisōs Kraist ej Ļaddik eo Emour Nejin Anij Emour.

• Pija eo im kakōļļe eo ilo Revelesōn 1 ealikkar an kam̧ool bwe Jisōs Kraist emour im bwe E ej tōl Kabun̄ eo An. Bōlen ro uwaan kūlaaj eo remaron̄ je ioon boot eo jejjo eoon ko jān Revelesōn 1 me ekoba pija eo ak kakōļļe eo im kwaļo̧k ta eo kajjojo eoon ko rej katakin er kake kōn Jisōs Kraist. N̄an waanjon̄ak, ta eo jej ekkatak jān kakōļļe kein kōn ekōjkan an Kraist tōl Kabun̄ eo An rainin? Ekōjkan an kōmeļeļe eo an Jon kōn Rilo̧mo̧o̧r eo keidi n̄an eo ilo Katak im Bujen Ko 110:1–4?

Revelesōn 2–3

Jisōs Kraist ejeļā kajjied kajjojo im enaaj jipan̄ kōj anjo̧ ioon kapan̄pan̄ ko ad.

• Riiti ennaan eo an Irooj n̄an elōn̄ branch ko an Kabun̄ in ilo Revelesōn 2–3 emaron̄ in jipan̄ bar kam̧ool n̄an ro uwaan kūlaaj eo bwe Rilo̧mo̧o̧r eo ejeļā kōn er. Bōlen kwomaron̄ kajjitōk ippāer n̄an etale jepta kein n̄an kappukōt kein kam̧ool eo bwe Jisōs Kraist ekar jeļā mālijjon̄ ko im kajoor ko an kajjojo branch. Remaron̄ barāinwōt kwaļo̧k en̄jake ko me raar en̄jaki bwe Rilo̧mo̧o̧r eo ekar jeļā kōn jekjek ko aer rein juon. Ta kapilōk eo Irooj ekar leļo̧k n̄an Armej ro Rekwojarjar me emaron̄ barāinwōt jipan̄ kōj anjo̧ ioon apan̄ ko ad?

• Ilo ejja jepta kein wōt Irooj ekar kōm̧m̧ani kallim̧ur ko reim̧we n̄an ro me rej anjo̧. Kwomaron̄ kajjitōk ippān ro uwaan kūlaaj eo n̄an jerbal ilo ruo iaan ruo n̄an etale Revelesōn 2–3 n̄an pukōt kallim̧ur ko an Irooj. Bōlen remaron̄ barāinwōt jin̄aik pija ko n̄an bōk jikin jet iaan kallim̧ur kein, innām kwaļo̧ki ippān kūlaaj eo ta eo raar loe. Ekōjkan an kallim̧ur kein im̧we kōj n̄an wōnm̧aanļo̧k wōt in kajjieon̄ n̄an anjo̧ ioon mālijjon̄ ko ad make im m̧ōjņo̧ ko?

Revelesōn 5

Jisōs Kraist wōt emaron̄ kōm̧m̧an bwe en pidodo karōk eo an Jemedwōj Ilan̄.

• Juon men kein katakin (object lesson) emaron̄ ke jipan̄ kūlaaj eo am̧ meļeļe kakōļļe eo ilo Revelesōņ 5 kōn an Rilo̧mo̧o̧r eo kōpeļļo̧k bok eo kar liāpe? Kwomaron̄ bōktok kapijie ilo juon nine eļak n̄an kwaļo̧k ippān kūlaaj eo. M̧okta jān kūlaaj, leļo̧k ilo ittiņo̧ n̄an juon armej ki eo n̄an ļak eo. Kōmeļeļeik n̄an kūlaaj eo ta eo ilowaan nine eo, im kōtļo̧k an jejjo ro uwaan kūlaaj eo kajjieon̄ kōpeļļo̧ke bo̧o̧k eo m̧okta jān an armej eo ewōr ippān ki eo kōpeļļo̧ke. Innām kūlaaj eo emaron̄ keidi menin katak in n̄an Revelesōņ 5. Kajjitōk ko āinwōt kein remaron̄ jipan̄: Ekōjkan an lo̧mo̧o̧ren ajri ro nejin Jemedwōj Ilan̄ āinwōt nine eo kar ļake ak bok eo kar liāpe? Etke Jisōs Kraist ekar E wōt emaron̄ in kar kōpeļļo̧k liāp ko? (lale kout eo ilo “Kein Jipan̄ ko Jet”).

• Āinwōt armej ro relem̧ōņōņō kar kōnono kaki ilo Revelesōņ 5, rainin jemaron̄ barāinwōt kotak ainikied n̄an nōbar Rilo̧mo̧o̧r eo āinwōt Juon eo ej erreo n̄an letok n̄an kōj lo̧mo̧o̧r. Bōlen ro uwaan kūlaaj eo remaron̄ al ippān doon juon al in nōbar em̧m̧an tata kōn nōbar Rilo̧mo̧o̧r eo, eo āinwōt “Glory to God on High” (Hymns, nō. 67). Ro uwaan kūlaaj eo remaron̄ kwaļo̧k m̧ool ko al eo ej katakin kōn Jisōs Kraist. Ta men ko reir wōt juon jej loi ikōtaan ennaan ko an al in nōbar ko ad im kean̄ ko ilo Revelesōn 5:9–14?

Kein Jipan̄ ko jet

Jisōs Kraist wōt emaron̄ pinmuur kōn kōj.

Kōmeļeļeik iien ko ilo mour eo m̧okta, Elder Jeffrey R. Holland ekar katakin:

“Kraist ekar baļantier n̄an kautiej anemwkoj eo eo an aolep armej em̧ool āinwōt An kar pinmuur kōn jerawiwi ko aer. Ilo iien eo, E enaaj kar bar jepļaakļo̧k n̄an ippān Jemen ilo aolep aiboojoj kōn kain iakwe in pinmuur in.

“Pinmuur in ejjeļo̧k jem̧ļo̧kin an Kraist ekar pidodo kōnke (1) E ekar e wōt armej eo ejjeļo̧k an jeraiwiw ekar mour ioon laļ in im kōn menin ekar jab lokjak n̄an mej ilo jetōb tokjān jerawiwi, (2) E wōt ekar Make Wōt Jitōnbōro Nejin Jemen im kōn menin ekar bōk piktok ko an anij me kar leļo̧k n̄an E kajoor ioon mej ilo kanniōk, im (3) Ilo m̧ool E wōt ekar bwe an ettā im m̧ōņōņō ilo ko̧o̧njeļ eo ilo mour eo m̧okta n̄an kar kapiti n̄an jerbal jab eo” (“The Atonement of Jesus Christ,” Liahona, Mar. 2008, 35).

Kōkm̧anm̧anļo̧k Ad Katakin

Kōjerbal jeje ko rekwojarjar im naan ko an rikanaan ro ilo raan ko āliktata. “Irooj ekar kakien kōn̄ n̄an ‘katakin doon pedped in katak ko an aelōn̄ in kiin̄ eo’ [Katak im Bujen Ko 88:77] im n̄an kōjerbal jeje ko rekwojarjar n̄an ‘katakin kōn pedped ko an gospel eo [An]’ [Katak im Bujen Ko 42:12]. Jeje ko rekwojarjar im naan ko an rikanaan ro im rijilōk ro ilo raan ko āliktata rej unjen m̧ool ko jej katakin (Teaching in the Savior’s Way, 21).