Jikin Kweilo̧k Indeeo, jān Keith Larson

Tijem̧ba 25–31

Revelesōn 15–22

“Eo Ej Bōk Anjọ Enaaj Jolōt Men Kein”

Ta eo tariņae eo ikōtaan em̧m̧an im nana kar kōmeļeļeik ilo Revelesōn ej katakin eok kake aorōk eo an ļoor Kraist ijin ioon laļ in? Ālkin kejekļo̧kjeņ kōn pedped in katak in, ļōmņak kōn aikuj ko an ro uwaan kūlaaj eo am̧ Ta m̧ool ko jān Revelesōn remaron̄ jipan̄ er kōm̧m̧ane kāālet ko rejim̧we?

Kajjitōk bwe ren Kwaļo̧k

Ilo an ro uwaan kūlaaj eo itok n̄an jem̧ļo̧k eo an ekkatak eo aer kōn Kallim̧ur Ekāāl, kōketak er n̄an kwaļo̧k ļōmņak ko aer kōn Kallim̧ur Ekāāl. Kajjitōk ippāer n̄an kwaļo̧k ekōjkan an ekkatak jeje ko rekwojarjar eo aer kar jipan̄ kōkōm̧anm̧anļo̧k aer jeļā kōn Jisōs Kraist im eromļo̧k āinwōt E.

Katakin Katak eo

Revelesōn 17–18

Jej aikuj kōjepeļļo̧k kōj make jān nana eo an laļ in.

• Ejjab kanooj em̧m̧an riit kōn nana eo im wōtļo̧k eo an Babylon ilo Revelesōn 17–18, bōtaab ekōmeļeļe kōnke Babylon emaron̄ in juon kakōļļe in juon laļ enana jej mour ie rainin. Bōlen kwomaron̄ ajije jepta kein ibwilijin ro uwaan kūlaaj eo im kajjitōk ippāer n̄an pukōt uwaak ko n̄an kajjitōk ko āinwōt kein: Etke armej ro rej ialaleļo̧k Babylon, ak men ko an laļ in? Etke Babylon ekauwōtata? Ta eo enaaj waļo̧k n̄an Babylon? Ta kakkōļ ko Jon ekar litok n̄an jipan̄ kōj joļo̧k nana eo an Babylon?

• Ālkin riiti Revelesōn 18:4, ro uwaan kūlaaj eo remaron̄ ekōnono kōn ekōjkan aer maron̄ “diwōjtok jān” Babylon im “jab bōk ṃōttan jerọwiwi ko an.” Remaron̄ kwaļo̧k eoon ko ak ennaan ko jān ritōl ro an Kabun̄ in me raar jipan̄ er jum̧ae kapo ko an Babylon, ak an laļ in. Ļōmņak in alooje pija in alooj eo “Dare to Stand Alone” (ChurchofJesusChrist.org) ak riiti ennaan eo an Elder Quentin L. Cook ilo “Kein Jipan̄ ko Jet.” Ro uwaan kūlaaj eo remaron̄ kwaļo̧k ļōmņak ko kōn ekōjkan aer kōjerbal pedped in katak kein ruo Elder Cook ekar kōnono kaki. Ilo jekjek rōt jej “diwōjtok” jān Babylon? (lale, n̄an waanjon̄ak, Aiseia 52:11; Katak im Bujen Ko 25:10). Ta eo jemaron̄ kōm̧m̧ane n̄an kōketak ro jet n̄an kōm̧m̧ane ejja in wōt?

Revelesōn 19–20

Jemaron̄ m̧aanjabpopo n̄an Itok eo Kein Karuo an Irooj im Raan in Ekajet eo.

• Itok eo Kein Karuo an Jisōs Kraist emakijkij kōn ņa etan “raan eo eļap im kaamjiak an Jeova” (Joel 2:31), im pedped ioon Revelesōn 19–20, menin ej āinwōt juon kōmeļeļe eo em̧m̧an. Ļōmņak in je ioon boot eo jet iaan iien ko kar kōmeļeļeik ilo Revelesōn 19:5–20;15. Kajjitōk ippān ro uwaan kūlaaj eo n̄an pukōt eoon ko me rej kōmeļeļeik iien kein. Etke iien kein kar ņa etaer reļļap im nana? Ta eo jej ekkatak jān eoon kein kōn Rilo̧mo̧o̧r eo im ro rej ļoor E? Ta eo jemaron̄ kōm̧m̧ane kiiō n̄an pād ibwilijin ro me renaaj lem̧ōņōņō ilo iien eo an itok eo An?

• N̄an im̧we juon iien ekōnono kōn bok in mour im ekajet eo āliktata, kwomaron̄ kajjitōk ippān ro uwaan kūlaaj eo n̄an ejake juon bok eļem waan jān nukij juon m̧ōttan peba n̄an emen m̧ōttan. Innām remaron̄ riiti Revelesōn 20:12–15; 2 Nipai 9:14; 29:11 im kejekļo̧kjeņ kōn ta eo renaaj kar kōņaan jeje kaki ilo bok in mour eo. Kajjitōk ippāer n̄an je men kein ilo bok ko aer, im kajjitōk ippān jejjo ro uwaan kūlaaj eo n̄an kwaļo̧k jet men ko raar jei. Ta kāālet ko jemaron̄ kōm̧m̧ani kiiō bwe men kein ren jeje ilo bok in mour eo? N̄an jipan̄ ro uwaan kūlaaj eo jab en̄jake ebbwer kōn eddōkļo̧k ilo jetōb eo aer make, ļōmņak in kwaļo̧k kapilōk eo jān ennaan eo an Elder Jeffrey R. Holland “Em̧ool—Kom̧ Naaj Weeppān” (Liaona, Nob. 2017, 40–42).

Ekajet eo Āliktata, jān John Scott

Revelesōn 21:1–22:5

Eļan̄n̄e jej tiljek, jenaaj jeraam̧m̧an kōn aiboojojo in jeļijtieļ.

• Men̄e raan ko āliktata rej kanaan kōn an naaj kar obrak kōn nana im kauwōtata, jinekjej eo Jon ekar loe n̄an ro retiljek ekanooj ļap jān jorrāān eo me ej waļoktok jān e. N̄an jipan̄ ro uwaan kūlaaj eo etale jem̧ļo̧k in eaiboojoj n̄an Revelesōn, kwomaron̄ kajjitōk ippāer n̄an etale Revelesōn 21:1–22:5, pukōt eoon ko me rej im̧we er n̄an kajjieon̄ n̄an aiboojoj in jiļijteiļ. Ta kallim̧ur ko kar kōm̧m̧ani n̄an ro rej tiljek? Ekōjkan an kōmeļeļe in jipan̄ kōj n̄e jej jemļae kapan̄pan̄ ko im mālijjon̄ ko kiiō?

Kein Jipan̄ ko Jet

Kāālet jim̧we eo ioon nana eo an Babylon.

Elder Quentin L. Cook ekar katakin:

“Jej jab maron̄ bōbrae laļ in. Em̧ool jān an pād ejjab uwaak eo. Juon en̄jake em̧m̧an, ad jipan̄ n̄an laļ in ej m̧ōttan idajon̄jon̄ eo ad im ej menin aikuj eļan̄n̄e jenaaj kaddōkļo̧k tōļan ko ad. …

… Ro uwaan Kabun̄ in rej aikuj in bōk koņaer ilo laļ in ilo juon wāween em̧m̧an. Innām ekōjkan ad kōjepaan wōt aikuj eo n̄an leļo̧k jipan̄ eo em̧m̧an n̄an laļ in im n̄an jab lokjak n̄an jewaiwiw ko an laļ in? [Lale Katak im Bujen Ko 25:10; 59:9.] Ruo pedped in katak ko renaaj kōm̧m̧ane juon oktak eļap.

1. Kōjeļļāik armej ro kwoj juon Armej ro Rekwojarjar ilo Raan-ko Āliktata em̧ool. …

2. Kwon lōke kōn im mour kōn tōmak ko am̧” (“Lessons from the Old Testament: In the World but Not of the World,” Ensign, Pāp. 2006, 54–55).

Kōkm̧anm̧anļo̧k Ad Katakin

Kautiej anemkwoj in kāālet eo an ro jet. “Armej ro elukkuun pidodoļo̧k aer kōm̧m̧an oktak ko eļap tokjāer ilo mour ko aer n̄e oktak kein rej itok jān aer kōjerbal anemkwoj in kāālet ko aer make. N̄e kwoj leļo̧k kajjitōk ko n̄an jerbalki, kwon lukkuun lale bwe kwon kautiej anemkwoj in kāālet eo an ro kwoj katakin er” (Teaching in the Savior’s Way, 35).