pēpē toki fāʻeleʻi

Little Lamb [Kiʻi Lami], tā fakatātaaʻi ʻe Jenedy Paige

18-24 Tīsema

Kilisimasi

“Ongoongolelei ʻo e Fiefia Lahi”

ʻOku ʻi ai ha mālohi fakalaumālie ʻi he ngaahi fealēleaʻaki ʻo e ongoongoleleí, ʻi he taimi ʻoku fakatefito ai ʻia Sīsū Kalaisí. ʻI hoʻo ako ʻi he uiké ni ʻa e ʻaloʻi mo e misiona ʻo Sīsū Kalaisí, fekumi ki ha tataki fakalaumālie mei he Laumālie Māʻoniʻoní ke ke ʻiloʻi e founga ke ke fakatefito lelei taha ai e fealeaʻaki hoʻo kalasí ʻi he Fakamoʻuí.

fakaʻilonga ʻo e feʻinasiʻakí

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ke vahevahe ʻa e meʻa ʻoku nau fai pe kuo nau fakahoko fakafoʻituitui pe fakafāmili ʻi he kuohilí, ke fakamanatua ʻaki e ʻaloʻi ʻo e Fakamoʻuí, ʻi ha ngaahi founga ʻokú ne ʻomi kinautolu ke nau ofi ange kiate Iá.

fakaʻilonga ʻo e akoʻí

Akoʻi ʻa e Tokāteliné

Mātiu 1:18–25; Luke 1:26–38; 2:1–20

Naʻe āfeitaulalo ʻa Sīsū Kalaisi ke ʻaloʻi ia ʻi māmani.

• Ko e Kilisimasí ko ha taimi lelei ia ke fakalaulauloto ai mo fakamanatua e āfeitaulalo ʻa Kalaisí—ʻa ʻEne finangalo ke mavahe mei he “ʻafioʻanga ʻo ʻEne Tamai ʻi ʻolungá, mo e tangata ke moʻui, ki ha tangata ke pekia” (Again We Meet around the Board,” Hymns, no.186). Ke fakaʻaiʻai ha fealeaʻaki ʻi he tefito ko ʻení, te ke lava ʻo fehuʻi ki he kau mēmipa ʻo e kalasí ʻa e meʻa kuo nau ako ʻi heʻenau ako fakataautaha pe fakafāmili ʻi he uike ní, fekauʻaki mo e tuʻunga ne ʻi ai ʻa Sīsū kimuʻa peá Ne toki ʻaloʻí (vakai, Sione 17:5; Mōsaia 7:27; Tokāteline mo e Ngaahi Fuakava 76:12–14, 20–24; Mōsese 4:2). ʻE lava leva ke ke fakaʻaliʻali ʻa e fakatātā ʻi he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ʻi he laukonga ʻa e kau mēmipa ʻo e kalasí fekauʻaki mo e ʻaloʻi ʻo e Fakamoʻuí (vakai, Mātiu 1:18–25; Luke 1:26–38; 2:1–20). Fakalotolahiʻi kinautolu ke vahevahe ʻenau ngaahi fakakaukaú mo e ongó ʻi heʻenau fakafehoanaki e nāunau ʻo e Fakamoʻuí ʻi he maama fakalaumālié mo Hono ʻaloʻi masivá.

• ʻE lava ʻo hoko ha fehuʻi hangē ko ia naʻe fai ʻe he ʻāngeló kia Nīfai ʻi he 1 Nīfai 11:16 ko ha founga lelei ke kamata ʻaki ha fealeaʻaki fakakalasi, neongo te ke ala fakalea kehe ia. Mahalo te ke ala hiki ʻi he palakipoé Ko e hā e āfeitaulalo ʻa e ʻOtuá? pea kole ki he kau mēmipa ʻo e kalasí ke nau fakalaulauloto ki he fehuʻi ko ʻení ʻi heʻenau lau ʻa e 1 Nīfai 11:17–33. Kole ange ke nau vahevahe ha faʻahinga fakakaukau pē fekauʻaki mo e fakamoʻuí ʻoku ʻomi ʻe he ngaahi veesi ko ʻení. Ko e hā ha ngaahi fakatātā te ke lava ʻo fakaʻaliʻali ki he kalasí ʻokú ne ʻomi ha ngaahi ʻata mei he moʻui ʻa e Fakamoʻuí naʻe fakamatalaʻi ʻe Nīfaí?  

• Ko e mūsiká ko ha founga fakaʻofoʻofa ia ke fakaafeʻi ʻaki e Laumālié ki hoʻomou kalasí. Fakakaukau ke fakaafeʻi ha taha ke ne tā ha hiva Kilisimasi, pe lau pe hivaʻi fakataha mo e kalasí ha ngaahi himi ʻe niʻihi (vakai, Ngaahi Himi, fika 110–122). ʻE lava ke kumi ʻe he kau mēmipa ʻo e kalasí ha ngaahi kupuʻi lea ʻi he ngaahi himi ko ʻení pea mo e ngaahi folofola ʻoku lisi atu ʻi he ngaahi himí ʻokú ne fakatupulaki ʻenau houngaʻia ʻi he Fakamoʻuí mo ʻEne finangalo ke hāʻele hifo ki māmaní.

tūʻulutui ʻa Sīsū ʻi he Ngoue ʻi Ketisemaní

Gethsemane [Ketisemani], tā fakatātaaʻi ʻe J. Kirk Richards

Luke 4:16–21; Sione 3:16

Naʻe fakahoko ʻe Sīsū Kalaisi Hono misioná, ʻa ia ʻoku malava ai ke tau maʻu ʻa e moʻui taʻengatá.

• Ke tokoni ʻi hono aleaʻi ʻe he kau mēmipa ʻo e kalasí ʻa e ngaahi ʻuhinga naʻe ʻaloʻi ai ʻa Sīsū Kalaisí, te ke lava ʻo fakaafeʻi kinautolu ke nau kumi mo vahevahe ha ngaahi potufolofola ʻokú ne fakamatalaʻi nounou Hono misioná (vakai, fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke maʻu ha ngaahi sīpinga). Mahalo ʻe lava ʻo kumi mo lau ʻe he kau mēmipa ʻo e kalasí ha ngaahi veesi, ʻo nau tauhoa pe ʻi ha fanga kiʻi kulupu iiki. Ko e hā ʻoku nau ako fekauʻaki mo e misiona ʻo Kalaisí mei he ngaahi veesi ne nau maʻú? Ko e hā ʻoku tau ako fekauʻaki mo Hono misioná mei he ngaahi hingoa kuo foaki kiate Ia ʻi he ngaahi potufolofolá? (vakai, Fakahinohino ki he Ngaahi Folofolá, “Sīsū Kalaisi”).

• ʻE lava ke ako e kau mēmipa ʻo e kalasí ki he misiona ʻo e Fakamoʻuí ʻaki haʻanau lau ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (ChurchofJesusChrist.org) mo vahevahe ʻa e ngaahi fakamatala ʻoku nau maʻu ʻoku fakamatalaʻi ai e ʻuhinga naʻá Ne hāʻele mai ai ki māmaní. Tuku ha taimi ke fakakaukau ai e kau mēmipa ʻo e kalasí ki heʻenau fakamoʻoni kia Sīsū Kalaisí mo Hono misioná. ʻE lava ke nau vahevahe ha ngaahi aʻusia fakataautaha pe talanoa mei he moʻui ʻa e Fakamoʻuí kuó ne fakatupulaki ʻenau tui pe ʻofa kiate Iá? Kuo tokoni fēfē hono ako ʻo e Fuakava Foʻoú ʻi he taʻu ní ki ha faʻahitaʻu Kilisimasi mahuʻingamālie angé?  

Ko Hono Fakatupulaki ʻEtau Founga Akoʻí

Tuku ha taimi ke vahevahe ai e kau akó. “ʻI he taimi ʻoku vahevahe ai ʻe he kau akó e meʻa ʻoku nau akó, ʻoku ʻikai ngata pē heʻenau ongoʻi hono fakamālohia ʻe he Laumālié ʻenau fakamoʻoní, ka te nau fakalotolahiʻi foki e toenga ʻo e kalasí ke nau ʻiloʻi e moʻoní ʻiate kinautolu pē. … Tuku [ha] taimi ke feʻinasiʻaki ai e kau akó he lēsoni kotoa pē—mahalo ko e taimi ʻe niʻihi, te ke ʻiloʻi ko e ngaahi fealēleaʻaki ko ʻení ko e lēsoní ia” (Ko e Faiako ʻi he Founga ʻa e Fakamoʻuí, 31).