E ’orometua ha’api’i ’oe i roto i te ’Ēkālesia a Iesu Mesia

’Ua pi’ihia ’oe e te Atua nō te ha’api’i i tāna mau tamari’i mai tā te Fa’aora te huru. ’Ua fa’ata’ahia ’oe nō teie pi’ira’a nā roto i te ha’amanara’a o tōna autahu’ara’a mo’a. Noa atu e ’ere ’oe i te hō’ē ’orometua ha’api’i ’aravihi, ’a ora ti’a mā ai ’oe, ’a pure ai i te mau mahana ato’a, ’e ’a tuatāpapa ai i te mau pāpa’ira’a mo’a, e hōro’a mai te Metua i te ao ra ia ’oe i te fa’aurura’a ’e te mana o te Vārua Maita’i (hi’o 2 Nephi 33:1).

Te feiā tei tu’uhia mai i raro a’e i tā ’oe ti’a’aura’a, e mau tamari’i ïa nā te Metua i te ao ra, ’e ’ua ’ite ’oia e aha tei tītauhia nō rātou, ’e nāhea i te toro maita’i a’e i te rima ia rātou. ’A ’imi ai ’oe nā roto i te pure i te fa’aurura’a a te Vārua Maita’i, e arata’i ’oia ia ’oe ’a fa’aineine ai ’e ’a ha’api’i ai ’oe. E heheu mai ’oia ia ’oe i te mea tā ’oe e parau ’e e rave (hi’o 2 Nephi 32:5).

Te tumu faufa’a rahi o te ha’api’ira’a ’e te ’apora’a mai i te ’evanelia ’o te fa’ahōhonura’a ïa i te fa’afāriura’a i te Metua i te ao ra ’e ia Iesu Mesia. Tā ’oe fā ’ei ’orometua ha’api’i ’o te tauturura’a ïa i te feiā tā ’oe e ha’api’i ra ’ia rave i te mau mea ato’a tā rātou e nehenehe, ’ia fa’afāriu-mau-hia mai ā rātou—e tauto’ora’a ’o te tupu i o atu i te taime ha’api’ira’a. E ani i te feiā tā ’oe e ha’api’i ra ’ia ’āmui itoito mai i roto i te ’apora’a mai nō ni’a ia Iesu Mesia ’e tāna ’evanelia ’e ’ia ’ohipa mai te au i te mea tā rātou i ’apo mai. E fa’aitoito ia rātou ’ia rave i tā rātou iho ’e tā te ’utuāfare tuatāpapara’a i rāpae’au i te piha ha’api’ira’a ’ei tumu mātāmua nō tā rātou ’apora’a mai i te ’evanelia. Ma te ravera’a rātou nā roto i te fa’aro’o i te tuatāpapara’a ’ei ta’ata hō’ē ’e ’ei ’utuāfare, e tītau manihini rātou i te Vārua i roto i tō rātou orara’a, ’e nā te Vārua e fa’atupu i te fa’afāriura’a mau. Te mau mea ato’a tā ’oe e rave ’ei ’orometua ha’api’i e ti’a ’ia toro atu i te reira fā mo’a ra.

’A ha’api’i noa i te ha’api’ira’a tumu o te ’evanelia a Iesu Mesia tei fa’aho’i-fa’ahou-hia mai, mai te ’itehia i roto i te mau pāpa’ira’a mo’a ’e i roto i te mau parau a te mau peropheta o te mau mahana hope’a nei. E tītau manihini te ha’api’ira’a tumu ateate—te parau mau mure ’ore ’e te tāuiui ’ore tei ha’api’ihia e te Atua ’e tāna mau tāvini—i te Vārua ’e e mana tō te reira ’ia taui i te mau orara’a.

Te pi’ira’a ’ia ha’api’i ’o te ti’aturira’a mo’a ïa, ’e i te tahi mau taime e tae mai iho ā te mana’o tuauru. ’A ha’amana’o rā ē, nā tō ’oe Metua i te ao ra i pi’i ia ’oe, ’e e ’ore roa ’oia e fa’aru’e ia ’oe. E ’ohipa teie nā te Fatu, ’e ’a tāvini ai ’oe « ma tō ’ā’au ato’a, ma tō pūai, tō mana’o ’e ma tō itoito ho’i » (Te Ha’api’ira’a Tumu ’e te mau Fafaura’a 4:2) e fa’arahi ’oia i tō ’oe mau ’aravihi, mau hōro’a ’e mau tārēni ’e e ha’amaita’i tā ’oe tāvinira’a i te orara’a o te feiā tā ’oe e ha’api’i ra.