Fa’a’ohipara’a i te Mai, pe’e mai—nō te Ha’api’ira’a Sābati

Fa’aineinera’a nō te ha’api’i i roto i te Ha’api’ira’a Sābati

’Ia riro te tuatāpapara’a a te ta’ata hō’ē ’e a te ’utuāfare i te fare ’ei pū nō te ’apora’a mai i te ’evanelia. E parau mau te reira nō ’oe ’e nō te mau ta’ata tā ’oe e ha’api’i ra. ’A fa’aineine ai ’oe nō te ha’api’i, ’a ha’amata nā roto i te fāri’ira’a i tō ’oe iho mau ’itera’a rau nō te mau pāpa’ira’a mo’a. E tupu tō ’oe fa’aineinera’a faufa’a mau ’a ora ai ’oe i te ’evanelia, ’a pātē [sonder] ai i te mau pāpa’ira’a mo’a, ’e ’a tītau ai i te fa’aurura’a a te Vārua Maita’i.

’Ua riro te Mai, pe’e mai—nō te ta’ata hō’ē ’e te ’utuāfare ’ei tuha’a faufa’a rahi nō tā ’oe iho tuatāpapara’a ’e tā ’oe fa’aineinera’a nō te ha’api’i. E tauturu te reira ia ’oe ’ia noa’a te hō’ē hāro’aro’ara’a hōhonu o te ha’api’ira’a tumu o te mau parau tumu e ’itehia i roto i te mau pāpa’ira’a mo’a. E fa’ati’a ato’a te reira ia ’oe ’ia fa’auru ’e ’ia ani i te mau pīahi ’ia fa’a’ohipa i te Mai, pe’e mai—nō te ta’ata hō’ē ’e te ’utuāfare nō te fa’ananea atu ā i tā rātou iho tuatāpapara’a pāpa’ira’a mo’a ’e tā te ’utuāfare (nō te tauturu i te ravera’a i te reira, hi’o « Mau mana’o nō te fa’aitoito i te tuatāpapara’a ta’ata hō’ē ’e te tuatāpapara’a ’utuāfare » i roto i teie mātēria tauturu). ’A nā reira ai ’oe, ’a ha’amana’o ’ia vai ara noa nō te mau pīahi ’aita te orara’a ’utuāfare e fa’atupu nei i te tuatāpapara’a pāpa’ira’a mo’a tāmau ’e te purera’a pō ’utuāfare.

I roto i tā ’oe fa’aineinera’a, e tae mai te mau mana’o ’e te mau fa’aurura’a nō te mau ta’ata tā ’oe e ha’api’i nei. E fāri’i ’oe i te mau ’itera’a e nāhea te mau parau tumu i roto i te mau pāpa’ira’a mo’a e ha’amaita’i ai i tō rātou orara’a. E arata’ihia ’oe nō te fa’auru ia rātou ’ia ’ite mai i teie mau parau tumu, ’a ’apo mai ai rātou iho nā roto mai i te mau pāpa’ira’a mo’a.

Mau mana’o tauturu nō te ha’api’ira’a

’A fa’aineine ai ’oe nō tē ha’api’i, e nehenehe e noa’a ia ’oe te fa’aurura’a hau atu ma te hi’ora’a i te mau fa’anahora’a o te ha’api’ira’a i roto i teie mātēria tauturu. ’Eiaha e fa’ariro i teie mau mana’o ’ei mau arata’ira’a ’ia rave-hō’ē-hō’ē-hia, ’ei mau mana’o rā nō te fa’atupu mai i tō ’oe iho fa’aurura’a. ’Ua mātau ’oe i tā ’oe mau pīahi, ’e e mātau maita’i atu ā ’oe ia rātou ’a ’apo ’āmui mai ai ’outou i roto i te piha ha’api’ira’a. ’Ua mātau ato’a te Fatu ia rātou, ’e e fa’auru ’oia ia ’oe i te mau rāve’a maita’i roa a’e nō te tauturu i te mau pīahi ’ia fa’ananea atu ā i tō rātou ’apora’a mai i te ’evanelia i te fare.

E rave rahi atu ā mātēria tauturu e vai ra nō te tauturu ia ’oe ’ia fa’aineine, ’oia ho’i te mau mana’o i roto i te Mai, pe’e mai—nō te ta’ata hō’ē ’e te ’utuāfare ’e te Mau ve’a a te ’Ēkālesia. Nō te ha’amāramaramara’a hau atu nō teie ’e te tahi atu mau mātēria tauturu, ’a hi’o te tuha’a « Te tahi atu ā mātēria tauturu » i roto i teie mātēria tauturu.

Te tahi mau mea e ha’amana’o noa

• E manuia a’e te ’apora’a mai i te ’evanelia ’ia fa’atumu-ana’e-hia te reira i ni’a i te ’utuāfare. ’Ei ’orometua ha’api’i, e hōpoi’a faufa’a rahi roa tā ’oe nō te turura’a, te fa’aitoitora’a ’e te fa’ananeara’a i te ’apora’a mai i te ’evanelia a te mau pīahi i te fare.

• E fa’ahōhonu atu ā te fa’afāriura’a o te mau pīahi nō Iesu Mesia ’e nō tāna ’evanelia ’a hāro’aro’a ai rātou ’e ’a fa’a’ohipa ai i te ha’api’ira’a tumu mau. E fa’aitoito ia rātou ’ia pāpa’i ’e ’ia rave mai te au i te mau mana’o tā rātou e fāri’i nō ’ō mai i te Vārua Maita’i.

• ’Ua hau atu te ha’api’ira’a atu i te a’o–noa–ra’a, ’ua hau ato’a rā te reira i te arata’i–noa–ra’a i te hō’ē tāu’ara’a parau. Hō’ē tuha’a o tō ’oe ti’ara’a ’oia ho’i te fa’aitoitora’a ïa ia rātou ’ia ’āmui mai ’ei ha’amaita’ira’a ’e ’ia fa’atumuhia i ni’a i te mau pāpa’ira’a mo’a. E ti’a ato’a ia ’oe ’ia fa’a’ite i te mau mana’o fa’auru ’o tā ’oe i ’apo mai ’a tuatāpapa ai ’oe i te mau pāpa’ira’a mo’a.

• ’A ha’amana’o ē, e rave rahi pīahi e ora nei i te mau ’itera’a faufa’a roa nā roto i te tuatāpapara’a i te fare, taua ā mau pāpa’ira’a mo’a ra ’o tā ’oe e ’āparau atu i roto i te piha ha’api’ira’a. E nehenehe ’oe e pāturu i tā rātou tuatāpapara’a i te pāpa’ira’a mo’a ma te hōro’a-pinepine-ra’a ia rātou i te mau rāve’a nō te fa’a’ite mai i te mea tā rātou i ’apo mai i te fare.

• Tē hina’aro nei te Metua i te ao ra ’ia manuia ’oe ’ei ’orometua ha’api’i. ’Ua hōro’a mai ’oia e rave rahi rāve’a nō te tauturu ia ’oe, ’oia ato’a te mau rurura’a a te mau ’orometua ha’api’i. I roto i teie mau rurura’a e nehenehe ’oe e tāu’aparau ’e te tahi mau ’orometua ha’api’i nō ni’a i te mau fifi tā ’oe e fārerei ra. E nehenehe ato’a ’oe e ’āparau ’e e fa’a’ohipa i te mau parau tumu o te ha’api’ira’a mai te huru Mesia.

• E ’apo maita’i mai te ta’ata mai te mea e hōro’ahia ia rātou te rāve’a nō te ha’api’i i te ta’ata. I te tahi taime, ’a feruri e hōro’a i te mau pīahi, te feiā ’āpī ato’a, ’ia ha’api’i i te hō’ē tuha’a o te ha’api’ira’a. ’Ia ravehia teie fa’aotira’a ’ia au i te mau hina’aro ’e te mau ’aravihi o te mau pīahi. Mai te mea e ani ’oe i te hō’ē pīahi ’ia ha’api’i, ’a rave i te taime nō te tauturu iāna ’ia fa’aineine ātea ma te fa’a’ohipa i te mau mana’o e ’itehia i roto i teie mātēria tauturu ’e i roto i te Mai, pe’e mai—nō te ta’ata hō’ē ’e te ’utuāfare. ’A ha’amana’o ē, ’ei ’orometua ha’api’i tei pi’ihia, nā ’oe te hōpoi’a mātāmua roa nō te mea e ha’api’ihia i roto i te piha ha’api’ira’a.

I roto i teie mātēria tauturu, tē vai ra te mau fa’anahora’a ha’api’ira’a nō te hepetoma tāta’itahi o te matahiti. I te mau sābati, ’aita ana’e te Ha’api’ira’a Sābati e fa’aterehia nō te ’āmuira’a rahi ānei, te ’āmuira’a titi ’aore rā nō te tahi atu tumu, e ti’a ’ia fa’aitoitohia te mau pīahi ’ia tāmau noa i te tai’o i te Faufa’a ’Āpī i te fare mai te au i te tārena i fa’ata’ahia i roto i te Mai, pe’e mai—nō te ta’ata hō’ē ’e te ’utuāfare. ’Ia tupu ana’e te Ha’api’ira’a Sābati, e nehenehe ’outou e mā’iti e ’ōu’a ’aore rā e ’āmui i te mau ha’api’ira’a.