e ’utuāfare e tuatāpapa ra i te mau pāpa’ira’a mo’a

Mau mana’o nō te fa’aitoito i te tuatāpapara’a ta’ata hō’ē ’e te tuatāpapara’a ’utuāfare

Tei i’ō nei te tahi mau mana’o nō te tauturu ia ’oe ’ia fa’aitoito i te mau pīahi ’ia tuatāpapa i te parau a te Atua i te fare, ’ei ta’ata hō’ē ’e ’ei ’utuāfare. E ara maita’i, e’ita te tā’āto’ara’a o te mau pīahi e nehenehe e tuatāpapa i te mau pāpa’ira’a mo’a ’e tō rātou mau ’utuāfare (’ei hi’ora’a, tē ora ’ōtahi nei vetahi mau pīahi ’aore rā i roto i te mau ’utuāfare e ’ere te tā’āto’ara’a i te melo nō te ’Ēkālesia).

• E ani i te mau pīahi ’ia fa’a’ite mai i te ’ohipa i tupu nō rātou ’a tuatāpapa ai rātou i te mau pāpa’ira’a mo’a i te fare. ’Ei hi’ora’a, e nehenehe ’oe e ani ia rātou ’ia fa’a’ite mai i te hō’ē ’īrava tei ha’aputapū ia rātou ’e ’ia fa’ata’a mai nō te aha e mea faufa’a te reira nō rātou.

• E ani i te mau pīahi ’ia hōro’a mai i te mau hi’ora’a nō te mau mea tā rātou e rave nei nō tē fa’ariro i te tuatāpapara’a pāpa’ira’a mo’a a te ta’ata hō’ē ’e a te ’utuāfare ’ei ’ohipa faufa’a roa. (E nehenehe te tahi mau mana’o e ’itehia i raro nei « Mau mana’o nō te ha’amaita’i i tā ’outou iho tuatāpapara’a pāpa’ira’a mo’a » ’e « Mau mana’o nō te ha’amaita’i i tā te ’utuāfare tuatāpapara’a pāpa’ira’a mo’a » i roto i te Mai, pe’e mai—nō te ta’ata hō’ē ’e te ’utuāfare.)

• E tītau manihini i te mau pīahi ’ia fa’a’ite mai, e aha tā rātou i rave ’ia au i te mau mana’o tei tae mai i roto i tā rātou iho tuatāpapara’a pāpa’ira’a mo’a ’aore rā i te tuatāpapara’a pāpa’ira’a mo’a a te ’utuāfare.

• ’A rave i te tahi tau minuti nō te fa’a’ite i te mau pīahi i te tahi atu mātēria tauturu tei hōro’ahia mai e te ’Ēkālesia nō te tauturu i te mau pīahi ’ia tuatāpapa i te ’evanelia. I roto i teie mau mātēria tauturu tē vai ra te mau tauturu tuatāpapara’a pāpa’ira’a mo’a e ’itehia i ni’a scriptures.ChurchofJesusChrist.org ; « Te mau ’ā’amu o te pāpa’ira’a mo’a » e ’itehia i ni’a children.ChurchofJesusChrist.org ; te mau fa’anahora’a nō te ha’api’ira’a ’e te tahi atu mātēria tauturu i roto i te Mai, pee mai—nō te Paraimere ; te mau mea i roto tei fa’atumuhia i ni’a i te feiā ’āpī i ni’a youth.ChurchofJesusChrist.org ; te mau buka ha’api’ira’a a te seminaire ’e te institut ; ’e te mau fa’aharuharura’a fa’aro’oro’o ’e video ’e te mau hōho’a pēbu e ’itehia i ni’a GospelMedia.ChurchofJesusChrist.org. E rave rahi o teie mau mātēria e ’ite-ato’a-hia i roto i te fa’anahora’a ’āfa’ifa’i o te Vaira’a buka ’evanelia.

• ’A rave i te tahi tau minuti nō te fa’ata’a e nāhea ’ia fa’a’ohipa i te fa’anahora’a ’āfa’ifa’i o te Vaira’a buka ’evanelia nō te tuatāpapa i te mau pāpa’ira’a mo’a, ’oia ato’a te tāpa’ora’a i te mau ’īrava ’e ’ia pāpa’i i te mau mana’o e tae mai.

• E ani i te hō’ē ’aore rā hau atu mau pīahi ’ia fa’a’ite mai mea nāhea tō rātou ha’api’ira’a ’aore rā ’apora’a mai i te hō’ē parau tumu ta’a ’ē i roto i tō rātou ’utuāfare.