ʻīmisi ʻo e māmaní mo e māhiná

3–9 Sānuali

Sēnesi 1–2; Mōsese 2–3; Ēpalahame 4–5

“Naʻe Fakatupu ʻe he ʻOtuá ʻi he Kamataʻangá ʻa e Langí mo e Māmani”

Ke teuteu ke faiakó, tomuʻa lau mo fakalaulauloto ki he Sēnesi 1–2; Mōsese 2–3; mo e ʻĒpalahame 4–5, pea lekooti hoʻo ngaahi ongo fakalaumālié. ʻE lava ke tokoni e Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Motuʻá mo e ngaahi fakakaukau ʻi laló ke mahino kiate koe mo ke akoʻi e tokāteline ʻi he ngaahi vahe ko ʻení.

Lekooti Hoʻo Ngaahi Ongó

fakaʻilonga feʻinasiʻakí

Fakaafeʻi e Feʻinasiʻakí

Naʻe toutou fakahaaʻi ʻe he ʻOtuá naʻe “lelei” e ngaahi meʻa naʻá Ne ngaohi lolotonga e Fakatupú (vakai, Mōsese 2:4, 10, 12, 18, 21, 25, 31). Fakaafe‘i e kau mēmipa ʻo e kalasí ke nau vahevahe e ngaahi meʻa lelei naʻa nau maʻu ʻi heʻenau lau e folofolá ʻi ʻapi ʻi he uike ní. Ko e hā naʻe lelei fekauʻaki mo e ngaahi meʻa ne nau ʻiló?

fakaʻilonga akoʻí

Akoʻi e Tokāteliné

Sēnesi 1; Mōsese 2; ʻĒpalahame 4

“Na‘e fakatupu ʻe he ʻOtuá ʻi he kamataʻangá ʻa e langí mo e māmani.”

• Mahalo naʻe fakatokangaʻi ʻe he kau mēmipa ʻo e kalasí ʻa e ngaahi faitatau mo e faikehekehe ʻi he ngaahi fakamatala ʻo e Fakatupú ʻi he ngaahi tohi Sēnesí, Mōsesé, mo ʻĒpalahamé. Poupouʻi e kau mēmipa ʻo e kalasí ke nau vahevahe pe ko e hā ʻoku tānaki atu ʻe he liliu ʻa Siosefa Sāmita ʻi he Mōsese 2 ki heʻetau mahino kau ki he fakamatala ʻo e Fakatupú ʻi he Sēnesi 1. Ko e hā ha toe fakakaukau ʻoku tau maʻu mei he ʻĒpalahame 4? Ke fakakau mai ha niʻihi tokolahi ki he fevahevaheʻakí, te ke lava ʻo poupouʻi e kalasí ke nau tauhoa pe ʻi ha fanga kiʻi kulupu iiki ʻo fai ai e fakafehoanaki ko ʻení. (ʻOku ʻi ai ha ngaahi faikehekehe mahuʻinga ʻi ha niʻihi ʻo e ngaahi vēsí ʻoku fakamatalaʻi ʻi he “Ngaahi Maʻuʻanga Tokoni Kehé.”) ‘Oku lelei fēfē nai kiate kitautolu hono maʻu ha ngaahi fakamatala ʻoku lahí? Ko e hā ʻoku fokotuʻu mai ʻe he ngaahi fakamatala ko ʻení fekauʻaki mo e meʻa ʻoku finangalo e ʻOtuá ke tau ʻiloʻi fekauʻaki mo e Fakatupú?

• ʻI hono fakatupu ʻe he ʻOtuá ʻa ʻĀtama mo ʻIví, naʻá Ne tuku ke na pule ki he māmaní mo ʻEne ngaahi fakatupu kehe ʻi aí (vakai, Sēnesi 1:28; Mōsese 2:28; ʻĒpalahame 4:28). ʻOku tokoni fēfē e Tokāteline mo e Ngaahi Fuakava 59:16–21 mo e 104:13–18 ke mahino lelei ange kiate kitautolu e ʻuhinga ke pule ʻi he māʻoniʻoni ki he māmaní?

• ʻI ha ngaahi ʻaho siʻi kimuʻa ʻi he kalasí, te ke lava ʻo fakaafeʻi e kau mēmipa ʻo e kalasí ke nau ʻomi ha ngaahi fakatātā ne nau faitaaʻi pe maʻu ʻi honau ʻapí, ʻokú ne fakamanatu ange kiate kinautolu e fakaʻofoʻofa ʻo e ngaahi fakatupu ʻa e ʻOtuá. ‘Oku uesia fēfē ʻe he ʻilo kau ki he ngaahi ngāue mohu founga ʻa e ʻEikí, ʻetau ngaahi ongo kiate Iá, kiate kitautolú, mo e māmaní? ʻE lava foki ʻe he kau mēmipa ʻo e kalasí ʻo vahevahe e ngaahi pōpoaki ʻoku nau ongoʻi ʻoku ʻomi ʻe he ʻOtuá kiate kitautolu ʻi he ngaahi fakamatala ko ʻeni ʻo e Fakatupú ʻi he Sēnesi 1; Mōsese 2; mo e ʻĒpalahame 4. ʻE lava ke tokoni hano hivaʻi pe fanongo ki ha foʻi hiva fekauʻaki mo e Fakatupú hangē ko e “Māmani Fakaʻofoʻofá” (Ngaahi Himí, fika 29) ke ongoʻi ʻe he kau mēmipa ʻo e kalasí ʻoku nau houngaʻia ʻi he ngaahi fakatupu ʻa e ʻOtuá.

  monomono ʻokú ne fakaʻaliʻali e ngaahi tuʻunga kehekehe ʻo e fakatupú

  Creation (Fakatupú), tā fakatātaaʻi ʻe Joan Hibbert Durtschi

Sēnesi 1:26–28; Mōsese 2:26–28; ʻĒpalahame 4:26–28

Naʻe fakatupu kitautolu ʻi he tatau ʻo e ʻOtuá.

• Ko e hā ʻoku mahuʻinga ai ke tau ʻiloʻi naʻe fakatupu kitautolu ʻi he tatau ʻo e ʻOtuá? Te ke tokoni fēfē ki he kau mēmipa ʻo e kalasí ke nau fakalaulauloto ki he moʻoni ko ʻení? Te nau lava ʻo lau ʻa e Sēnesi 1:26–28; Mōsese 2:26–28; ʻĒpalahame 4:26–28; pe ko e palakalafi hono ua ʻo e “Ko e Fāmilí: Ko ha Fanongonongo ki Māmani” (ChurchofJesusChrist.org). ʻOku tokoni fēfē ʻa e moʻoni ko ʻení ki heʻetau vakai kiate kitautolu, niʻihi kehé, mo e ʻOtuá? ʻE lava ke maʻu ʻe he kau mēmipa ʻo e kalasí ha ngaahi fakakaukau lahi ange ʻi he ngaahi himi hangē ko e “ ʻE Tamai ʻi Hēvani ē” pe “Fānau Au ʻa e ʻOtuá” (Ngaahi Himi, fika 185, 193).

• ʻOku fakamoʻoni ʻa Palesiteni Lāsolo M. Nalesoni ki he fakaofo ʻo e sino ʻo e tangatá (vakai, “Fakafetaʻi ki he ʻOtuá,” Liahona, Mē 2012, 77–80). Fakakaukau ke vahevahe ʻa e lea ko ʻení kimuʻa pea lau fakakalasi ʻa e Sēnesi 1:26–28; Mōsese 2:26–28; pe ʻĒpalahame 4:26–28. ‘Oku fakaloloto fēfē ʻe he fakamoʻoni ʻa Palesiteni Nalesoní ʻa hoʻo houngaʻia ki he ngaahi moʻoni ʻi he ngaahi veesi ko ʻení?

Sēnesi 1:27–28; Mōsese 3:18, 21–25; ʻĒpalahame 5:14–19

Ko e mali ʻi he vahaʻa ʻo ha tangata mo ha fefiné ko e tuʻutuʻuni ia ʻa e ʻOtuá.

• ‘Oku kehekehe ʻa e ngaahi fakakaukau lahi ki he malí ʻi he ʻahó ni mei he moʻoni taʻengatá. Te ke lava ʻo fakaafeʻi e kalasí ke nau lau e Sēnesi 1:27–28; Mōsese 3:18, 21–25; pe ʻĒpalahame 5:14–19 ke tokoni ke nau ako fekauʻaki mo e finangalo ʻo e ʻOtuá ki he malí, pea ke nau hiki ʻi he palakipoé e ngaahi moʻoni ʻoku nau maʻú. Te nau lava foki ʻo tānaki atu ki heʻenau lisí ʻa e ngaahi moʻoni ʻoku maʻu ʻi he “Ko e Fāmilí: Ko ha Fanongonongo ki Māmani” (ChurchofJesusChrist.org). Ko e hā ʻoku mahuʻinga ai e ngaahi moʻoni ko ʻení kiate kitautolú?

fakaʻilonga ki he ngaahi maʻuʻanga tokoni kehé

Ngaahi Maʻuʻanga Tokoni Kehé

Fakafehoanaki ʻo e ngaahi talanoa ʻo e Fakatupú.

Sēnesi	Mōsese	ʻĒpalahame
Sēnesi Sēnesi 1:1	Mōsese Mōsese 2:1	ʻĒpalahame ʻĒpalahame 4:1
Sēnesi Sēnesi 1:16	Mōsese Mōsese 2:16	ʻĒpalahame ʻĒpalahame 4:16
Sēnesi Sēnesi 1:26–27	Mōsese Mōsese 2:26–27	ʻĒpalahame ʻĒpalahame 4:26–27
Sēnesi Sēnesi 1:30	Mōsese Mōsese 2:30	ʻĒpalahame ʻĒpalahame 4:30
Sēnesi Sēnesi 2:5	Mōsese Mōsese 3:5	ʻĒpalahame ʻĒpalahame 4:30
Sēnesi Sēnesi 2:5	Mōsese Mōsese 3:5	ʻĒpalahame ʻĒpalahame 5:5
Sēnesi Sēnesi 2:7	Mōsese Mōsese 3:7	ʻĒpalahame ʻĒpalahame 5:7
Sēnesi Sēnesi 2:9	Mōsese Mōsese 3:9	ʻĒpalahame ʻĒpalahame 5:9
Sēnesi Sēnesi 2:17–19	Mōsese Mōsese 3:17–19	ʻĒpalahame ʻĒpalahame 5:13–14

Ko Hono Fakatupulaki ʻEtau Founga Akoʻí

Tokoni ke fakatatau ʻe he kau akó e folofolá kiate kinautolu. “Ko e ngaahi moʻoni tatau pē ʻo e ongoongoleleí naʻá ne fakalotoa mo poupouʻi ʻa ʻĒpalahame, ʻĒseta, Līhai pea mo Siosefa Sāmitá, ko e ngaahi moʻoni tatau pē ia te nau lava ʻo tokoniʻi e niʻihi ʻokú ke akoʻí ke nau fehangahangai mo e ngaahi faingataʻa ʻi onopōní” (Faiako ʻi he Founga ʻa e Fakamoʻuí, 21). Poupou‘i e kau akó ke nau fakaʻaongaʻi e ngaahi tefitoʻi moʻoni ʻoku nau maʻu ʻi he folofolá ki honau ngaahi tūkungá.