Adam and Eve (Atam ao Ewa), iroun Douglas M. Fryer

Tianuare 10–16

Karikani Bwai 3–4; Mote 4–5

Bwakan Atam ao Ewa

Ngkai ko katauraoi n reirei taekan Karikani Bwai 3–4 ao Mote 4–5, iangoia bwa tera titiraki ke waaki ni kakukurei aika a kona ni buokiia kaain te kiraati bwa a na matata riki ni Bwakan Atam ao Ewa.

Korei Am Namakin

Kaunga te Tibwatibwa

Kain te kiraati a kona n ti rinanon Karikani Bwai 3–4 ke Mote 4–5, rinei kibu ake a tei okoro irouia, ao n tibwai ma temanna are e tekateka ni kaan nakoia. Ngkanne tabeman aomata a kona n tibwai aia iango ma te kiraati.

Reirei te Reirei

Mote 4:1–13; 5:1–12

Ti kainnanoa te inaomata ao te kakaitara bwa ti aonga n rikirake.

• Ibukin te inaomata n rinerine—te Atua e anga te inaomata ni karaoi rinerine—bon aan mwakoron te maiu ae kakaawaki, ngaira n tabetai ti onimakinna. Ni kakorakora riki aia kakaitau kain te kiraati ibukin te bwaintangira aei, a kona ni wareka ao ni maroroakina Mote 4:1–4. Tera ae a reireiniira rongorongo aikai iaon kakaawakin te inaomata? Bukin tera ana baire te Atua e na kamaunaaki ngkana ti aki karekea te inaomata n rinerine? Taeka ake inanon “Bwaai n Ibuobuoki Riki Tabeua” a kona ni katauraoi iango riki tabeua.

• Tao a kona kain e kiraati ni kamatebwaia ana rongorongo Beretitenti Dallin H. Oaks “Kaitaraan Bwaai ni Kabane” (Riaona, Meei 2016, 114–17) bwa mwakoron aia kamatebwai ibon irouia ke n te utu inanon te wiiki aei. Inanon te wiiki, ko kona n iangoia ni kaoia tabeman aomata bwa a na roko ni katauraoi tabeua bwaai man ana rongorongo are e na buokiia n ota ni Bwakan Atam ao Ewa (taraa riki mwakoro I ao II). Bukin tera Tamara arei Karawa e kariaia bwa tina rinanon “kaitaraan bwaai ni kabane”? (taraa 2 Nibwaai 2:11–16). Kona bae ni kaoia kain te kiraati bwa a na wareka Reirei ao Berita aika Tabu 29:39–40 ao ni maroroakinna bwa bukin tera ana karirii Tatan e kakaawaki n ana baire te Atua. A kanga ni bukiira Tamara arei Karawa ao Iesu Kristo ngkai ti kaitarai kariiri?

  

  Leaving Eden (Kitanan Eten), iroun Annie Henrie Nader

Mote 4:4–12; 5:13–33

Tatan e ukoukoria bwa e na “mwamwanaira ao ni kamatakiira”.

• Mote 4:4–12; 5:13–33 e kona ni buokiia kaain am kiraati ni kinai kawai tabeua ake e kabonganai Tatan ni kariirira bwa tina karaoa ae buakaka. Ko kona n tuangiia iteran te kiraati bwa a na wareka Mote 4:4–12 ao iterana are teuana bwa a na wareka Mote 5:13, 18–33. Ngkai a wareware, a kona ni karinani kawai ake e kataia Tatan ni kariiria Atam ao Ewa ao natiia. E kanga ni kataia ni karaoi naba akanne ni bong aikai? E kanga Tamara are i Karawa ni buokiira n totokoi ana kamwane Tatan?

Karikani Bwai 3:1–7; Mote 4:22–31; 5:4–15

Ana mwakuri ni kamaiu Iesu Kristo e anga te kantaninga ao te kabooaki man te Bwaka.

• Mwaitin are ti ota iai imwiin te Bwaka, mwaitin riki ara kakaitau ibukin Ana Mwakuri ni Kamaiu Iesu Kristo. Kain te kiraati a kona ni kakaei ibukin mwiin te Bwaka inanon Karikani Bwai 3:1–7; Mote 4:22–31 ao ni korei rinan bwaai ake a kunei iaon te burakibooti. Imwiina a kona ni kakae n Mote 5:4–12, 14–15 n reiakina ana baire te Atua ni kabooira man mwiina akanne.(taraa naba 2 Nibwaai 2:19–25; Aramwa 12:22–34) ao ni karinani bwaai ake a kunei iaon te burakibooti. A kona naba n tibwai bwaai ake a kukurei iai n aia kakoaua Atam ao Ewa ibukin Iesu Kristo are e kuneaki n kiibu 10–12. Tera ara namakin ibukin ana baire te Atua imwiin warekan koroboki aikai?

• Ana karaki Atam ao Ewa n onimaki ao ni kabooaki a kona ni kaungaia kaain te kiraati ngkana e kangaanga te maiu. Iangoia ni kaoia bwa a na karekei taeka ao kibu n Mote 5:7–12 are e kaota te kantaninga are Atam ao Ewa a namakinna ngke a reiakinna bwa te Tia Kamaiu e kona ni kabooia. Nningai ae ti a tia n namakina iai te kantaninga ae aekakin anne are a namakinna Atam ao Ewa? Iangoia ni kaoia kaain te kirati bwa a na tibwa kunaia ae a tatangiria are e kaota te kantaninnga are e roko rinanona ana Mwakuri ni Kamaiu te Tia Kamaiu. Ko kona n anenei tabeua man akanne n ikotaki.

Bwaai n Ibuobuoki Riki Tabeua

Ti kona n rinerine bon ibukira.

Unimwaane Dale G. Renlund e reirei:

“Ana kouru Tamara arei i Karawa n nakoana ni karo tiaki kairaia natina bwa a na karaoa ae eti, bon kairaia Natina bwa a na rinea ae eti ao n tokin te tai n riki n ai Arona. Ngkana E ti tangiriira bwa ti na ti ongotaeka, E na waekoa ni kabonganai kaniwanga ao katuua ni bitii anuara.

“Ma te Atua e aki tangiriia Natina bwa a na kataneiaki ao a na ongotaeka “n aroia maan” ake aki tenatenai bwain ana auti n te katangaina n te ruu are tiretio. Tiaki, te Atua e tangiriia natina bwa a na rikirake n te maiu n tamnei ao n raonna inanon te waaki n utu” (“N te Bong Aei Kam na Rineia,” Riaona, Nob. 2018, 104).

Kanakoraoan Ara Anga reirei

Karikirakea te iwawaaki irouia kaain am kiraati. Angiin waaki ni kakukurei a kona ni karaoaki n te kiraati, inanon kurubu aika uarereke, ke n ikatoatoa. Kabonganai kawai aika a mwaiti bwa aonga aomata ni irii waaki irouia naake aki kona n reke aia tai. (Taraa Reirei n ana Kawai te Tia Kamaiu, 33–34.)