Better than Paradise (Tamaroa riki nakon te Bwaretaiti), iroun Kendal Ray Johnson

Tianuare 17–23

Karikani Bwai 5; Mote 6

“Reirei Bwaai Aikai n Aki Tiatianna Nakoia Natimi”

Imwain ae ko wareki riki bwaai n ibuobuoki riki tabeua, wareka ao iangoa Karikani Bwai 5 ao Mote 6, ao korei am namakin n tamnei. Nakomai, Iriirai—Ibukiia Aomata n Tatabemaniia ao Utu ao te rongorongo aei e kona ni buokiiko n ataia bwa kona kanga ni buokiia naake ko reireiniia ni kunea te koaua are e kaineti nakoia.

Korei Am Namakin

Kaunga te Tibwatibwa

Kona kanga ni kaungaia kaain te kiraati bwa a na tibwai aia iango ao aia namakin n te bwai are a tia ni kamatebwaia n Karikani Bwai 5 ao Mote 6? Ko kona ni korei araia Atam ao Enoka iaon te burakibooti ao ni kaoia kaain te kiraati bwa a na korea te bwai teuana mai irouia burabeti aikai are e karaoia ke e reirei are e rang ni kakaawaki ibukiia.

Reirei te Reirei

Mote 6:26–39

Te Uea e weteira bwa tina karaoa Ana mwakuri n aki tarai kabwakara.

• Iai te tai ae tamaroa are temanna n am kiraati are e a tia n namakinna—ke ae namakinna ngkai—n aki tau ibukin te tibwanga n te mweenga ke n te ekaretia. Ni katea aia onimaki kaain te kiraati are te Uea e kona ni buokiia, ko kona ni kaoia bwa a na wareka te bwai are e rinanona Enoka are e reke n Mote 6:26–39. E kanga te Atua ni buoka Enoka ni karaoa Ana mwakuri n aki tabe ma maakun Enoka? Tuangiia kaain te kiraati bwa a na iangoa taekan katooto tabeua iaoia aomata ake a tokanikai iaon kabwakaia ao a katia ana mwakuri te Uea, bon man koroboki aika a tabu ke man maiuia. Tera katooto aika ti kona n tibwai? (taraa naba Otinako 4:10–16; Ieremia 1:4–10; 2 Nibwaai 33:1–4; Ita 12:23–29).

• Angiina abotoro ni boong aikai ao burabeti a tia ni kaota raraomaia n aron Enoka ngke a kabwarabwara aron aia namakin ni karekean nakoaia. Aia taneiai e kona ni kakorakora riki otaia kaain te kiraati n Mote 6:26–39. Iangoia ni rinanon ana maroro te abotoro ae tibwa ngkai n te Kooram n Abotoro n te Tengaun ma Uoman (te katooto, taraa aia koaua Unimwaane Ronald A. Rasband, Unimwaane Gary E. Stevenson, ao Unimwaane Dale G. Renlund [Riaona, Nobembwa 2015, 89–94]). Anganiia kaain te kiraati bwa a na tibwaia bwa tera ae taraa ni kakaawaki irouia iaon katooto aikai. Tera ae ti kona n reiakinna mairouia taan kairiiri aikai iaon ara namakin n aki tau? Te mwakoro n taeka mairoun Beretitenti Thomas S. Monson n “Bwaai ni Ibuobuoki riki Tabeua” e kona naba n ibuobuoki ni mwakoron te maroro aei.

Mote 6:48–65

Oninmaki, rairannano, bwabetito, ao karekean te Tamnei ae Raoiroi e katauraoira n oki nakon te Atua.

• Bwaai aika a kakaawaki n te wiki aei n Nakomai, Iriirai—Ibukiia Aomata n Tatabemaniia ao Utu e rineia warekan Mote 6:48–62 ni karekean te bwai are ngaira n tatabemaniira ti na riai n ataia ao ni karaoia bwa ti na karekea te kabooaki. Tao kaain te kiraati a kona n tibwai iango ake a roko man aia kamatebwai anne ni mweengaia. Ke ko kona ni maroroakina Mote 6:48–62 n ikotaki n te kiraati. Tina kanga ni kaeka nakon temanna are e titiraki bwa bukin tera te onimaki, rairannano, bwabetito, ao karekean ana bwaintangira te Tamnei ae Raoiroi a riai n reke? E kanga ni kaeka te titiraki aei te Uea n kiibu 53–65, ao tera ae ko reiakinna man ana kaeka?

  

  Karo a riai n reireiniia natiia te euangkerio.

Mote 6:51–63

“Reirei bwaai aikai n aki tiatianna nakoia natimi.”

• N Mote 6:51–63 ti reiakina koauan te euangkerio are e reirei iai te Uea nakon Atam ao e tuangnga bwa e na reireiniia te roro n taai aika a na roko. Tao kaain te kiraati a kona ni karaoi rinanin koaua aikai man kamatebwaia ni kurubu aika uarereke iaon kiibu, n aron kiibu 51–52, 53–57, 58–60, 61–63. Bukin tera koaua aikai a kakaawaki nakoia te roro ae rikirake ni bong aikai? Tera ae ko tangiria bwa kairake a ana ataia ibukin te Tia Kamaiu man kibu aikai? Kain te kiraati a kona naba n tauraoi n tibwai iango ke taneiai n ibuobuoki imarenaia n reiakin koaua aikai n ae nakoraoi nakoia ataei ao kairake. Tera riki ae ko kona n reiakinna man ana kaetieti te Uea nakoia karo inanon Motiaea 4:14–15 ao Reirei ao Berita aika Tabu 68:25–28; 93:40–50?

• N reitia ma are e anga reirei iaona Mote 6 ibukin tabeia kaaro bwa a na reireniia natiia, ko na bae ni kaoia kaain te kiraati ni mataku n teuana ke nako riki ni witeo aikai: “Parenting: Touching the Hearts of Our Youth,” “Proclamation Series: Children,” or “Mother in Israel” (ChurchofJesusChrist.org). Tera ae ti reiakin man witeo aikai ibukin reiakinaia natira taekan te euangkerio? Ngkana ko reireiniia te roronrikirake, ko kona ni kaoia bwa a na tibwaia bwa a kanga ni kona ni boutokaia aia karo inanon aia kekeiaki n reirei te euangkerio n te mweenga.

Bwaai n Ibuobuoki Riki Tabeua

“Antai are e weteia te Uea, e konabwai imatan te Uea.”

Beretitenti Thomas S. Monson e reirei: “Tabeman mai iroumi a kona ni mamama n aroia ke a iangoia bwa aki tau ni butimwaea te wewete ngkana a anganaki. Uringnga bwa te mwakuri aei tiaki am mwakuri ao ngai n tii ngaira. Bon ana mwakuri te Uea, ao ngkana ti karaoa ana mwakuri te Uea, Ti kabaeaki nakon ana ibuobuoki te Uea. Uringnga bwa antai are e weteia te Uea, e tau imatan te Uea” (“Duty Calls,” Ensign, May 1996, 44).

Kanakoraoan Ara Anga reirei

Te Tamnei ae Raoiroi bon te tia reirei. Tibwangam n tia reirei e kakaawaki, ma uringnga bwa te Tamnei ae Raoiroi boni ngaia raoi te tia reirei. Buokiia kaain te kiraati n reiakinna maroun te Tamnei ao n tibwaia imarenaia tera are a tia n reiakinna.