“Tianuare 24–30. Mote 7: ‘Te Uea E Arania Ana Aomata Bwa Tion,’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Tianuare 24–30. Motiaea 7,” Nakomai, Iriirai—Ibukin te Reirei n Tabati: 2022
Love One Another (Itangitangiri I-Marenami), iroun Emma Donaldson Taylor
Tianuare 24–30
Mote 7
“Te Uea E Arania Ana Aomata Bwa Tion”
Ngkai ko kamatebwaia Mote 7, iangoia aomata ake ko reireiniia ao kona kanga ni kona ni buokiia n ota n te bwai are e reirei iaona te mwakoro aei ibukin Tion ao reirein te euangkerio ake tabeua.
Korei Am Namakin
Kaunga te Tibwatibwa
N tabetai te titiraki ae beebete ao tabeua te miniti n iangoia a tau ni buokiia aomata n te bwai are a reiakinna ni mweengaia. Tao ko kona n anganiia kaain te kiraati bwa a na rinanon Mote 7, ni kakaea te kibu ae e karekea nakoia te namakin ni kakaitau ibukin koaua ake a kaokaki n ana boki Mote, ao imwiina a tibwaia.
Reirei te Reirei
Ti kona ni katea Tion n ara bong.
-
Tera te kabanea n tamaroa ni kawai ni kaota te kantaninga iaon Tion n am kiraati? Teuana te iango bwa ko kona n reitaki ma kaain am kirati inanon te wiiki imwain te kiraati ao ni kaoia bwa a na uoti bwaai man mweengaia are a namakinna bwa e tei ibukin anuaia aomata ake kaain Tion, n aron are e kabwarabwaraaki n Mote 7:18. Ngkai ko maroroakin kibu aikai n ikotaki, kaain te kiraati a kona ni kabwarabwara kakaawakin bwaai ake a uoti.
Ti riai ni kataia n riki “bwa ti teuana nanoia ao teuana aia iango” (Mote 7:18).
-
Te witeo (ChurchofJesusChrist.org) e kona ni buokiko ni wakina te maroro iaon tina kanga n riki “bwa ti teuana nanora ao teuana ara iango” (Mote 7:18) n ara uoote ao n ara utu. Ingaoia n tuangiia kaain te kirati bwa a na iangoa te tai are a namakina iai te katiteuanaaki inanon aia utu ke ngkai a ibuobuoki imarenaia n te Ekaretia ke te Komiuniti. Tera ae a karaoia aomata ni katiteuanaaki n aro aikai? Tera ae ti kona n reiakinna n taekan Tion ao te katiteuanaaki man Mote 7? (tarai riki kiibu 16–21, 27, 53, 62–69). Aikai tabeua riki koroboki aika a tabu ake a kona n ibuobuoki: I-Biribi 2:1–4; 4 Nibwaai 1:15–18; Reirei ao Berita aika Tabu 97:21; 105:5.
Te Atua e tang ibukiia Natina.
-
Tabeman aomata a taraa te Atua bwa te aomata ae raroa, e kangaanga rekena, are akea ana namakin ae rootaki iai n te bwai ae riki nakoira. Kona kanga ni kabongana miin Enoka ni buokiia kaain am kiraati n ota bwa te Atua e irekereke inanon maiura ao e tabe ibukira? Ko bae ni kaoia kaain am kiraati bwa a na wareka Mote 7:28–44 ao ni karaoa te rinan tabeua bukina ngkai e tangi te Atua. Tera ae e reireiniko kiibu aikai n taekan aron ana namakin te Atua ibukiia natina? Te rongorongo inanon “Bwaai n Ibuobuoki Riki Tabeua” e kona ni karekei riki iango nakon te marooro aei.
-
Bwaai aika a kakaawaki n te wiiki aei n Nakomai, Iriirai—Ibukiia Aomata n Tatabemaniia ao Utu tuangiia bwa a iangoia tera Mote 7:28–31, 35 ae reirei iaona ibukin te Atua. Naake a karaoa aei ni mweengaia a kona n tauraoi n tibwa aia iango ma te kiraati. Ke ko kona ni kaoia kaain te kiraati bwa a na iangoi kiibu aikai ao ni maroroakin inanon te kiraati.
Te Uea e na manga oki n te kabanea ni bong.
-
Kona kanga ni buokiia kaain am kiraati ni kunea te bwai are Mote 7:59–67 reiakinna n taekan Kauaokin te Tia Kamaiu? Tao ko kona ni karinani uoua ke teniua koaua ke bwaai aika a riki man kiibu aikai iaon te burakibooti ao n tuangiia kaain te kiraati bwa a na kakai kiibu ao n ikoti nakon te rinan ake a korei. Bukin tera ngkai bon te kakabwaia karekean mwiin miin Enoka—temanna te burabeti n taai akekei iaon te Kauaoki?
Bwaai n Ibuobuoki Riki Tabeua
Te Atua e tang ibukiia Natina.
Unimwaane Jeffrey R. Holland e reirei:
“I nuukan te mii ae korakora iaoia aomata are e uki iai karawa nakon ana nooraba, Enoka, e noori kakabwaia ao kakaewenako n te maiu n rabwata, e bita ana taratara ni kaineti nakon te Tama ao e mimi n nooria bwa E tang. E taku ma te titiraki ao te mimi nakon te aomata ae moan te mwaaka n te aonaaba: ‘E kanga ngkai ko kona n tang?’ …
“N tarai bwaai ake a kona n riki n te bong teuana, E kaeka te Uea: ‘Nooriia tarim aikai; boni ngaiia ake I karikiia n oin baiu. … Ao nakoia tarim I a tia n taekinna … [n] anga naba te tua, bwa a na itangitangiri imarenaia, ao bwa a na riai n rineai, bwa Tamaia; ma nooria, bon akea aia tangira, ao a ribaia aika oin raraaia;. … Tera bukina bwa karawa a na aki tang, n norakiia aikai bwa a na karawawataki?’ [Mote 7:29–33, 37].
“Te nonori ae kamimi ae onoti anne, e raka riki arona nakon te anua n Atua nakon are e kona ni kabwaranakoa te iango ni wanawana. … Te banna ae kanuuringan tamnein te Atua ni kabaeaki inanon maiura! Tera unin nanoia karo ngkana natiia a rineia bwa a na aki Rineia ke ‘ana euangkerio te Atua’ are e kanakoa! [IRom 1:1]. Ai bebetera tangirakin temanna ae n ti ngaia ae tangiriira!” (“The Grandeur of God,” Liahona, Nov. 2003, 72).
Kanakoraoan Ara Anga reirei
Kaungaia kaain te kiraati bwa a na kamatebwaia koroboki aika a tabu ni mweengaia. Teuana te kawai are ko kona iai ni kaunga kamatebwaian koroboki aika a tabu bon karekean te tai ibukiia kaain te kiraati bwa a na tibwai bwaai ake a kunei ao iango man aia kamatebwai ibon irouia ao n utu. (Taraa Reirei n Ana Kawai te Tia Kamaiu, 29.)