ʻĒpalahame mo Sela

Tā fakatātaaʻi ʻo ʻĒpalahame mo Sela, fai ʻe Dilleen Marsh

7–13 Fēpueli

Sēnesi 12–17; ʻĒpalahame 1–2

“Ke Hoko ko ha Tokotaha ʻoku Muimui Lahi Ange ki he Māʻoniʻoní”

Ko e hā kuo akoʻi atu ʻe he Laumālie Māʻoniʻoní kiate koe ʻi he uiké ni ʻi hoʻo ako e Sēnesi 12–17 mo e ʻĒpalahame 1–2? Fakapapauʻi ʻokú ke ʻoange ki he kau mēmipa ʻo e kalasí ha ngaahi faingamālie ke vahevahe e meʻa ne akoʻi ange ʻe he Laumālie Māʻoniʻoní kiate kinautolú.

Lekooti Hoʻo Ngaahi Ongó

fakaʻilonga feʻinasiʻakí

Fakaafeʻi e Feʻinasiʻakí

Ke ʻoange ki he kau mēmipa ʻo e kalasí ha ngaahi faingamālie ke vahevahe e meʻa naʻa nau ako mei he Sēnesi 12–17 mo e ʻĒpalahame 1–2, te nau lava takitaha ʻo fili ha tokotaha ʻoku lau ki ai ʻi he ngaahi vahe ko ʻení pea fakakakato ha sētesi hangē ko ʻení: “Naʻe akoʻi au ʻe ʻĒpalahame ” pe “Naʻe akoʻi au ʻe Sela .”

fakaʻilonga akoʻí

Akoʻi e Tokāteliné

Sēnesi 15:1–6; 17:15–22; ʻĒpalahame 1:1–19

ʻE tāpuekina kitautolu ʻe he ʻOtuá koeʻuhi ko ʻetau tuí mo e ngaahi holi māʻoniʻoní.

• ʻE lava ke tokoni e ngaahi aʻusia ʻa ʻĒpalahame mo Sela ʻi he Sēnesi 15; 17; ʻĒpalahame 1 ki he kau mēmipa ʻo e kalasí ke tauhi maʻu ʻenau tui ʻe fakakakato ʻenau ngaahi fili māʻoniʻoní ʻi he taimi ʻa e ʻEikí. ʻE anga fēfē haʻo kamataʻi ha fealeaʻaki fekauʻaki mo e tefitoʻi moʻoni ko ʻení? Ko e fakakaukau ʻe taha ko hono fakaafeʻi e kalasí ke fekumi ʻi he Sēnesi 15:1–6 mo e ʻĒpalahame 1:1–19 pea fakamatalaʻi e loto-holi ʻa ʻĒpalahamé mo e ngaahi tūkunga faingataʻá. Naʻe fakahaaʻi fēfē ʻe ʻĒpalahame mo Sela ʻena tuí ʻi he ngaahi taimi ʻo e faingataʻá? (vakai, Hepelū 11:8–13). Naʻe anga fēfē ʻa e faifai pea fakakakato ʻena ngaahi holi māʻoniʻoní? (vakai, Sēnesi 17:15–22; 21:1–3; Tokāteline mo e Ngaahi Fuakavá 132:29; ʻĒpalahame 1:31). ʻE anga fēfē haʻatau fakahaaʻi ʻetau tuí kapau ʻoku teʻeki fakakakato ʻetau ngaahi holi māʻoniʻoní ʻi he founga ʻoku tau fie maʻu ke fakahoko aí? ʻE lava ke vahevahe ʻe he kau mēmipa ʻo e kalasí e founga kuo poupouʻi ai kinautolu ʻe he Fakamoʻuí ʻi he ngaahi tūkunga peheé.

• Mahalo ʻoku ʻi ai ha kau mēmipa ʻo hoʻo kalasí ʻoku siʻisiʻi e poupou ʻoku nau maʻu mei honau fāmilí ʻi heʻenau feinga ke moʻui ʻaki e ongoongoleleí—pea ʻe malava pē ke nau fehangahangai mo ha fakafepaki. Ko e hā te tau lava ʻo ako mei he sīpinga ʻa ʻĒpalahame ʻi he ʻĒpalahame 1:1–19 ʻe lava ke ne tokoniʻi kinautolu ʻoku nau feinga ke moʻui māʻoniʻoni ʻi he ngaahi tūkunga peheé?

• Te ke lava ʻo kole ki he kau mēmipa ʻo e kalasí ke nau lau e Liliu ʻa Siosefa Sāmitá, Sēnesi 14:36–40 (ʻi he Fakahinohino ki he Ngaahi Folofolá) pea vahevahe e meʻa naʻa nau ako fekauʻaki mo e tui mo e ngaahi holi ʻa ʻĒpalahamé. Te nau lava foki ‘o vahevahe e founga ne tāpuekina ai kinautolu ʻi heʻenau fakaʻaongaʻi ʻenau tuí ke totongi vahehongofulú.

ʻĒpalahame 2:6–11

‘Oku faitāpuekina kotoa kitautolu ʻe he fuakava faka-ʻĒpalahamé.

• Ke tokoni ke mahino ki he kau mēmipa ʻo e kalasí ko e hā ʻa e fuakava faka-ʻĒpalahamé, te ke lava ʻo vahevahe e ongo lea ʻa Palesiteni Lāsolo M. Nalesoní ʻi he “Ngaahi Maʻuʻanga Tokoni Kehé” (vakai foki, “Abrahamic Covenant,” topics.ChurchofJesusChrist.org). Mahalo ne ʻosi ako e kau mēmipa ʻo e kalasí ʻo kau ki he fuakava faka-ʻĒpalahamé mei he ʻĒpalahame 2:6–11, ʻo hangē ko ia kuo fokotuʻu atu ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻE lava ke vahevahe ʻe he kau mēmipa ʻo e kalasí e meʻa naʻa nau akó, pe ʻe lava ke ako fakataha ʻe he kalasí e ngaahi veesi ko ʻení. Ko e hā ha ngaahi talaʻofa mo ha ngaahi fatongia ʻoku tau maʻu makatuʻunga ʻi he fuakava faka-ʻĒpalahamé? ʻE lava ke tokoni e foʻi vitiō “Fakamoʻoni Makehe—Palesiteni Nalesoni” ke tali ʻa e fehuʻí ni (https://www.churchofjesuschrist.org/study/video/special-witnesses-of-christ/2011-04-18-special-witness-elder-nelson?lang=ton). Ko e hā ʻoku fie maʻu ke tau fai ke maʻu ʻa e ngaahi tāpuaki ʻo e fuakava ko ʻení? ʻI heʻetau hoko ko e hako ʻo ʻĒpalahamé, ʻe anga fēfē haʻatau tāpuekina e “ngaahi faʻahinga kotoa pē ʻo e māmaní”? ( ʻĒpalahame 2:11).

Sēnesi 14:18–19; Liliu ʻa Siosefa Sāmitá, Sēnesi 14:25–40

“Ko Melekisētekí ko ha tangata tui lahi ia.”

• Ko e tokolahi taha ʻo e kāingalotu ʻo e Siasí ʻoku nau maheni mo e Lakanga Taulaʻeiki Faka-Melekisētekí koeʻuhí ko hono Fakafoki Mai ʻo e ongoongoleleí, ka ʻoku ʻi ai ha niʻihi ʻoku ʻikai ke nau ʻilo ki he tangata ko Melekisētekí. Ke tokoni ke ako lahi ange e kau mēmipa ʻo e kalasí fekauʻaki mo ia, te ke lava ʻo fakaafeʻi kinautolu ke nau fakakaukauloto atu naʻe kole ange ke nau fakafeʻiloaki ia ki ha taha ʻoku ʻikai ke ne ʻiloʻi ia, pea hiki ʻi he palakipoé ʻa e ngaahi meʻa te nau ala lea ʻakí. Te nau lava ʻo fakatefito e ngaahi meʻá ni ʻi he meʻa naʻa nau lau ʻi he Liliu ʻa Siosefa Sāmitá, Sēnesi 14:26–27, 33–38 (ʻi he Fakahinohino ki he Ngaahi Folofolá); ʻAlamā 13:13–19; mo e Tokāteline mo e Ngaahi Fuakava 107:1–4. Ko e hā ʻoku tau ako fekauʻaki mo e Lakanga Taulaʻeiki Faka-Melekisētekí mei he ngaahi veesi ko ʻení?

  Tāpuakiʻi ʻe Melekisēteki ʻa ʻEpalame

  ʻOku Tāpuakiʻi ʻe Melekisēteki ʻa ʻEpalame, tā ʻe Walter Rane

fakaʻilonga ki he ngaahi maʻuʻanga tokoni kehé

Ngaahi Maʻuʻanga Tokoni Kehé

Ngaahi Tāpuaki ʻo e fuakava faka-ʻĒpalahamé.

Naʻe akonaki ʻa Palesiteni Lāsolo M. Nalesoni ʻo pehē:

“Ko e fuakava naʻe fai ʻe he ʻOtuá mo ʻĒpalahamé pea toe fakahoko kimui ange mo ʻAisake mo Sēkopé ʻoku matuʻaki mahuʻinga ia. … Naʻe hā mai ʻa e ʻEikí ʻi he ngaahi ʻaho fakaʻosí ke toe fakafoʻou e fuakava faka-ʻĒpalahamé. … Hangē ko e kakai he kuonga muʻá, ʻoku tau toe maʻu ʻi hono fakafoʻou e talaʻofá ni, ʻa e lakanga fakataulaʻeiki māʻoniʻoní pea mo e ongoongolelei taʻengatá. ʻOku tau maʻu e totonu ke maʻu e kakato ʻo e ongoongoleleí, fiefia he ngaahi tāpuaki ʻo e lakanga fakataulaʻeikí, pea taau ke maʻu e tāpuaki mahuʻinga taha ʻa e ʻOtuá—ʻa ia ko e moʻui taʻengatá” (“Ngaahi Fuakavá,” Liahona, Nōvema 2011, 87–88).

“ʻOku maʻu e ngaahi tāpuaki taupotu taha ʻo e fuakava faka-ʻĒpalahamé ʻi he ngaahi temipale toputapú. ʻOku fakangofua ʻe he ngaahi tāpuaki ko ʻení ke tau ʻalu atu ʻi he ʻuluaki toetuʻú ʻo maʻu ʻa e ngaahi taloni, ngaahi puleʻanga, ngaahi mālohi, ngaahi pule fakapilinisi mo e ngaahi pule ki hotau ‘hakeakiʻí mo e nāunau ʻi he ngaahi meʻa kotoa pē’ [Tokāteline mo e Ngaahi Fuakava 132:19]” (“Special Witnesses of Christ,” Ensign, ʻEpeleli 2001, 7).

Ko Hono Fakatupulaki ʻEtau Founga Akoʻí

Faʻa fai hoʻo fakamoʻoní. ʻE lava ke hanga ʻe hoʻo fakamoʻoni faingofua mo fakamātoato ki he moʻoni fakalaumālié, ʻo takiekina mālohi e niʻihi ʻokú ke akoʻí. Hangē ko ʻení, te ke lava ʻo vahevahe ha kiʻi fakamoʻoni mahinongofua fekauʻaki mo e founga kuo tāpuekina ai hoʻo moʻuí ʻe he ngaahi fuakavá.