Tā fakatātaaʻi ʻo Noa heʻene mavahe mei he ʻaʻaké, fai ʻe Sam Lawlor

31 Sānuali–6 Fēpueli

Sēnesi 6–11; Mōsese 8

“Naʻe ʻOfeina ʻa Noa ʻi he ʻAo ʻo [e ʻEikí]”

ʻOku fakamamafaʻi ʻe he lēsoni ko ʻení ʻa e ngaahi tefitoʻi moʻoni ʻoku maʻu ʻi he Sēnesi 6–11 mo e Mōsese 8, ka ʻoku ʻikai ko e ngaahi tefitoʻi moʻoni pē ʻeni te ke lava ʻo tokanga taha ki ai ʻi hoʻo faiakó. Falala ki he ngaahi ue‘i fakalaumālie ʻokú ke maʻu ʻi hoʻo ako e folofolá.

Lekooti Hoʻo Ngaahi Ongó

Fakaafeʻi e Feʻinasiʻakí

Fakakaukau ke kole ki he kau mēmipa ʻo e kalasí ke vahevahe ha pōpoaki fakalaumālie maʻa hotau kuongá mei he talanoa ʻo Noá pe ko e Taua ʻo Pēpelí. Poupou‘i kinautolu ke nau vahevahe ha potufolofola ʻokú ne poupouʻi e pōpoaki ko ʻení.

Akoʻi e Tokāteliné

Sēnesi 6–8; Mōsese 8

‘Oku ʻi ai e malu fakalaumālie ʻi he muimui ki he palōfita ʻa e ʻEikí.

• ‘E lava ke fakamanatu mai ʻe he faiangahala ʻi he kuonga ʻo Noá ʻa e faiangahala ʻoku tau feʻao mo ia he ʻaho ní. Ke tokoni ki he kau mēmipa ʻo e kalasí ke ʻaonga e ngaahi lēsoni ʻi he talanoa ʻo Noá, te ke lava ʻo tohi ʻi he palakipoé ʻa e Ngaahi Fakatokangá mo e Ngaahi Fakapapaú. ʻE lava ke toe vakaiʻi ʻe he kau mēmipa ʻo e kalasí ʻa e Sēnesi 6–8 pe Mōsese 8:13–30 pea fekumi ki ha meʻa ʻoku nau ongoʻi ko ha fakatokanga mahuʻinga ki hotau kuongá mo ha meʻa ʻoku nau pehē ne hoko ko ha fakapapau mai (vakai foki, “Ngaahi Maʻuʻanga Tokoni Kehé”). Te nau lava ʻo tohi e meʻa naʻa nau maʻú ʻi he ʻuluʻi tohi totonú ʻi he palakipoé. Ko e hā ʻoku mahuʻinga ai e talanoa ʻo Noá kiate kitautolu he ʻaho ní?

Sēnesi 9:8–17

‘Oku tokoniʻi kitautolu ʻe he ngaahi fakaʻilongá pe fakataipé ke tau manatuʻi ʻetau ngaahi fuakava mo e ʻEikí.

• ʻOku fokotuʻu atu ʻe he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí hono lau ʻo e Sēnesi 9:8–17 mo fakalaulauloto ki he founga ʻe lava ke hoko ai e ngaahi fakataipé pe fakaʻilongá ko ha fakamanatu ʻo ʻetau ngaahi fuakavá. Ke tokoni ki he kau mēmipa ʻo e kalasí ke vahevahe ʻenau fakakaukaú, te ke lava ʻo ʻomi ki he kalasí ha ngaahi naunau ʻokú ne fakamanatu mai kiate kitautolu ha ngaahi meʻa mahuʻinga—hangē ko ha mama mali, ko ha fuka fakafonua, ko ha pine faifekau—pea fakafehoanaki ia ki he “fakaʻilonga” ʻo e ʻumatá. Ko e hā ʻoku akoʻi mai ʻe he Liliu ʻa Siosefa Sāmitá, Sēnesi 9:21–25 (ʻi he Fakahinohino ki he Ngaahi Folofolá) fekauʻaki mo e fakaʻilonga ko ʻení? ʻOku fakaʻaongaʻi fēfē ʻe he ʻOtuá ʻa e ngaahi fakaʻilongá pe fakataipé ke tokoniʻi kitautolu ke tau manatuʻi ʻetau ngaahi fuakavá?

Sēnesi 11:1–9

Ko e founga pē ke aʻu ai ki he langí ko e muimui ʻia Sīsū Kalaisi.

• ‘Oku ʻomi ʻe he talanoa ʻo hono langa ʻe he kakai ʻo Pēpelí ha tauá, ʻa e fakafehoanaki mālie ki he talanoa ʻo ʻĪnoke mo hono kakaí ʻi hono langa ʻo Saioné, ʻa ia naʻe ako ʻe he kau mēmipa ʻo e kalasí ʻi he uike kuo ʻosí. Na‘e feinga ʻa e ongo falukunga kakaí fakatouʻosi ke aʻu ki he langí ka ʻi ha ongo founga kehekehe. Te ke ala fakaafeʻi e kau mēmipa ʻo e kalasí ke nau hiki ʻi he palakipoé ha meʻa pē ʻoku nau manatuʻi fekauʻaki mo e kakai ʻo Saioné (vakai, Mōsese 7:18–19, 53, 62–63, 69) mo e meʻa ʻoku nau ako mei he Sēnesi 11:1–9 mo e Hilamani 6:26–28 fekauʻaki mo e kakai ʻo Pēpelí. Ko e hā e ngaahi faikehekehe ʻoku nau maʻú? Ko e hā ʻoku akoʻi mai heni fekauʻaki mo ʻetau ngaahi feinga ke foki ki he ʻao ʻo e ʻOtuá?

  

  Tā fakatātā ʻo e Taua ʻo Pēpelí, fai ʻe David Green

• ʻOku ʻikai toe ʻi heni e kolo fakakuongamuʻa ko Pēpelí, ka ʻoku kei ʻi heni pē ʻa e hikisia mo e anga fakamāmani ʻokú ne fakataipé. Ke tokoni ki he kau mēmipa ʻo e kalasí ke nau fakaʻaongaʻi e ngaahi lēsoni mei he Taua ʻo Pēpelí ʻi heʻenau moʻuí, kamata ʻaki hano fakaafeʻi kinautolu ke toe vakaiʻi e Sēnesi 11:1–9. Hili iá, te ke lava ʻo tufaki ha ngaahi laʻi pepa pea fakaafeʻi e kau mēmipa ʻo e kalasí ke nau tohi e meʻa ʻoku fai ʻe he kakaí ke nau mamaʻo ai mei he ʻOtuá; pea ʻi he ngaahi laʻi pepa kehé, te nau lava ʻo tohi e meʻa naʻe fai ʻe he kakaí ke nau ʻunu ke ofi ange ki he ʻOtuá. ʻE fakafiefia ki he toʻu tupú hano fokotuʻutuʻu e ngaahi ʻuluaki kongokonga laʻipepá ʻi he palakipoé ʻo hangē ha fuo ʻo ha tauá pea ko e ngaahi kongokonga laʻi pepa hono uá ʻi he fuo ʻo ha temipale. Ko e hā kuo tokonaki mai ʻe he ʻOtuá ke tokoniʻi kitautolu ke tau “aʻu ki he langí”? (Sēnesi 11:4; vakai foki, Sione 3:16). ʻE lava ke mou hivaʻi ha himi ʻi he tefito ko ʻení hangē ko e “Ofi Hoku ʻOtuá” (Ngaahi Himi, fika 49).

Ngaahi Maʻuʻanga Tokoni Kehé

Ngaahi Lēsoni meia Noá.

Naʻe pehē ʻe Palesiteni Henelī B. ʻAealingi:

“ʻOku holoki hotau mālohi ke tali ʻa e faleʻi fakalaumālie ʻi he kahaʻú, ʻi he ʻikai ke tau tokanga ki he enginaki fakapalōfitá. Ko e taimi lelei taha ke fai ai e fili ke tokoni kia Noa ʻi hono langa ʻo e ʻaʻaké ʻa e fuofua taimi ne fai atu ai e kolé. Ko e taimi kotoa pē naʻá ne kole ai hili e meʻa ko iá, pea ʻikai ke talí, naʻe holoki ai ʻa e malava ke ongoʻi e Laumālié. Ko e taimi kotoa pē ne hangē ia ha kole ʻoku ngalivalé, kae ʻoua ke tō mai e ʻuhá. Pea fuʻu tōmui leva.

“Ko e taimi kotoa pē ʻi heʻeku moʻuí naʻá ku fili ai ke fakatoloi hano muimuiʻi ha akonaki fakalaumālie pe te u fakakaukau ʻoku ʻikai ʻuhinga mai ia kiate au, ne u ʻilo ai kuó u ʻi he hala ʻo e faingataʻá. Ko e taimi kotoa pē kuó u fakafanongo ai ki he faleʻi ʻa e kau palōfitá, ongoʻi hono fakapapauʻi mai ia ʻi he lotú, pea toki muimuiʻi iá, ne u ʻilo kuó u laka atu ki he malú” (“Finding Safety in Counsel,” Ensign, Mē 1997, 25).

Ko e hā naʻe ʻomi ai ʻe he ʻOtuá ʻa e Lōmakí?

ʻOku fifili ha kakai ʻe niʻihi fekauʻaki mo e fakamaau totonu ʻa e ʻOtuá ʻi hono ʻomi ha lōmaki ke “fakaʻauha … ʻa e tangatá” (Sēnesi 6:7). Naʻe fakamatalaʻi ʻe ʻEletā Niila A. Mekisuele ʻo pehē, ʻi he taimi ʻo e Lōmaki Lahí, naʻe ngāue mai ʻa e ʻOtuá, “ʻi he taimi naʻe aʻu ai ʻa e faikoví ki ha tuʻunga naʻe maumauʻi ai ʻa e tauʻatāina ke filí, ʻo ʻikai lava ai ke ʻomi ʻa e ngaahi laumālié ki heni ʻi he tuʻunga ʻo e fakamaau totonú” (We Will Prove Them Herewith [1982], 58).

Ko Hono Fakatupulaki ʻEtau Founga Akoʻí

Tuku ha taimi ki he fakalaulaulotó. ʻOku fie maʻu ʻe he fehuʻi leleí ʻa e fakalaulaulotó, fekumí, mo e ueʻi fakalaumālié. ‘Oange ki he kau mēmipa ʻo e kalasí ha kiʻi taimi ke nau fakalaulauloto ki ha fehu‘i kimuʻa pea ʻeke ange ʻenau ngaahi talí. (Vakai, Ko e Faiako ʻi he Founga ʻa e Fakamoʻuí, 31–34.)