Tā fakatātaaʻi ʻo Lepeka ʻe Dilleen Marsh

21–27 Fēpueli

Sēnesi 24–27

Kuo Fakafoʻou e Fuakavá

ʻI hoʻo lau e Sēnesi 24–27, lotua ke ʻiloʻi e founga te ke lava ai ʻo poupouʻi e kau mēmipa ʻo e kalasí ke maʻu haʻanau ngaahi aʻusia pē ʻanautolu mei hono ako e folofolá.

Lekooti Hoʻo Ngaahi Ongó

Fakaafeʻi e Feʻinasiʻakí

Ke poupouʻi e kau mēmipa ʻo e kalasí ke vahevahe ʻenau ngaahi fakakaukau mei he Sēnesi 24–27, te ke lava ʻo fakaafeʻi kinautolu ke fili ha potufolofola pau naʻá ne ueʻi kinautolu pea tohi ia ʻi ha laʻi pepa. Tānaki e ngaahi laʻi pepá, pea fili ha niʻihi ke lau mo aleaʻi fakakalasi ia.

Akoʻi e Tokāteliné

Sēnesi 24

‘Oku mahuʻinga e fuakava ʻo e malí ki he palani taʻengata ʻa e ʻOtuá.

• ʻOku ʻomi ʻe hono fakamahuʻingaʻi ʻe ʻĒpalahame e kumi ʻo ha uaifi maʻa ʻAisaké ha faingamālie ke aleaʻi e mahuʻinga ʻo e fuakava ʻo e malí ʻi he palani ʻa e ʻOtuá maʻatautolú. Ke kamataʻi ha fealeaʻaki, ʻe lava ke vakaiʻi vave ʻe he kau mēmipa ʻo e kalasí ʻa e Sēnesi 24 pea vahevahe e ngaahi meʻa naʻe fai ʻe he ʻEikí ke fakatahaʻi ʻa ʻAisake mo Lepeka ʻi he malí. Ko e hā ʻoku mahuʻinga ai e nofomalí ki he ʻEikí? Ke tokoni ki he kau mēmipa ʻo e kalasí ke aleaʻi e fehuʻi ko ʻení, te ke lava ʻo vahevahe mo kinautolu ʻa e lea ʻa ʻEletā D. Toti Kulisitofasoni ʻi he “Ngaahi Maʻuʻanga Tokoni Kehé.” ‘E anga fēfē haʻatau tokoni ke fakapapauʻi ʻoku fakahoko e ngaahi taumuʻa ʻa e ʻOtuá ki he malí?

• Fehuʻi ki he kalasí pe ko e hā ha ngaahi ʻulungaanga kuo nau vakai ki ai ʻi hanau hoa, ongo mātuʻa, pe ngaahi hoamali kehé kuo tokoni ki ha mali ʻoku fiefia mo angatonu. ʻOku fakahaaʻi ʻe he Sēnesi 24 e ngaahi ʻulungaanga ʻe lava ke tokoni ki ha taha ke ne fokotuʻu e fiefiá ʻi ha nofomali—mo e ngaahi tafaʻaki kehe ʻo e moʻuí. Hangē ko ʻení, ʻi he veesi 12 ʻoku tau ako ai fekauʻaki mo hono tataki kitautolu ʻe he lotú, pea ʻi he veesi 19 ʻoku tau ako ai ki he hiki hake e tuʻunga ngāué ʻi he ngāue tokoní. Ko e hā ha toe ngaahi tefitoʻi moʻoni kehe ʻe lava ke maʻu ʻi he ngaahi vahe ko ʻení? ʻE lava foki ke vakai e kau mēmipa ʻo e kalasí ki he “Ko e Fāmilí: Ko ha Fanongonongo ki Māmani” (ChurchofJesusChrist.org).

Sēnesi 25:29–34

Te tau lava ‘o fili ʻi he fakahōhōloto taimi nounoú mo e ngaahi meʻa ʻoku mahuʻinga angé.

• ʻE anga fēfē haʻo tokoni ki he kau mēmipa ʻo e kalasí ke nau maʻu ha ngaahi lēsoni fakataautaha mei he ngaahi aʻusia ʻa Sēkope mo ʻĪsoá? Ko e fakakaukau ʻe taha ko hono fakaafeʻi kinautolu ke faʻu ha lisi ʻe ua ʻi he palakipoé—ko e taha ki he ngaahi tāpuaki taʻengata ʻoku finangalo e ʻOtuá ke ʻomi kiate kitautolú pea ko e taha ki he ngaahi meʻa fakamāmani ʻoku nau toʻo ʻetau tokangá mei he ngaahi tāpuaki ko iá. Hili iá, ʻe lava ke lau ʻe he kau mēmipa ʻo e kalasí ʻa e Sēnesi 25:29–34, ʻo fakafetongi e “ʻuluaki fohá” ʻaki ha meʻa mei he ʻuluaki lisí mo e “haka luú” ʻaki ha meʻa mei he lisi hono uá. Ko e hā ha founga ʻoku feinga ai e filí ke fakalotoʻi kitautolu ke fakafetongi e ngaahi tāpuaki ʻa e ʻOtuá ʻaki e ngaahi meʻa ʻoku siʻi ange honau mahuʻingá? Fakakaukau ke fakaafeʻi e kau mēmipa ʻo e kalasí ke nau fefaleʻiʻaki ʻi he founga ke nofotaha ai ʻi he Fakamoʻuí mo e ngaahi tāpuaki taʻengata kuó Ne ʻomi maʻatautolú.

Sēnesi 26:18–25, 32–33

Ko Sīsū Kalaisi ʻa e matavai ʻo e vai moʻuí.

• ‘Oku hā tuʻo lahi ʻi he Sēnesi 26 naʻe pau ke keli vai ʻa ʻAisake mo hono falé ke maʻu e vaí, pea naʻe faʻa hoko eni ko ha fuʻu ngāue lahi. ʻE lava ke akoʻi ʻe he moʻoniʻi meʻa ko ʻení e kau mēmipa ʻo e kalasí ki he ngāue ʻoku fie maʻu ke ʻomi e “vai moʻui” ʻa e Fakamoʻuí ki heʻetau moʻuí (vakai, Sione 4:10). Mahalo te ke lava ‘o fakatātāʻi ʻeni ʻaki hano tā ʻi he palakipoé ha maʻuʻanga vai ʻoku fonu ʻuli. ʻE lava ke taufetongi e kau mēmipa ʻo e kalasí ʻi hono toʻo e ʻulí ʻi heʻenau fakamatalaʻi e ngaahi founga te nau lava ai ʻo maʻu e vai moʻui ʻa e Fakamoʻuí. Poupouʻi kinautolu ke fakaʻaongaʻi e Fakahinohino ki he Ngaahi Folofolá ke kumi ha ngaahi veesi felāveʻi mo e meʻa ʻoku nau vahevahé.

  

  Ko ha vaitupu ʻi Peasia he kuonga muʻá ʻa ia naʻe keli vai ai ʻa ʻĒpalahame mo ʻAisaké.

Ngaahi Maʻuʻanga Tokoni Kehé

Ko e malí mo e fāmilí ko e fakatupu ia ʻa e ʻOtuá.

Naʻe ʻomi ʻe ʻEletā D. Toti Kulisitofasoni ha ngaahi ʻuhinga ʻoku mahuʻinga fau ai e malí mo e fāmilí ki he palani ʻa e ʻOtuá:

“ʻOku ʻomi ʻe ha fāmili naʻe langa ʻi he mali ʻa ha tangata mo ha fefiné, ʻa e tuʻunga lelei taha ke tupulaki ai e palani ʻa e ʻOtuá—ʻa e tuʻunga ki hono fāʻeleʻi mai e fānaú, ʻoku maʻa mo haohaoa mei he ʻOtuá pea mo e ʻātakai ki he ako mo e teuteu te nau fie maʻu ki ha moʻui fakamatelie lavameʻá mo e moʻui taʻengata he moʻui ka hokó. ʻOku mahuʻinga e ngaahi fāmili lalahi ʻoku langa he faʻahinga founga mali ko ʻení ki he moʻui mo e tupulaki ʻa e ngaahi sosaietí. …

“… Ka ʻoku ʻikai ke makatuʻunga e tufakanga ʻo e malí mo e fāmilí he ngaahi feohi fakasōsialé, ka ʻi he foʻi moʻoni, ko e fakatupu ia ʻa e ʻOtuá. Ko Ia ia ʻi he kamataʻangá naʻa Ne fakatupu ʻa ʻĀtama mo ʻIvi ʻi Hono tataú, ko e tangata mo e fefine, pea fakatahaʻi kinaua ko e husepāniti mo e uaifi ke hoko ʻo ‘kakano pē ʻe taha’ pea fanafanau mo fakatokolahi e māmaní. ʻOku maʻu ʻe he tokotaha fakafoʻituitui takitaha ha ʻīmisi fakalangi, ka ʻoku tau toki maʻu ʻi he mali ʻa e tangatá mo e fefiné ʻa e ʻuhinga kakato hono fakatupu kitautolu ʻi he tatau ʻo e ʻOtuá—ko e tangata mo e fefine. … Ko e mali peheé … ko e konga lahi ia ʻo e palani ʻo e fiefiá ʻo hangē pē ko e Hingá mo e Fakaleleí” (“ ʻUhinga ʻo e Malí, ʻUhinga ʻo e Fāmilí,” Liahona, Mē 2015, 52).

Ko Hono Fakatupulaki ʻEtau Founga Akoʻí

Fakatefito hoʻo akoʻí ʻi he tokāteliné. ‘I hoʻo fakaafeʻi e kau mēmipa ʻo e kalasí ke nau vahevahé, fakapapauʻi ʻokú ke toutou fakafoki maʻu pē e fealeaʻakí ki he tokāteline ʻi he ngaahi folofolá. Te ke lava ‘o fai ʻeni ʻaki haʻo akoʻi e kau mēmipa ʻo e kalasí ke ako e ngaahi potufolofolá ʻi he kalasí, fai e ngaahi fehuʻi fekauʻaki mo e meʻa ʻoku lau ki ai e folofolá, pea fakaafeʻi e kau mēmipa ʻo e kalasí ke vahevahe ʻenau ngaahi fakamoʻoni ki he tokāteline ʻoku akoʻí.