Meei 2–8

Te Otinako 35–40; Nakoaia Ibonga 1; 16; 19

“E Tabu Bwa Ana Bwai te Uea”

Ngkana iai am taneiai ae uaana ni kamatebwaian koroboki aika tabu, ko na kona n angareirei ao ni kakoaua ngkana ko bootaki ma kain am kiraati n te Tabati. Tera ae ko kona ni kaungaiia iai kain te kiraati bwa a na karaoa naba anne?

Korei Am Namakin

Kaunga te Tibwatibwa

Mwakoro n te wareware n te wiiki aei a kabonganai kanikina n reirei taekan Iesu Kristo ao Ana angakarea ni kamaiu. Ko riai ni moana te kiraati man kaoiia kain te kiraati bwa a na koreia ke ni korea tamneina iaon te burakibooti te bwai ae a kunea inanon Te Otinako 35–40 ke Nakoaia Ibonga 1; 16; 19 are e reireiniia taekan te Tia Kamaiu. Kaoiia bwa a na taekina te bwai are a reiakinna.

Reirei te Reirei

Te Otinako 35–40

E tangiriira te Uea bwa ti na tabu n Arona.

• Ngkai a kamatebwaia kain te kiraati Te Otinako 35–40 n te wiiki aei, a na bae n tia n iangoia bwa a kanga bwain te tabaenako ngkoa ni biti aia iango nakon Iesu Kristo. Ngkana a karaoia, kaungaiia bwa a na tibwauai aia iango. Te taibora n te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu e kona n ibuobuoki ma te marooro aei. Kam kona naba ni maroroakinna bwa tera ae reitiia kanikina aikai ma te tabaenako n reirei taekan te riki n ae tabu riki. E kanga Iesu Kristo ni buokiira bwa ti na riki n tabu riki?

• Ibukiia aika mwaiti, te iango ni kan riki n tabu e a moanna n taraa ni kangaanga koron bukina. Ko kanga ni buokiia kain te kiraati ni kaotaia bwa te riki n tabu bon mwakoron ana baire Tamara are i Karawa ibukira? Kam kona ni bootaki ni wareka ana rongorongo Beretitenti Henry B. Eyring inanon “Bwaai n Ibuobuoki Riki Tabeua.” Tera ae nanonaki bwa ko na riki n tabu? A kanga ara tembora ni boong aika kaitira ao te mwakuri ae ti karaoia ikekei e buokiira n tabu riki? (taraa naba Reirei ao Berita aika Tabu 84:19–24; 109:6–26; 128:15–18). Ko kona ngkanne n titirakiniia kain te kiraati bwa a na tibwauaia bwa a kanga bwaai aikai n tia ni buokiia—ke tabeman ake a kinaia—n riki n tabu riki.

• Aia tabaenako kain Iteraera n te rereua ti tearona ma ara tembora ni boong aika kaitira ni kawai aika mwaiti. Ko na bae ni kaoiia kain te kiraati bwa a na koroi bwaai aika a reiakin ibukin te tabaenako inanon Te Otinako 35–40 ae kauringiia n te bwai ae ti ataia n te tembora. Ngkana a kainnanoa te ibuobuoki, ko kona ni kaoti nakoia kiibu inanon Te Otinako 40 ni kaineti ma te roki, baonikarea, kunnikai aika tabu, uaati, ao taian kabiribiri. E kanga te tembora ni buokiira n nakon Kristo? Tera ae ti kona ni karaoia ni kabanea ara tai iaona inanon te tembora?

Nakoaia Ibonga 1:1–9; 16

Rinanon Ana Mwakuri ni Kamaiu Iesu Kristo, a konaa ni kabwaraaki ara bure.

• E ngae ngke te iango iaon te anga karea n te man e na taraa ni kamiimi nakoira n te bong aei, e mwaiti riki ae ti kona n reiakinna man te mwakuri aei iaon ana angakarea ni kamaiu Iesu Kristo. Ni moanakin te marooro, ko kona ni katei tamnein te Tia Kamaiu i Ketetemwane ao iaon te kaibangaki (taraa Gospel Art Book, nambwa. 56, 57). A kona kain te kiraati n tibwauai taeka aika a namakin bwa a kaineti nakon ana mwakuri ni kamaiu Iesu Kristo. Ao kaoiia kain te kiraati bwa a na rinanon Nakoaia Ibonga 1:1–9 ke Nakoaia Ibonga 16, ae kabwarabwarai anga karea n te man, ao ni kakaai taeka aika a namakin naba bwa a kaineti nakon ana angakarea te Tia Kamaiu. A kanga aia anga karea kain rimoa ni buokiira n ataa raoi ana Mwakuri ni kamaiu Iesu Kristo? A kona kain te kiraati n anenea te anene ibukin te Tia Kamaiu ao n tibwaua aia namakin Ibukina.

  

  Ataein Iteraera anga aia karea ibukin te tabaenako ma “nanona ae kan anga” (Te Otinako 35:5). Kamtaata n te tamnei iroun Corbert Gauthier, © Lifeway Collection/licensed man goodsalt.com

• E kona n ibuobuoki ibukiia kain te kiraati bwa a na kabotaui anga karea ae kainnanoia te Uea n te O Tetemanti ma anga karea aika E tuangiira n te bong aei. Te katooto, a kona ni koroi kawai ni karaoan anga karea ibukin te Uea ao Ana mwakuri, n aron te beku man taian wewete, kabwakaan te angabwai n aki mamatam, karaoan te mwakuri n rongorongon te utu, ke ibuobuoki i bon imarenaia. A kona n ikotaki ni wareka Nakoaia Ibonga 1:1–9 ao ni kaoiia kain te kiraati bwa a na tarai mwakoron te anga karea aika a kabwarabwaraaki ni kiibu aikai aika a kona ni kaineti ma te angabwai ae tuangiira te Uea bwa ti na anga n te bong aei (taraa 3 Nibwaai 9:19–20; Reirei ao Berita aika Tabu 64:34). Tera ae ti kona n reiakinna man Mote 5:7 bwa ti na kanga n tarai ara anga karea ibukin ana mwakuri te Uea?

Bwaai n Ibuobuoki Riki Tabeua

E kona te Atua ni karaoira bwa aomata ngaira aika mimitong.

E reirei Beretitenti Henry B. Eyring:

“Te kukurei ae korakora e roko man korakoran mimitongin te aomata. … E reireiniira booki aika tabu bwa mai buakon bwaai tabeua, ti kona ni kaitiakaki ke n riki ni mimitong ngkana ti kamwakura te onimaki inanon Kristo, ni kaota ara ongeaba, rairannano, n anga karea Ibukina, karekei otenanti aika tabu, ao ni kawakin ara berita aika tabu ma Ngaia. …

“Te anene ‘More Holiness Give Me’ [Anene n Taromauri, nambwa. 131] e karekea te kawai n tataro ibukin te ibuobuoki ni kona ni mimitong riki. E iangoia te tia koro rongorongo bwa te mimitong ae ti ukoukoria bon te bwaintituaraoi mairoun te Atua ae tangira, ae ti karekea imwiin te tai, imwiin ae ti kona ni karaoia” (“Holiness and the Plan of Happiness,” Riaona, Nobembwa. 2019, 100–101, 103).

Kanakoraoan Ara Anga Reirei

Kabonganai katangitang aika tabu. Rongorongo inanon anene a kona ni kakorakorai reirei inanon booki aika tabu. Ibukin te katooto, anenean te kuna n aron “More Holiness Give Me” ke “I Stand All Amazed” (Anene n Taromauri, nambwa. 131, 193) a kona ni kakorakorai tabeua rongorongo aika reireiaki inanon Nakoaia Ibonga 16 ao 19.