“Meei 16–22. Te Tua Kaua 6–8; 15; 18; 29–30; 34: ‘Kona Tarataraiko bwa Kona Aki Mwanuoka Iehova,’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Meei 16–22. Te Tua Kaua 6–8; 15; 18; 29–30; 34,” Nakomai, Iriirai—Ibukin te Reirei n Tabati 2022
Kabwarabwara n tamnein Mote iaon te Maunga are Nebo, © Providence Collection/licensed from goodsalt.com
Meei 16–22
Te Tua Kaua 6–8; 15; 18; 29–30; 34
“Kona Tarataraiko bwa Kona Aki Mwanuoka Iehova”
Moote e kairaki bwa e na reireiniia natin Iteraera ni bwaai ake a kainnanoi (taraa Te Tua Kaua 6:1). Ngkai ko kamatebwaia te Tua Kaua, ukoukora te kairi bwa kona ataia bwa te reirei raa ae kona reirei iaona, ni boboto iaon kainnanoia kain te kiraati.
Korei Am Namakin
Kaunga te Tibwatibwa
Ibukina bwa Te Tua Kaua iai inanona ana kabanea n taeka Mote nakoia natin Iteraera, kona bae ni kaoiia kain te kiraati bwa a na tibwa te bwai are a kunea n te Tua Kaua are a tangiria ni karinna n aia kabanea n taeka nakoia natiia ke tibuia. Ngkai a tibwatibwa, tuangiia bwa a na kabwarabwara bwa bukin tera ngkai a rinei taeka akanne.
Reirei te Reirei
Te Tua Kaua 6:4–7, 20–25; 8:2–5, 11–17; 29:18–20; 30:6–10, 15–20
Te Uea e tangiriira bwa ti na tangiria ma nanora ni kabane.
-
Rinanon te Tua Kaua, iai rongorongo ake a kona ni kairiira bwa ti na iangoa taekan aron maiun tamnein nanora. Ni buokiia kain te kiraati n tibwai aia iango iaon rongorongo aikai, ko kona ni korea tamnein te aati iaon te burakibooti. Imwiina tibwatibwai kiibu aikai nakoia kain te kiraati: Te Tua Kaua 6:4–7, 20–25; 8:2–5, 11–17; 29:18–20; 30:6–10, 15–20. Kaoiia kain te kiraati bwa a na korea te kibu inanon te aati ngkana e reirei te bwai ae a riai ni karekea inanoia ke ni korea te kibu i tinanikun te aati ngkana e reirei te bwai ae a riai n totokoia. Tera ae e nanonaki ni kabanei nanora nakon Tamara arei Karawa?
-
Ti na kanga ni kabwarabwara nakoia ara utu ao tabeman bwa bukin tera ti ongotaeka nakon ana tua te Atua? Imwiin iangoan te titiraki aei, kain te kiraati a kona ni wareka Te Tua Kaua 6:4–7, 20–25 ke te rongorongo n “Bwaai ni Ibuobuoki riki Tabeua” ao n tibwai aia iango. A kanga iango aikai n roota aron ara namakin ibukin tua ke berita aika a tabu?
“Reireiniia [ana taeka te Uea] raoi natim.”
-
N tabetai e ibuobuoki ongoraean iango iaon kawai tabeua ni kamatebwai ao n reiakina taekan te euangkerio inanon mweengaia. Maroroakina bwa a kanga kain te kiraati n iriira te reirei inanon Te Tua Kaua 6:4–9, 20–25 ni kona n anganiia aia tai n reiakini mai irouia imarenaia. Tera ae ti karaoia ngkai ti angareirei ao ni “maroroakina” (kibu 7) ana taeka te Atua ni kabwarabwarakin kiibu aikai? Tera taneiai aika ti kona n tibwai n te tai are e kairiira iai te Uea inanon ara mwakuri?
Buokakiia ake a kainnano e kainanoi baira n akoi ao n anga kukureira n ibuobuoki.
-
Ti tuai n roko n te bonga are “Ma ana aki mena akana akea aia bwai ibuakomi” (Te Tua Kaua 15:4), ngaia are te reirei ibukin buokakiia kainnano inanon Te Tua Kaua 15 a teimatoa ni kakaawaki, e ngae ngke waaki ni kaineti ma taarau ao tooro a tia ni bitaki. Ko kona ni kaoiia kain te kiraati bwa a na rinanon kiibu 1–15 ao ni kakaai reirei ibukin buokaia rarikin ao kainnano are a tangiria ni maroroakinna. Tititraki n aron aikai a kona ni buoka te marooro: Tera ae e nanonaki n “kaurea baim” nakoia ake a kainnano? (kiibu 8, 11). Tera tibwangan nanora are e karaoia ni buokakiia tabeman? (taraa kibu 7, 9–10). Tera ae ti kona n reiakinna ibukin buokakiia kainnano man ana banna ni katooto te Uea? (taraa kibu 15).
Te Uea e kaoira bwa ti na rineia imarenan “maiu n te raoiroi, ao te mate n te buakaka.”
-
E kona ni kakaongora kabotauan ana taeka Mote n Te Tua Kaua ma tabeua ana kabanea n reirei Riaai nakoia ana utu n 2 Nibwaai 1–4. Tao a kona kain te kiraati ni kakaai titebo ao kaokoro imarenan kibuntaeka aikai: Te Tua Kaua 29:9 ao 2 Nibwaai 4:4; Te Tua Kaua 30:15–20 ao 2 Nibwaai 2:26–29. E kanga Riaai ni kabwaranakoa riki te bwai are e reirei iai Mote? Bukin tera taeka n ai aron maiu ao mate te kawai ae tamaroa ni kabwarabwaraan ara rinerine ni “kawakina” ke “tannako” man ana tua te Atua? (Te Tua Kaua 30:16–17). Kain te kiraati a kona n tibwa te bwai are a kunea ni kibuntaeka aikai are e kaungaia bwa a na “rinea te maiu” (Te Tua Kaua 30:19).
Bwaai n Ibuobuoki Riki Tabeua
Ti kawakin ara berita aika a tabu ibukina bwa ti tangira te Atua.
Beretitenti Linda K. Burton e reirei:
“Man bukina ni kabane are ti tangiria iai ni mwakuri korakora ni kawakinan ara berita ae tabu, bukina aei e rianako riki nakoia ni kabane—tangira. …
“‘Ngkana ti kakaitau n ae bwanin ni kakabwaia aika a mwaiti aika ara bwai rinanon te kamaiuaki are e karaoaki ibukira, akea riki te bwai ae ti na bubuti ibukina are e na karaoia te Uea are ti na aki ingainga ni kan karaoi’ [Joseph Fielding Smith, “Importance of the Sacrament Meeting,” Relief Society Magazine, Oki. 1943, 592]. Ni kaineti nakon ana rongorongo Beretitenti Joseph Fielding Smith, kawakinan berita aika a tabu bon teuana te kawai ni kaotan ara tangira ibukin te Mwakuri ni Kamaiu ae aki kona ni kabwarabwaraaki ae akea tokina n ana Mwakuri ni Kamaiu ara Tia Kamaiu ao te Tia Kabooira ao ana tangira ae kororaoi Tamara are i Karawa” (“The Power, Joy, and Love of Covenant Keeping,” Riaona, Nob. 2013, 114).
Kanakoraoan Ara Anga reirei
Kakauongo. “Te kakauongo bon kaotan te tangira. … Butiia Tamam are i Karawa bwa e na buokiko ni kaotako n te bwai ae a taekinna kain am kiraati. Ngkana ko kakauongo raoi nakon aia rongorongo aika a taekinaki ao aika aki taekinaki, ko na kona n atai raoi riki kainnanoia, tabeaiangaia, ao bwaai ake a tangiri” (Reirei n ana Kawai te Tia Kamaiu, 34).