“Meei 23–29. Iotua 1–8; 23–24: ‘Kam na Korakora ao Kam na Ninikoria,’” Nakomai, Iriirai—Ibukin te Reirei n Tabati: O Tetemanti 2022 (2021)
“Meei 23–29. Iotua 1–8; 23–24,” Nakomai, Iriirai—Ibukin te Reirei n Tabati: 2022
Kamataata n tamnein Mote ngke e katabua Iotua, iroun Darrell Thomas
Meei 23–29
Iotua 1–8; 23–24
“Kam na Korakora ao Kam na Ninikoria”
Ngkai ko wareka Iotua 1–8 ao 23–24, iangoa te reirei ni “iangoia ni ngaina ao ni bong” (Iotua 1:8). Kabanea am iango nakon te wirikiriki are e roko. Aikai a na konaa n reke inanon te iango n angareirei ibukiia kain am kiraati.
Korei Am Namakin
Kaunga te Tibwatibwa
Kaoiia kain te kiraati bwa a na tibwaua te kibu n taeka man aia wareware n te wiiki aei are e kakorakora aia onimaki iroun Iesu Kristo. Te katooto, a bae n tia n iangoi kawai n ana mition Iotua are e kauringiia n taekan Iesu Kristo. Bukin tera ti kakaitau ibukin karaki inanon ana boki Iotua?
Reirei te Reirei
“Kam na korakora ao kam na ninikoria.”
-
E tuangaki Iotua, “Kam na korakora ao kam na ninikoria” tabeua te tai (taraa Te Tua Kaua 31:7, 23; Iotua 1:6–7, 9). Tao a na tekeraoi kain te kiraati man maroroakinan te bwai ae nanonna te Uea n te kibu n taeka aei. A kona ni karaoa aia kamatebwai iaon Iotua 1:1–9 ibukin reirei ake e angan Iotua bwa e na buokia ni korakora ao n ninikoria. A kona naba n tibwauai aia katooto iaoia aomata aika a ataia aika iai irouia katei aikai. E kanga Iotua ni kaota te korakora ao te ninikoria n ana boki Iotua? (te katooto, taraa mwakoro 3, 6, ao 8). A kona kain te kiraati n tibwauaia bwa a kanga ni kataia n riki ni korakora ao n ninikoria ibukin Kristo.
Ana taeka te Atua e kona ni kanakoraoa kawaira.
-
Ni kaungaiia kain te kiraati n oin aia kamatebwai ao n aia utu iaon booki aika tabu, kam kona ni wareka Iotua 1:8 n ami kiraati. Tera ae ti reiakinna man te kibu aei iaon arora ni kamatebwaia koroboki aika tabu? Tao a kona kain te kiraati n tibwaua te bwai ae a karaoia ni “iango” inanon booki aika tabu.” E kanga te Uea ni “kakabwaia kawaira” ao ni “katekeraoira” ngkai ti kamatebwaia Ana taeka?
Ana taeka te Atua e kona “ni karaoa [kawaira] bwa e na kakabwaiakaki” (Iotua 1:8).
Ti kona n rinanoi ana “kamiimi.” te Atua.
-
Tao a kona kain te kiraati ni kabwaia man rinanoan rongorongoia kain Iteraera n rinanon te Karaanga are i Ioretan. Ko kona n tibwaua te kiraati ni kakauoua ao kaoiia kurubu n tatabeua bwa a na taekina te karaki nakoia n tatabemania nako (ni kaungaiia bwa a na taraa Iotua 3 ngkana a kainnanoa te ibuobuoki n uringa te karaki). Ngkanne, n aia kiraati, a kona ni maroroakin kabwarabwara aika onoti ataakina irouiia. Tera ae ti reiakinna man te karaki aei ae kona ni buokiira n atai ana “kamimi” te Uea ni maiura? (te kibu 5). Tera “kamiimi” ae E a tia ni karaoi ibukira? Bukin tera e kakawaki bwa a na riai kain te roro teuana ma teuana n iai aia taneiai are e na reireiniia bwa “te Uea … e mwaaka”? (Iotua 4:24).
-
E ngae ngke ti bane ni kainnanoia ni karekea oin ara taneiai ni katean oin ara onimaki, n uringa te bwai are e a tia te Uea ni karaoia ibukiia ara bakatibu e bon kakawaki naba. Ni kaineti ma Iotua 4, tera ae a karaoia kain Iteraera ni buokiia te roro ae na roko n uringa te tai are a rinanon iai te Karaanga are Ioretan? (taraa Iotua 4:1–7). Tera ae ti karaoia ni kakoaua ae a na aki mwaninga ara atatai te roro are imwiina?
Te ongotaeka e uota mwaakan te Atua nakon maiu.
-
Te kamataata n te wiiki aei inanon Nakomai, Iriirai—Ibukiia n Tatabemaniia ao Utu iangoia ni kabotaua aia buaka kain Iteraera’ ni buakaniia tibun Kanaan inanon Iotua 6–8 ma ara buaka ni kaitaraa te kataaki. Ko kona n tuangiia kain te kiraati aia iango ke aia namakin ae iai irouia ngkai a wareki mwakoro aikai ma te kabotau aei n aia iango. Ke ko kona ni kaoti nakoia kiibu aika onoti ae a taraa ni kakawaki nakon ara buaka n totokoa te bure, ao a kona n taetae iaon bwaai aika a reirei kiibu aikanne iaon karekean mwaakan te Atua ni maiura. Tabeua mai ibuakon kiibu aikanne bon Iotua 6:1–5, 18, 20; 7:11–13.
“Ko na rineia n te bong aei, bwa antai ae ko na toro irouna.”
-
Tao e na ibuobuoki nakoia kain te kiraati ni kabongana Iotua 23–24 nakoia ngkana a iangoia bwa ngaia kain Iteraera n ongo iroun Iotua ngke e anga te reirei aei n tokin maiuna. Ko kona n anganiia tabeua kiibu bwa ana wareki ni karaurau ao tuangiia bwa a na tibwauaia man kiibu aikanne te bwai ae na kaungaiia bwa a na tiku n onimaki iroun te Uea. A kona naba n tibwauaia bwa a na kanga n tia ni karaoa te babaire bwa “antai [ae] ana toro irouna” (Iotua 24:15). Bukin tera ngkai a karaoa te babaire aei?
-
Ko kona ni kaoiia kain te kiraati bwa a na rinea te kibu n taeka man Iotua 23–24 are e kaungaiia bwa a na rineia ni beku ibukin te Atua ao karaoa te boutita ke te tamnei ma te kibu n taeka aei ni kateia n te mweenga ke n te kanakobwana.
Kanakoraoan Ara Anga reirei
Te rikirake n te maiu n tamnei e riki inanon te mweenga. A kainnanoia kain am kiraati kainnanoan karekean oin aia taneiai n te tamnei itinanikun te kiraati bwa ko aonga n tiku ni matoatoa n te maiu n tamnei. Kakaai kawai aika ko na kabongana te tai ae uarereke ma ngaiia ni kaungaiia bwa a na kakaea kakorakorakiia n tamnei ni koroboki aika tabu ni mweengaia—n tatabemaniia nako ma aia utu. (Taraa Te Reirei n Ana Kawai te Uea, 18.)